Lithempeli ePortland, Oregon, USA.
Sehluko 32
Kuphila njengeMindeni Ingunaphakadze
Imindeni ingaba kanjani ndzawonye ingunaphakadze, ngisho nangemuva kwekuphila emhlabeni?
Nkulunkulu Wahlela kutsi Imindeni ibe Ndzawonye Ingunaphakadze
Umndeni ulicembu lebantfu lababaluleke kakhulu emhlabeni. Umndeni wetfu wasemhlabeni ufaniswe nemndeni wetfu wasezulwini. Sonkhe besibomnaketfu nabodzadzewetfu ezulwini. Besibantfwana baNkulunkulu. Nkulunkulu bekangumholi welikhaya letfu lasezulwini. Satfola kunakekelwa kwelutsandvo nekucondziswa kubatali betfu basezulwini.
Nkulunkulu watfumela ngamunye wetfu emndenini lamhlabeni. Unikete batali sibopho sekunakekela ngamunye webantfwana Bakhe baseselana emhlabeni. Batali kumele batsandze bantfwana babo baphindze babanike kudla, tembatfo, kanye nelikhaya. Kumele bafundzise bantfwana babo ngaNkulunkulu nekutsi bangafana Naye.
Nkulunkulu wakwenta kwenteka kutsi imindeni ibe ndzawonye ingunaphakadze. Uniketa baholi beLibandla Lakhe ligunya lekubopha imindeni ndzawonye ingunaphakadze. Lokubopha ndzawonye kubitwa ngekutsi kuboshwa. Lokuboshwa kungenteka kuphela ethempelini. Emathempeli takhiwo letingcwele lapho khona ngemalunga latsembekile kuphela eLibandla langaya. Uma wesilisa newesifazane baboshwa ethempelini ngumuntfu lophetse buphristi futsi lonemandla ekubopha lakhetsekile, umshado wabo awunawuphela uma bafa. Umshado wabo utawuhlala kute kube phakadze uma bagcina titsembiso labatenta ethempelini. Loku kubitwa ngekutsi ngumshado wangunaphakadze.
Uma wesilisa newesifazane bangakaboshwa ethempelini, umshado uphela uma munye wabo afa. Uma siboshiwe ethempelini, futsi uma silandzela Jesu Khristu ngekwetsembeka kute kube sekugcineni kwetimphilo tetfu, imindeni yetfu ingaba ndzawonye ingunaphakadze.
Lababili labashadile bangaya ethempelini kuyoboshwa uma babalandzeli baJesu labatsembekile. Le, lophetse buphristi loneligunya lelikhetsekile angababopha kulomunye nalomunye. Angaphindze abophe nebantfwana babo kubo. Emvakwekutsi baboshwe kulomunye nalomunye, bangaba ndzawonye ingunaphakadze, kwangatsi bebakadze bashadile ethempelini kwasekucaleni.
Nkulunkulu ufuna bonkhe bantfwana Bakhe bahlele kuboshwa ethempelini baphindze bakhulise umndeni lolalelako. Batali kumele bahole bantfwana babo kute batawuhlala balungele kuya ethempelini kuyoboshwa uma bashada. Uma wesilisa newesifazane baboshiwe ethempelini, bonkhe bantfwana lababatele emvakwekuboshwa kwabo batawuboshwa kubo ngalokutentekelako.
Kucocisana
-
Nkulunkulu ukwente kwenteka kanjani kutsi tsine sibe nemindeni yetfu ingunaphakadze?
-
Kubaluleke ngani kutsi siboshwe ethempelini?
Ngemalunga eLibandla Kuphela Latsembekile Langangena eThempelini
Emathempeli tindzawo letingcwele. Ngemalunga eLibandla laJesu Khristu Lalabangcwele Betinsuku Tekugcina kuphela lakhombise lukholo lawo kuJesu Khristu ngekulalela imiyaleto Yakhe labavumelekile kungena kuwo. Laba bantfu babe ngulabafanelekile kungena ethempelini. Ngaphambi kwekutsi umuntfu angene ethempelini, kumele kutsi abelilunga leLibandla lokungenani umnyaka munye. Emadvodza kumele abe emukele buPhristi bakaMelkhisedeki.
Kubona kutsi bafanelekile kuya ethempelini, bobabili besilisa nebesifazane kumele bakhulume nembhishobhi noma mengameli weligala. Uma umbhishobhi noma mengameli weligala atfola kutsi lomuntfu ufanelekile, utawunika lomuntfu liphepha lelisayiniwe lelibitwa ngekutsi yimvumo yelithempeli. Bese lilunga lebungameli besikhonkhwane noma mengameli wemishini kumele aphindze acocisane nalomuntfu. Utawuphindze asayine lemvumo yasethempelini uma atfola kutsi lomuntfu ufanelekile. Lomuntfu kumele aphatse lemvumo yasethempelini kute akhone kungena khona.
Lokulandzelako yimibuto lefanana naleyo umbhishobhi noma mengameli weligala latawuyibuta kute ancume kutsi lilunga leLibandla lifanelekile kuya ethempelini:
-
Uyakholelwa kuNkulunkulu; kuNdvodzana Yakhe, Jesu Khristu; nakuMoya loNgcwele?
-
Uyamemukela yini Mengameli weLibandla laJesu Khristu Lalabangcwele Bentisuku Tekugcina njengemphrofethi, umboni, nemembuli? Uyamemukela njengaye yedvwa umuntfu lamhlabeni loneligunya lekusebentisa tonkhe tikhiya tebuphristi?
-
Uyakunika yini eBandleni lokukodvwa eshumini lokutfolako?
-
Uyalitfobela yini Livi leKuhlakanipha?
-
Uyatama yini kwetsembeka kulabanye bantfu?
-
Ngabe utama kamatima kwenta umsebenti wakho eBandleni ngekuya emihlanganweni yakho nekulalela imiyaleto?
-
Ngabe uyawutfobela umtsetfo webumsulwa?
-
Uke wenta sono lesikhulu waphindze wangasivumi kubaholi bebuphristi labafanele?
Kungena ethempelini kulilungelo lelingcwele. Kumele sibe ngulabafanelekile siphindze sitimisele kulalela sonkhe setsembiso lesingcwele lesisentako naNkulunkulu ethempelini. Kumele sikhumbule kutsi lokuboshwa kwangunaphakadze lokwentiwa emathempelini kungcwele. Nguyo yodvwa indlela lengenta kutsi sibe ndzawonye njengemindeni ingunaphakadze. Nguyo yodvwa indlela lesingemukela ngayo tonkhe letibusiso Nkulunkulu lanato ngatsi. Kubaluleke kakhulu enjabulweni yetfu yaphakadze kutsi sitame kuya ethempelini kuyoboshwa.
Kucocisana
-
Ngubani longangena ethempelini?
-
Yini tintfo umuntfu lekumele atente kute abe ngulofanelekile kungena ethempelini?
-
Kubaluleke ngani kutsi siye ethempelini nekuyoboshwa?
Kulungiselela Umndeni wakho kutsi Uhlale Ndzawonye Ingunaphakadze
Kuboshwa ethempelini kwenta kutsi sikhone kuhlala ndzawonye ingunaphakadze njengemndeni, kodvwa kunaletinye tintfo lokumele sitente uma sifuna kutfola lesi sibusiso lesikhulu. Kumele sichubeke silandzele Jesu ngekwetsembeka. Kumele sigcine letitsembiso lesitentako ethempelini. Kumele sifundze kuba ngemalunga emndeni lalungile labatsandzako futsi labasitako labanye. Kumele sithandaze kuNkulunkulu kutsi Moya loNgcwele utawusisita kwenta tincumo letikahle kuyo yonkhe intfo lesiyentako. Kumele sitame imihla yonkhe kusita imindeni yetfu ibe ngulefanelekile kuhlala naNkulunkulu.
Kucocisana
-
Ngaphandle kwekuboshwa ethempelini, yini umndeni lekumele ukwente kute uhlale ndzawonye ingunaphakadze?
Nkulunkulu Ukwente Kwenteka kutsi Sisindzise Bokhokho betfu
Tigidzi tebantfwana baNkulunkulu tifile ngaphandle kwekuva livangeli Lakhe. Abakatemukeli timiso letidzingekako kute bacolelwe tono tabo baphindze bahlale naNkulunkulu futsi. Nkulunkulu uyabatsandza bonkhe bantfwana bakhe futsi ufuna kutsi bonkhe babuyele kuye, ngakoke ulungise indlela yekutsi bentelwe timiso telivangeli. Lomsebenti lo kumele wentiwe ethempelini.
Letinye taletimiso letentiwa ethempelini talabo lasebafile ngumbhabhatiso, kunika sipho saMoya loNgcwele, nekuboshwa kwemindeni ingunaphakadze. Ngenca yekutsi leti timiso tidzingekile kubo bonkhe labafuna kuhlala naNkulunkulu futsi, singabentela bokhokho betfu lomsebenti.
Kucocisana
-
Labo labafa bangakaliva livangeli bangatemukela kanjani timiso letidzingekako kubuyela kuNkulunkulu?
-
Ngubani lonesibopho sekubona kutsi timiso letidzingekile tentelwa labo lasebafile?
Labaphilako Bentela Labafile Timiso
Kukhona letinye tintfo lesingatenta kute timiso tentelwe tihlobo tetfu lesetifile. Sidzinga kubatfola ngemabito abo nelusuku nendzawo labatalelwa kuyo kanye nekufa. Uma singakwati kutfola lwati, sisengabatfola ngekubhala lokuningi ngendlela lesikwati ngayo ngelicembu lemndeni (babe, make, nebantfwana babo).
Lomsebenti wekutfola emabito abokhokho betfu lasebafile nalo lonkhe lwati ngabo ubitwa ngekutsi ngumlandvo wetitukulwane, noma ngumlandvo wemndeni.
Kukhona emafomu lamabili, labitwa ngelishathi lekutalwa nembhalo welicembu lemndeni, lapho khona ungabhala lolwati. Ungatfola emakhophi alawa mafomu kumholi wakho webuphristi. Utawuba nemuntfu lotokusita kubhala lolu lwati. Ungabese uyatsatsa noma utfumele lolwati ethempelini, lapho khona letimiso titawentiwa khona.
Uma kute etihlobeni tetfu letiphilako lonalolwati lesiludzingako, singalutfola emibhalweni yahulumende, emibhalweni yemabandla lokungenteka kutsi bokhokho betfu bebangebawo, emathuneni, noma kunoma nguyiphi lenye indzawo lapho lolwati lutfolakala khona.
Uma sifanelekile, singaya ethempelini siyokwentela tihlobo tetfu letimiso. Uma singakhoni kuya ethempelini, labanye batawubentela letimiso. Kumele siye ethempelini njalo kuyowenta timiso talabafile.
Kucocisana
-
Yini lokumele yentiwe ngaphambi kwekutsi sente timiso ethempelini tabokhokho betfu labafile?
-
Nguluphi lwati loludzingekako kute leti timiso tikhone kwentiwa?
-
Ngubani longentela bokhokho betfu lasebafile letimiso?
Imilandvo yeMuntfu Ibalulekile
Uma sifundza loko lilunga lemndeni wetfu lelakubhala ngaye, siyati siphindze sitsandze loyo muntfu kancono. Ngaphandle kwekufundza ngetihlobo tetfu lesetifile nekutentela timiso, kumele sigcine umbhalo ngetimphilo tetfu. Kumele sibhale ngebatali betfu, kutalwa kwetfu, netintfo letenteke kitsi ngesikhatsi sekuphila kwetfu. Kumele siphindze sibhale imicabango yetfu kute bantfwana nebatukulu betfu bati kabanti ngatsi baphindze bakhutsateke kwenta letintfo letinhle letifanako nalesitentile.
Nkulunkulu watjela Adamu kutsi abhalele bantfwana bakhe umbhalo ngemphilo yakhe. Baphrofethi nabo babhala imibhalo lenjengale, futsi natsi kumele sente kanjalo. Ngekufundza lombhalo Adamu nalabanye baphrofethi labawubhala, sifundza ngetibusiso nemiyaleto labayitfola kuNkulunkulu. Loko kuyasisita kutsi sente loko lokulungile. Kumele sisite bantfwana betfu ngekugcina umbhalo wetimphilo tetfu.
Kucocisana
-
Nkulunkulu ubatjele leni bantfu kutsi bagcine umbhalo wetimphilo tabo?
-
Ngutiphi tibusiso letingeta kubantfwana bakho nebatukulu ngembhalo wakho?