Tinsita Letisisekelo
Sehluko 10: ImiBhalo Lengcwele

Sehluko 10

ImiBhalo Lengcwele

Babe wetfu loseZulwini usinike tincwadzi letingcwele letine kusisita. Uyawati yini emagama aleti tincwadzi letine?

Babe wetfu loseZulwini Ukhombisa Lutsandvo Lwakhe Kitsi Ngekusinika ImiBhalo Lengcwele

Babe wetfu loseZulwini utjele baphrofethi kutsi babhale letintfo lafuna kutsi tsine sitati. Lena mibhalo ibitwa ngekutsi yimibhalo lengcwele. Ingcwele kakhulu ngoba letintfo letikuyo tibuya kuBabe wetfu loseZulwini. Tinkhulu kakhulu futsi tibaluleke kakhulu kwendlula noma ngayini umuntfu langake ayibhale ngaphandle kwelusito lwaBabe wetfu loseZulwini.

Babe wetfu loseZulwini usinika lena mibhalo kusisita. Ngekuyifundza singafundza ngelisu laBabe wetfu loseZulwini ngatsi. Singafundza ngemphilo yetfu Naye ngaphambi kwekutsi sitalwe. Singafundza ngaJesu Khristu. Singafundza ngetintfo lekumele sitente kute sijabule nekutsi sifane naBabe wetfu loseZulwini.

Lena mibhalo iyasisita kutsi sifundze kutsi Babe wetfu loseZulwini uyasitsandza futsi ufuna sente tintfo letilungile. Isitjela ngalabanye bantfu labafundza ngaBabe wetfu loseZulwini. Isitjela kutsi utsandza bonkhe bantfu. Siyafundza kulemibhalo kutsi uma bantfu bakhetsa kulalela Babe wetfu loseZulwini, bayajabula, futsi uyabasita. Uma bangamlaleli, abajabuli futsi abalutfoli lusito Lwakhe.

Kucocisana

  • Yini imibhalo lengcwele?

  • Yini lesingayifundza emibhalweni lengcwele?

Tine Tincwadzi TemiBhalo Lengcwele Lesinato

Letincwadzi letine temibhalo lengcwele liBhayibheli, iNcwadzi yaMormon, iMfundziso neTivumelwano, kanye neLigugu leLinani Lelikhulu. Tonkhe ticuketse emavi aBabe wetfu loseZulwini naJesu Khristu. Tonkhe tifundzisa ngetimfundziso letiliciniso taBabe wetfu loseZulwini naJesu Khristu.

LiBhayibheli

LiBhayibheli licuketse emavi aBabe wetfu loseZulwini lawanika bantfu kusukela ngesikhatsi sa-Adamu kuya ngesikhatsi BaPhostoli* baJesu basaphila. Lamavi lawa etfu futsi kutsi siwafundze siphindze siwalandzele lamuhla. LiBhayibheli lihlukaniswe tincenye letimbili. LiThestamente leLidzala neliThestamente leLisha.

LiThestamente leLidzala licala ngendzaba yekutsi Babe wetfu loseZulwini wawudala kanjani umhlaba nekutsi wamtfumela kanjani wekucala wesilisa newesifazane emhlabeni. LiThestamente leLidzala licuketse tindzaba tebaphrofethi labanyenti, njenga Nowa, Abrahama, Israyeli, Mosi, Isaya, na-Elija. Letindzaba tilandzisa ngekutsi Babe wetfu loseZulwini wabasita njani bantfu nabenta loko lokulungile. Tiphindze tichaze kutsi uma labantfu bangabalaleli baphrofethi futsi bangalaleli timfundziso taBabe wetfu loseZulwini, bebangalutfoli lusito Lwakhe.

LiThestamente leLisha yincenye yesibili yeliBhayibheli. Lilandzisa ngendzaba yekutalwa nemphilo yaJesu emhlabeni. Licuketse letinye tetimfundziso letinhle taJesu netindzaba letinyenti ngelutsandvo Lwakhe kubantfu nekutsi wabasita kanjani. Lichaza ngekutsi wababita kanjani baPhostoli phakatsi kwebalandzeli Bakhe nekutsi wabafundzisa njani laba baPhostoli nekubanika ligunya lwekenta umsebenti Wakhe. Balandzeli Bakhe bebati kutsi uyiNkhosi. Emvakwesikhatsi babhali bambita ngeNkhosi Jesu Khristu.

LiThestamente leLisha lilandzisa ngekutsi Jesu wahlupheka waphindze wabafela njani bonkhe bantfu. LiThestamente leLisha ligcina ngetindzaba tekutsi BaPhostoli Bakhe babafundzisa njani labanye Ngaye, tintfo letitowenteka ngaphambi kwekutsi Jesu abuye futsi, nesiphetfo semhlaba.

Bantfu balamhlabeni abatange babemukele baPhostoli kodvwa babahleka, babahlukubeta baphindze bababulala. Uma bonkhe baPhostoli nebaphrofethi sebafile, kwaba bete lowasala kubhala emavi aBabe wetfu loseZulwini.

LiBhayibheli licuketse emavi aBabe wetfu loseZulwini njengoba lihunyushwe ngendlela lefanele.

INcwadzi yaMormon

INcwadzi yaMormon icuketse timfundziso taBabe wetfu loseZulwini kubantfu bakhe labebahlala emavenikati laseMelika. Tincenye talombhalo tabhalwa emnyakeni leyi 2,000 ngaphambi kwekutalwa kwaJesu Khristu. Lenye incenye icala eminyakeni lecishe ibe ngu600 ngaphambi kwaJesu Khristu iphindze iphelele eminyakeni leyi 400 emvakwekutalwa kwakhe. Lencwadzi le icuketse timfundziso letimcoka taBabe wetfu loseZulwini. INcwadzi yaMormon yabhalwa kusita bantfu ngalesa sikhatsi nanyalo kutsi bati kutsi Jesu nguMsindzisi wemhlaba wonkhe.

Lokunyenti kweNcwadzi yaMormon kulandzisa ngesicumbi sebantfu labebahamba besuka eJerusalema baya evenikati leMelika. Benta luhambo lwabo eminyakeni lengu 600 ngaphambi kwekutalwa kwaJesu Khristu. Bebachutjwa ngumphrofethi lolibito lakhe bekunguLehi nendvodzana Yakhe Nefi. Babili bomnakabo Nefi bebakhohlakele futsi bebangamlaleli babe wabo. Bebabitwa ngekutsi nguLamani naLemuweli.

Uma Lehi afa, emalunga emndeni wakhe ehlukana emacembu lamabili. Labo lebebalandzela Nefi bebabitwa ngemaNefi. Labo bebalandzela Lamani bebabitwa ngemaLamani. Lamacembu lamancane lawa akhula aba tive letinkhulu. EmaNefi nemaLamani balwa timphi letinyenti babhekane bodvwa. Babe wetfu loseZulwini wabusisa waphindze wavikela labo bantfu labebalalela imiyaleto Yakhe.

Babe wetfu loseZulwini wakhetsa baphrofethi labanyenti kutsi bafundzise baphindze bahole bantfu Bakhe eMelika. Letindzaba tetimphilo tabo netimfundziso tabo titfolakala eNcwadzini yaMormon. Labanye bebaphrofethi labamcoka kakhulu kulencwadzi boNefi, Jakobe, Bhenjamini, Alima, Mormon, naMoroni. Onkhe lamadvodza lawa abhala umlandvo ngebantfu baBabe wetfu loseZulwini eMelika. Mormon watsatsa lena mibhalo leyabhalwa baphrofethi wayibeka kanyekanye kwaba yincwadzi yinye.

Baphrofethi batjela bantfu kutsi Jesu utawukuta atobabona eveni labo emvakwekube acedze umsebenti wakhe eJerusalema. Jesu vele wavela kulabo bantfu labalungile eMelika. Wabafundzisa livangeli* Lakhe netintfo lekumele batente kute babuyele kuBabe wetfu loseZulwini emvakwekufa kwabo.

Bantfu bamkholelwa Jesu baphindze bamlalela iminyaka leminyenti. Bebalungile futsi bebahlala ngekuthula. Babese bacala kukhohlwa ngaJesu. Bayekela kulalela baphrofethi babo. Benta tintfo letimbi kuphela.

Mormon, longumunye webaphrofethi bekugcina kulencwadzi, wanika umlandvo webantfu bakhe, emaNefi, kundvodzana yakhe Moroni. Emvakwekube bonkhe bantfu bakhe babulawe emphini lenkhulu nemaLamani, Moroni wangcwaba egcumeni umlandvo baphrofethi labebawubhalile ngebantfu babo.

Lomlandvo wahlala ungcwatjiwe kuleligcuma emakhulu eminyaka. Ekugcineni, nga 1820, Babe wetfu loseZulwini wakhetsa Joseph Smith kuba ngumphrofethi Wakhe waphindze watfuma Moroni, umuntfu lowavuswa,* kukhombisa Joseph kutsi ngukuphi lapho lomlandvo bewungcwatjwe khona. Joseph wahumusha lomlandvo kuya eSingisini. Watiwa namuhla kutsi yiNcwadzi yaMormon.

INcwadzi yaMormon yabhalwa kukhombisa kutsi Babe wetfu loseZulwini uyati futsi uyabatsandza bantfu Bakhe mhlaba wonkhe. INcwadzi yaMormon ifundzisa kutsi Jesu nguMsindzisi wabo bonkhe bantfu emhlabeni nekutsi yiNdvodzana yaBabe wetfu loseZulwini.

IMfundziso neTivumelwano

IMfundziso neTivumelwano ticuketse livi laBabe wetfu loseZulwini kubantfu betikhatsi tamanje. Ticuketse imiyaleto yekuhlela Libandla laJesu Khristu. Tichaza imisebenti yemalunga nebaholi. Ticuketse timfundziso letalahleka sikhatsi lesidze kubantfu bemhlaba. Tichaza letinye timfundziso teliBhayibheli.

IMfundziso neTivumelwano tinemilayeto yetfu tsine lesiphila lamuhla. Tiyasecwayisa ngetintfo letitawukuta uma singamlaleli Babe wetfu loseZulwini. Tiphindze tisitjele ngetintfo letingummangaliso Babe wetfu loseZulwini lasilungisele tona uma simlalela.

Ligugu leLinani Lelikhulu

Ligugu leLinani lelikhulu licuketse incwadzi yaMosi, incwadzi ya-Abrahama, naleminye imibhalo lephefumulelwe yaJoseph Smith.

Incwadzi yaMosi icuketse imibono Babe wetfu loseZulwini layinika Mosi. Ichaza ngeNdalo yemhlaba. Icuketse timfundziso letalahleka eBhayibhelini.

Incwadzi ya-Abrahama ilandzisa ngeNdalo yemhlaba nangaBabe wetfu loseZulwini nemandla Akhe.

Imibhalo yaJoseph Smith ilandzisa ngekutsi Babe wetfu loseZulwini wambita kanjani kutsi abe ngumphrofethi. Ifaka ekhatsi leminye imihumusho yakhe ngeliBhayibheli nemavi lachaza ngaletinye tinkholelo teLibandla laJesu Khristu Lalabangcwele Betinsuku Tekugcina. Lamavi abitwa ngekutsi yimiBhalo yeLukholo.

Umphrofethi waBabe wetfu loseZulwini lophilako lamuhla naye ubhala tintfo Babe wetfu loseZulwini lamtjela tona. Babe wetfu loseZulwini wente kwatiwa tintfo letinyenti letinkhulu naletimcoka kubaphrofethi ngaphambilini. Usachubeka nekwenta kwatiwe tintfo letinkhulu naletimcoka kubaphrofethi Bakhe lamuhla.

Kucocisana

  • Ngutiphi tincwadzi letine temibhalo lengcwele lesinato namuhla?

  • Imcoka ngani ngayinye yaletincwadzi kitsi?

Babe wetfu loseZulwini Utawusisita Uma Sifundza ImiBhalo Lengcwele

Emibhalweni lengcwele, Babe wetfu loseZulwini usifundzisa ngelisu Lakhe lekutsi sibuyele Kuye. Ngekufundza lemibhalo lengcwele singafundza letintfo lafuna sitati futsi sitente. Uma singayifundzi imibhalo lengcwele, ngeke sati kutsi yini lekuyo. Ngeke sati kutsi Babe wetfu loseZulwini ufuna senteni.

Kudzingeka sifundze imibhalo lengcwele onkhe malanga. Kumele futsi kutsi sifundzele imindeni yetfu imibhalo lengcwele. Kumele sisite imindeni yetfu icondzisise imibhalo lengcwele. Kumele sifundzise bantfwana betfu kutsi leti tincwadzi letingcwele letibuya kuBabe wetfu loseZulwini. Kumele sibasite bati kutsi yini lekuletincwadzi baphindze babonge ngato.

Kucocisana

  • Babe wetfu loseZulwini utawusisita kanjani uma sifundza lemibhalo lengcwele?