Sehluko 15
UmBhabhatiso
Kubhajatiswa ngulokunye kwetintfo letibaluleke kakhulu longatenta la emhlabeni. Kungani umbhabhatiso ubaluleke kangaka? Nguyiphi indlela lefanele yekubhajatiswa?
Babe wetfu loseZulwini Usiyalete kutsi Sibhajatiswe
Kubhajatiswa kusho kubekwa ngalokuphelele ngaphansi kwemanti umzuzwana bese uyaphakanyiswa futsi ngumuntfu loneligunya lekwenta umbhabhatiso. UmBhabhatiso yincenye yelisu laBabe wetfu loseZulwini ngatsi. Usilayetela kutsi sibhatjatiswe kukhombisa kutsi sikholelwa kuJesu Khristu, kutsi siyamtsandza futsi sifuna kumlalela, nekutsi siphendvukile etonweni tetfu.
Jesu bekati kutsi Babe wetfu loseZulwini ulayetele bonkhe bantfwana Bakhe kutsi babhajatiswe. Uma Jesu asemhlabeni, wabhajatiswa. Wenta loku ngoba abefuna kutfobela Babe wetfu loseZulwini. Futsi bekafuna kusikhombisa kutsi kumele simlalele Babe wetfu loseZuwlini siphindze sibhajatiswe.
Wonkhe umuntfu losafike eminyakeni lesiphohlongo, locondza lokulungile nalokungakalungi, futsi lonelukholo kuJesu waphindze waphendvuka kumele abhajatiswe. Bantfwana labasebancane kunesiphohlongo akudzingeki babhajatiswe. Babe wetfu loseZulwini akabehluleli kuloko labakwentako. Futsi, bantfu labete emandla ngekwengcondvo kucondzisisa lokulungile nalokungakalungi akudzingeki babhajatiswe. Bonkhe labanye bantfu kumele babhajatiswe uma bafuna kubuyela bahlale naBabe wetfu loseZulwini.
Jesu usitjelile kutsi kumele sibhajatiswe nini. Watjela balandzeli Bakhe kutsi babhabhatise bantfu emvakwekutsi bantfu bafundze Ngaye, bakholelwa Kuye, baphindze baphendvuka. Wanika lamanye emadvodza eBandleni Lakhe ligunya lekubhabhatisa bantfu.
Kucocisana
-
Babe wetfu loseZulwini ufunelani kutsi sibhajatiswe?
-
Jesu wabhajatiswelani?
-
Ngubani lodzinga kubhajatiswa?
Khristu wabhajatiswa nguJohane uMbhabhatisi.
Kubhajatiswa Ngulokunye Kwetintfo Letimcoka Kakhulu Lesingakwenta
Ngekubhajatiswa, sikhombisa Babe wetfu loseZulwini kutsi sifuna kulandzela lisu Lakhe ngatsi. Siyatsembisa kwemukela Jesu njengemholi wetfu siphindze silalele konkhe lasitjela kutsi sikwente. Sitsembisa kutsi sitohlala njalo simkhumbula netintfo lasentele tona.
Uma sibeka lukholo lwetfu kuJesu Khristu, siphendvuka etonweni tetfu, siphindze sibhajatiswe, Babe wetfu loseZulwini uyasicolela tono tetfu. Uyasetsembisa kutsi singabuyela sihlale Naye. Uyasemukela njengemalunga eLibandla laJesu. Utfumela Moya loNgcwele kutosisita kufundza kabanti Ngaye nekutosisita kwenta tintfo letilungile. Simukela tonkhe leti tibusiso uma sichubeka senta letintfo lesetsembisa kutenta uma sibhajatiswa.
Singemukela leti tibusiso kuphela uma sibhajatiswa. Ngulena kuphela indlela yetfu yekubuyela sihlale naBabe wetfu loseZulwini. Ngulena kuphela indlela yetfu yekuba malunga eLibandla laJesu Khristu. Ngulena kuphela indlela yetfu yekumukela sipho saMoya loNgcwele, loku lilungelo lekuba naMoya loNgcwele kusisita etimphilweni tetfu. Lesi sipho siniketwa sona emvakwekubhajatiswa. Tonkhe leti tintfo tiyadzingeka kute sibuyele sihlale naBabe wetfu loseZulwini.
Kucocisana
-
Yini setsembiso lesisentako kuBabe wetfu loseZulwini uma sibhajatiswa?
-
Yini setsembiso Babe wetfu loseZulwini lasenta kitsi uma sibhajatiswa?
-
Ubaluleke ngani umbhabhatiso?
Kumele Sitilungiselele Ngekwetfu kuBhajatiswa
Kumele sente tintfo letitsite ngaphambi kwekulungela kubhajatiswa. Kumele sifundze ngaJesu Khristu futsi sikholelwe Kuye, siphendvuke etonweni tetfu, siphindze sente letintfo Jesu lasilayetele kutsi sitente.
Kucocisana
-
Yini lekumele siyenta kulungiselela umbhabhatiso?
Kumele sibhajatiswe ngekucwiliswa kute sitsetselelwe tono tetfu.
UmBhabhatiso Usinika Sicalo Lesisha
UmBhabhatiso usivumela sicale imphilo lensha, lehlantekile esonweni. Jesu wake watsi kufana nekutsi sicu setfu sitalwa kabusha. Watsi ngaphandle sitalwe kabusha ngekwakamoya, angeke sibuyele sihlale naBabe wetfu loseZulwini.
Munye webalandzeli baJesu, lolibito lakhe kwakunguPawula, watsi kumele sicale imphilo lensha emvakwekubhajatiswa. Watsi uma sifakwa ngaphansi kwemanti ngembhabhatiso, kufana nekungcwaba tonkhe tono tetfu. Uma siphuma emantini, kufana nekuba ngumuntfu lohlantekile, umuntfu lomusha, lolungele kucala imphilo lensha. UmBhabhatiso usicalisa endleleni yekubuyela kuBabe wetfu loseZulwini.