Sehluko 21
Timiso
Emadvodza nebafana bangenta ini ngebuphristi?
NgebuPhristi, Emadvodza aneLigunya lelifanako leKwenta Timiso Jesu labekanalo
Timiso yimisebenti lengcwele leyentiwa ngulabo labaniketwe ligunya lebuphristi. UmBhabhatiso, sicinisekiso, kubeka tandla kulabo labagulako kubaphilisa, kanye nekubusisa nekunika sidlo seNkhosi nguletinye taletimiso.
Uma Jesu asemhlabeni, wenta timiso kusita bantfu. Waphilisa labagulako waphindze wenta timphuphutse tabona. Wenta labangeva bakhona kuva futsi nalabafile babuyiswa ekuphileni. Wanika sidlo seNkhosi kubalandzeli Bakhe.
Jesu unike emadvodza laphetse buphristi emandla neligunya lekwenta timiso. Emadvodza nebafana labafanelekile labaphetse buphristi bangenta timiso. Benta letimiso kubusisa nekusisita kutsi sibe njengaBabe wetfu loseZulwini. Letimiso tisisita kutsi silungisele kubuyela siphindze siphile naBabe wetfu loseZulwini.
Ngoba Jesu unike buphristi kumadvodza emhlabeni lamuhla, singemukela tibusiso letinyenti etimphilweni tetfu. Singabhajatiswa, simukele sipho saMoya loNgcwele, siphindze siboshwe nemindeni yetfu ingunaphakadze.
Bomengameli beKhoramu kumele bafundzise emalunga emakhoramu abo kutsi timiso tentiwa kanjani. Uma indvodza lenebuphristi kumele yente simiso kani ayati kutsi sentiwa kanjani, kumele icele mengameli wayo wekhoramu kutsi amfundzise.
Kucocisana
-
Tentiwelani timiso?
Jesu wamisa sidlo seNkhosi eMkhosini weliPhasika nebaPhostoli Bakhe.
Timiso tentelwa Kusita tsine
UmBhabhatiso
UmBhabhatiso simiso sekucala selivangeli laJesu Khristu. Ngaphambi kwekubhajatiswa, bantfu kumele babe nelukholo kuJesu, baphendvuke etonweni tabo, baphindze bafune kwenta letintfo Jesu latifundzisa.
Ngumuntfu lonebuphristi kuphela longabhabhatisa labanye. Kubhabhatisa noma ngangumuphi umuntfu, kumele abe nemvumo lebuya kumbhishobhi noma mengameli wakhe weligala. Lomuntfu lobhabhatisako wehlela emantini nalomuntfu lotobhajatiswa. Lomuntfu lobhabhatisako ubita lona lobhajatiswako ngeligama bese usho umthandazo lomfisha. Ubese ufaka lomuntfu lobhajatiswako ngalokuphelele ngaphansi kwemanti bese sewuyamkhipha futsi emantini.
Lomthandazo lomuntfu lawushoko ngunangu: “Ngekugunyatwa nguJesu Khristu, ngiyakubhabhatisa egameni laBabe, neleNdvodzana, nelaMoya loNgcwele. Amen.”
Kucocisana
-
Yini simiso sekucala selivangeli laJesu Khristu?
Kunika Sipho saMoya loNgcwele
Emvakwekutsi umuntfu abhajatiswe, emadvodza lanebuPhristi bakaMelkhisedeki abeka tandla tawo enhloko yalomuntfu, bese munye wabo usho umthandazo lokhetsekile. Kuloyo mthandazo, bacinisekisa lomuntfu lilunga leLibandla laJesu Khristu Lalabangcwele Betinsuku Tekugcina baphindze batsi kuye “Yemukela Moya loNgcwele.” Loku kusho kutsi lomuntfu wemukela lilungelo lekuholwa nguMoya loNgcwele imihla yonkhe, njengoba lomuntfu atama ngekwetsembeka kulalela imiyaleto yaJesu. Loku kunika sipho saMoya loNgcwele simiso sesibili selivangeli laJesu Khristu. Bese lona lowenta lesimiso unika lomuntfu sibusiso lesiphefunyulelwe ngaMoya loNgcwele. Emadvodza kumele abe nemvumo yembhishobhi noma mengameli wabo weligala kunika umuntfu sipho saMoya loNgcwele.
Kucocisana
-
Ngubani longanika sipho saMoya loNgcwele?
Kugcotjwa ebuPhristini
Kunika indvodza buphristi simiso. Kumele kwentiwe ngulamanye emadvodza lanebuphristi. Kumele abe nemvumo yembhishobhi noma mengameli weligala kunika buPhristi baka-Aroni, seyamengameli wesikhonkhwane kunika buphristi bakaMelkhisedeki. Kuyintfokoto lenkhulu endvodzeni noma emfaneni kutfola buphristi. Labo labagcina tetsembiso labatentako uma bemukela buphristi batawuba nebuphristi ingunaphakadze.
Kucocisana
-
Ngubani longanika buphristi kulabanye?
Sidlo seNkhosi
Umuntfu lonebuphristi usho umthandazo kubusisa sinkhwa nemanti. Bese yena noma lomunye umuntfu lonebuphristi unika emalunga eLibandla lucetu lwesinkhwa nemanti kutsi banatse. Loku kubitwa ngekutsi sidlo seNkhosi. Sidlo seNkhosi simiso.
Lesinkhwa nemanti timphawu tenyama nengati yaJesu. Tisisita sikhumbule kutsi wanikela* imphilo Yakhe ngenca yetfu. Kumele sikhumbule lutsandvo Lwakhe ngatsi. Kumele simbonge kutsi wente kwenteka kutsi sitsetselelwa tono tetfu siphindze sihlale futsi naBabe wetfu loseZulwini.
Ngasosonkhe sikhatsi uma sitsatsa sidlo seNkhosi, senta futsi letitsembiso lesatenta kuBabe wetfu loseZulwini mhla sibhajatiswa. Siyetsembisa futsi kutsi sitawuhlala simkhumbula Jesu, kutsi sitimisele kubitwa ngelibito Lakhe, nekutsi sitawuhlala njalo silalela imiyaleto Yakhe. Ngaphambi kwekutsatsa sidlo seNkhosi, kumele siphendvuke ngetintfo letingakalungi lesitentile siphindze sicabange ngetitsembiso lesitentile.
Babe wetfu loseZulwini usetsembisa kutsi uma senta letintfo lesetsembisa kutenta, utawutfumela Moya loNgcwele kutsi abe natsi imihla yonkhe.
Kubusiswa kweSinkhwa
Jesu usinike imithandazo lekhetsekile yesidlo seNkhosi. Lona ngumthandazo wesinkhwa:
“Awu Nkulunkulu, Babe waPhakadze, siyakucela egameni leNdvodzana yakho, Jesu Khristu, kutsi ubusise futsi ungcwelise lesi sinkhwa emiphefumulweni yabo bonkhe labo labasemukelako, kute basidle njengesikhumbuto semtimba weNdvodzana yakho, futsi bakhombise kuwe, Awu Nkulunkulu, Babe waPhakadze, kutsi bayavuma kubitwa ngelibito leNdvodzana yakho, futsi bayikhumbule njalo futsi bagcine imiyaleto yayo lebanikete yona; kute bahlale banaMoya wayo njalo. Amen.”
Kubusiswa kweManti
Lona ngumthandazo wemanti:
“Awu Nkulunkulu, Babe waPhakadze, siyakucela egameni leNdvodzana yakho, Jesu Khristu, kutsi ubusise futsi ungcwelise lamanti emiphefumulweni yabo bonkhe labo labawanatsako, kute bakwente loko njengesikhumbuto sengati yeNdvodzana yakho, leyacitselwa bona; kute bakhombise kuwe, Awu Nkulunkulu, Babe waPhakadze, kutsi bayayikhumbula njalo, kute babe naMoya wayo. Amen.”
Kucocisana
-
Yini sidlo seNkhosi?
-
Yini lekumele sicabange ngayo ngesikhatsi labaphetse buphristi babusisa baphindze bendlulisa sidlo seNkhosi?
-
Ngutiphi titsembiso lesitentako uma sitsatsa sidlo seNkhosi?
Kubusiswa kweBantfwana
Emadvodza lanebuphritsi angababusisa bantfwana, imvamisa emvakwemaviki lambalwa emvakwekutsi labantfwana batalwe. Kumele abe nemvumo yembhishobhi noma mengameli weligala kwenta loku. Uyise wemntfwana angambusisa lomntfwana uma anabo buPhristi bakaMelkhisedeki. Uma ete buPhristi bakaMelkhisedeki, angeke ambusise lomntfwana noma abekulesiyingi nalamadvodza labusisa lomntfwana. Angacela lomunye lophetse buphristi bakaMelkhisedeki kutsi abusise lomntfwana. Lobabe, uma abuphetse lobuphristi bakaMelkhisedeki futsi afanelekile, noma lomunye umuntfu lophetse lobuPhristi bakaMelkhisedeki, ubamba lomntfwana etandleni takhe, asitwe ngulabanye lekumele nabo baphatse buPhristi bakaMelkhisedeki, baphindze basho umthandazo. Kulomthandazo, ukhuluma naBabe wetfu loseZulwini, atsi wenta lesimiso ngeligunya lebuphristi bakaMelkhisedeki, aphindze anike lomntfwana libito lelikhetfwe batali. Ubese sowuyambusisa lomntfwana njengoba Moya loNgcwele amphefumulela.
Kucocisana
-
Yini umuntfu lonebuPhristi bakaMelkhisedeki lakwentako uma abusisa umntfwana?
Kubusiswa kweBantfu Labagulako
Uma bantfu bagula, bangacela emadvodza lanebuphristi bakaMelkhisedeki bababusise. Kwekucala, munye lophetse buphristi ugcobisa lomuntfu logulako. Wenta loku ngekubeka linani lemafutsa lamancane langcwele enhloko yalomuntfu, bese ubeka tandla takhe kulomuntfu aphindze asho umthandzo lokhetsekile. Emvakwaloko, lalabaphetse buphristi babeka tandla tabo enhloko yalomuntfu, bese munye wabo ubopha lomgcobiso aphindze abusise lomuntfu asaphefumulelwa nguMoya loNgcwele. Bantfu labanyenti bative bancono noma baphilisiwe ngekugula kwabo uma bemukele lesibusiso sebuphristi. Lokubusiswa kwebantfu labagulako kusimiso.
Lamafutsa lasentjetiswako kugcobisa bantfu labagulako angcweliselwe lenjongo le kulesinye simiso. Kungcwelisa lamafutsa, indvodza lenebuPhristi bakaMelkhisedeki iphatsa linani lelincane lawo esitjeni lesivulekile ibese isho umthandazo lokhetsekile.
Indvodza lenebuPhristi bakaMelkhisedeki ayiyidzingi imvumo kumbhishobhi, mengameli weligala, noma mengameli wesikhonkhwane kwenta leti timiso.
Kucocisana
-
Ngubani longabusisa bantfu uma bagula?
Babe angaBusisa Emalunga Emndeni wakhe
Babe lonebuPhristi bakaMelkhisedeki angabusisa emalunga emndeni wakhe. Angakwenta loku uma lelilunga lemndeni ligula noma lidzinga ngalenye indlela lusito lolukhetsekile. Akayidzingi imvumo kumbhishobhi, mengameli weligala, noma mengameli wesikhonkhwane kwenta loku. Lobabe ubeka tandla takhe enhloko yalomuntfu aphindze asho umthandazo. Kulomthandazo, unika lomuntfu letibusiso Moya loNgcwele lamtjela tona engcondvweni kutsi akatinike. Kubusisa emalunga emndeni simiso.
Kucocisana
-
Babe angawabusisa nini emalunga emndeni wakhe?
Letinye timiso tibaluleke kakhulu kangangobe Wonkhe Muntfu kumele atitfole
Letinye timiso tebuphristi tidzingekile kute umuntfu abuyele ahlale naBabe wetfu loseZulwini. Timbili taleto timiso ngumbhabhatiso nekwemukela sipho saMoya loNgcwele. Emadvodza nebafana kumele emukele buphristi. Leletinye timiso, njengetibusiso babe latinika emalunga emndeni wakhe, tentiwa uma sidzinga lusito noma indvudvuto.
Kucocisana
-
Ngutiphi letinye timiso?
-
Sibusiso sini lesiletfwa nguleso naleso?