Kubuya Kwesibili kwaJesu Khristu

Jesu Khristu utawuphindza ete emhlabeni. Kutawuba yini timphawu tekubuya Kwakhe, futsi singalungiselela kanjani kuhlangana Naye uma eta?

Jesu Watsembisa kutsi Utawubuya Emhlabeni Futsi

Emvakwemalanga langemashumi lamane Jesu avusiwe, Yena nebaPhostoli Bakhe bahlangana entsabeni lebitwa ngekutsi yiNtsaba yeMincumo. Sikhatsi besesifikile kutsi Jesu abuyele ezulwini. Bekasatentile tonkhe letinfo Babe wetfu loseZulwini lebekamtfumele kutsi atente. BaPhostoli Bakhe babukela Jesu enyukela ezulwini. Basebukile baPhostoli, tingilosi letimbili teta taphindze tabatjela kutsi Jesu utawubuya futsi emhlabeni. Kusukela ngaleso sikhatsi kute kube ngunyalo, labo labakholelwa kuJesu bayakulangatelela kubuya Kwakhe. Kubuya Kwakhe kubitwa ngekutsi Kubuya Kwesibili kwaKhristu.

Ekubuyeni Kwesibili, Jesu utawehla ezulwini ngemandla lamakhulu. Utawuhlanta umhlaba kubo bonkhe bubi, futsi naSathane angeke asaba nawo emandla ngetulu kwebantfu. Jesu utawubusa iminyaka letinkhulungwane ngetulu kwabo bonkhe bantfu labebatsembele Kuye.

Kucocisana

Sati kanjani kutsi Jesu utawubuya futsi emhlabeni?

Jesu Usitjelile Loko Lokutawenteka Ngaphambi Kwekuta Kwakhe

Jesu usitjele tintfo letinyenti letitawenteka ngaphambi kwekubuya Kwakhe futsi. Leti tintfo tibitwa ngekutsi timphawu teKubuya Kwakhe Kwesibili. Usitjele kutsi sibuke leti timphawu siphindze sikulungele kubuya Kwakhe. Utsite uma sibona leti tintfo tenteka, sitawukwati kutsi uyeta masinyane. Kodvwa angeke sati sikhatsi lesicondzile sekubuya Kwakhe.

Uma sifundza imibhalo lengcwele futsi sitsembekile kuJesu, sitawukwati kutsi timphawu tekubuya kwaJesu ngutiphi. Tintfo letinyenti titawenteka ngaphambi kwekutsi Jesu ete emhlabeni futsi. Letinye setentekile, letinye tenteka nyalo, futsi letinye titawenteka esikhatsini lesitako.

Ngaphambi kweKubuya kwaJesu Kwesibili, livangeli litawushumayelwa kuto tonkhe tive. Loku kutawenta bantfu labanyenti bajabule futsi kubaletsele tibusiso. Letinye tintfo letitawenteka titawuvivinya lukholo lwetfu. Kutawuba khona bubi lobukhulu, kutamatama kwemhlaba, naletinye tinhlobo tekubhujiswa.

Kutawuba neKukhatsateka Lokukhulu Emhlabeni

Jesu watsi sitawukwati kutsi kubuya Kwakhe sekudvute uma sibona bubi lobukhulu, imphi, nekuhlupheka emhlabeni. Lesi kutawuba sikhatsi sekukhatsateka lokukhulu. Kutawuba nekutamatama kwemhlaba, tivunguvungu letinkhulu, tifo, kanye nendlala. Tangcotfo titawubhubhisa titjalo emhlabeni.

Bantfu labanyenti batawuyekela kutsandza Babe wetfu loseZulwini futsi batawuphendvukela kuSathane. Batawuphindze bayekele kutsandza nekusita labanye bantfu futsi batawucala kubalimata. Kutawuba netimphi letinyenti emhlabeni. Tive titawulwa todvwa. Leti timphi titawuchubeka kute kube nemphi lenkhulu neyekugcina letowenteka, lekutawuba yimphi lebhubhisa kakhulu kunato tonkhe latake taliwa emhlabeni. Jesu utawubese uyeta.

LiVangeli Libuyiselwe

Baphrofethi batsi livangeli litawubuyiselwa emhlabeni ngaphambi kwekutsi Jesu ete futsi. Livangeli libuyiselwe ngemPhrofethi Joseph Smith. Yonkhe imfundziso yelivangeli ledzingekako kutsi siyati futsi siyente kute sibuyele kuBabe wetfu loseZulwini ibuyiselwe emhlabeni.

Jesu watsi sitawukwati kutsi uyabuya masinyane uma iNcwadzi yaMormon seyishicilelwe yaphindze yaniketwa umhlaba. Kadzeni, umphrofethi Isaya naHezekeli balandzisa ngeNcwadzi yaMormon. INcwadzi yaMormon yahunyushwa ngumPhrofethi Joseph Smith kuya elulwimini lwesingisi. Seyihunyushiwe kusekela ngaleso sikhatsi kuya kuletinye tilimi. Itawuniketwa kuto tonkhe tive temhlaba ngaphambi kwekuta kwaJesu.

Indlu yaka-Israyeli kumele Igcogcwe Futsi

Babe wetfu loseZulwini watsi titukulwane tendlu yaka-Israyeli* kumele tive tiphindze tilemukele livangeli futsi titilungiselele kuhlangana naJesu uma eta futsi. Labo labalemukelako livangeli kumele balifundzise kubo bonkhe bantfu, bakhe emathempeli, baphindze bentele bantfu labafile timiso.

Bantfu labanyenti endlini yaka-Israyeli, kungaba ngengati noma ngekutfolwa, baguculelwa eBandleni njengoba bemukela livangeli laJesu Khristu. Umhlaba Longcwele ubusiselwe kugcogcwa kwetitukulwane ta-Abrahama letinyenti. Titukulwane ta-Abrahama tifaka ekhatsi bantfu labatiwa ngekutsi ma-Arabhu neBetive, kanye nalabanye. Letitukulwane tebantfu beNcwadzi yaMormon eMelika, labaphindze babe titukulwane ta-Abrahama, temukela livangeli futsi tiba bantfu labanemandla nalabatsembekile.

LiVangeli Litawushumayelwa kuwo Wonkhe Umhlaba

Jesu watsi sitawukwati kutsi uyabuya masinyane uma balandzeli Bakhe sebalishumayele livangeli kuwo wonkhe umhlaba. Kusukela ngalesikhatsi Libandla libuyiselwa, bafundzisi belivangeli batfunyelwa kuyawushumayela livangeli etiveni letehlukene. Bafundzisi belivangeli labanyenti nyalo bashumayela livangeli cishe yonkhe indzawo emhlabeni. Lonkhe lilunga leLibandla liyacelwa kutsi litjele tihlobo talo nebangani ngelivangeli, futsi labanyenti baya kulamanye emave kuyofundzisa livangeli, kute bonkhe bantfu babe nelitfuba lekuliva.

Elija Ufikile

Umphrofethi Malakhi eBhayibhelini watsi ngaphambi kwekutsi Jesu ete kwesibili, umphrofethi Elija utawuvakashela umhlaba. Utawubuyisa leligunya lekubopha imindeni ndzawonye ingunaphakadze. Utawubangela bantfu kutsi bafune kufundza ngabokhokho babo netitukulwane tabo aphindze abasite baphendvuke. NgaMabasa 1836, Elija weta waphindze wabuyisela leli ligunya kumPhrofethi Joseph Smith. Ngenca yekutsi Elija weta, imindeni nyalo seyingaboshwa ndzawonye ethempelini emhlabeni lamuhla.

Lidolobha Lelisha leJerusalema Litawakhiwa

Jesu watsi sitawukwati kutsi uyabuya masinyane uma Libandla Lakhe selakhe lidolobha lelibitwa ngeJerusalema Lensha. Jesu watsi utawubusa kulelo dolobha, futsi bantfu labalungile batawuhlala khona. Usitjelile kutsi lelidolobha leli litawakhiwa kuphi. Litawuba sesifundzeni saseMissouri e-United States.

Leti nguletimbalwa nje timphawu letitawusibonisa kutsi Jesu uyabuya masinyane. Imibhalo lengcwele isitjela ngaletinye timphawu. Nanoma timphawu letinyenti setivele tiboniwe asisati sikhatsi lesicondzile Jesu latawukuta ngaso futsi.

Kucocisana

Sati kanjani kutsi Kubuya Kwesibili kwaJesu sekusedvute?
Ngutiphi timphawu teKubuya Kwesibili kwaJesu?

Singaba Nekuthula neLitsemba nanoma Bubi neKukhatsateka Kusihacile

Kumele sitilungiselele Kubuya Kwesibili kwaJesu. Indlela lencono kakhulu yekutilungiselela kubuya Kwakhe kulalela timfundziso Takhe onkhe malanga. Kumele siphindze silalele imiyaleto nemiyalo layinika Mengameli weLibandla letfu lamuhla. Kumele sibe ngulabafanelekile kuba naMoya loNgcwele kitsi ngaso sonkhe sikhatsi kusihola emicabangweni yetfu nasetentweni. Jesu watsi uma silungele uma eta, angeke sesabe. Sitawujabula futsi sitawufuna kuba Naye. Labantfu labalungile angeke babhujiswe uma eta. Batawuhlala emhlabeni, futsi bantfwana babo batawukhula ngaphandle kwesono. Jesu utawuba nabo futsi ababusise aphindze abahole.

Uma Jesu eta futsi abuya ezulwini, labantfu lababi batawubhujiswa. Labantfu labalungile labafile batawuvuka emathuneni abo baphindze bamhlangabete aseta abuya ezulwini. Lalababi abanawuvuka emathuneni abo kute kube kungemvakwesikhatsi seminyaka lengu 1,000. Lesikhatsi seminyaka lengu 1,000 satiwa ngekutsi yiMileniyamu.*

Uma Jesu asaphila lamhlabeni, bantfu labambalwa kakhulu labebati kutsi Yena, uMsindzisi wemhlaba, utile. Uma Jesu eta futsi, wonkhe muntfu utawukwati kutsi nguJesu Khristu, iNdvodzana yaNkulunkulu, uMsindzisi wemhlaba.

Kucocisana

Kwati timphawu teKubuya Kwesibili kungasisita njani?
Kutawentekani kulabantfu labalungile emhlabeni uma Jesu abuya?
Kutawentekani kulabantfu lababi labatawube baphila ngaleso sikhatsi emhlabeni?