Tinsita Letisisekelo
Sehluko 36: Kuphila lokuPhakadze
sibhakabhaka sigcwele kukhanya

Labo labatsembekile kute kube sekugcineni batawuphakanyiswa naBabe wetfu loseZulwini naJesu Khristu.

Sehluko 36

Kuphila lokuPhakadze

Sitawukuya kuyohlala kuphi emvakweKwehlulelwa kweKugcina?

Sitawukuya Ngamunye Endzaweni Lesilungiselwe yona

Jesu wafundzisa kutsi Babe wetfu loseZulwini usilungiselele tindzawo letinyenti kutsi sihlale. Ngamunye wetfu utokwabelwa indzawo yinye kuletine, kuye ngekutsi sasitsembeke kanganani kuJesu Khristu. Sitawukuya embusweni lesiwulungiselele ngetincumo lesitentile. Leti tindzawo letine ngumbuso wesilestiyali, umbuso wetherestriyali, umbuso wethelestiyali kanye nebumnyana lobungaphandle.

Umbuso weSilestiyali

Lena yindzawo lapho Babe wetfu loseZulwini naJesu bahlala khona. Yindzawo lapho bantfu batawujabula khona, futsi itawubayinhle kakhulu kunaloku lesingakucabanga. Labantfu labatawuhlala kulombuso lo batawumtsandza Babe wetfu loseZulwini naJesu futsi batawukhetsa kubalalela. Kumele babe baphendvukile kuto tonkhe tono tabo futsi kumele babe bamemukele Jesu njengeMsindzisi wabo. Kumele babe babhajatisiwe futsi bemukele sipho saMoya loNgcwele. Kumele babe nebufakazi lobubuya kuMoya loNgcwele kutsi Jesu nguMsindzisi.

Kuhlala kulencenye lephakeme kakhulu yembuso wesilestiyali kubitwa ngekutsi kuphakanyiswa* noma kuphila lokuphakadze. Kute ukhone kuhlala kulencenye le yembuso wesilestiyali, bantfu kumele babe bashadile ethempelini futsi kumele babe batigcinile letitsembiso letingcwele labatenta ethempelini. Batawemukela yonkhe intfo Babe wetfu loseZulwini lanayo futsi batawufana Naye. Batawukhona nekuba nebantfwana bamoya baphindze babakhele emave lamasha kutsi bahlale kuwo, baphindze bente tonkhe letintfo Babe wetfu loseZulwini latentile. Bantfu labangakashadi ethempelini bangahlala kuletinye tincenye tembuso wesilestiyali, kodvwa angeke baphakanyiswe.

Umbuso weTherestriyali

Lombuso lo awusiwo lomangalisa njengembuso wesilestiyali. Noma Jesu atawuvakashela umbuso wetherestriyali, labo labahlala lapho angeke bahlale naBabe wetfu loseZulwini, futsi angeke babe nako konkhe lanako. Labo labaya embusweni wetherestriyali kutawuba bantfu labahloniphekile. Labanye babo kutawuba malunga eLibandla, futsi labanye angeke kube nguwo. Kutawuba nalabo labangatange bemukele Jesu emhlabeni kodvwa bamemukela muva eveni lamoya. Labantfu labatawuhlala le angeke babe yincenye yemndeni waphakadze kodvwa batawuhlala ngekwehlukana, ngaphandle kwemindeni. Babe wetfu loseZulwini utawunika laba bantfu lenjabulo labalungele kuyitfola.

Umbuso weThelestiyali

Lombuso lo awusiwo lomangalisa njengembuso wesilestiyali noma umbuso wetherestriyali. Babe wetfu loseZulwini noma Jesu angeke abavakashele labo labahlala lapho. Tingilosi titawuvakashela laba bantfu, futsi batawuba nemtselela waMoya loNgcwele. Labantfu labahlala embusweni wethelestiyali ngulabo labangatange balemukele livangeli noma bufakazi baJesu, lamhlabeni noma eveni lamoya. Batawuhluphekela tono tabo ejele lamoya kute kube semvakweMileniyamu. Bese emvakwaloko batawuvuswa ekugcineni.

Baseselamhlabeni, bebabacambi manga, emasela, babulali, baphrofethi bemanga, baphingi, futsi nalabo labahlekisa ngetintfo letingcwele. Kwakungulabantfu labemukela tinkholelo temhlaba kunetimfundziso taJesu. Bantfu labanyenti batawuhlala kulombuso. Babe wetfu loseZulwini utawunika laba bantfu lenjabulo lebalungele kuyitfola.

Bumnyama Lobungephandle

Bumnyama lobungaphandle ngulapho Sathane nalabo labamlandzele batawuhlala khona. Labantfu laba kutawuba ngulabo labakhetsa kuhlala naSathane. Angeke bacolelwe. Labantfu laba batawuhlala ingunaphakadze ebumnyameni, elusizini, bahlupheke naSathane nemimoya leyamlandzela.

Kucocisana

  • Ngumuphi umbuso lekumele sitilungiselele wona kute sifanane naBabe wetfu loseZulwini?

  • Yini letinye tetintfo lekumele sitente la emhlabeni kute sibe ngulabafanelekile kuhlala njengaBabe wetfu loseZulwini?

Babe wetfu loseZulwini Usinike liVangeli Kusilungiselela Kuphila lokuPhakadze kuMbuso weSilestiyali

Babe wetfu loseZulwini uniketa ngamunye wetfu litfuba lekutfola kuphila lokuphakadze Naye. Kuphila lokuphakadze nguloluhlobo lwemphilo Babe wetfu loseZulwini naJesu labayiphilako. Babe wetfu loseZulwini uphelele. Wati tonkhe tintfo. Unemandla ngetulu kwato tonkhe tintfo. Ubusa tonkhe tintfo. Uphila ngekuvumelana nemaciniso nemitsetfo yaphakadze.

Jesu wamlalela Babe wetfu loseZulwini, ngakoke uphila naBabe wetfu loseZulwini. Uma senta letintfo Jesu lasifundzisa kutsi sitente, sitawukhona kuphila njengoba Naye naBabe wetfu loseZulwini baphila. Kuba nekuphila lokuphakadze naBabe wetfu loseZulwini sipho lesikhulukati langasinika sona. Kutawusiletsela injabulo ngetulu kwanoma yini lenye.

Livangeli lisitjela konkhe lesidzinga kukwati nako konkhe lesidzinga kukwenta kutfola kuphila lokuphakadze. Lisisita kutsi sati Babe wetfu loseZulwini naJesu. Lisifundzisa kutsi siphile kanjani njengoba Nabo baphila. Ngekuthandaza nangekufundza imibhalo lengcwele singabati kancono. Uma sibati futsi sibatsandza, sitawufuna kulalela emavi Abo. Sisalalela, sitawukwati kufana Nabo siphindze sikhone kuba ngulabafanelekile kuphila Nabo ingunaphakadze.

Kucocisana

  • Yini kuphila lokuphakadze? Ngubani lotawukutfola?

  • Livangeli lisisita kanjani kusilungiselela kuphila lokuphakadze?

Babe wetfu loseZulwini Utawusisita uma Sikhetsa Kulalela liVangeli

Babe wetfu loseZulwini uyati kutsi kungenteka kutsi sonkhe siphile livangeli siphindze sitfole kuphila lokuphakadze. Njengoba sibantfwana Bakhe, sinawo emandla ekufana Naye. Uyabati butsakatsaka bangamunye wetfu naleto tintfo letingasilinga. Usivumele kutsi site emhlabeni ngesikhatsi futsi nasendzaweni letasinika ematfuba ekwenta tintfo letinhle futsi sifundze.

Nyalo ngiso sikhatsi sekwenta konkhe lesidzinga kukwenta kute sitfole kuphila lokuphakadze. Babe wetfu loseZulwini uyasitsandza futsi ufuna kutsi siphumelele. Wente konkhe langakwenta ngenca yetfu. Usinike umhlaba lapho singafundza siphindze sikhule khona. Utfumele iNdvodzana yakhe, Jesu Khristu, kutoba nguMsindzisi wetfu nekusifundzisa livangeli. Usimemile kutsi sithandaze Kuye. Ukwente kwenteka kutsi Moya loNgcwele abe ngumcondzisi wetfu. Nyalo kudzingeka sente tintfo letifanele. Uma sikhetsa kuba nelukholo kuJesu Khristu siphindze simlalele, utawusisita aphindze asinike emandla ekuncoba tilingo naletinye tinkinga letitako etimphilweni tetfu.

Babe wetfu loseZulwini usicele kutsi simukele livangeli. Kwenta loku kumele sicale sibe nelukholo kuJesu Khristu. Bese kumele siphendvuke etonweni tetfu kute sibhajatiswe siphindze sicinisekiswe emalunga eLibandla laJesu Khristu Lalabangcwele Betinsuku Tekugcina. Uma sicinisekiswa, simukela sipho saMoya loNgcwele kuloyo lonebuphristi. Moya loNgcwele utjela ngamunye wetfu loko Jesu lafuna sikwente, futsi kutfola kuphila lokuphakadze kumele sicitse timphilo tetfu tonkhe simlalela siphindze simsebentela.

Jesu udzinga kutsi sonkhe silalele imiyaleto kute isisite kulungiselela kubuyela sihlale naBabe wetfu loseZulwini. Loku kufaka ekhatsi kutfobela umtsetfo webumsulwa, kukhokha kwelishumi nekunikela umnikelo, kutfobela Livi leKuhlakanipha, kwetsembeka ngaso sonkhe sikhatsi, nekugcina lilanga leSabatha lingcwele.

Kute sifane naBabe wetfu loseZulwini kumele siphindze semukele timiso letinikwa ethempelini, letatiwa ngekutsi kwembatsisa.* Kudzingeka kutsi siboshwe le kute sitawuba ndzawonye nemindeni yetfu ingunaphakadze. Kumele bese sesifuna emabito abo kanye nelwati loluphatselene netihlobo tetfu letafa siphindze sinike loko lesikutfolako eBandleni, kute kutsi letimiso letidzingekako tentelwe bona ethempelini.

Jesu usiyalete kutsi sente tintfo letinyenti. Leti tintfo tifaka ekhatsi kutjela labanye ngelivangeli, kubatsandza siphindze sibasite, nekuba sibonelo lesihle kubo.

Kumele sigcine tonkhe letitsembiso lesitentako kuBabe wetfu loseZulwini, siye emihlanganweni yeLibandla njalo, sifundzise umndeni wetfu livangeli ngekufundza imibhalo lengcwele onkhe emalanga, siphindze sithandaze sodvwa nanemindeni yetfu onkhe emalanga.

Uma sinelukholo kuJesu Khristu futsi sitama kulalela yonkhe imiyaleto Yakhe, sitawutfola kuphila lokuphakadze siphindze sifanane naBabe wetfu loseZulwini.

Kufanana naBabe wetfu loseZulwini kufana nekukhuphuka liladi. Kufanele sicale phansi siphindze sikhuphuke sitebhisi ngasinye site sifike etulu. UmPhrofethi Joseph Smith watsi uma sifuna kufanana naBabe wetfu loseZulwini kumele sifundze indlela lativa ngayo, lacabanga ngayo, futsi lenta ngayo. Uma sicondzisisa leti tintfo Ngaye, singafundza tonkhe letinye tintfo Ngaye, site sati kutsi singaba kanjani njeNgaye.

Kutawusisita kutsi sikhumbule kutsi Babe wetfu loseZulwini wake waba yindvodza leyahlala emhlabeni, ngalokufanako natsi. Waba nguBabe wetfu loseZulwini ngekuncoba tinkinga, njengoba natsi kumele sente kulomhlaba lo. Kodvwa, umPhrofethi Joseph Smith watsi angeke sifundze yonkhe intfo lesidzinga kuyifundza sisesemhlabeni. Kutawusitsatsa sikhatsi lesidze emvakwekutsi sicedzele lemphilo le kwati tonkhe letintfo lesidzinga kutati kute sifanane naBabe wetfu loseZulwini.

Uma sifundza kugcina yonkhe imiyaleto yaBabe wetfu loseZulwini, cabanga kutsi sitawujabula kanjani sesibuyela Kuye aphindze asitjele kutsi uyajabula ngemphilo lesiyiphilile futsi sitawufana Naye siphindze sihlale Naye ingunaphakadze.

Kucocisana

  • Kungenteka leni kutsi ngamunye wetfu afane naBabe wetfu loseZulwini?

  • Yini tintfo lekumele sitente kuba neluhlobo lwemphilo Babe wetfu loseZulwini lanalo?

  • Babe wetfu loseZulwini usisita kanjani kutsi sifane Naye?

  • Chaza kutsi ungeva kunjani kuva Babe wetfu loseZulwini akutjela kutsi wente kahle futsi uyakutsandza.