Jesu Khristu wagcoba baPhostoli.
Sehluko 18
Libandla Jesu laliHlela
Jesu wahlela libandla uma asesemhlabeni. Belibitwa ngekutsi yini? Ngubani lobekahola leLibandla Lakhe?
Jesu bekayiNhloko yeLibandla laliHlela
Uma Jesu asesemhlabeni, wahlela libandla. Lelibandla belibitwa ngeLibandla laJesu Khristu. Lamalunga eLibandla laJesu bekabitwa ngaLabangcwele. Jesu lucobo bekayinhloko yaleLibandla. Bekalihola. Wakhetsa emadvodza lalishumi nakubili kutsi amsite kuhola leLibandla. Bebabitwa ngebaPhostoli. Laba baPhostoli bebaphindze babe baphrofethi. Jesu wabeka tandla Takhe etinhloko tabo waphindze wanika ngamunye wabo buphristi. Wabanika kutsi bente umsebenti Wakhe. Laba baPhostoli nebaphrofethi bebabaholi eBandleni laJesu Khristu.
EBandleni laJesu Khristu, emadvodza lemukele buphristi abeka tandla tawo etinhloko talamanye emadvodza lalungile abanike buphristi. Ngulena kuphela indlela buphristi lobungendluliselwa ngayo kusuka endvodzeni yinye kuya kulenye. Buphristi ngeke sebutsengwe.
Kucocisana
-
Bekungubani umholi weLibandla laJesu Khristu?
-
Bekabitwa ngabobani lamadvodza lasita Jesu?
Libandla laJesu Khristu Lachubeka Emhlabeni emvakwekutsi Abuyele eZulwini
Emvakwekube Jesu abuyele ezulwini, Libandla Lakhe lachubeka emhlabeni. Beliholwa baPhostoli labalishumi nakubili. Uma umPhostoli afa, Jesu wakhetsa lenye indvodza wayifaka esikhundleni sakhe. NgaMoya loNgcwele, Jesu wakwenta kwatiwa kulabanye baPhostoli kutsi umPhostoli lomusha kumele kube ngubani. LabaPhostoli labalishumi nakubili bakhetsa lamanye emadvodza lalungile baphindze babanika buphristi kutsi ubasite bente umsebenti weLibandla laJesu. Lawa madvodza bekabitwa ngekutsi nguLabangemashumi Lasikhombisa, baphristi labakhulu, babonisi, babhishobhi, baphristi, bafundzisi, kanye nebadikhoni. Imisebenti yabo ichazwe kusehluko 20.
Jesu wahola leLibandla ngeKwembulelwa
Imilayeto Jesu layiniketa ngaMoya loNgcwele kubantfu emhlabeni ibitwa ngekutsi tembulo. Jesu uhola Libandla Lakhe ngekuveta kubaphrofethi nalabanye baholi letintfo lekumele batente.
Ngaphambi kwekube Jesu abuyele ezulwini, watjela baPhostoli Bakhe kutsi utawuhlala anabo njalo. Jesu bekasho kutsi utawuchubeka abahole ngaMoya loNgcwele.
Kucocisana
-
Jesu walihola kanjani Libandla Lakhe emvakwekutsi abuyele ezulwini?
Libandla laJesu Khristu Lalicuketse Timfundziso Takhe Teliciniso
Baholi beLibandla laJesu Khristu bemukela sembulo kuJesu ngaMoya loNgcwele. Sibonelo, Jesu watjela umPhostoli Phetro kutsi livangeli kumele lifundziswe kubo bonkhe bantfu hhayi kubantfu baka-Israyeli kuphela. Jesu watjela umPhostoli Pawula tintfo letinyenti lekumele atifundzise bantfu. Jesu watjela tintfo letinyenti ngesikhatsi lesitako kumPhostoli Johane.
Asaphila lamhlabeni, Jesu wafundzisa bantfu kutsi bakholelwe Kuye, baphendvuke, baphindze babhajatiswe. Wabafundzisa kutsi batsandze Babe wetfu loseZulwini baphindze bamlalele. Wabafundzisa kutsi batsandze labanye bantfu baphindze babasite.
Emvakwekubuyela kwaJesu ezulwini, baPhostoli bafundzisa tintfo letifanako naleto Jesu bekatifundzisa. Bonkhe lebebafuna kuba malunga eLibandla laJesu Khristu bekumele babe nelukholo kuJesu Khristu, baphendvuke etonweni tabo baphindze babhajatiswe. Bemukela sipho saMoya loNgcwele, njengoba Jesu bekatsembisile. Bafundza kutsandza Babe wetfu loseZulwini nekumlalela. Bafundza kutsandza baphindze basite labanye bantfu.
Kucocisana
-
Yini Bantfu lebekumele bayente kute babe ngemalunga eLibandla laJesu Khristu?
Labo labebabeLibandla laJesu Khristu Bemukela Tipho takamoya
Labo labebabeLibandla laJesu Khristu bemukela tipho takamoya. Letinye taletipho bekulukholo lwekwenta bantfu labagulako baphile, likhono lekulandzisa ngetehlakalo letitako, nemandla ekubona imibono.
Kucocisana
-
Ngutiphi letinye tipho takamoya?
Libandla laJesu Beselingekho Emhlabeni
Emvakwekubuyela kwaJesu ezulwini, baPhostoli Bakhe bahola Libandla. Bantfu labanyenti baba malunga eLibandla. Kodvwa lamanye emalunga acala afundzisa aphindze akholelwa tintfo letingemanga, esikhundleni setintfo Jesu nebaPhostoli lebebatifundzisa. Sibonelo, labanye bantfu bafundzisa kutsi Babe wetfu loseZulwini ute umtimba wenyama nematsambo.
Bantfu labakhohlakele bacala bahlukubeta baholi nalamanye emalunga eLibandla. Labantfu labakhohlakele babulala baPhostoli nalabanye baholi labebanebuphristi. Baphindze babulala nalamanye emalunga lamanyenti eLibandla laJesu Khristu.
Bantfu bafundzisa kakhulu timfundziso letingemanga kwate kwababete namunye lokholelwa etimfundzisweni taJesu letiliciniso. Kute lobekanebuphristi, ngakoke kwaba bete namunye lobekangenta umsebenti waJesu emhlabeni noma emukele imiyaleto lebuya kuJesu webantfwana bonkhe baBabe wetfu loseZulwini. Lesikhatsi kute namunye lokholelwa etimfundzisweni letiliciniso taJesu futsi kute namunye lobekaneligunya Lakhe sibitwa ngekutsi Kuhlubuka.
Ngesikhatsi seKuhlubuka, bantfu bahlela emabandla labekahlukile kuleLibandla Jesu lebekalihlelile. Bafundzisa tintfo Jesu lebekangake atifundzise. Bebete buphristi. Benta imisebenti lebeyehlukile kunalebeyentiwa eBandleni laJesu. Bebete sembulo lesibuya kuJesu. Bebangafundzisi yonkhe imiyaleto yelivangeli njengoba Jesu nebaPhostoli Bakhe bebafundzisile. Baphrofethi bebashito kutsi konkhe loku kutawenteka.
Kucocisana
-
Kuhlubuka kwenteka kanjani?
Jesu Watsembisa kutsi utawuBuyisela Libandla Lakhe Emhlabeni
Jesu bekati kutsi labantfu bebatawulahlekelwa ngemandla Akhe netimfundziso Takhe teliciniso. Ngakoke walungisa indlela yeLibandla Lakhe leliliciniso kutsi lihlelwe futsi emhlabeni.
UmPhostoli Johane wabona embonweni sikhatsi lapho livangeli litawubuyiselwa emuva emhlabeni. Wabona kutsi Jesu utawutfumela tingilosi kutofundzisa emadvodza ngeliciniso ngaBabe wetfu loseZulwini. Jesu utawenta siciniseko kutsi bonkhe bantfwana baBabe wetfu loseZulwini bangalemukela lelivangeli, buphristi, tibusiso, nato tonkhe letinye tintfo letidzingekako kubo kute bakhone kubuyela kuBabe wetfu loseZulwini.
Kucocisana
-
Jesu wayilungiselelani indlela yekubuyisela kabusha Libandla Lakhe futsi emhlabeni?