Si Moroni, Si Inay, at Isang Aral sa Buhay Ko

Ni Louisa Hoe

Ang awtor ay naninirahan sa Singapore.

Ang aral na ito mula sa Aklat ni Mormon ay nagpaalam sa akin na hindi ako kailanman nag-iisa sa espirituwal.

Detalye mula sa Moroni Burying the Plates, ni Gary Ernest Smith

Maraming nagbago para sa akin noong mag-17 anyos ako. Kalilipat ko lang ng bagong eskuwelahan at nasa ikatlong taon na ako ng seminary. Hindi lamang iyan, may bago rin akong guro sa seminary: ang nanay ko.

Nabanggit ko ba na ako lang ang estudyante niya? Dahil isang oras ang biyahe sa tren papunta sa eskuwela mula sa tirahan namin, nagpasiya si Inay na turuan ako ng early-morning seminary sa bahay para hindi ako mahuli sa eskuwela. Mapalad akong maturuan niya araw-araw, pero medyo nakakanerbiyos din. Kailangan ko talagang magtuon habang nagtuturo siya, na mahirap gawin lalo na kapag alas-5:30 ng umaga.

Noong pinag-aaralan namin ang Aklat ni Mormon, nakarating kami sa aklat ni Moroni, isang propeta na talagang hinahangaan ko. Gayunman, noon ko pa ito itinatanong: Bakit nag-iisa si Moroni? Bakit hindi nagpadala ang Ama sa Langit ng taong makakasama niya? Bakit hindi siya nagreklamo nang iwanan siyang mag-isa ng Panginoon para tapusin ang Aklat ni Mormon?

Ipinaliwanag ng aking ina na dahil sa kanyang kabutihan at pananampalataya sa Ama sa Langit, alam ni Moroni na hindi siya nag-iisa. Naroon ang Ama sa Langit at si Jesucristo para tulungan siyang tapusin ang Aklat ni Mormon. Natanto ko na hindi kailangan ni Moroni na may makasama roon dahil alam niya na may isang tao na espirituwal na naroon, na nagbabantay sa kanya. Alam niya na hindi lalayo sa kanyang tabi ang Ama sa Langit kailanman.

Malaki ang naging epekto niyon sa akin. Alam ko na ngayon na tuwing maiisip ko na nag-iisa ako, hindi ako espirituwal na nag-iisa dahil kasama ko ang Espiritu Santo, na tumutulong sa akin na mas mapalapit sa aking Ama sa Langit at kay Jesucristo. Alam ko na hangga’t nananampalataya at nagtitiwala ako sa Panginoon, hindi ako mag-iisa kailanman.

Ang aral na ito ay nakaapekto sa aking pananampalataya at patotoo sa Ama sa Langit at kay Jesucristo. Bagama’t kinabahan ako noon na mag-seminary sa bahay, nagpapasalamat ako ngayon dahil nagbigay ito sa akin ng magagandang karanasan sa pagkatuto sa piling ng aking ina.

Tahanan: Ang Workshop sa Pag-aaral ng Ebanghelyo

“Ang isang lugar na gustung-gusto nating mapuspos ng liwanag at katotohanan ay ang sarili nating tahanan. … Ang mga pamilya ang workshop ng Panginoon sa lupa upang tulungan tayong matutuhan at ipamuhay ang ebanghelyo. Napunta tayo sa ating pamilya na may sagradong tungkuling tumulong na espirituwal na palakasin ang isa’t isa.

“Ang matatag na walang-hanggang mga pamilya at mga tahanang puspos ng Espiritu ay hindi basta-basta nangyayari. Kailangan dito ang malaking pagsisikap, kailangan ng panahon, at dapat gawin ng bawat miyembro ng pamilya ang kanyang tungkulin. Kakaiba ang bawat tahanan, ngunit ang bawat tahanan na mayroong kahit isang indibiduwal na naghahangad ng katotohanan ay makagagawa ng kaibhan.”

Cheryl A. Esplin, unang tagapayo sa Primary general presidency, “Punuin ang Ating mga Tahanan ng Liwanag at Katotohanan,” Liahona, Mayo 2015, 8.

Mga Ideya para sa Pag-aaral at Pamumuhay ng Ebanghelyo sa Tahanan

Itala ang mga espirituwal na paramdam sa inyo. Ang pagsulat sa mga nadarama ninyo ay makakatulong sa inyo na mas magkaroon ng espirituwal na kamalayan, kabilang na ang nadama ninyo matapos magdasal, magbasa ng mga banal na kasulatan, o makibahagi sa family home evening.

Ibahagi ang natutuhan ninyo mula sa seminary, sa simbahan, sa pag-aaral ninyo ng mga banal na kasulatan, o kahit ang ideya mula sa inyong pang-araw-araw na buhay. Ang pagbabahagi ng mga ideya ay nagpapalakas sa iba.

Maghanda para sa family home evening. Halimbawa, maaari ninyong itanong sa mga magulang ninyo kung may gusto silang ipagawa sa inyo, o pagkasunduan ninyo sa pamilya na magbasa ang lahat ng isang mensahe sa pangkalahatang kumperensya o isang kabanata sa banal na kasulatan at sama-samang talakayin ito sa susunod ninyong home evening.

Matuto mula sa pang-araw-araw na buhay. Sa anong mga sitwasyon kayo kailangang manampalataya? Ano ang mga pagkakataon ninyong tumupad ng mga tipan? Paano nagpapatotoo kay Cristo ang mga bagay sa paligid ninyo?

Ano ang Itinuturo ng mga Banal na Kasulatan tungkol sa Pag-aaral ng Ebanghelyo?

“Ihihilig mo ang iyong puso sa pagunawa.” —Mga Kawikaan 2:2

“Ang Espiritu ng katotohanan … ay papatnubayan … kayo sa buong katotohanan” —Juan 16:13

“Matuto ng karunungan sa iyong kabataan; sundin ang mga utos ng Diyos.” —Alma 37:35

“Maghangad na matuto, maging sa pamamagitan ng pag-aaral at gayon din sa pamamagitan ng pananampalataya.” —Doktrina at mga Tipan 88:118