Tinsita Letisisekelo
Sehluko 29: Imindeni Ibalulekile
Image
umndeni embikwelithempeli

Imindeni ingaba ndzawonye ingunaphakadze.

Sehluko 29

Imindeni Ibalulekile

Kungani Babe wetfu loseZulwini asihlelele kutsi sihlale njengemindeni lamhlabeni?

Babe wetfu loseZulwini Wasihlelela kutsi Siphile njengeMindeni

Umndeni wetfu la emhlabeni unjengemndeni wetfu wasezulwini. Besiyincenye yemndeni ezulwini ngaphambi kwekutsi site kulomhlaba lo. Besibantfwana bemoya baNkulunkulu, longuBabe wetfu loseZulwini. Uyasitsandza futsi uyasikhatsalela. Usifunela tintfo letinhle kakhulu futsi ufuna sibuyele siphindze sihlale Naye ngalelinye lilanga.

Babe wetfu loseZulwini wahlanganisa umndeni wekucala nakanikela Eva ku-Adamu emshadweni. Wabatjela kutsi babe nebantfwana. Loku wakwentela kutsi bantfwana bakamoya baBabe wetfu loseZulwini bangatfola imitimba yenyama nematsambo. Wabatjela kutsi banike bantfwana babo letintfo labatidzingako. Waphindze wabatjela kutsi bafundzise bantfwana babo livangeli baphindze babasite kwemukela timiso telivangeli.

Babe wetfu loseZulwini usifake emindenini ngetizatfu letinyenti.

Kwekucala, kubatali betfu sitfola imitimba yenyama nematsambo. Sidzinga imitimba yenyama nematsambo kufundza letintfo lesidzinga kutenta kute sihlale naBabe wetfu loseZulwini ingunaphakadze.

Kwesibili, imindeni ingasinika letintfo lesitidzingako kulomhlaba lo. Batali bangasinika kudla, tembatfo, indzawo yekuhlala, lutsandvo, naletinye tintfo letidzingekako kubantfwana babo. Emvakwesikhatsi, bantfwana bangabanakekela batali babo uma labatali sebakhulile kutsi bangatinakekela ngekwabo.

Kwesitsatfu, batali bangalifundzisa livangeli laJesu Khristu kubantfwana babo. Bangabafundzisa kulalela imiyaleto yaBabe wetfu loseZulwini. Futsi bangenta siciniseko kutsi bantfwana bemukele timiso Jesu latsite kumele sitemukele.

Kucocisana

  • Babe wetfu loseZulwini wasihlelelelani kutsi site emhlabeni njengemindeni?

  • Ngumuphi umndeni wekucala kuta emhlabeni?

  • Yini Babe wetfu loseZulwini layihlela kutsi imindeni yetfu itosentela kona?

Babe wetfu loseZulwini Ufuna Emalunga Emndeni Atsandzane

Umndeni wetfu la emhlabeni ungaba njengoba umndeni wetfu wasezulwini wawunjalo ezulwini. Lomndeni ungeva lutsandvo lolutabenta bafune kusitana futsi bente baphindze basho tintfo letilungile kulomunye nalomunye.

Indvodza nemfati emndenini kumele batsandzane. Kumele babe nemusa baphindze basitane. Akukameli basho noma bente noma ngayini letawenta lolomunye ative kabi.

Batali kumele batsandze bantfwana babo. Kumele bafundzise bantfwana babo kutsi batsandzane. Kumele babafundzise kutsi basitane baphindze bakhatsalelane.

Bantfwana kumele batsandze batali babo. Kumele bahloniphe, balalele, baphindze basite batali babo.

Kucocisana

  • Fundza Kubase-Efesu 4:29–32.

  • Singawasita kanjani emalunga emndeni kutsi atsandzane?

  • Babe wetfu loseZulwini ufunelani kutsi emalunga emndeni atsandzane?

Intfo Lebaluleke Kakhulu Lesingayenta Kusebentela kuba Nemndeni Lojabulile futsi Lolungile

Kusebentela kukhulisa umndeni lolungile ngumsebenti lobaluleke kakhulu lesingawenta. Akukhatsalekile kutsi siphumelela kanganani ekwenteni letinye tintfo, uma singafundzisi umndeni wetfu kutsandza nekulalela Babe wetfu loseZulwini, sehlulekile emsebentini wetfu lobaluleke kakhulu. Ngalesinye sikhatsi, bantfwana betfu bangakhetsa kungamtsandzi noma kungamlaleli Babe wetfu loseZulwini, kodvwa kumele sente konkhe lesingakhona kukwenta kubafundzisa tindlela Takhe. Uma batali benta konkhe labangakwenta kufundzisa bantfwana babo ngendlela lefanele, Babe wetfu loseZulwini angeke abatfwese licala ngalokungakalungi bantfwana babo labakwentako. Batali behluleka kuphela uma bayekela kwetama kuba batali labakahle.

Imindeni yetfu ingasinika injabulo yetfu lenkhulu emphilweni. Senta lokuhle kakhulu uma sisebenta ngekutimisela kukhulisa bantfwana kutsi babe malunga lalungile eLibandla nekutsi babe takhamuti letilungile eveni labaphila kulo.

Umndeni uyincenye lebaluleke kakhulu yeLibandla. Babe wetfu loseZulwini wahlela Libandla Lakhe kusita imindeni kwenta konkhe leyidzinga kukwenta kute ibuyele ihlale Naye. Libandla lifuna kusita umndeni ngamunye ube kanyekanye ingunaphakadze.

Sathane uyati kutsi imindeni ibaluleke kanganani eliswini laBabe wetfu loseZulwini. Utama kusenta sente tintfo letitawuhlukanisa imindeni.

Kucocisana

  • Ubaluleke kangakanani umndeni wakho kuwe?

Babe wetfu loseZulwini Usitjele kutsi singaba nawo kanjani Umndeni Lolungile

Sonkhe sifuna kuba nemndeni lolungile futsi lojabulile. Nati letinye tetintfo letitawusita umndeni:

  1. Umndeni kumele uthandaze ndzawonye ekuseni nakusihlwa.

  2. Batali kumele bathandaze ndzawonye lilanga ngalinye.

  3. Batali kumele bafundzise bantfwana livangeli.

  4. Umndeni kumele ufundze imibhalo lengcwele ndzawonye malanga onkhe.

  5. Umndeni kumele uye emihlanganweni yeLibandla ndzawonye njalo ngeLisontfo.

  6. Umndeni kumele uzile ndzawonye kanye ngenyanga uma bantfwana sebakhule ngalokwanele kutsi bangazila futsi bayayicondzisisa inhloso yekuzila.

  7. Umndeni kumele uhlangane ndzawonye liviki ngalinye emhlanganweni wemndeni lobitwa ngekutsi kusihlwa nemndeni* kutokhuluma ngetintfo letinhle lomndeni lowutentile. Kumele baphindze bacoce ngekutsi tingacatululwa kanjani tinkinga tanoma ngubani lanato. Kulomhlangano lo bangaphindze bahlabele, babe nesifundvo, bafundze lamanye emavesi emibhalweni lengcwele, badlale imidlalo, baphindze babe nalokutsite lokukhetsekile lokudliwako noma lokunatfwako.

  8. Umndeni kumele usebente uphindze ufundze ndzawonye.

  9. Emalunga emndeni kumele abe nemusa nesineke kulomunye nalomunye.

  10. Umndeni kumele ugcine umlandvo wetintfo labatentako.

Uma sikhumbula kuthandaza sisodvwa kanye njengemndeni, Babe wetfu loseZulwini utawuba sedvute natsi. Utawuyiva imithandazo yetfu aphindze ayiphendvule ngendlela lesilungele.

Kucocisana

  • Yini letinye tetintfo lesingatenta kute sibe nemndeni lolungile?

Print