Tinsita Letisisekelo
Sehluko 19: Libandla laJesu Khristu Namuhla

Sehluko 19

Libandla laJesu Khristu Namuhla

Singalitfola kuphi livangeli leliliciniso laJesu Khristu lamuhla?

Iminyaka Leminyenti Libandla laJesu Khristu Belingekho Emhlabeni

Jesu wahlela Libandla Lakhe uma alamhlabeni. Libandla Lakhe lahlala lamhlabeni sikhashana emvakwekubuyela Kwakhe eZulwini. Uma bantfu bayekela kufundzisa nekukholelwa timfundziso Takhe teliciniso, Jesu watsatsa buphristi neLibandla Lakhe emhlabeni.

Iminyaka leminyenti, bantfu baphila ngaphandle kwelivangeli leliciniso neLibandla laJesu Khristu. Labantfu bahlela emabandla lamanyenti, lasekelwe emibonweni yabo nakuletinye timfundziso taseBhayibhelini. Kodvwa lawa mabandla bekete buphristi baBabe wetfu loseZulwini. Bekete tonkhe timfundziso taJesu. Bekete sembulo lesichubekako lesibuya kuJesu. Bekete tonkhe tipho takamoya.

Labantfu bacala bafuna kwati liciniso ngaBabe wetfu loseZulwini. Bacala bafuna liciniso ngaBabe wetfu loseZulwini netimfundziso Takhe. Labanye babo babona kutsi livangeli leliliciniso neLibandla laJesu Khristu besekungekho emhlabeni. Babe wetfu loseZulwini wati kutsi sikhatsi sesifikile sekubuyisela livangeli leliliciniso neLibandla laJesu Khristu emhlabeni.

Kucocisana

  • Jesu wabutsatselani buphristi emhlabeni?

  • Emabandla bantfu labawahlela bekangasilo leni Libandla laJesu Khristu?

First Vision [Umbono wekuCala], nguWalter Rane

Babe wetfu loseZulwini naJesu bavakashela Joseph Smith.

Babe wetfu loseZulwini wagcina setsembiso Sakhe Kubuyisela emuva Libandla leLiliciniso

Babe wetfu loseZulwini utsandza bonkhe bantfwana Bakhe. Ufuna bati loko lekumele bakwente kute bahlale Naye emvakwekutsi bafe baphindze bavuswe. Ngaphambi kwekususa leLibandla leliliciniso laJesu Khristu emhlabeni, Jesu watjela baphrofethi nebaPhostoli kutsi loku kutawenteka. Waphindze watsembisa kutsi ngalelinye lemalanga utawubuyisela leLibandla emhlabeni. Utawukwenta loku uma sekunebantfu futsi labalungele kwemukela livangeli leliliciniso.

Jesu Ulibuyisele Libandla Lakhe Emhlabeni

Jesu ulibuyisele Libandla emhlabeni ngeligunya nangetibusiso letifanako njengeLibandla lalihlela asaphila emhlabeni. Wonkhe umuntfu lotimisele kulalela imiyaleto Yakhe angaba lilunga leLibandla Lakhe.

Babe wetfu loseZulwini Wakhetsa Joseph Smith kusita Kubuyisela leLibandla

Emnyakeni wa 1820, Jesu wacala kubuyisela livangeli leliliciniso neLibandla emhlabeni. Lijaha lelalibitwa ngaJoseph Smith belifuna kwati kutsi nguliphi libandla bekuLibandla laJesu Khristu. Wafundza eBhayibhelini kutsi umuntfu lofuna kwati intfo letsite kumele abute Babe wetfu loseZulwini. Wancuma kubuta Babe wetfu loseZulwini kutsi nguliphi libandla lebekumele abe lilunga lalo. Waya ehlatsini madvute nelikhaya lakubo wayobuta Babe wetfu loseZulwini kutsi nguliphi Libandla lekumele abe lilunga lalo. Babe wetfu loseZulwini naJesu bavela kuJoseph Smith. Babe wetfu loseZulwini watjela Joseph kutsi akalalele Jesu aphindze amtfobele. Jesu watjela Joseph kutsi akangabi lilunga lanoma nguliphi lalamabandla. Watsi Libandla leliliciniso alikho emhlabeni.

Sembulo lesinjengalesi lesibuya kuBabe wetfu loseZulwini sisengakemukelwa kusukela livangeli leliliciniso neLibandla laJesu Khristu lesuswa emhlabeni. Kusukela kuleso sembulo, letinye tembulo letinyenti setifikile. Babe wetfu loseZulwini wakhetsa Joseph Smith kutomelela Yena emhlabeni. Jesu wabuyisela livangeli leliliciniso neLibandla laJesu Khristu ngaJoseph Smith.

Kucocisana

  • Joseph Smith wawubonelani umbono?

BuPhristi baBuyiselwa

Buphristi babuyiselwa emhlabeni nga1829. Johane uMbhabhatisi weta asuka ezulwini wafike wanika lelinye leligunya lebuphristi kuJoseph Smith ngekubeka tandla takhe enhloko yaJoseph. Leligunya leli lebuphristi libitwa ngekutsi buPhristi baka-Aroni. Johani uMbhabhatisi, lowabuyisela leli ligunya lebuPhristi, bekunguye yena loyo muntfu lowabhabhatisa Jesu. Phetro, Jakobe na Johane, batsatfu bebaPhostoli bekucala, nabo beta baphindze banika Joseph ligunya lebuPhristi lelingetiwe. Leli ligunya lebuPhristi libitwa ngekutsi buPhristi bakaMelkhisedeki.

Labanye baphrofethi, labafaka ekhatsi Mosi na-Elija, nabo beta baphindze banika Joseph Smith ligunya lekwenta leminye imisebenti lengcwele. Leligunya lelibuya kuBabe wetfu loseZulwini lekufundzisa livangeli, lekwenta imisebenti lengcwele, nekuhola Libandla seliphindze likhona emhlabeni.

Kucocisana

  • Joseph Smith wabemukela kanjani kucala buphristi?

Jesu waHlela Libandla Lakhe futsi

Ngesembulo, Jesu wacondzisa Joseph kutsi ahlele Libandla Lakhe futsi, ngamhlaka 6 Mabasa 1830. Jesu bekayinhloko yeLibandla Lakhe uma asaphila emhlabeni. Uyinhloko yeLibandla Lakhe nyalo. Emalunga eLibandla Lakhe asabitwa ngaLabangcwele.

Jesu wacamba Libandla Lakhe lamuhla kutsi Libandla laJesu Khristu Lalabangcwele Betinsuku Tekugcina. Lamagama Lusuku Lwekugcina ayakhombisa kutsi leli Libandla laJesu Khristu esikhatsini lesitako emhlabeni. Jesu watsi leli Libandla ngilo kuphela Libandla leliliciniso emhlabeni wonkhe nekutsi uyatfokota ngalo.

Jesu ukhetsa umphrofethi kutohola leLibandla emhlabeni. Jesu ucondzisa lomphrofethi. Unika lomphrofethi ligunya lekuhola leLibandla. Joseph Smith bekangumphrofethi wekucala weLibandla laJesu Khristu Lalabangcwele Betinsuku Tekugcina. Umphrofethi waleLibandla uphindze abitwe ngekutsi nguMengameli weLibandla. LoMengameli unemadvodza lamsitako. Babitwa ngekutsi Beluleki. Uma umphrofethi afa, Jesu ukhetsa umphrofethi lomusha kutsi atsatse indzawo yakhe.

Jesu uphindze akhetse baPhostoli labalishumi nakubili kusita kuhola leLibandla. Emadvodza lakhetsiwe kuba ngemalunga eKhoramu yaLabangemashumi Lasikhombisa basita baPhostoli naMengameli. Lamanye emadvodza lalungile nebafana nabo bayabemukela buphristi baphindze basebente eBandleni. Babitwa ngekutsi baphristi labakhulu, babonisi, babhishobhi, baphristi, bafundzisi kanye nebadikhoni njengoba bebabitwa eBandleni laJesu Khristu laphambilini.

Jesu watjela Joseph Smith kutsi Libandla Lakhe lihlelwe kanjani. Uma Libandla lihlelwe ngalokuphelele endzaweni, leyo ndzawo yatiwa ngesikhonkhwane.* Mengameli uhola lesikhonkhwane. Une beluleki lababili kumsita.

Sikhonkhwane sehlukaniswe ngetindzawo letincane. Leti tindzawo tatiwa ngekutsi ngemawadi.* Umholi webuphristi lobitwa ngekutsi ngumbhishobhi uhola leliwadi. Une beluleki lababili kumsita.

Etindzaweni lapho sikhonkhwane sisengakahlelwa, kungaba netifundza,* letakhiwe ngemagala. Emagala aholwa nguMengameli nebeluleki lababili. Letindzawo lapho kunebafundzisi belivangeli labanyenti labafundzisa livangeli libitwa ngekutsi ngemamishini.*

Emadvodza lanebuPhristi aHlelwe ngemaKhoramu

Emadvodza laphetse buphristi ahlelwa ngemacembu labitwa ngeKhoramu. Ikhoramu yebuphristi licembu lemadvodza leliphetse lihhovisi lelifanako ebuphristini. Bayahlangana basitane baphindze basite labanye bantfu.

Kucocisana

  • Ngubani inhloko yeLibandla laJesu Khristu namuhla?

  • Lamadvodza lasita kuhola Libandla abitwa ngekutsi yini?

Libandla Namuhla liHlelwe Ngendlela Lefanako njengeLibandla Jesu laliHlela uma asesEmhlabeni

Jesu Usahola Libandla Lakhe ngeSembulo

NgaMoya loNgcwele, Jesu utjela umphrofethi kutsi kumele alihole kanjani Libandla. Uphindze avete kumPhostoli nalabanye baholi beLibandla loko lafuna bakwente. Ngesembulo, Jesu uyachubeka uhola emalunga eLibandla Lakhe.

Noma ngubani Angaba Lilunga leLibandla

Noma ngubani angaba lilunga leLibandla laJesu Khristu nyalo ngendlela lefanako bantfu lababa malunga eLibandla Lakhe uma aseselamhlabeni. Lomuntfu kumele abe nelukholo kuJesu aphindze aphendvuke. Lomuntfu kumele abhajatiswe. Emvakwekutsi lomuntfu abhajatiswe, wemukela sipho saMoya loNgcwele.

Kucocisana

  • Yini lekumele siyente kute sibe ngemalunga eLibandla laJesu Khristu nyalo?

Emalunga eLibandla Namuhla emukela Tipho Takamoya

Jesu njalo nje unika tipho takamoya kumalunga eLibandla. Onkhe lawa mandla akamoya aseBandleni namuhla.

Kucocisana

Jesu Wabuyisela Timfundziso Takhe Teliciniso

Jesu ubuyisele letimfundziso Yena nebaPhostoli Bakhe labatifundzisa. Lesisekelo setimfundziso lukholo kuJesu Khristu, kuphendvuka, umbhabhatiso kanye nesipho saMoya loNgcwele. Lamanye emaciniso labalulekile Jesu lawanike Libandla Lakhe ngunawa:

  1. Babe wetfu loseZulwini unemtimba wenyama nematsambo.

  2. Sibantfwana bamoya baBabe wetfu loseZulwini. Saphila Naye ezulwini njengemimoya ngaphambi kwekube sitalwe emhlabeni.

  3. Sitawujeziswa kuphela ngetono tetfu lucobo hhayi ngaloko Adamu lakwenta. Bantfu labanyenti bakholelwa kutsi ngoba Adamu na-Eva badla sitselo lebesingakavumeleki, tsine, bantfwana babo, sitoni uma sitalwa. Loku akusilo liciniso. Bantfwana abasito toni uma batalwa. Bamsulwa. Ngako ke, akudzingeki babhajatiswe bate babe neminyaka lesiphohlongo.

  4. Indvodza kumele ibe nebuphristi kute ikhone kwenta timiso* (buka sehluko 21) yeLibandla laJesu Khristu.

Kucocisana

  • Ngutiphi letinye tetimfundziso taJesu latinike bantfu futsi?

Libandla laJesu Khristu aliyuze liphindze Litsatfwe Emhlabeni

Nyalo ngoba Libandla laJesu Khristu leliliciniso, ligunya lebuphristi, kanye nelivangeli kubuyiselwe emhlabeni, akuyuphindze kutsatfwe emhlabeni futsi. Babe wetfu loseZulwini utsite utawumisa umbuso longayuphindze ubhujiswe. Lona mbuso Libandla laJesu Khristu Lalabangcwele Betinsuku Tekugcina. Utawuchubeka ingunaphakadze.

Bantfu labanyenti sebabe ngemalunga eLibandla laJesu Khristu Lalabangcwele Betinsuku Tekugcina. Kunemalunga eLibandla emaveni lamanyenti emhlabeni. Bantfu labanyenti ngalokungetiwe basatochubeka babe ngemalunga eLibandla. Bonkhe labantfwana baBabe wetfu loseZulwini batawuliva lelivangeli baphindze babe nelitfuba lekulemukela.

Kucocisana

  • Yini longayenta kusita labanye kutsi beve ngelivangeli laJesu Khristu kute babe ngemalunga eLibandla Lakhe?