“Leksyon 2 Materyal sa Pagpangandam sa Klase: Ang Unang Panan-awon,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 2 Materyal sa Pagpangandam sa Klase,” Materyal sa Magtutudlo sa Mga Pundasyon sa Pagpahiuli
Leksyon 2 Materyal sa Pagpangandam sa Klase
Ang Unang Panan-awon
Si Presidente Joseph F. Smith mihulagway sa Unang Panan-awon ni Joseph Smith isip “ang pinakamahinungdanong panghitabo … sukad sa pagkabanhaw sa Anak sa Dios” (Mga Pagtulun-an sa mga Presidente sa Simbahan: Joseph F. Smith [1998], 16). Samtang magtuon ka sa Unang Panan-awon, hunahunaa ang mahitungod sa kaimportante niining sagradong panghitabo ug ang epekto niini sa imong kinabuhi ug sa kalibutan.
Seksyon 1
Unsang mga kamatuoran ang atong makat-unan gikan sa Unang Panan-awon ni Joseph Smith?
Naghisgot sa Unang Panan-awon ni Joseph Smith, si Elder Richard J. Maynes sa Seventy mitudlo:
Usa ka talagsaon ingon man makapalamdag nga kasinatian nga moanalisar kon unsay tinud-anay natong nakat-unan gikan niining sagrado, makapadasig nga kasinatian … kabahin sa mahangturong kinaiyahan sa atong Langitnong Amahan ug sa Iyang Anak, si Jesukristo; ang katinuod ni Satanas; ang panlimbasog tali sa maayo ug dautan, ingon man sa ubang importanting mga aspeto sa mahinungdanong plano sa kaluwasan. …
Ang Unang Panan-awon ni Joseph Smith maoy yawe nga moabli sa daghang mga kamatuoran nga natago sulod sa daghang mga siglo. Dili nato kalimtan o ibaliwala ang daghang bililhon nga mga kamatuoran nga atong nakat-unan gikan sa Unang Panan-awon. (Richard J. Maynes, “Ang Unang Panan-awon: Yawe sa Kamatuoran,” Liahona, Hunyo 2017, 30, 31)
Si Joseph Smith nagdako sa usa ka panahon sa dakong kalibug sa relihiyon. Ang nagkalain-laing mga Simbahan nga Kristiyano niini nga dapit nagkompetensya sa pagkuha og mga kinabig ug kusganong nakiglalis sa usag usa kabahin sa doktrina ug relihiyoso nga mga binuhatan. Samtang magtuon ka sa mosunod nga istorya sa Unang Panan-awon nga narekord niadtong 1838 ug karon nalakip sa sumbanan nga mga basahon isip ang Joseph Smith—Kasaysayan, timan-i ang imong mga nasabtan ug markahi ang mga kamatuoran sa ebanghelyo nga personal nga makahuluganon kanimo.
Pagtuon agi og Pagpangandam alang sa Klase
Basaha ang Joseph Smith—Kasaysayan 1:8, 11–19.
Irekord ang Inyong mga Hunahuna
Irekord ang mga kamatuoran nga imong nakita gikan sa 1838 nga istorya ni Joseph Smith sa iyang Unang Panan-awon diha sa usa ka journal o sa luna nga gigahin sa ubos. Isulat usab ngano kaha nga kini nga mga kamatuoran importante nga masabtan. Tambong sa klase nga andam nga mopakigbahin unsay imong gisulat.
Seksyon 2
Sa unsa nga paagi nga ang daghang mga istorya sa Unang Panan-awon ni Joseph Smith makahatag og mas dako nga panabut niining sagrado nga hitabo?
Sinulat ni Joseph Smith gikan sa iyang 1832 nga istorya sa Unang Panan-awon.
Ang 1838 nga istorya sa Unang Panan-awon nga narekord sa Joseph Smith—Kasaysayan gidiktar ni Joseph atol sa panahon sa oposisyon sa “pagbutang sa tanan nga mga nagpakisayud mahitungod sa kamatuoran nga makahibalo sa tinuod nga mga hitabo” (Joseph Smith—Kasaysayan 1:1). Mao kini ang labing nailhan nga istorya sa Unang Panan-awon ug narekord isip kabahin sa opisyal nga kasaysayan ni Joseph Smith sa Simbahan. Kini opisyal nga gidawat nga kasulatan uban sa Perlas nga Labing Bililhon niadtong 1880 ug nahimong kabahin sa sumbanan nga mga kasulatan sa Simbahan nianang higayuna.
Agig dugang sa 1838 nga istorya, si Propeta Joseph Smith mirekord o midiktar og laing tulo ka istorya sa iyang kasinatian. Adunay lima usab ka segunda mano nga mga istorya sa Unang Panan-awon nga narekord sa mga kaubanan ni Joseph Smith.
Ang nagkalain-laing mga istorya sa Unang Panan-awon nagsugilon og makanunayon nga istorya, bisan kon managlahi ang empasis ug detalye niini. Ang mga tigsaysay naglaum nga kon ang indibidwal mosugilon og usa ka kasinatian sa daghang mga sitwasyon sa lain-laing tigpaminaw sa daghang katuigan, ang matag istorya mohatag og gibug-aton sa lain-laing mga aspeto sa kasinatian ug maglakip og lahi nga mga detalye. Sa pagkatinuod, ang kalainan nga susama sa mga istorya sa Unang Panan-awon anaa sa nagkalain-laing mga saysay sa kasulatan kabahin sa panan-awon ni Pablo diha sa dalan sa Damasco ug sa kasinatian sa mga Apostoles didto sa Bukid sa Transpigurasyon. Apan bisan pa sa mga kalainan, ang pagkaparehas nagpabilin diha sa tanang mga istorya sa Unang Panan-awon. Ang pipila sayop nga nakiglalis nga ang bisan unsang kausaban diha sa pagsaysay og balik sa istorya usa ka ebidensya nga kini bakak. Hinoon, ang luho nga rekord sa kasaysayan nagtugot kanato nga makat-on pa mahitungod niining talagsaong hitabo kay sa atong mahimo kon wala kaayo kini marekord. (“First Vision Accounts,” Gospel Topics, topics.ChurchofJesusChrist.org)
Samtang magbasa ka sa mosunod nga mga kinutlo gikan sa dugang nga personal nga mga istorya sa Unang Panan-awon ni Joseph Smith, ikonsiderar ang pagmarka sa mga detalye ug mga kamatuoran nga importante kanimo. Mahimo usab nimo nga irekord ang imong bisan unsa nga mga pangutana ug dad-a kini sa klase.
Pahibalo: Ang kompleto nga rekord sa matag istorya anaa sa “Joseph Smith’s Accounts of the First Vision” sa josephsmithpapers.org.
Ang 1832 nga Istorya
Kini nga istorya gisulat sa sinugdanan sa letter book ni Joseph Smith ug mao lamang ang istorya nga naglakip sa porsyon sa iyang kaugalingong sinulat. Ang pipila niini sinulat usab sa tigsulat ni Joseph.
“Sa pag-edad og mga dose, ang akong hunahuna sa tinuoray nga nadani sa tanang importante nga mga pagpakabana alang sa akong imortal nga kalag. …
… Ang akong hunahuna nahasul pag-ayo, kay ako mibati nga sad-an tungod sa akong mga sala. … Akong gibati nga magbangutan alang sa akong kaugalingong mga sala ug alang sa mga sala sa kalibutan. …
Busa, nag-ampo ako ngadto sa Ginoo alang sa kalooy, kay walay lain nga akong kaduolan ug kapangayoan og kalooy. Ug ang Ginoo nakadungog sa akong pag-ampo sa kamingawan, ug samtang nagtawag sa Ginoo, sa nag-edad ako og dise-sais anyos, usa ka dako nga gilis sa kahayag labaw sa kahayag sa adlaw sa udtong tutok mikanaog gikan sa ibabaw ug midapat kanako. Napuno ako sa espiritu sa Dios, ug ang Ginoo miabli sa mga langit diri kanako ug akong nakita ang Ginoo.
Ug siya namulong ngari kanako, nag-ingon, “Joseph, akong anak, ang imong mga sala gipasaylo na. Lakaw, magalakaw kamo sa akong kabalaoran, ug pagabantayan ninyo ang akong mga sugo. Tan-awa, Ako mao ang Ginoong Dios sa himaya. Ako gilansang sa krus alang sa kalibutan, aron kadtong tanan nga motuo sa akong ngalan mahimo nga makaangkon og kinabuhing dayon. Tan-awa, ang kalibutan naglunang sa sala niining higayuna, ug walay usa ang nagbuhat og maayo, wala, bisan usa. Mipalayo sila sa ebanghelyo ug wala magtuman sa akong mga sugo. Sila nagpaduol ngari kanako uban sa ilang mga ngabil, apan ang ilang mga kasingkasing layo gikan kanako. Ug ang akong kasuko napukaw batok sa mga lumulupyo sa yuta, sa pagbisita kanila sumala sa ilang pagkadili diosnon ug sa pagpahinabo diin gipamulong pinaagi sa ba-ba sa mga propeta ug mga apostoles. Tan-awa ug sud-onga, moanha na ako sa dili madugay, ingon nga nahisulat mahitungod kanako, diha sa mga panganod sa langit, gisul-uban sa gahum ug dako nga himaya sa akong Amahan.”
Ang akong kalag napuno sa gugma, ug sulod sa daghang mga adlaw nagmaya ako uban sa hingpit nga kalipay. Ang Ginoo nag-uban kanako, apan ako wala makakita og usa nga motuo sa langitnong panan-awon. Bisan pa niana, akong gipamalandungan kini nga mga butang diha sa akong kasingkasing.
Ang 1835 nga Istorya
Kini nga istorya mao ang rekord ni Joseph nga naghulagway sa iyang Unang Panan-awon ngadto sa usa ka tawo nga mibisita sa iyang panimalay. Kini girekord diha sa journal ni Joseph pinaagi sa iyang tigsulat.
Nangamuyo ako sa Ginoo sa kusganon nga pag-ampo. Usa ka dako nga gilis sa kalayo mipakita ibabaw sa akong ulo. Kini mitugdon diha kanako ug mipuno kanako sa dili mahulagway nga kalipay. Usa ka personahe mipakita taliwala niining dako nga gilis sa kalayo, nga mikatap sa palibut apan walay bisan unsa nga nasunog. Laing personahe dayon mipakita, sama sa nahauna. Siya miingon kanako, “Ang imong mga sala gipasaylo na.” Mipamatuod siya kanako nga si Jesukristo mao ang anak sa Dios. Ug nakakita ako og daghang mga anghel niini nga panan-awon. Ako nag-edad og mga katorse anyos sa dihang ako nakadawat niining una nga komunikasyon.
Ang 1842 nga Istorya
Kini nga istorya nagagikan sa usa ka sulat nga gisulat sa pagtubag sa mga pangutana gikan sa editor sa pamantalaan sa Chicago nga ginganlan og John Wentworth.
Miadto ko sa sekreto nga dapit sa kakahoyan ug nagsugod sa pagtawag sa Ginoo. Samtang mainiton akong nangamuyo, ang akong hunahuna gidala palayo gikan sa mga butang nga naglibut kanako, ug naputos ako sa usa ka langitnong panan-awon ug nakakita og duha ka mahimayaong mga personahe kinsa sama gayud og hitsura sa usag usa ug panagway, gialirongan sa usa ka kahayag nga mibuntog sa adlaw sa udtong tutok. Sila miingon kanako nga ang tanan nga relihiyosong mga denominasyon nagtuo sa sayop nga mga doktrina, ug nga wala niini ang giila sa Dios isip iyang simbahan ug gingharian. Ug ako piho nga gisugo nga “dili monunot kanila,” ug sa samang higayon nakadawat og saad nga ang kahingpitan sa ebanghelyo ipahibalo kanako sa umaabut nga panahon.
Pamalandong agi og Pagpangandam alang sa Klase
Sa unsa nga paagi nga kining dugang nga mga istorya makadugang sa imong pagsabut ug pagpasalamat sa Unang Panan-awon ni Joseph Smith? Unsa nga dugang nga mga kamatuoran ang imong ikadugang sa imong lista gikan sa seksyon 1 niini nga materyal? Sa unsang paagi nga ang imong pagpamatuod niining sagrado nga hitabo nakaapekto sa imong kinabuhi?