Sehluko 6
Adamu na-Eva
Bekubobani bo-Adamu na-Eva? Bentani kusita tsine?
Adamu na-Eva kwaba Bantfu bekuCala Kuta Emhlabeni
Babe wetfu loseZulwini wetsa bantfu bekucala lamhlabeni Adamu na-Eva. Bobabili bekubantfwana Bakhe labebamachawe. Ngibo labenta kutsi sikhone kuta emhlabeni.
Ezulwini, Adamu bekabitwa ngekutsi nguMikhayeli. Bekangumunye webaholi betfu. Wasichuba emphini lebesibhekene nayo naSathane. Mikhayeli bekuyindvodza lebeyilungile. Wenta konkhe Babe wetfu loseZulwini lebekafuna kutsi akwente. Waba wekucala wesilisa kuba semhlabeni.
Eva bekayindvodzakati lelungile yaBabe wetfu loseZulwini. Babe wetfu loseZulwini watfumela Eva emhlabeni na-Adamu kutsi kube ngumkakhe aphindze amsite. Babe wetfu loseZulwini bekati kutsi akukalungi kutsi Adamu abe yedvwa. Adamu, ngekwakhe, bekangeke akhone kwenta kutsi site emhlabeni. Incenye ya-Eva kulelisu beyimcoka njengeya Adamu.
Kucocisana
-
Ngaphambi kwekuta emhlabeni, bekabitwa ngabani Adamu futsi wentani?
-
Babe wetfu loseZulwini wamtfumelelani Eva kutsi abe na-Adamu?
INsimu yase-Edeni Yaba Likhaya lekuCala la-Adamu na-Eva
Babe wetfu loseZulwini wadala indzawo lenhle lamhlabeni kute Adamu na-Eva baphile kuyo. Beyibitwa ngekutsi kuseNsimini yase-Edeni. Bo-Adamu na-Eva nabaseNsimini yase-Edeni, ngamunye bekanemtimba wenyama nematsambo longafi. Bebate bantfwana. Besingekho sidzingo sekutsi batjale noma bavune noma basebentele letintfo lebebatidzinga. Bebangakhumbuli imphilo yabo eZulwini. Bebangati kutsi ngukuphi lokuhle nekutsi ngukuphi lokubi.
ENsimini yase-Edeni, Adamu na-Eva bebakhona kuhamba baphindze bakhulume naBabe wetfu loseZulwini. Wabatjela ngetintfo lebekufanele batente. Wabatjela kutsi banakekele lensimu ihlale iyinhle. Wabatjela kutsi babe nebantfwana. Wabatjela kutsi bangadla ngekukhululeka sitselo sanoma ngusiphi sihlahla kulengadzi, ngaphandle kwasinye. Babe wetfu loseZulwini wabatjela kutsi bangasidli sitselo sesihlahla selwati lwalokuhle nalokubi. Wabecwayisa kutsi nabangadla sitselo saleso sihlahla batawufa.
Kucocisana
-
Beyihluke kanjani imphilo ku-Adamu na-Eva eNsimini yase-Edeni kunemphilo namuhla?
-
Yini Babe wetfu loseZulwini layitjela Adamu na-Eva kutsi bayente?
Adamu na-Eva eNsimini yase-Edeni.
Adamu na-Eva Behlukaniswa kuBabe wetfu loseZulwini
Sathane wacabanga kutsi angalibulala lelisu laBabe wetfu loseZulwini. Weta eNsimini yase-Edeni wetama kuphocelela Eva kutsi adle lesitselo sesihlahla selwati lwalokuhle nalokubi. Wamtjela kutsi nakangasidla lesitselo ngeke aze afe. Watsi utokwati umehluko emkhatsini walokuhle nalokubi, njengoba naBabe wetfu loseZulwini ati. Eva wamkholwa Sathane, wasidla lesitselo. Eva nakatjela Adamu kutsi sowusidlile lesitselo, wati kutsi Eva sekutawudzingeka ashiye lansimini. Naye wase sowuyasidla lesitselo kute bahlale kanyekanye.
Timphilo tabo-Adamu na-Eva tashintja emvakwekudla lesitselo Babe wetfu loseZulwini latsite bangasidli. Babe wetfu loseZulwini wabakhipha eNsimini yase-Edeni. Abaphindzanga bakhona kuhamba nekukhuluma Naye. Kusukela lapho luntfu lwahlukaniswa ebukhoneni baBabe wetfu loseZulwini. Kungakhoni kuba naBabe wetfu loseZulwini kubitwa ngekutsi kufa kwakamoya.* Adamu na-Eva kwafanela kutsi baphile emhlabeni ngaphandle kwasensimini lenhle. Kwafanela kutsi basebente kute batfole tintfo bebatidzinga.
Imitimba yabo yashintja. Besebangakhona kuba nebantfwana. Besebangagula, beve buhlungu, lusizi, baphindze ngalelinye lemalanga bafe. Lolushintjo lolwafikela Adamu na-Eva lubitwa ngekutsi Kuwa kwa-Adamu.
Lolushintjo lutsintsa tonkhe titukulwane ta-Adamu na-Eva. Njengabo, natsi sinawo emandla ekuba nebantfwana, nekugula, buhlungu, lusizi, kanye nekufa nako kuyeta kitsi.
Kucocisana
-
Wentani Sathane kwetama kubulala lisu laBabe wetfu loseZulwini?
-
Timphilo ta-Adamu na-Eva tashintja kanjani emvakwekudla sitselo sesihlahla sekwati lokuhle nalokubi?
-
Yini kufa kwakamoya?
-
Yini Kuwa kwa-Adamu?
Kuwa kwa-Adamu KwakuyiNcenye Ledzingekako eLiswini laBabe wetfu loseZulwini
Babe wetfu loseZulwini wahlela kutsi bantfwana Bakhe bete emhlabeni kutomukela umtimba wenyama nematsambo. Emvakwekube sekabakhiphile bo-Adamu na-Eva eNsimini yase-Edeni, bacala baba nebantfwana. Emvakwesikhatsi bantfwababo bashada baba nebantfwana. Ngaleyondlela bantfwana bakamoya baBabe wetfu loseZulwini labebaphila Naye bacala beta emhlabeni njengoba bekahlelile. Ngesizatfu saloko bo-Adamu na-Eva bebakwentile, ngamunye wetfu besingeta emhlabeni kutowemukela umtimba wenyama nematsambo.
Babe wetfu loseZulwini waphindze wahlela kutsi banfwana Bakhe basebente kute batfole tintfo lebebatifuna baphindze batidzinga. Kusukela bo-Adamu na-Eva bashiya eNsimini yase-Edeni, banfwana baBabe wetfu loseZulwini emhlabeni kumele basebente kute batfole tintfo labatifunako nalabatidzingako.
Emvakwekube bo-Adamu na-Eva badle sitselo Babe wetfu loseZulwini labatjela kutsi bangasidli, bafundza umehluko emkhatsini walokuhle nalokubi. Nyalo, ngamunye wetfu lamhlabeni singafundza lomehluko emkhatsini walokuhle nalokubi siphindze sitikhetsele ngekwetfu kwenta lokulungile noma lokungakalungi.
Uma Babe wetfu loseZulwini akhipha Adamu na-Eva eNsimini yase-Edeni, betama kufundza letintfo labekafuna kutsi batente. Bamlalela baphindze bafundzisa bantfwana babo kutsi bamlalele. Ngamunye wetfu kumele sifundze letintfo Babe wetfu loseZulwini lafuna kutsi sitente, futsi kumele simlalele sifundzise nebantfwabetfu kutsi bamlalele.
Kucocisana
-
Ngabe Sathane walibulala yini lisu laBabe wetfu loseZulwini?
-
Kumele sibonge leni ngetintfo bo-Adamu na-Eva labatenta?