Tinsita Letisisekelo
Sehluko 1: Ukhona Nkulunkulu

Sehluko 1

Ukhona Nkulunkulu

Ngalesinye sikhatsi bantfu bayatibuta: Ukhona yini Nkulunkulu? Uma akhona Nkulunkulu, Unjani? Ngingati kanjani Ngaye?

Tintfo Letinyenti Tiyasikhombisa kutsi Ukhona Nkulunkulu

Nasibuka kuletintfo letinyenti letisimangaliso lamhlabeni, siyati kutsi umuntfu lotsite lohlakaniphile nalolungile wahlela waphindze wakwenta. Ebusuku, nasibona tinkhanyeti letinyenti nemapulanethi ahamba njalo etindzaweni tato letifanele, siyati kutsi kukhona umuntfu lotsite lonemandla lamakhulu lowenta futsi uyakulawula. Nkulunkulu nguye lowenta tonkhe leti tintfo.

Bakhona bantfu labalungile labambonile baphindze bakhuluma naNkulunkulu. Basitjelile kutsi Nkulunkulu ukanjani nekutsi ufuna tsine senteni. Basitjelile kutsi unguBabe wetfu loseZulwini. Babhale tincwadzi letingcwele kute sifundze Ngaye.

Ngamunye wetfu singati kutsi Nkulunkulu ukhona nekutsi futsi unguBabe wetfu loseZulwini. Utawusisita sati kutsi Ukhona ngempela nekutsi singati kabanti Ngaye.

Kucocisana

  • Ngutiphi taletinye tintfo letikhombisa kutsi Nkulunkulu ukhona?

Babe wetfu loseZulwini Ngumuntfu Lophelele

Labantfu labalungile labambonile Babe wetfu loseZulwini bashito kutsi ukhona ngempela. Uyaphila. Unjengemuntfu.

Babe wetfu loseZulwini akasiso sithico noma silwane. Unemtimba wenyama nematsambo. Umtimba wakhe ufana nemtimba wemuntfu, kodvwa wehlukile.

Umtimba Wakhe awuyuze ufe. Umtimba Wakhe awubuva buhlungu futsi angeke sowuke ugule.

Unemizwa. Angajabula noma adzabuke. Utsandza bonkhe bantfu futsi ufuna bajabule. Unemusa futsi ulungile. Wenta lokuhle kodvwa, futsi ukhuluma emaciniso odvwa. Wati tonkhe tintfo. Angenta tonkhe tintfo. Kunekukhanya lapho akhona khona. Kukhanya nebuhle Bakhe bungetulu kwako konkhe lesake sakubona.

Babe wetfu loseZulwini nguye kuphela umuntfu lekumele simkhonte. Uhlala endzaweni lokutsiwa kuseZulwini. Yindzawo lenhle kwendlula umhlaba.

Kucocisana

  • Ungumuntfu lokanjani Nkulunkulu?

  • Nkulunkulu wehluke kanjani kitsi?

Babe wetfu loseZulwini Ukhombisa Lutsandvo Lwakhe Kitsi Ngetindlela Letinyenti

Babe wetfu loseZulwini usebentisa emandla Akhe kusita tsine. Wenta iNdvodzana Yakhe, Jesu, yenta sibhakabhaka nemhlaba. Wenta Jesu kutsi ente lilanga, inyanga, netinkhanyeti. Walayetela Jesu kutsi abeke tihlahla netilwane emhlabeni. Babe wetfu loseZulwini wenta konkhe loku, entela tsine ngoba uyasitsandza. Ufuna kusisita kutsi sibe ngulabalungile futsi sijabule.

Babe wetfu loseZulwini usebentisa lwati Lwakhe kutsi asisite. Wati konkhe lokwentekile phambilini. Wati konkhe lokwentekako nyalo. Aphindze ati konkhe lokutakwenteka, esikhatsini lesitako. Wati imicabango yetfu sonkhe. Kungoba wati tonkhe tintfo, Uyati kutsi sidzinga ini kute sijabule. Uyati kutsi kute sijabule ngempela kumele sibe ngulabalungile. Ufuna kusisita kutsi sibe ngulabalungile ngoba uyasitsandza.

Kucocisana

  • Babe wetfu loseZulwini usikhombisa kanjani lutsandvo Lwakhe?

Babe wetfu loseZulwini Ufuna Simati

Njengoba Babe wetfu loseZulwini asitsandza, Usiphe imphilo nemhlaba lomuhle kute siphile kuwo. Ufuna sati letintfo lekumele sitente. Usitsembisile kutsi singamati.

Kwenta leti tintfo kungasisita kutsi sifundze kabanti ngaBabe wetfu loseZulwini:

  1. Singabuka lomhlaba lasentele wona sibonge.

  2. Singakholelwa kutsi Babe wetfu loseZulwini wangempela futsi uyasitsandza.

  3. Singafundza letintfo bantfu labalungile labatibhalile ngaBabe wetfu loseZulwini.

  4. Singafundza siphindze sente Lalafuna kutsi sikufundze futsi sikwente.

  5. Singakhuluma naBabe wetfu loseZulwini simcele kutsi asisite kutsi simati.

Kwati ngaBabe wetfu loseZulwini kungasisita etimphilweni tetfu. Kwati Ngaye kungasisita kutsi sijabule futsi siphephe. Ulungile futsi angeke ente tintfo letimbi kitsi. Singafundza letintfo lafuna kutsi sitente. Singafundza kutsi lusito Lwakhe singalucela kanjani. Singaba bantfu labancono nalabajabulile.

Kucocisana

  • Yini lesingayenta kute sati futsi sicondzisise Babe wetfu loseZulwini?

  • Kwati Babe wetfu loseZulwini kungasisita njani?