Khristu wakwenta kwenteka kutsi siphile emvakwekutsi sife.
Sehluko 35
Imphilo emvakweKufa
Singayilungiselela kanjani imphilo lelandzelako?
Imimoya yetfu Iyaphila emvakwekutsi Sife
Sibantfwana bamoya baBabe wetfu loseZulwini. Sisahlala Naye ezulwini njengemimoya, besite imitimba yenyama. Bekuyincenye yelisu Lakhe ngatsi kutsi sitalwe la emhlabeni nekutsi imimoya yetfu itfole imitimba yenyama nematsambo. Imimoya yetfu nguyona inika imphilo emitimbeni yetfu yenyama sisaphila emhlabeni.
Njengoba kutalwa kwakuyincenye yelisu laBabe wetfu loseZulwini, lenye incenye yelisu Lakhe ngatsi kutsi sife. Uma sifa, imimoya yetfu ishiya imitimba yetfu. Ngaphandle kwemoya, umtimba ute imphilo futsi ubekwa ethuneni.
Kodvwa imimoya yetfu yaphila ngaphambi kwekutalwa kwetfu, futsi isatochubeka iphile emvakwekufa. Uma sifa, imimoya yetfu itawukuya eveni lemoya kuyomela kuvuka, kodvwa umtimba uyawusala ethuneni.
Eveni lemoya imimoya yetfu itawuba nesimo lesifanako nangesikhatsi siphila emhlabeni ngemitimba yenyama nematsambo. Sitawubukeka njengoba sibukeka lapha. Sitawucabanga ngendlela lefanako siphindze sikholelwe tintfo letifanako njengoba sasenta lapha. Labo labalungile kulemphilo le batawube solo balungile. Labo labangakalungi batawube solo bangakalungi. Sitawuba netifiso letifanako emvakwekufa njengoba sasinato lapha emhlabeni.
Kucocisana
-
Imitimba yetfu yamoya yabuya kuphi?
-
Kwentakalani kuyo uma sifa?
-
Injani imitimba yemoya?
Live Lamoya Yindzawo yeKusebenta, Kufundza, kanye neKulindza
Baphrofethi baBabe wetfu loseZulwini basitjlele tintfo letinyenti ngelive lakamoya. Lenye indzawo ibitwa ngekutsi yipharadesi. Uma umuntfu afa lomukele livangeli futsi ube ngumlandzeli lotsembekile kuJesu, umoya waloyo muntfu uya epharadesi. Lena yindzawo lapho bantfu bajabulile futsi banekuthula. Lapha bakhululekile ekukhatsatweni, lusizi, kanye nebuhlungu. Bangenta tintfo letibalulekile, letifana nekufundzisa labanye ngelivangeli noma kufundza kabanti ngalo nabo ngekwabo.
Lelenye indzawo ibitwa ngekutsi lijele lamoya. Luhlobo lwebantfu labatsatfu labatawuba le. Kutawuba nalabo labakhohlakele kulemphilo le, labo labaphila timphilo letinhle kodvwa bangalemukeli livangeli, nalabo labangatange balitfole litfuba lekuva livangeli.
Baphrofethi baBabe wetfu loseZulwini basitjelile kutsi bafundzisi belivangeli batawutfunyelwa phakatsi kwalabalungile eveni lemoya kutsi bafundze livangeli kuyo yonkhe imimoya yebantfu labafile. Labanyenti batawulemukela livangeli baphindze baphendvuke. Timiso letisindzisako letidzingekile tiyawentelwa bona bantfu labaphilako emathempelini aBabe wetfu loseZulwini. Tihlobo noma lamanye emalunga eLibandla abentela leti timiso. Batawubese sebayakhona kuphuma ejele lamoya. Ngalena ndlela, Babe wetfu loseZulwini uniketa litfuba kubo bonkhe bantfwana Bakhe kutsi bamukele tibusiso telivangeli akukhatsalekile kutsi baphila nini emhlabeni.
Ekugcineni bonkhe labo labaseveni lamoya batawuvuswa. Ekuvukeni, nemoya nemtimba kutohlanganiswa ndzawonye futsi. Nanoma umtimba sewubolile futsi waba lutfuli usesethuneni, utawuba ngumtimba longabhubhi futsi lophelele. Imibhalo lengcwele iyasho kutsi kute ngisho lunwele enhloko loluyawulahleka nekutsi tonkhe tintfo titawubuyiselwa eluhlakeni lwato lolufanele naloluphelele.
Ekuvukeni umtimba nemoya kutawuhlanganiswa, akuyuphindze kuhlukaniswe futsi. Ngelutsandvo Lwakhe nangemhlatjelo Wakhe lomkhulu lohlawulako ngatsi, Jesu wanika lesi sipho lesimangalisako sekuvuka kuwo wonkhe umuntfu loke waphila kulomhlaba.
Kucocisana
-
Ngutiphi tigaba letimbili letikhona eveni lamoya?
-
Ngubani lotawukuba sepharadesi? Imimoya lese pharadesi itawentani?
-
Ngubani lotawukuba sejele lamoya? Kwentekani le?
Sitawuhlulelwa Sonkhe eKuhlulelweni kweKugcina
Siyehlulelwa esikhatsini lesinyenti phakatsi netimphilo tetfu taphakadze. Sehlulelwa sisaphila naBabe wetfu loseZulwini kubona kutsi sifanelekile yini kuta la emhlabeni kutotfola imitimba. Siyehlulelwa siselapha kubona kutsi sifanelekile yini kutsi sibhajatiswe. Emadvodza ayehlulelwa kubona kutsi afanelekile yini kuniketwa buphristi. Siyehlulelwa kubona kutsi sifanelekile yini kungena ethempelini kute simukele tibusiso letikhetsekile. Emvakwekufa, siyehlulelwa, futsi umvuzo lesitawutfola utoya ngekutsi siphile kanjani emhlabeni.
Emvakwekuvuswaswa, sitawuletfwa embikwaBabe wetfu loseZulwini kutohlulelwa kwekugcina. Loku kubitwa ngekutsi Kwahlulelwa Kwekugcina. Kwahlulelwa kwekugcina kutawuhlukaniswa kutsi sitawuya kuphi kuyawuphila ingunaphakadze. Sitawuhlulelwa ngetintfo lesitishito nalesitentile nalesiticabangile kulemphilo le. Sitawehlulelwa ngekutsi sitilandzele kahle kangakanani timfundziso taJesu. Sitawuhlulelwa ngemibhalo legciniwe ezulwini nasemhlabeni. Babe wetfu loseZulwini utawukwenta kutsi Jesu asehlulele.
Jesu usitsandza kakhulu, kodvwa ungumehluleli lolungile futsi kumele asehlulele ngendlela lebesiphila timphilo tetfu ngayo. Konkhe lesikucabangile noma lesikushito noma lesikwentile kuyabhalwa, etingcondvweni tetfu nasemibhalweni legciniwe. Jesu utati tonkhe tento tetfu, futsi uma sima embikwakhe sitokhumbula, natsi.
Kucocisana
-
Shano letinye tikhatsi lapho sehlulelwa khona.
-
Ngutiphi letinye tintfo lesitawuhlulelwa ngato?
Sincuma ngeTento tetfu Temalanga Onkhe Loko Lokutawenteka kitsi emvakwekufa
Uma senta loko lokulungile ngesikhatsi sekuphila kwetfu, sitawutilungiselela ngekwetfu kuhlala ingunaphakadze naBabe wetfu loseZulwini nalabantfu labalungile balamhlabeni. Uma singakayilandzeli imiyaleto yaBabe wetfu loseZulwini, sitawuva kabi kakhulu uma sima ngaphambi kwaJesu kutawehlulelwa.
Baphrofethi bashito kutsi emavi etfu, imicabango yetfu, nayo yonkhe imisebenti yetfu itawusilahla uma ibe ngulemibi. Bashito kutsi lababi batawukuma ngaphambi kwaJesu ngemahloni nelicala lelibi baphindze bafise kutifihla ebukhoneni Bakhe.
Ngamunye umuntfu lophilile la kulomhlaba, bese, lilanga lekwahlulelwa kwekugcina kutawuba lilanga lelimangalisako noma lilanga lekudzabuka. Kumele silungiselele lesikhashana lesi lesitako kute kwetfu kube lilanga lekujabula. Sifuna kukhona kuma embikwaBabe wetfu loseZulwini ngaphandle kwemahloni siphindze simuve atsi uyavumelana naloko lesakwenta ngesikhatsi sekuphila kwetfu.
Kumele sicabange ngaloku kwehlulelwa kwekugcina. Kumele sitsembeke kuJesu Khristu siphindze siphendvuke etonweni tetfu kute kube sekugcineni kwekuphila kwetfu kute sikulungele. Nguleyo kuphela indlela lesingakhululeka ngayo kuso sonkhe sono uma leso sikhatsi sifika. Uma sinelukholo kuJesu Khristu siphindze siphendvuka kuto tonkhe tono tetfu, Babe wetfu loseZulwini utawusitsetselela tono tetfu aphindze asisite sibete sono ngalokuphelele. Uma sitsembekile kuJesu Khristu, sitawucitsa kuphila kwetfu senta tintfo letilungile, sicabanga imicabango lemihle, siphindze sikhulume emavi lalungile. Sitawugwema bantfu, tincwadzi, netindzawo letiyawusibangela kutsi sicabange imicabango lemibi noma singalungi nganoma nguyiphi indlela.
Babe wetfu loseZulwini utsandza ngamunye wetfu futsi usifuna sihlale singulabafanelekile kubuyela ebukhoneni Bakhe. Uma sifisa kuhlala Naye nalabantfu labalungile lesibatsandzako, kumele sibe nelukholo kuJesu Khristu siphindze sente letintfo lasiyaleta kutsi sitente. Kumele siphindze sisite imindeni yetfu kutsi iphile timphilo letilungile. Babe wetfu loseZulwini utawusisita. Usinike livangeli kusikhombisa indlela futsi usitjele kutsi singathandaza imihla yonkhe Kuye ngelusito Lwakhe.
Kucocisana
-
Imicabango netento tetfu temalanga onkhe tibaluleke ngani kakhulu?
-
Yini longayenta kutfutfukisa imicabango yakho, emavi, kanye netento?
-
Siludzingelani lusito lwaBabe wetfu loseZulwini kuba ngulabaphelele?
-
Kungani kungelukholo kuJesu Khristu kuphela singahlulelwa njengalabafanelekile kuhlala naBabe wetfu loseZulwini?