Sendlalelo

Lencwadzi le itokusita kutsi ufundze uphindze ufundzise timiso letisisekelo selivangeli laJesu Khristu. Kwati leti timiso kutokusita kutsi ucondzisise injongo yemphilo nekutsi ungajabula njani ngempela. Letimiso letichaziwe kulencwadzi tiliciniso. Usafundza leti timiso, uzindla futsi uthandaza ngato, utawubanelwati ngekwakho, kani naMoya loNgcwele utawukufakazela, kutsi tiliciniso.

Lencwadzi ungayisebentisela tinjongo letinyenti letahlukene. Ungayisebentisa kufundza nekutifundzela wena. Ungayisebentisa kulungisela tinkhulumo noma kusita kuchazela labanye ngelivangeli.

Lencwadzi ungayisebentisa kufundza nemndeni, nakusihlwa ekhaya nemndeni. Sifundvo ngasinye sinemibuto lokungatsi wena njengemtali noma umfundzisi uyibute kubantfwana labancane kute ubone kutsi bacondzisisa kanganani.

Nawufundzisa tifundvo kulencwadzi, ungafundzisa ngetulu kwasinye sehluko ngesikhatsi seliklasi noma ucitse ngetulu kwasinye sikhatsi seliklasi sehluko sisinye. Yiba nesiciniseko kutsi bafundzi bakho bayasicondzisisa kahle simiso ngaphambi kwekuba uchubekele embili kulesinye sihloko. Nangabe imibhalo lengcwele seyihunyushiwe, buka tinkhomba temibhalo lengcwele nicoce ngato.

Njengemfundzisi, kubeke engcodvweni kutsi ungacishe ube na 21 kuya ku 25 wetikhatsi teliklasi kuphela ngemnyaka kufundzisa liklasi. Loku kusho kutsi kungaba nesidzingo sekuhlanganisa 10 noma ngetulu waleto tifundvo. Cabanga tidzingo teliklasi lakho bese uyancuma kutsi ngutiphi tifundvo longatihlanganisa nekutsi ngutiphi tifundvo longacitsa sikhatsi lesiningi kuto.

Nasekusondzele kuphela kwemnyaka ungaba nesifiso sekusebentisa linye noma mabili emaklasi nicocisane ngemiBhalo yeLukholo, lephindze ivele kulencwadzi. Usengayisebentisa lemiBhalo yeLukholo kubuyeketa letifundvo.

Batali nebafundzisi, thandazelani kucondziswa nisalungisa futsi nifundzisa leti tifundvo. Vumela kuholwa nguMoya loNgcwele ekucondzisiseni nasekufundziseni kwakho. Emalunga onkhe lakhonako kumele afundze tehluko aphindze ete alungele kwabelana nalamanye emalunga ekucocisaneni kweliklasi.

Nawubona ligama lelineluphawu *, ungatfola inchazelo yalo encenyeni “Emagama longaWati” lasekugcineni kwalencwadzi. Lamanye emagama afakiwe kukusita kutsi ucondzisise tinchazelo tawo.

Kwangatsi Nkulunkulu angakubusisa njengoba usafundza ngemthandazo emaciniso alencwadzi.