Tinsita Letisisekelo
Sehluko 31: Umsebenti wetfu Kushumayela liVangeli
Image
Go Ye Therefore [Ngako ke Hambani], ngu Harry Anderson

Jesu wayaleta baPhostoli Bakhe kutsi bafundzise livangeli emhlabeni wonkhe.

Sehluko 31

Umsebenti wetfu Kushumayela liVangeli

Singabasita kanjani bonkhe bantfwana baBabe wetfu loseZulwini kutsi beve livangeli?

Babe wetfu loseZulwini Ufuna Bonkhe Bantfwana Bakhe Bati liVangeli

Babe wetfu loseZulwini utsandza bonkhe bantfwana Bakhe. Ngamunye wetfu ubalulekile Kuye, futsi ngamunye angafana Naye. Ufuna sibuyele sihlale Naye siphindze sibe nalenjabulo nenkhatimulo lanayo.

Babe wetfu loseZulwini unelisu lekusita ngamunye wetfu kubuyela siphindze sihlale Naye. Lelisu libitwa ngekutsi livangeli laJesu Khristu. Uma sifundza livangeli, sifundza kutsi sibaluleke kanganani. Sifundza kutsi leni silana kulomhlaba lo. Siphindze sifundze kutsi sitawukuya kuphi uma sifa. Sifundza loko lokumele sikwente kute sibuyele kuBabe wetfu loseZulwini.

Jesu Khristu ngumnaketfu wamoya. Uyindvodzana yamoya lelitubulo yaBabe wetfu loseZulwini. Weta emhlabeni njengeNdvodzana yaBabe wetfu loseZulwini letelwe yodvwa enyameni. Usitsandza kakhulu kangangekutsi wasihluphekela waphindze wasifela. Wafundzisa loko Babe wetfu loseZulwini lafuna kutsi sikwati siphindze sikwente. Wahlela Libandla Lakhe kutsi asisite. Wanika buphristi Bakhe kumadvodza emhlabeni kute bente umsebenti Wakhe.

Libandla laJesu Khristu Lalabangcwele Betinsuku Tekugcina ngilolodvwa libandla lelinebuphristi baBabe wetfu loseZulwini kanye nelisu Lakhe leliliciniso. Babe wetfu loseZulwini ufuna bonkhe bantfu bafundze ngelisu Lakhe futsi balemukele. Letimiso teLibandla leliciniso tidzingekile kitsi kute sibuyele sihlale naBabe wetfu loseZulwini.

Babe wetfu loseZulwini utjele lonkhe lilunga leLibandla Lakhe kutsi litjele labanye ngelivangeli. Bonkhe baphrofethi kusukela ku-Adamu basebentise sikhatsi sabo lesiningi bafundzisa livangeli kulabanye. Basitjele kutsi lonkhe lilunga leLibandla kumele libe ngumfundzisi welivangeli. Lena yincenye yesetsembiso lesasenta uma sibhajatiswa. Satsembisa kutjela bantfu ngaJesu noma kunini lapho singakwati.

Kucocisana

  • Bonkhe bantfu kumele balive leni livangeli?

  • Ngubani lonesibopho sekufundzisa livangeli kubo bonkhe bantfu?

Umndeni ngamunye eBandleni kumele ucondzisise kubaluleka kwekufundzisa livangeli. Siyati kutsi lisu lelivangeli libaluleke kanganani. Kumele sibakhatsalele ngalokwanele labanye kute sente noma yini ledzingekako kute sibasite bacondzisise lisu laBabe wetfu loseZulwini.

Emalunga emndeni angenta tintfo letinyenti kusita labanye bafundze ngelivangeli. Letinye taletintfo ngunati:

  1. Yentela labanye tintfo letinhle.

  2. Tjela labanye kutsi ujabulile ngoba ulalela timfundziso telivangeli.

  3. Chazela bangani nabomakhelwane livangeli. Bameme bahambe nawe emhlanganweni weLibandla.

  4. Mema bantfu kutsi bete ekhaya lakho kutsi babe nawe kusihlwa ekhaya nemndeni noma uma bafundzisi belivangeli bangabafundzisa.

  5. Nika bafundzisi belivangeli emabito nemakheli ebangani bakho noma tihlobo labangafuna kufundza ngelivangeli.

  6. Fundzisa bantfwana kubaluleka kwekusebenta njengebafundzisi belivangeli. Basite bonge imali kute baye kumishini.

  7. Khokha kwelishumi.

  8. Nikela ngemali esikhwameni sebafundzisi belivangeli.

Kucocisana

  • Cabanga indlela yekutjela lomunye longasilo lilunga leLibandla ngelivangeli.

  • Yini umndeni wakho longakwenta kusita labanye bantfu bafundze ngelivangeli?

Umndeni wakho ungaba Yincenye Lebalulekile yeMsebenti weBumishini eBandleni

Libandla letfu selitfumele tinkhulungwane tebafundzisi belivangeli kuyofundzisa livangeli emaveni lamanyenti. Linyenti labo bantfu labancane labasemkhatsini weminyaka lengu 18 na 25. Bantfu labadzala nabo bayasebenta njengebafundzisi belivangeli. Bamalunga eLibandla latsembekile, lalalelako lanesifiso sekusebentela Babe wetfu loseZulwini.

Bafundzisi belivangeli labanyenti ngalokwengetiwe bayadzingeka. Umndeni wakho ungabamba lichaza kulomsebenti lobalulekile ngekulungiselela emalunga emndeni kutsi aye kumishini. Batali bangasita bantfwana babo batfole bufakazi belivangeli baphindze bafundze kutsi bangalichaza kanjani livangeli kulabanye. Bangafundzisa bantfwana babo kutsandza bantfu bawo onkhe emasiko. Batali kumele nabo batilungiselele kuya kumishini emvakwekukhula kwebantfwana babo.

Linyenti lebantfu lisengakeva ngelivangeli. Labanye babo bahlala emaveni lapho bafundzisi belivangeli abakate bakhona kuya khona. Laba bantfu kumele babe nelitfuba lekuva baphindze balemukele livangeli. Babe wetfu loseZulwini utawenta indlela yekutsi loku kwentiwe. Kumele sithandaze Kuye kutsi baholi balamave lawa bavumela bafundzisi belivangeli kutsi bangene baphindze bafundzise bantfu babo.

Kucocisana

  • Imindeni eBandleni isigcwalise kanjani sibopho sayo sekufundzisa livangeli kubo bonkhe bantfu?

  • Kudzingekelani bafundzisi belivangeli labangetiwe lamuhla?

Tibusiso Letinkhulu Tita Kulabo Labatjela Labanye ngeliVangeli

Babe wetfu loseZulwini utawusibusisa uma sikhatsalela ngalokwanele labanye ngekubatjela ngelivangeli. Utawusibusisa ngekulalela imiyaleto Yakhe nangenjabulo lesiyiletsako kulabo labemukela livangeli. Usitjelile kutsi sitawujabula uma sisita munye kuphela webantfwana Bakhe kufundza livangeli nekubuyela Kuye. Intfokoto yetfu itawuba yinkhulu kakhulu uma sisita labanyenti bebantfwana Bakhe babuyele emuva Kuye.

Kucocisana

  • Ngutiphi tibusiso letita ngekumikisa livangeli kulabanye?

  • Uke wabhekana nanoma ngutiphi taleti tibusiso?

Print