ImiBhalo yeLukholo

Entfwasahlobo ya1842, umPhrofethi Joseph Smith watfumela incwadzi kuJohn Wentworth, lobekangumhleli weliphephandzaba lelibitwa ngeChicago Democrat. Lencwadzi le beyicuketse umlandvo wetehlakalo letinyenti temlandvo weLibandla lekucala. Lombhalo nawo wawucuketse 13 wemibiko lochaza tinkholelo Talongcwele Wetinsuku Tekugcina. Leti tiye tatiwa ngekutsi yimiBhalo yeLukholo, leniketiwe ngentasi.

ImiBhalo yeLukholo yimfundziso lesemtsetfweni yeLibandla futsi yentiwe yabangcwele njengencenye yembhalo longcwele wetinsuku tekugcina. Yimibiko lecacako yenkholo lesita emalunga acondzisise tinkholelo letisisekelo teLibandla aphindze achaze leti tinkholelo kulabanye. Ayisiko, noko, sifinyeto lesiphelele semfundziso yeLibandla. Ngebaphrofethi labaphilako, leLibandla liholwa sembulo lesichubekako kanye nelugcozi.

1. Sikholelwa ku Nkulunkulu, Babe waPhakadze, nakuyo iNdvodzana Yakhe, Jesu Khristu, nakuMoya loNgcwele.

2. Sikholelwa kutsi bantfu batawujeziswa ngetono tabo lucobo, hhayi ngesiphambeko sa-Adamu.

3. Sikholelwa kutsi ngeNhlawulo yaKhristu, bonkhe bantfu bangasindziswa, ngekulalela imitsetfo netimiso teliVangeli.

4. Sikholelwa kutsi imigomo netimiso tekucala teliVangeli nguleta: kwekucala, luKholo eNkhosini Jesu Khristu; kwesibili, kuPhendvuka, kwesitsatfu, kuBhajatiswa ngekucwiliswa kute kutsetselelwe tono; kwesine kuBekwa tandla kute utfole sipho saMoya loNgwcele.

5. Sikholelwa kutsi umuntfu kufanele abitwe ngekukaNkulunkulu, ngesiphrofetho, nangekubekwa tandla ngulabo labasegunyeni, kutsi ashumayele liVangeli futsi ente timiso talo.

6. Sikholelwa eluhlelweni lolufanako nalolo lwalukhona eBandleni laseMandvulo, loku, baphostoli, baphrofethi, bashumayeli, bafundzisi, bavangeli, njalo njalo.

7. Sikholelwa esiphiweni setilimi, sekuphrofetha, sekwembulela, semibono, sekuphilisa, sekuhumusha tilimi, njalonjalo.

8. Sikholelwa kutsi liBhayibheli lilivi laNkulunkulu kangangobe lihunyushwe ngalokungiko; siyakholelwa futsi kutsi iNcwadzi yaMormon ilivi laNkulunkulu.

9. Siyakholelwa kuko konkhe loko Nkulunkulu lasakwembulile, konkhe loko Yena lakwembulako manje, futsi sikholelwa kutsi Yena usatokwembula tintfo letiningi letinkhulu naletibalulekile letiphatselene neMbuso waNkulunkulu.

10. Sikholelwa ekugcogceni kwangempela kwaka-Israyeli nasekubuyiselweni kweTivana letiLishumi; kutsi Siyoni (iJerusalema leNsha) itokwakhiwa ngetulu kwelivekati leMelika; kutsi Khristu utobusa Yena lucobo emhlabeni; futsi, nekutsi umhlaba utokwentiwa kabusha uphindze ube nenkhatimulo lefana neparadesi.

11. Sati kutsi lilungelo lekukhonta Nkulunkulu uMninimandla Onkhe ngekutjelwa bonembheza betfu lingeletfu, futsi sivumela bonkhe bantfu kutsi babe nelilungelo lelifanako, bangakhonta ngendlela labatsandza ngayo, nalapho batsandza khona, noma loko labakutsandzako.

12. Sikholelwa ekubeni ngaphansi kwemakhosi, bengameli, babusi, futsi nabomantji, ekutfobeleni, ekuhlonipheni, nasekusekeleni umtsetfo.

13. Sikholelwa ekubeni sitsembeke, ekubeni neliciniso, ekubeni msulwa, ekubeni mnene, ekulungeni, nasekwenteni lokuhle kubo bonkhe banftu; impela, singasho kutsi silandzela umyalo waPawula—Sikholelwa tonkhe tintfo, sitsemba tintfo tonkhe, sesibeketelele tintfo letiningi, futsi sitsemba kutsi sitokwati kubeketelela tonkhe tintfo. Uma kukhona noma yini lelungile, letsandzekako, noma lenebuntfu, noma lencomekako, sitama kutitfola leto tintfo.