Tinsita Letisisekelo
Sehluko 22: Kulalela
Image
Baptism of Christ [UmBhabhatiso waKhristu], ngu Greg Olsen

Jesu wakhombisa kumlalela Babe Wakhe ngekubhajatiswa.

Sehluko 22

Kulalela

Babe wetfu loseZulwini usitjele letintfo lekumele sitente kute sijabule futsi sibuyele sihlale Naye. Singafundza kanjani kwenta leti tintfo?

Babe wetfu loseZulwini Usinika Imitsetfo ngoba Uyasitsandza

Babe wetfu loseZulwini ufuna sijabule la emhlabeni ngoba uyasitsandza. Phindze ufuna sibuyele sihlale Naye kute sibe nalentfokoto lanayo. Singakwenta loku kuphela uma sisebentisa lelikhono lasinikete lona kutsi sifane Naye.

Babe wetfu loseZulwini uyati loko lokumele sikwente kute sifane Naye. Usinike imiyaleto lesitjela loko lokusilungele kutsi sikwente. Uphindze asitjele loko lokungakasilungeli kutsi sikwente.

Wonkhe umyaleto Babe wetfu loseZulwini lasinike wona kutsi sizuze futsi utosisita. Lemiyaleto le ingaba ticondziso kitsi etimphilweni tetfu, futsi uma siyilalela sitawujabula.

Sonkhe siyephulile imiyaleto yaBabe wetfu loseZulwini. Ngoba siyephulile lemiyaleto yaBabe wetfu loseZulwini, sonile. Ngoba sonile, sihlukaniswe naBabe wetfu loseZulwini. Sijeziso lesifanele ngenca yetono tetfu kutsi sihlukaniswe naBabe wetfu loseZulwini ingunaphakadze.

Kodvwa Babe wetfu loseZulwini uyasitsandza. Wente indlela yekubhadala inhlawulo ngenca yetono tetfu. Watfumela iNdvodzana Yakhe, Jesu, kutobhadala inhlawulo ngenca yetono yetfu. Jesu uyibhadele leyo nhlawulo, futsi singabuyela kuBabe wetfu loseZulwini ngekuba nelukholo kuJesu. Kuba nelukholo kuJesu kusho kumetsemba siphindze sibe balandzeli Bakhe labamlalelako. Labo labanelukholo kuJesu balalela imiyaleto Yakhe. Sinyatselo sekucala sekubuyela kuBabe wetfu loseZulwini kuba nelukholo kuJesu, kutama ngekweliciniso kumlalela. Bese, uma sichubeka nekwetsembeka kuJesu, utawusisita kutsi silalele yonkhe imiyaleto yaBabe wetfu loseZulwini, futsi Babe wetfu loseZulwini utawusicolela tono tetfu.

Leminye imiyaleto yaJesu yemalunga onkhe eLibandla. Lena uyinika emibhalweni lengcwele nangebaphrofethi Bakhe. Leminye imiyaleto uyinika tsine ngamunye, ngaMoya loNgcwele. Sibonelo, imibhalo lengcwele nebaphrofethi basitjela kutsi onkhe emalunga kumele asite kufundzisa livangeli kulabanye. Kodvwa Moya loNgcwele utawutjela ngamunye wetfu loko lesingakwenta ngamunye kufundzisa livangeli kumalunga etfu emndeni, bangani, nabomakhelwane. Uma sifundza imibhalo lengcwele, silalela emavi ebaphrofethi, siphindze silandzele kuhletjelwa nguMoya loNgcwele, sitawuhlala njalo sitati tintfo lekumele sitente.

Kucocisana

  • Imiyaleto yaBabe wetfu loseZulwini naJesu isikhombisa kanjani lutsandvo Lwabo kitsi?

  • Singakwati kanjani loko Babe wetfu loseZulwini naJesu labasitjele kutsi sikwente?

Wonkhe Umyaleto waBabe wetfu loseZulwini Ubalulekile

Kumele sitimisele kwenta yonkhe intfo Jesu lasiyaleta kutsi siyente. Yonkhe imiyaleto Yakhe ibalulekile futsi isisita kulungiselela kuhlala naBabe wetfu loseZulwini. LiBhayibheli lilandzisa ngendzaba yendvodza lebitwa ngaNamani. Abegula kakhulu futsi afuna umphrofethi Elisha kutsi amphilise. Washiya likhaya lakhe waya eveni lapho Elisha bekahlala khona. Elisha watfumela sitfunywa kutsi sitjele Namani kutsi akatigeze kasikhombisa emfuleni lobitwa ngeJordane, utawuphila.

Namani watfukutsela uma atjelwa kutsi akente loku. Watibuta kutsi kumele aye emfuleni iJordane leni, njengoba beyikhona imifula lemikhulu leminyenti lapho ahlala khona. Kodvwa nakube bekatfukutsele, Namani emvakwesikhatsi wancuma kulalela. Ngenca yekutsi walalela, waphila. Kube akatange alalela, abengeke aphiliswe.

Labanye bantfu bacabanga kutsi imiyaleto yaJesu ilukhuni kakhulu kuyilalela. Kwake kwabakhona lijaha lelalibitwa nga Nefi, lo, yena nebanakabo, wacelwa kutsi ente intfo tsite lelukhuni kakhulu. Jesu wabatjela kutsi babuyele edolobheni eJerusalema kuyolandza leminye imibhalo lengcwele lebalulekile. Bomnakabo batsi ngeke bakhone kukwenta. Bekulukhuni kakhulu. Kodvwa Nefi watsi utawenta njengoba Jesu amtjele kutsi akente. Watsi umaJesu asitjele kutsi asente intfo letsite, akukhatsalekile kutsi ibukeka ilukhuni kanganani kitsi, uyasisita kuyenta.

Jesu usitjele kutsi kumele sisebentele kufana Naye naBabe wetfu loseZulwini. Bekangeke asitjele kutsi sente loku ngaphandle kwekutsi ati kutsi singakwati kukwenta.

Jesu ufana naBabe wetfu loseZulwini ngoba akentanga sono. Sonkhe sonile, kodvwa singafana naBabe wetfu lose Zulwini ngekukholwa kuJesu nekuphendvuka.

Kulesinye sikhatsi angeke sesicondzisise sizatfu samunye wemiyaleto yaJesu. Kodvwa uma simtsandza Jesu futsi simetsemba, sitawenta loko lasitjela kutsi sikwente. Sitawulalela noma ngabe asicondzisisi kutsi leni asitjele kutsi asente intfo letsite. Adamu na-Eva benta loku. Jesu watjela Adamu na-Eva kutsi banikele imihlatjelo* kuBabe wetfu loseZulwini. Ngalelinye lilanga ingilosi yeta ku-Adamu yambuta kutsi kungani anikela imihlatjelo. Adamu watsi akati kutsi leni, ngaphandle kwekutsi Jesu umtjele kutsi akakwente. Lengilosi yabese itjela Adamu sizatfu salomtsetfo yaphindze yamfundzisa Adamu livangeli. Jesu wajabula nga-Adamu ngoba Adamu wamlalela nangaphambi kwekwati sizatfu salomtsetfo.

Kumele silalele imiyaleto yaJesu ngoba siyamtsandza futsi sifuna kumlalela. Babe wetfu loseZulwini utsite uyajabula ngalabo labafuna kulalela Jesu. Uyadzabuka uma bantfwana Bakhe bangamlaleli Jesu kuze kwenteke intfo letsite lebaphocelela kutsi balalele. Babe wetfu loseZulwini ufuna bonkhe bantfwana Bakhe bafundze kutsandza Jesu nekumlalela, ngoba ngulena kuphela indlela labangabuyela ngayo kuBabe wetfu loseZulwini.

Kucocisana

  • Kubaluleke leni kulalela imiyaleto yaJesu noma ibukeka imatima kakhulu kuyilalela?

  • Kumele siyilalele leni imiyaleto noma singayicondzisisi?

  • Kubaluleke leni kulalela ngoba sifuna kulalela?

Uma Sitsandza Babe wetfu loseZulwini, Sifuna Kulalela Jesu

Jesu wenta yonkhe intfo Babe wetfu loseZulwini lamyaleta kutsi ayente. Jesu wamlalela Babe wetfu loseZulwini ngoba bekamtsandza Babe wetfu loseZulwini. Sathane walinga Jesu kutsi angamlaleli Babe wetfu loseZulwini. Jesu akatange atente letintfo Sathane lamlinga kutsi akatente.

Umyaleto wekuCala naloBalulekile Kutsandza Babe wetfu loseZulwini

Uma sitsandza Babe wetfu loseZulwini, sitawufuna kumlalela njengoba naJesu enta. Singamtsandza Babe wetfu loseZulwini kakhulu uma sifundza kabanti Ngaye. Kumele sifundze Ngaye naloko lasentela kona. Sifundza loku ngekufundza imibhalo lengcwele nekulalela baholi beLibandla laJesu Khristu. Uma sitsandza Babe wetfu loseZulwini, sitawuphindze sitsandze naJesu ngenca yaloko Jesu lakwenta kusisita kutsi sibuyele kuBabe wetfu loseZulwini. Sifundza kutsandza Jesu ngekwenta letintfo lasiyaleta kutsi sitente. Njengoba lutsandvo ngaBabe wetfu loseZulwini naJesu luba lukhulu, kulalela imiyaleto Yabo kuba lula.

Umyaleto Lomkhulu wesiBili Kutsandza Bonkhe Bantfu

Jesu wasitjela kutsi sitsandze siphindze sisite labanye bantfu. Usitjele kutsi sibaphatse ngendlela lesifuna nabo basiphatse ngayo. Utsite akukameli sisho tintfo letimbi ngabo. Kumele sibacolele ngemaphutsa abo. Kumele sisite labanye ngayoyonkhe indlela lesingakhona ngayo.

Uma sitsandza Babe wetfu loseZulwini naJesu, sitsandza siphindze sisite labanye. Njengoba sitsandza siphindze sisebentela Jesu, nalabanye bantfu, kulalela yonkhe imiyaleto yaBabe wetfu loseZulwini naJesu kuba melula.

Kucocisana

  • Nguyiphi imiyaleto lemikhulu lemibili?

  • Sibonelo saJesu singasisita kanjani kulalela imiyaleto yaBabe wetfu loseZulwini?

  • Singafundza kanjani kutsandza Babe wetfu loseZulwini naJesu siphindze silalele imiyaleto Yabo?

Sonkhe Sibusiso Lesisemukelako Sita ngenca yeKulalela

Babe wetfu loseZulwini uyasibusisa uma silalela imiyaleto Yakhe. Utsembisa sibusiso ngamunye umyaleto lesiwulalelako. Noma kunini lapho silalela umyaleto, simukela sibusiso sekuwulalela. Uma singalaleli umyaleto, angeke sigadze kwemukela sibusiso lesitsenjisiwe.

Letinye tibusiso letifika ngekulalela imiyaleto yaBabe wetfu loseZulwini yinjabulo, inkhuleko ekwesabeni, imphilo lenhle, kanye nelwati nelikhono lolwengetekile. Sibusiso lesikhulu Babe wetfu loseZulwini lasitsembisa sona kutsi singafana Naye siphindze sihlale Naye ingunaphakadze. Singasemukela lesibusiso lesi ngekulalela yonkhe imiyaleto Yakhe.

Njengoba sitama ngebumnene kulalela imiyaleto yaBabe wetfu loseZulwini, kubalulekile kukhumbula kutsi singakwenta kuphela ngekusitwa nguJesu. Kumele siphindze sikhumbule kutsi uma singalaleli, Babe wetfu loseZulwini utawusicolela uma sibeka lukholo lwetfu kuJesu Khristu siphindze siphendvuka. Njengoba sonkhe sonile, kumele sibonge kakhulu ngeNhlawulo yaJesu Khristu. Ngenca yeNhlawulo Yakhe, Babe wetfu loseZulwini angasicolela aphindze asibusise futsi asisite kutsi silalele. Asiyuze sifanelwe tibusiso taBabe wetfu loseZulwini ngekwetfu.

Kucocisana

  • Ngutiphi tibusiso letingeta kuwe ngenca yekulalela Babe wetfu loseZulwini?

  • Jesu usisita kanjani kutfola leti tibusiso?

  • Singasemukela kanjani sipho lesikhulukati saBabe wetfu loseZulwini?

Print