Sehluko 7
Moya loNgcwele
Babe wetfu loseZulwini ukhetse umuntfu kusitjela letintfo lafuna kutsi sitati. Ngubani lona muntfu, futsi singafundza kanjani kucondzisisa imilayeto yaBabe wetfu loseZulwini?
Moya loNgcwele Usebenta naBabe wetfu loseZulwini naJesu Kusisita
Moya loNgcwele usebenta naBabe wetfu loseZulwini naJesu. Uyafakaza kitsi kutsi bayaphila futsi bayasitsandza. Uyabasita kufundzisa tsine letintfo lesidzinga kutati nekutenta aphindze asisite kutsi silalele imiyaleto Yabo. Ute umtimba wenyama nematsambo njengoba Babe wetfu loseZulwini naJesu banawo. Ungumoya. Ufana nemuntfu.
Babe wetfu loseZulwini, Jesu Khristu, naMoya loNgcwele bantfu labatsatfu labehlukene. Basebenta kanyekanye kusisita sifundze letintfo lesidzinga kutati nekutenta. Nasitfola imilayeto lebuya kuBabe wetfu loseZulwini noma Jesu, imvamisa kuba nguMoya loNgcwele losiletsela yona. Aphindze asisite kulalela imiyaleto Yabo.
Kucocisana
-
Moya loNgcwele usebenta nabani?
-
Moya loNgcwele wehluke kanjani kuBabe wetfu loseZulwini naJesu?
Umsebenti waMoya loNgcwele
Moya loNgcwele usifundzisa ngaBabe wetfu loseZulwini naJesu. Usitjela kutsi bayaphila nekutsi bayasitsandza. Usitjela kutsi Babe wetfu loseZulwini nguBabe wemimoya yetfu. Uphindze asitjele kutsi Jesu nguMsindzisi wetfu.
Moya loNgcwele uyasisita kutsi sicondzisise ngaBabe wetfu loseZulwini naJesu netintfo lekumele sitente kute sibuyele eZulwini. Aphindze asisite kutsi sifundze siphindze sicondzisise onkhe emaciniso.
Moya loNgcwele uphindze usinike emandla ekulalela imiyaleto yaBabe wetfu loseZulwini naJesu. Ungasisita kwenta sincumo lesifanele nakumele sikhetse emkhatsini wetento letimbili. Ungasinika kuthula ngetikhatsi tenhlupheko.
Kucocisana
-
Yini umsebenti waMoya loNgcwele?
-
Yini Moya loNgcwele langasisita kutsi siyati?
-
Yini Moya loNgcwele langasisita kutsi siyente?
Moya loNgcwele Usifundzisa Ngendlela Lenemandla
Moya loNgcwele usifundzisa kutsi ngukuphi lokulungile nalokungakalungi. Lemfundziso le inemandla kakhulu asike siyikhohlwe. Moya loNgcwele awukavamisi kukhuluma natsi ngendlela kutsi singeva etindlebeni tetfu. Esikhundleni, usibangela kutsi sicabange noma sive kutsi loku lesikufundzako noma lesikuvako kuliciniso. Lemizwa le inemandla kakhulu.
Emandla aMoya loNgcwele angaviwa bantfu labanyenti ngasikhatsi sinye. Kucondzisisa loku kancono, cabanga lilanga. Linye kuphela lilanga, kepha kukhanya nemfutfumalo yalo iviwa bantfu etindzaweni letinyenti ngesikhatsi sinye. Moya loNgcwele angacatjangwa ngaleyo ndlela. Emandla Akhe angaviwa bantfu etindzaweni letinyenti ngesikhatsi sinye noma Yena lucobo asendzaweni yinye ngesikhatsi sinye.
Kucocisana
-
Moya loNgcwele usitjela kanjani ngetintfo lesidzinga kutati?
-
Moya loNgcwele angabasita kanjani bantfu labanyenti ngasikhatsi sinye?
Moya loNgcwele Utawusita Ngamunye wetfu
Ngemvakwekube Babe wetfu loseZulwini akhiphe Adamu na-Eva eNsiminini yase-Edeni, bathandaza bambuta kutsi bente njani. Babe wetfu loseZulwini watfumela Moya loNgcwele kubafundzisa Ngaye naJesu ngetintfo bo-Adamu na-Eva bekumele batente. Moya loNgcwele wabatjela kutsi timfundziso taBabe wetfu loseZulwini tiliciniso. Wabanika emandla ekwenta tintfo Babe wetfu loseZulwini labekafuna kutsi batente.
Waphindze wabasita kutsi batfobeke baphindze babonge ngetintfo Babe wetfu loseZulwini labentela tona.
Ngekuholwa nguMoya loNgcwele, Adamu na-Eva bafundza kutsi bangaphindza baphile naBabe wetfu loseZulwini ngalelinye lemalanga uma bangahlala balandzela Jesu futsi balalela imiyaleto Yakhe. Ngekuholwa nguMoya loNgcwele kwabenta bajabula kakhulu.
Babe wetfu loseZulwini utsandza ngamunye wetfu. Utfumela Moya loNgcwele kutosihola aphindze asifundzise liciniso. Noma kunjalo, Moya loNgcwele utawusisita kuphela uma setama ngekutimisela kulandzela imiyaleto nemiyalo layiletsako lesuka kuBabe wetfu loseZulwini naJesu. Uma singetami ngekutimisela kulalela imiyaleto Yabo, noma uma singafuni Moya loNgcwele asifundzise, angeke asitjele lutfo. Sitawuba nemphilo lencono uma silandzela timfundziso taMoya loNgcwele.
Kucocisana
-
Moya loNgcwele wabasita kanjani bo-Adamu na-Eva?
-
Yini lekumele siyente kwemukela lusito kuMoya loNgcwele?