Indvodza leyimphumphutse beyinelukholo kutsi Khristu utawuyiphilisa.
Sehluko 13
Lukholo kuJesu Khristu
Singakholelwa kanjani kuJesu Khristu noma singakase sambona?
Singakholelwa kuJesu Khristu siphindze Simetsembe
Kuba nelukholo kusho kukholelwa kumuntfu noma intfo lesingayiboni, futsi sente ngalokuvumelana naleyo nkholo. Sibonelo, umlimi unelukholo kutsi titjalo titawukhula uma ahlanyela tinhlanyelo aphindze atinakekela. Ngakoke uhlanyela tinhlanyelo atinisela bese uyatinakekela. Uma enta njalo, letitjalo tiyakhula tiphindze timnike kudla.
Kuba nelukholo kuJesu kusho kutsi siyakholwa kutsi uyaphila futsi siyamlalela, noma singamboni. Leti nguletinye tetintfo lesitikholwako ngaJesu uma sinelukholo Kuye:
-
Siyakholwa kutsi Babe wetfu loseZulwini wakhetsa Jesu kutosisita kutsi silandzele lisu laBabe wetfu loseZulwini.
-
Siyakholwa kutsi Jesu nguMsindzisi wetfu.
-
Siyakholwa kutsi watalelwa lamhlabeni njengeNdvodzana yaBabe wetfu loseZulwini.
-
Siyakholwa kutsi weta emhlabeni kutosifundzisa kutsi singabuyela kanjani kuBabe wetfu loseZulwini.
-
Siyakholwa kutsi uyasitsandza.
-
Siyakholwa kutsi wahluphekela tono tetfu kute siphendvuke futsi singajeziselwa tona.
-
Siyakholwa kutsi wafa waphindze wavuswa.
-
Siyakholwa kutsi timfundziso Takhe tiliciniso.
-
Siyakholwa kutsi uma silalela Jesu singabuyela sihlale naBabe wetfu loseZulwini.
Kuba nelukholo kuJesu kubalulekile ekubuyeleni kwetfu kuBabe wetfu loseZulwini. Uma sinelukholo Kuye, siyametsemba futsi sifuna kufundza Ngaye. Jesu Nguye yedvwa longasiholela emuva kuBabe wetfu loseZulwini. Ngulabo kuphela labakholelwa kuJesu nalabamlalelako labangabuyela bahlale naBabe wetfu loseZulwini.
Kucocisana
-
Yini lukholo?
-
Yini lukholo kuJesu?
-
Yini letinye tetintfo lesitikholwako ngaJesu?
-
Sidzingelani kuba nelukholo kuJesu Khristu?
Jesu Wasinika Indlela yekuTfutfukisa Lukholo Kuye
Jesu usitjelile kutsi singafundza kanjani Ngaye siphindze sibe nelukholo Kuye. Usitjelile kutsi sifundze imibhalo lengcwele futsi sifundze loko baphrofethi labakubhalile Ngaye. Usicelile kutsi silalele umphrofethi lophilako lamuhla. Uma senta leti tintfo, sifundza kabanti ngaJesu.
Sisafundza ngaJesu, kumele sithandaze. Kumele sicele Babe wetfu loseZulwini kutsi asisite sicondzisise loko lesikufundzako nalesikuvako ngaJesu. Babe wetfu loseZulwini utositfumelela Moya loNgcwele kusisita kutsi sicondzisise letintfo lesitifundzako. Moya loNgcwele utasitjela kutsi Jesu yiNdvodzana yaBabe wetfu loseZulwini, kutsi unguMsindzisi wetfu, nekutsi timfundziso takhe tiliciniso.
Umphrofethi Alima watsi uma sifuna kwati kutsi intfo iliciniso, kumele siyetame. Wacatsanisa loku ngekuhlanyela inhlanyelo. Uma sihlanyela inhlanyelo lenhle siphindze siyinakekela, itomila, futsi sitokwati kutsi bekuyinhlanyelo lenhle. Uma lenhlanyelo ingamili, sitokwati kutsi bekuyinhlanyelo lembi. Uma sifuna kwati kutsi timfundziso taJesu tiliciniso, kumele sitifundze siphindze sitilalele.
Lukholo kuJesu kusho ngetulu kwekutsi siyakholelwa Kuye. Kusho kwetsembela Kuye ngemandla kangangekube sifuna kumlalela, noma ngayini lasiyaleta kutsi siyente. Ngulabo kuphela labalalela Jesu labanelukholo Kuye ngekweliciniso. Futsi sisamlalela, lukholo lwetfu kuye luba nemandla. Siyafundza kutsi timfundziso Takhe tibuya kuBabe wetfu loseZulwini, hhayi kubantfu.
Uma singamlaleli Jesu, lukholo lwetfu luba butsakatsaka. Uma senta letintfo lasiyaleta kutsi sitente, lukholo lwetfu luyakhula ngemandla. Lukholo lwetfu lungachubeka lube nemandla site sibe nelwati lolucinisekile kutsi uyaphila, nekuciniseka ngatsi singambona.
Kucocisana
-
Singaba nalo kanjani lukholo kuJesu noma singamboni?
-
Kumele simlalele leni Jesu kute sibe nelukholo Kuye?
Singalwemukela Lwati Lolukhulu neMandla Uma sineLukholo kuJesu
Baphrofethi lesifundza ngabo emibhalweni lengcwele bebanelukholo lolucinile kuJesu. Lolu lukholo lwabanika emandla ekusita bantfu babo. Ngoba bebanelukholo kuJesu bebanemandla ekwenta tintfo lebebangakhoni kutenta ngekwabo.
Ngaphambi kwekutalwa kwaJesu emhlabeni, Babe wetfu loseZulwini wamyaleta kutsi akatjele umphrofethi lolibito kwaku nguNowa kutsi akhe umkhumbi ngoba Babe wetfu loseZulwini bekatotfumela sikhukhula lesikhulu uma bantfu labakhohlakele besikhatsi saNowa bangaphendvuki. Labantfu abatange baphendvuke. Nowa wamukholwa Jesu futsi wakha lomkhumbi. Uma sikhukhula sifika, bonkhe labantfu labangatange baphendvuke bafa; kodvwa Nowa nemndeni wakhe baphepha emkhunjini ngoba bamkholela Jesu futsi benta latsi abakwente.
Mosi bekangumphrofethi lowakhipha bantfu bakhe ebugcilini. Babe wetfu loseZulwini watfumela Jesu kutsi asite Mosi ngoba Mosi bekakholelwa kuJesu futsi enta letintfo Jesu bekamtjela kutsi akatente.
Uma Jesu aphila emhlabeni, wesifazane bekanelukholo lolukhulu Kuye. Bekasagule sikhatsi lesidze, futsi wakholelwa kutsi uma angatsintsa tembatfo taJesu, utawuphila. Jesu bekahamba esicukwini sebantfu. Wafuca esicukwini waya Kuye watsintsa tembatfo Takhe. Waphila masinyane. Jesu wamtjela kutsi lukholo lwakhe lumente welulama.
UmPhrofethi Joseph Smith bekanelukholo kuJesu Khristu. Wafundza eBhayibhelini kutsi Babe wetfu loseZulwini utawuyiphendvula imithandazo yetfu uma sikholwa kutsi uyayiphendvula. Joseph wathandaza kuBabe wetfu loseZulwini. Babe wetfu loseZulwini naJesu bavela kuJoseph. Babe wetfu loseZulwini watjela Joseph kutsi akalalele Jesu aphindze atfobele loko Jesu latamtjela kona. Joseph wamtfobela Jesu, ngako wakhona kwemukela INcwadzi yaMormon waphindze wasita kubuyisela Libandla laJesu Khristu.
Jesu utawuphindze asisite natsi uma sinelukholo Kuye. Utawusisita ngetinkinga tetfu. Utawusisita uma sidvumele. Utawusisita kuncoba sono. Utawukhona kusita imindeni yetfu nalabanye bantfu.
Uma sinelukholo kuJesu, sicala kulandzela lisu laBabe wetfu loseZulwini. Sicala kuphila futsi sente tintfo letitosiholela emuva kuBabe wetfu loseZulwini. Uma sichubeka, ngalelinye lemalanga sitawukhona kuhlala Naye ingunaphakadze.
Kucocisana
-
Luhlobo luni lwelwati nemandla lesingaba nawo uma sinelukholo kuJesu?