Sehluko 23
Nikela
Kudzela intfo letsite kute usite lomunye yincenye yelisu laBabe wetfu loseZulwini kusisita kutsi sifane Naye. Wake waba nemuzwa wenjabulo lovela ngekudzela intfo letsite kute usite lomunye umuntfu?
Jesu Wanikela Ngemphilo Yakhe ngenca yetfu
Kulalela Babe wetfu loseZulwini, kufanele kutsi sinikele njalo. Kunikela kudzela lokutsite kute usite lomunye. Jesu wenta umnikelo lomkhulu kakhulu. Wahluphekela tono tetfu. Wabese unikela ngemphilo Yakhe ngenca yetfu.
Ngoba Jesu wanikela ngemphilo Yakhe ngenca yetfu, wonkhe muntfu utawuphila futsi emvakwekufa. Sonkhe sitawuba nemtimba lophelele longayuphindze ufe futsi. Loku kubitwa ngekutsi kuvuka. Futsi, labo labanelukholo kuJesu, baphendvuka kuto tonkhe tono tabo, batawucolelwa tono tabo ngenca yaloko Jesu lakwenta futsi batawukhona kubuyela kuBabe wetfu loseZulwini.
Kusukela ngalesikhatsi Adamu aphila kuya kulesikhatsi Jesu Khristu aphila, bantfu banikela tilwane kuBabe wetfu loseZulwini. Labantfu bakhetsa tilwane letincono kakhulu emhlambini wabo noma esicunjini kunikela. Bekuba ngematubulo lamadvuna njalo nje. Emvakwekukhetsa letilwane letifanele, labantfu bebatibulala babese bashisa incenye yato njengemnikelo kuBabe wetfu loseZulwini.
Labantfu banikela leti tilwane kulalela umtsetfo waBabe wetfu loseZulwini. Ngalena ndlela, bakhombisa kutimisela kwabo kulalela Babe wetfu loseZulwini noma loko kwakusho kudzela intfo letsite lebalulekile kubo. Babe wetfu loseZulwini wabayaleta kutsi banikele tilwane kubakhumbuta kutsi utawunikela ngeNdvodzana Yakhe kubo. Jesu, iNdvodzana lelitubulo yaBabe wetfu loseZulwini utawukuta emhlabeni futsi aphelele ngayo yonkhe indlela. Utawutivumela Yena kutsi ahlatjelwe tono tetfu.
Emvakwekutsi Jesu anikele ngemphilo Yakhe, wayaletela bantfu kutsi bangasanikeli tilwane. Wasiniketa sidlo seNkhosi kusikhumbuta ngemhlatjelo lomkhulu lasentela wona. Lesinkhwa nemanti esidlo seNkhosi amelele umtimba nengati yaJesu, lasinika wona nakafa.
Kucocisana
-
Umnikelo wetilwane etikhatsini tasemandvulo bewumelele ini?
Umnikelo Yincenye yeLisu laBabe wetfu loseZulwini ngatsi
Babe wetfu loseZulwini nyalo usidzinga kutsi sinikele ngendlela lehlukile. Usiyaleta kutsi sente umnikelo wenhlitiyo ledzabukile nemoya lophukile. Loko kusho kudzela tono tetfu nekutikhukhumeta kwetfu. Kusho kutimisela kukhumbula Jesu mihla yonkhe nekugcina imiyaleto Yakhe, kungakhatsali kutsi kubita malini. Loku kusho kutsi:
-
Sinelukholo kuJesu, siphendvuka etonweni tetfu, siyabhajatiswa, siphindze sigcine imiyaleto yaJesu.
-
Sitjela labanye bantfu ngenkholo yetfu kuJesu kute babe balandzeli Bakhe baphindze babe ngemalunga eLibandla Lakhe.
-
Sitimisela kwenta noma ngumuphi umsebenti eBandleni laJesu lafuna siwente.
-
Emadvodza ayatimisela kwemukela buphristi baphindze basite imindeni yabo nalabanye kuphila ngendlela yekutsi batawulungela kubuyela kuBabe wetfu loseZulwini emphilweni letako.
Kubuyela kuBabe wetfu loseZulwini, kumele sitimisele kunika yonkhe intfo Jesu lasicela kutsi siyinike. UmPhostoli Pawula watsi kumele sisebentise sikhatsi setfu lamhlabeni kwenta konkhe lesingakhona kukwenta kusita umsebenti waJesu.
Kucocisana
-
Ungakhombisa kanjani kutsi uyawukhumbula umnikelo waJesu namuhla?
Indzodza lecebile yabuta Jesu loko lekumele ikwente kute ihlale naBabe wetfu loseZulwini ingunaphakadze. Jesu wamtjela kutsi akalalele yonkhe imiyaleto yaBabe wetfu loseZulwini. Lendvodza lecebile yaphendvula yatsi iyilalele imiyaleto kusukela ngesikhatsi iseseyincane. Jesu wamtjela kutsi kwakunalenye futsi intfo lokwakumele ayente. Kumele atsengise yonkhe intfo lebekanayo. Kumele bese unika lemali kubantfu labamphofu aphindze alandzele Jesu. Uma lendvodza lecebile iva loku, yadzabuka. Bekangafuni kuniketa tonkhe tintfo lebekanato aphindze alandzele Jesu.
Lendvodza lecebile bekuyindvodza lelungile. Beketamile ngebumnene kulalela imiyaleto. Kodvwa uma Jesu amcela kutsi akanikele ngayo yonkhe intfo lanayo aphindze amlandzele akakwentanga.
Babili bebaPhostoli baJesu, Phetro na-Andreya bebatimisele kudzela yonkhe intfo lebebanayo kute balandzele Jesu. Uma Jesu abacela kutsi bamlandzele, bashiya umsebenti wabo bamlandzela.
Abrahama naye bekatimisele kunika noma ngayini bekanayo kuBabe wetfu loseZulwini. Abrahama waphila emhlabeni ngaphambi kwekutalwa kwaJesu. Ngaleso sikhatsi, Babe wetfu loseZulwini bekasadzinga kutsi bantfu banikele tilwane. Wayaleta Abrahama kutsi akanikele ngendvodzana yakhe, njengesivivinyo kubona kutsi Abrahama utawulalela yini. Abrahama bekatimisele kulalela. Wakha i-altar wase ubeka indvodzana yakhe kuyo. Abrahama bekalungele kubulala indvodzana yakhe, uma ingilosi imumisa. Lengilosi yatjela Abrahama kutsi kwakungakadzingeki kutsi anikele ngendvodzana yakhe. Babe wetfu loseZulwini bekati kutsi Abrahama bekatimisele kwenta konkhe Babe wetfu loseZulwini lamlayete kutsi akakunike, ngisho nendvodzana yakhe. Abrahama bekatsandza Babe wetfu loseZulwini kangangekutsi bekatimisele kwenta yonkhe intfo Babe wetfu loseZulwini lamyaleta yona. Babe wetfu loseZulwini wabusisa Abrahama ngoba Abrahama bekatimisele kumnikelela noma ngayini.
Kucocisana
-
Ngubani losibonelo semuntfu lobekangakatimiseli kunika ngako konkhe Jesu lamyaleta kutsi akunike?
-
Ngubani losibonelo semuntfu lobekatimisele kunika ngako konkhe Babe wetfu loseZulwini lamyaleta kutsi akunike?
-
Yini bewungayenta kuleti timo?
Lombusi lomncane locebile bekeswele lukholo kunikela ngetintfo takhe aphindze alalele Jesu.
Kungadzingeka Sinikele Tintfo ngenca Yemsebenti waJesu
Imindeni yetfu ingase isale uma silandzela Jesu. Labanye bantfu bangasihleka noma betame kusilimata uma silalela imiyaleto Yakhe. Singahle silahlekelwe yimisebenti yetfu ngekuba ngemalunga eLibandla laJesu Khristu.
Kungase kudzingeke sisebentise timali tetfu nesikhatsi setfu kuya kuyofundzisa labanye ngaJesu. Kungase kudzingeke sisebentise sikhatsi setfu kusita baholi beLibandla kwenta umsebenti Wakhe. Kungase kudzingeke sisebentise sikhatsi setfu nemali yetfu kusita labanye emndenini wetfu basenta umsebenti waJesu. Babe wetfu loseZulwini angase afune sinikele ngetimphilo tetfu kunekutsi siphike bufakazi betfu ngaJesu.
Kucocisana
-
Ungeva kunjani uma ungacelwa kutsi udzele tonkhe tintfo takho letiyintsandvokati?
-
Utimisele kanganani kunikela ngenca yemsebenti waJesu?
Abrahama bekanelukholo lolukhulu kangangobe bekalungele kunikela ngendvodzana yakhe Isaka ngemyaleto weNkhosi.
Umnikelo uletsa Tibusiso letingeke Tite ngalenye Indlela
Umnikelo usisita singabi nebugovu. Sifundza kusebentela Babe wetfu loseZulwini nekusita labanye bantfu. Sifundza kutsi kwentela bantfu tintfo kusenta sijabule. Sifundza kutsi kwenta loko Jesu lasiyaleta kutsi sikwente kumcoka kakhulu kwendlula noma nguyiphi intfo lephatsekako lesingaba nayo emhlabeni. Sifundza kutsi kusita labanye kumcoka kwendlula kuticabangela tsine ngekwetfu. Uma sinikela ngekutitsandzela, siphindze sitfole kutsi Babe wetfu loseZulwini usinika tibusiso letincono kwendlula loko lesikudzelile.
Kunikela ngenca yalabanye kusisita kutsi sicondzisise kancono loko Jesu lasentela kona. Wasitsandza ngalokwenele wate wanikela ngemphilo Yakhe ngenca yetfu. Njengoba sisanikela tintfo ngenca yaBabe wetfu loseZulwini noma ngenca yalabanye bantfu, sibatsandza kakhulu. Sicala kuba nelutsandvo nekuba njengaJesu naBabe wetfu loseZulwini.
Kuba netintfo letinyenti akusiko lokubi. Babe wetfu loseZulwini ngalesinye sikhatsi uyasinika letinto leti kute sisite labanye. Kodvwa kulukhuni kungatsandzi letintfo tetfu kanye nemali. Sisebenta matima kutitfola. Letinye taletintfo tiyadzingeka kute siphile. Noko, akukameli sitikhatsate kangako ngaleti tintfo kangangekutsi angeke sesidzele noma ngayini Babe wetfu loseZulwini layidzingako kusita bantfwana Bakhe.
Onkhe emalunga eLibandla laJesu Khristu kumele ente kusebentela Babe wetfu loseZulwini naJesu kube yintfo lebaluleke kakhulu etimphilweni tabo. Sikhombisa kutsi siyamtsandza Babe wetfu loseZulwini naJesu kwendlula kutsandza tintfo tetfu uma senta loko baholi beLibandla laJesu Khristu labasicela kutsi sikwente. Kumele sinikele sikhatsi setfu kubasita bafundzise baphindze basebentele labanye. Kute sibe ngulabafanelekile kuphila naBabe wetfu loseZulwini, kumele sitimisele kunika yonkhe intfo lesinayo kusita umsebenti waJesu uma kunguloko lakucelako kitsi.
Jesu utsembise tibusiso letinkhulu kulabo labamlalelako nalabamsebentelako. Utsite asikwati kuticabanga tintfo letimangalisako lesitatitfola emvakwesikhatsi uma sitawunikela ngenca yemsebenti Wakhe nyalo.