Kumele simukele sipho saMoya loNgcwele ngekubekwa tandla.

Sehluko 16

Sipho saMoya loNgcwele

Moya loNgcwele uyasisita kutsi sati siphindze sicondzisise tintfo letiliciniso. Singasemukela kanjani sipho saMoya loNgcwele?

Moya loNgcwele angasiholela Ecinisweni

Moya loNgcwele angabasita bantfu ngaphambi kwekuba babhajatiswe. Angamtjela umuntfu kutsi timfundziso taJesu tiliciniso. Ngalesinye sikhatsi usitjela kutsi singalitfola kuphi Libandla laJesu Khristu leliliciniso. Kodvwa Moya loNgcwele angeke ahlale natsi site sibhajatiswe futsi sinikwe sipho saMoya loNgcwele.

EThestamenteni leLisha sifundza ngendvodza lekutsiwa nguKhoneliyuse. Bekayindvodza lebeyingakabhajatiswa. Moya loNgcwele wamtjela kutsi timfundziso taJesu tiliciniso. Emvakwesikhatsi Khoneliyuse wabhajatiswa waphindze wemukela sipho saMoya loNgcwele.

Babe wetfu loseZulwini Usinike Indlela yeKwemukela Sipho saMoya loNgcwele

Sisafundza ngelisu laBabe wetfu loseZulwini ngatsi, sifuna kuphendvuka etonweni tetfu siphindze silalele yonkhe intfo Jesu lasitjela kutsi siyente. Kodvwa angeke sesikwente loku ngaphandle kwelusito. Sipho saMoya loNgcwele lilungelo lekuba nelusito kuMoya loNgcwele ngaso sonkhe sikhatsi. Simukela lesi sipho masinyane emvakwekubhajatiswa.

Kumele silungiselele kute semukele sipho saMoya loNgcwele. Kumele sikholelwe kuJesu siphindze setame kamatima kwenta loko lasilayetela kona. Kumele siphendvuke etonweni tetfu siphindze sibhajatiswe.

Emvakwekubhajatiswa, laba labaneligunya lelibuya kuBabe wetfu loseZulwini babeka tandla enhloko yetfu, basinika sipho saMoya loNgcwele, basente sibe ngemalunga eLibandla laJesu Khristu Lalabangcwele Betinsuku Tekugcina ngalokusemtsetfweni. Baphindze basibusise.

Kucocisana

Sisemukela njani sipho saMoya loNgcwele?

Tinyenti tindlela Moya loNgcwele longasisita ngato. Angasiletsela imilayeto lebuya kuJesu. Angasifundzisa tintfo letinyenti ngaJesu naBabe wetfu loseZulwini.

Ungasisita sikwati kutsi singaticatulula kanjani tinkinga tetfu. Ungasidvudvuta. Ungasisita kuncoba tono tetfu. Ungasisita kwenta tintfo letilungile.

Moya loNgcwele angasisita kucondzisisa siphindze sitsandze labanye. Angasisita kwati kutsi singabasita kanjani. Angasisita kucondzisisa timfundziso taJesu. Angasisita kutsi sati kutsi yini lesingayisho kufundzisa labanye bantfu ngaBabe wetfu loseZulwini naJesu.

Kucocisana

Ngutiphi letinye tindlela sipho saMoya loNgcwele lesingaba nemtselela etimphilweni tetfu?

Kumele Siphendvuke eTonweni tetfu kute Sibe Nalesi Sipho

Ngesipho saMoya loNgcwele singaba bantfu labancono siphindze sente tintfo letilungile. Singaba njengaBabe wetfu loseZulwini. Kodvwa kumele setame njalo kwenta tintfo letilungile nakungenjalo, Moya loNgcwele angeke ahlale natsi. Kumele setame kucabanga imicabango lemihle. Kumele setame kulandzela timfundziso taJesu. Uma senta intfo lengakalungi, kumele siphendvuke. Sisetame kwenta tonkhe leti tintfo, Moya loNgcwele uyasisita.

Ngalesinye sikhatsi Moya loNgcwele uyasihola usibangele kutsi sibe nemuzwa lofutfumele, umuzwa lonekuthula etinhlitiyweni tetfu. Uma sicala kwenta intfo lengakalungi, lomuzwa wenjabulo uyasishiya. Ngalesinye sikhatsi singeva livi etingcondvweni tetfu likhuluma natsi, lisitjela kutsi senteni noma singenti ini. Kumele sihlale njalo silungele kulalela nekutfobela loko Moya loNgcwele lositjela kona, ngoba Moya loNgcwele njalo nje usitjela loko Jesu lafuna sikwente, futsi ngekulalela Jesu kuphela singabuyela kuBabe wetfu loseZulwini.

Uma singamlaleli Moya loNgcwele futsi uma sicala senta tintfo letingakalungi, Moya loNgcwele uyasishiya. Angeke uhlale natsi noma asisite uma singenti tintfo letilungile. Kodvwa uma silalela kucondziswa Nguye, Moya loNgcwele utohlala natsi njalo. Usisita ekubeni bantfu labancono nasekulungiseleleni imphilo naBabe wetfu loseZulwini.

Kucocisana

Yini lekumele siyente kute Moya loNgcwele asisite?

Simukela Letinye Tibusiso Letikhetsekile ngaMoya loNgcwele

Letinye tibusiso letikhetsekile lesitemukela ngaMoya loNgcwele tibitwa ngekutsi tipho takamoya. Jesu unika leti tipho kumalunga eLibandla leliliciniso noma nini lapho Libandla Lakhe likhonakhona emhlabeni. Usinika letitipho ngemandla aMoya loNgcwele. Kumele sicondzise leti tipho kute sitisebentise ngekuhlakanipha.

Sipho seKukhuluma Letinye Tilimi

Sinye sipho sisita bantfu bakhulume tilimi letinye. Sinye setizatfu Jesu anika lesi sipho kubantfu kutsi abasite bafundzise livangeli kubantfu labakhuluma letinye tilimi.

Sipho seKuhumusha Lolunye Lulwimi

Lesinye sipho lesisita bantfu labatjelwa ngelivangeli. Lesipho sekuhumusha letinye tilimi sibasita kutsi bacondzisise umlayeto lobuya kuJesu lokhulunywa ngelulwimi labangalwati.

Sipho seKwati Kutsi Jesu yiNdvodzana yaBabe wetfu loseZulwini

Lesinye sipho sisita bantfu bati kutsi Jesu yiNdvodzana yaBabe wetfu loseZulwini. Imibhalo lengcwele itsi bantfu bangati kutsi Jesu nguMsindzisi wetfu kuphela uma Moya loNgcwele abasita kutsi bati. Lesipho lesi singufakazi lobuya kuMoya loNgcwele kutsi Jesu yiNdvodzana yaBabe wetfu loseZulwini ngekweliciniso nekutsi nguMsindzisi wemhlaba.

Sipho seKukholelwa Bufakazi Balabanye

Sipho sekukholelwa bufakazi balabanye sisita bantfu bati kutsi tintfo lomunye latishoko tiliciniso. Moya loNgcwele usisita kutsi sibone bufakazi beliciniso siphindze sibukholwe.

Sipho seLukholo

Sipho selukholo sisisita kulalela imiyaleto yaJesu. Ngaphandle kwelukholo angeke simukele noma ngutiphi letinye tipho takamoya. Ngaphandle kwelukholo angeke sibuyele kuBabe wetfu loseZulwini. Liningi lebantfu banelukholo lolucinile kuJesu. Munye webaphrofethi eNcwadzini yaMormon bekanelukholo lolukhulu kuJesu wate Jesu wavela kuye. UmPhrofethi Joseph Smith bekanelukholo lolucinile kuJesu Khristu kangangobe Babe wetfu loseZulwini naJesu bavela kuye.

Sipho seKuhumusha

Sipho sekuhumusha sisita bantfu bahumushe emavi labhaliwe aBabe wetfu loseZulwini naJesu nebalandzeli Bakhe kusuka elulwimini lunye kuya kulolunye. UmPhrofethi Joseph Smith bekanaso lesi sipho uma ahumusha INcwadzi yaMormon. Lesi sipho sisita umhumushi acondzisise inchazelo lefanele yemlayeto bese sewuyihumusha ngendlela lefanele.

Sipho seLwati

Sipho selwati sisita bantfu bacondzisise umsebenti waBabe wetfu loseZulwini naJesu. Babe wetfu loseZulwini utsite angeke sibuyele kuye uma singati noma singaticondzisisi letintfo lafuna kutsi sitente. Kumele sati lelisu Babe wetfu loseZulwini lasiniketa lona kute sibuyele kuye.

Jesu utsite lolwati lesiluzuza kulemphilo le lutawusisita eveni lamoya emvakwekufa. Ufuna sati ngetimfundziso nemiyaleto Yakhe, ngelizulu nemhlaba, ngetintfo letentekile, nangetitfo emaveni etfu nakulamanye emave. Utsite asisebentise lolwati ngekuhlakanipha. Kumele sicele lusito lwaMoya loNgcwele ekufuneni lolwati.

Sipho seKuhlakanipha

Lesipho lesi sisita bantfu basebentise ngendlela lefanele lwati Babe wetfu loseZulwini labanike lona. Kumele sisebentise lesi sipho kutfutfukisa timphilo tetfu nekufundzisa nekunika seluleko lesihlakaniphile kulabanye.

Sipho seKufundzisa

Sipho sekufundzisa sisita bantfu bafundzise livangeli kulabanye ngendlela yekutsi bacondzisise. Singaba naso lesipho kuphela uma sinelukholo kuJesu futsi nangekufundza nemthandazo.

Sipho sekuPhrofetha

Sipho sekuphrofetha sisita bantfu bati baphindze bacondzisise tintfo letentekile esikhatsini lesindlulile, tintfo letenteka nyalo, kanye netintfo letitawenteka esikhatsini lesitako. Baphrofethi baniketwa lesi sipho, kodvwa natsi singaba naso kusihola etimphilweni tetfu.

Sipho seKwembulelwa*

Moya loNgcwele uveta kubantfu tintfo letitabasita. Ngamunye wetfu singemukela sembulo kute kuzuze tsine. Kodvwa tembulo teLibandla lonkhe tinikwa umphrofethi kuphela. Angeke simukele sembulo semuntfu longumholi wetfu eBandleni. Yonkhe intfo Moya loNgcwele layivetako kitsi itovumelana naleleminye imiyaleto netimfundziso taBabe wetfu loseZulwini naJesu.

Sipho seKuphilisa

Sipho sekuphilisa sisita bantfu labagulako babencono. Labanye baba nelukholo kutsi bangaphiliswa futsi labanye baba nelukholo kutsi bangaphilisa labanye bantfu.

Sipho seKwenta Timangaliso

Sipho sekwenta timangaliso siniketwa kusita bantfu. Simangaliso yintfo letsite Babe wetfu loseZulwini lasentela yona lokukhulu kwendlula emandla tsine ngekwetfu lesinawo ekukwenta. Jesu utsite eThestamenteni leLisha naseNcwadzini yaMormon kutawuba netimangaliso phakatsi kwalabo labakholelwa Kuye.

Sathane angawalingisela Lawa Mandla akaMoya

Sathane angabangela tintfo tenteke letilingisa tipho takamoya teliciniso. Angatenta aphose afanane nengilosi. Angenta tintfo letikhohlakele tibukeke titinhle futsi tilungile. Angamenta umphrofethi wemanga abukeke angumphrofethi weliciniso. Angatenta timangaliso kukhohlisa bantfu. Batsakatsi, tangoma, lababhulako, nalabanye labafana nabo bemukela lawo mandla labanawo kuSathane abasibo balandzeli baJesu. Kumele sihlalele kudze nabo.

Sathane angenta tintfo tibukeke tiliciniso kangangekutsi lokungaba nguyona ndlela kuphela yekwati kutsi tingemanga kubuta kuBabe wetfu loseZulwini. Sitawuba nemuzwa wekungabata, hhayi umuzwa wekuthula, uma Sathane nebalandzeli bakhe balingisa letipho takamoya. Sipho sekwati uma tipho takamoya tingito ngempela noma uma tingumfanekiso waSathane sibitwa ngekutsi sipho sekucondza.

Kucocisana

Yini tipho takamoya?
Singehlukanisa kanjani emkhatsini wetipho takamoya teliciniso nemfanekiso waSathane?

Kumele Sisebente kuTfutfukisa nekuSebentisa Tipho Lesinato

Singafundza kutsi ngutiphi tipho lesinato uma sifundza, sizila, siphindze sithandaza. Singasebentisa tipho tetfu kuphela uma silalela imiyaleto yaJesu. Singabese siyafuna kutisebentisa kusita labanye nekusita kwakha Libandla laJesu Khristu Lalabangcwele Betinsuku Tekugcina. Uma singatitfutfukisi futsi singatisebentisi tipho tetfu, titosilahlekela.

Jesu utsite kumele singatichayisi ngetipho takamoya lesibusiswe ngato. Kumele singakhulumi ngato kubantfu labangeke baticabange kutsi tingcwele. Leti tipho tiniketwe tsine kutsi sizuze nekutsi sibusise labanye bantfu. Kumele sikhumbule kutsi letipho leti tingcwele. Jesu usinika leti tipho ngaMoya loNgcwele. Ucela kutsi simbonge nje kuphela siphindze sisebentise leti tipho ngendlela lafuna sitisebentise ngayo.

Kucocisana

Singatfola kanjani kutsi ngutiphi tipho lesinato?
Singatigcina kanjani tipho takamoya tingcwele?