Tinsita Letisisekelo
Sehluko 25: Umtsetfo weBumsulwa

Sehluko 25

Umtsetfo weBumsulwa

Babe wetfu loseZulwini usinike emandla langcwele ekuba nebantfwana. Usitjelile kutsi siwasebentise kanjani lamandla. Uma siwasebentisa ngendlela lefanele, singajabula kakhulu.

Babe wetfu loseZulwini Usitjele kutsi sibe neBantfwana siphindze Sitfobele Umtsetfo weBumsulwa

Emvakwekutsi Adamu na-Eva bashade, Babe wetfu loseZulwini wabatjela kutsi ababe nebantfwana. Watjela Adamu nemkakhe, Eva, kutsi babe nebantfwana kute imimoya leseZulwini itokuta emhlabeni iphindze yemukele imitimba yenyama nematsambo. Umtimba wenyama nematsambo ngulesinye setipho lesikhulu kakhulu Babe wetfu loseZulwini lasinike sona. Babe wetfu loseZulwini unemtimba wenyama nematsambo, futsi ufuna nebantfwana Bakhe bafane Naye.

Lamandla ekuba nebantfwana angcwele kakhulu. Babe wetfu loseZulwini usinike umtsetfo lositjela kutsi singawasebentisa kanjani lamandla. Lomtsetfo lo ubitwa ngekutsi ngumtsetfo webumsulwa. Utsi kumele sibe nebudlelwane ngekwelicansi kuphela nemuntfu lesishade naye ngekwemtsetfo. Loku kusho kutsi akukameli sibe nebudlelwane ngekwelicansi ngaphambi kwekutsi sishade, futsi emvakwekushada kumele sibe nebudlelwane ngekwelicansi kuphela nendvodza noma nemfati wetfu.

Kukhipha sisu, noma kususa umntfwana losengakatalwa ngekhatsi kunina simuvumele kutsi afe noma kubulala umntfwana asesengekhatsi kunina, akukalungi ngaphandle nakunetimo letikhetsekile, letidzinga kucatjangelwa ngekucophelela ngemthandazo nangelusito lwembhishobhi wetfu noma mengameli weligala. Akukakameli sisite noma ngubani kutsi akhiphe sisu.

Batali ngubo lokumele bafundzise umtsetfo webumsulwa kubantfwana babo. Batali kumele babafundzise kutsi imitimba yabo ingcwele nekutsi akumeli bavumele muntfu kubatsintsa tincenye letitsite temitimba yabo. Kumele balungise imicondvo lengakalungi nemagama bantfwana babo labawafundza kulabanye.

Njengoba bantfwana bakhula, kumele bafundziswe kutsi Babe wetfu loseZulwini usinike emandla ekuba nebantfwana nekutsi kusebentisa lamandla emvakwekushada kuhle. Ngesikhatsi bantfwana betfu baneminyaka lengu 12 noma 13, kumele sibe sesibasitile kucondzisisa kutsi bantfwana badalwa kanjani. Kumele sibafundzise kusenesikhatsi ngendlela lenebuhlakani kubavikela ebungotini noma etimfundzisweni letingemanga.

Kucocisana

  • Babe wetfu loseZulwini wasinikelani emandla ekuba nebantfwana?

  • Yini umtsetfo webumsulwa?

  • Yini lekumele siyifundzise bantfwana betfu ngemitimba yabo?

Sathane ufuna Siphule Umtsetfo weBumsulwa

Sathane ufuna kusivimba ekubuyeleni kuBabe wetfu loseZulwini. Sathane ufuna siphule lomtsetfo webumsulwa. Ufuna sicabange kutsi lamandla ekuba nebantfwana akasiwo langcwele. Ufuna sicabange kutsi kuphula lomtsetfo webumsulwa akusiso sono.

Sathane usebentisa tindlela tebucili kusiphocelela kutsi siphule lomtsetfo. Wetama kusenta sicabange kutsi kuvumela labanye babone noma batsintse imitimba yetfu kwemukelekile. Sathane ufuna sicabange imicabango lemibi. Usikhutsata kutsi sibuke titfombe, emafilimu, nemidanso lesilingako kutsi singabi msulwa. Uphindze asikhutsate kutsi sihlanganyele emidansweni nekulalela tindzaba, emahlaya, nemculo losilingako ekungabini msulwa. Sathane ufuna sente leti tintfo kute imitimba yetfu ingatobukeka ingulengcwele futsi kute sitawusebentisa lamandla ekuba nebantfwana ngendlela lengakalungi.

Sathane ngalesinye sikhatsi uyasilinga ngemizwa yetfu. Sathane uyati uma sinesitunge, sididekile, futsi singakajabuli. Ukhetsa leti tikhatsi tebutsakatsaka kutsi asente sifune kwephula umtsetfo webumsulwa. Ufuna kusenta sicabange kutsi sinalo lilungelo lekusebentisa lamandla ekuba nebantfwana noma ngabe nguyiphi indlela lesifisa kuyisebentisa. Utama kusenta sicabange kutsi kute lokubi lokutakwenteka kitsi uma siphula lomtsetfo webumsulwa.

Babe wetfu loseZulwini angasinika emandla ekumelana netilingo taSathane. Akafuni sibone tintfo letimbi noma sicabange imicabango lemibi. Utsembisile kutsi angeke avumele Sathane kutsi asilinge ngetulu kwaloko lesingamelana nako. Usilungiselele indlela lesingancoba ngayo tilingo.

Singathandaza kuBabe wetfu loseZulwini sicele lusito lekumelelana naSathane. Uma sithandaza, Babe wetfu loseZulwini utawutfumela Moya loNgcwele kutsi asisite. Moya loNgcwele utawusisita sikhumbule kutsi imitimba yetfu ingcwele nekutsi emandla ekuba nebantfwana angcwele. Moya loNgcwele utawusisita kutsi singawasebentisi lamandla lawa ngendlela lengakalungi. Utawusisita kutsi sikhetse tintfo letinhle kutibona siphindze sifundze futsi sicabange ngato. Utawusisita kutsi sikhumbule kutsi kwephula umtsetfo webumsulwa kutawusenta sidzabuke nekutsi kulalela lomtsetfo lo kutawusenta sijabule.

Kucocisana

  • Sathane ufunelani siphule umtsetfo webumsulwa?

  • Yini lesingayenta kute simelane netilingo taSathane?

  • Babe wetfu loseZulwini angasisita kanjani kutfobela umtsetfo webumsulwa?

Kwephula Umtsetfo weBumsulwa Sono Lesikhulu

Budlelwane ngekwelicansi buhle futsi bumsula uma bugcinwa emkhatsini wendvodza nemfati labatsandzanako nalabahloniphanako. Buyindlela Babe wetfu loseZulwini lasinikete yona kutsi sibe nebantfwana. Buyindlela yekutsi emadvodza nebafati babonisane lutsandvo baphindze basondzelane emizweni yabo. Kodvwa kuba nebudlelwane ngekwelicansi ngaphandle kwemshado sono lesikhulu kakhulu.

Kwephula umtsetfo webumsulwa kusenta singajabuli. Uma sibona kutsi asikamlaleli Babe wetfu loseZulwini, sitiva sinelicala futsi sinemahloni. Sitawubona kutsi siwasebentise ngendlela lengakalungi lamandla langcwele lasinika wona nekutsi sente labanye bangajabuli. Kwephula umtsetfo webumsulwa kungabangela kutsi umntfwana atalwe ngaphandle kwemndeni lofanele.

Tono letimbili kuphela letinkhulu kwendlula kwephula umtsetfo webumsulwa. Leti kuphika Moya loNgcwele nekubulala. Laba labaphule umtsetfo webumsulwa bangacolelwa. Babe wetfu loseZulwini utsite uma batawuba nelukholo kuJesu baphindze baphendvuke etonweni tabo, utawubacolela. Labo labephula umtsetfo webumsulwa baphindze bangaphendvuki angeke bakhone kuhlala naBabe wetfu loseZulwini.

Labo labadlwengulwa noma labahlukunyetwa ngekwelicansi bete licala lekwephula umtsetfo webumsulwa.

Intsetselelo ingeta kuphela ngelukholo kuJesu nekuphendvuka. Kumele sibone kutsi sonile siphindze sitisole ngalokungakalungi lesikwentile. Kumele siyekele kwenta letintfo letingakalungi siphindze sivume lesono kuBabe wetfu loseZulwini, kulabantfu lokungenteka kutsi sibavise buhlungu, nakulabo labaneligunya lebuphristi lelifanele (umbhishobhi, mengameli weligala, mengameli wesikhonkhwane noma mengameli wemishini). Babe wetfu loseZulwini utsite utawubacolela labo labanelukholo kuJesu, bavuma tono tabo kuBabe wetfu loseZulwini nebaholi beLibandla labafanele, baphindze baphendvuke ngekweliciniso. Noma ngubani longenti tonkhe leti tintfo akaphendvuki ngekweliciniso futsi angeke acolelwe.

Kucocisana

  • Kwephula umtsetfo webumsulwa kusono lesikhulu ngani?

  • Yini lengenteka kitsi uma siphula umtsetfo webumsulwa?

  • Kumele siwutfobele leni umtsetfo webumsulwa?

  • Yini lekumele siyente kuphendvuka ekuphuleni umtsetfo webumsulwa?

Kutfobela Umtsetfo weBumsulwa Kusenta Sijabule

Uma sitfobela umtsetfo webumsulwa, sikhombisa sibonelo lesihle kubantfwana betfu kutsi basilandzele. Siyati Babe wetfu loseZulwini uyajabula ngatsi ngekumlalela. Uma siwutfobela, labo labasemindenini yetfu bayati kutsi siyabatsandza, futsi site sizatfu sekutiva sinelicala noma sinemahloni. Sifana kakhulu naBabe wetfu loseZulwini. Babe wetfu loseZulwini uyasibusisa nebantfwana betfu, noma labantfwana lesitawuba nabo, uma sitfobela umtsetfo webumsulwa.

Kusebentisa lamandla Babe wetfu loseZulwini lawabeke emitimbeni yetfu emshadweni kuyawuletsa injabulo. Kubantfu labashadile, kuba nebudlelwane ngekwelicansi kungaletsa injabulo. Kungabasondzeta ndzawonye ngemizwa lenemandla yelutsandvo. Labantfwana labangatalwa basibusiso lesibuya kuBabe wetfu loseZulwini. Nanoma bantfwana ngalesinye sikhatsi bangabanga kukhatsateka nekudzabuka lokukhulu kubatali babo, baphindze baletse intfokoto lenkhulu. Lenye yenjabulo lenkhulu lesiyatiko emphilweni yetfu itawukuta bantfwana betfu basakhula, bafundza, bashada, baphindze babe nebantfwana babo.

Kucocisana

  • Ngutiphi tibusiso lesitemukelako uma sitfobela umtsetfo webumsulwa?

  • Sijabulelani kakhulu uma sitfobela umtsetfo webumsulwa kunalapho singawulaleli?