Sehluko 3
UMsindzisi wetfu
Ngubani lomuntfu loyedvwa longasiholela emuva kuBabe wetfu loseZulwini? Kungani kufuna simlandzele?
Besidzinga uMholi
Babe wetfu loseZulwini bekati kutsi uma sisesemhlabeni angeke sikhumbule imphilo yetfu Naye. Angeke sati letintfo lebesidzinga kutenta kute sibuyele Kuye. Bekati kutsi sitawona. Ngenca yetono tetfu, sitawujeziswa ngekuhlukaniswa Naye ingunaphakadze. Phindze nasifa, angeke sitfole umtimba wenyama nematsambo futsi.
Sitawudzinga umuntfu lotsite kutsi asisite ngaleti tinkinga. Lomuntfu utawusifundzisa kutsi kumele senteni kute sibuyele kuBabe wetfu loseZulwini. Utawusisita kutsi sincobe tintfo letingakalungi lesitatenta. Utawuphindze ente indlela yekutsi sitfole imitimba yetfu yenyama nematsambo emvakwekufa. Lomuntfu lo utobitwa ngekutsi nguMsindzisi wetfu. Nguye yedvwa lotokhona kusisindzisa kulesijeziso setintfo letimbi lesitawutenta. Nguye yedvwa lotosisita kutsi sifundze kutfobela Babe wetfu loseZulwini. Nguye yedvwa longenta kutsi sitfole imitimba yetfu yenyama nematsambo emvakwekufa.
Kucocisana
-
Ngutiphi letinye tetinkinga Babe wetfu loseZulwini lebekati kutsi sitawuhlangabetana nato emhlabeni?
-
Simdzingelani uMsindzisi kutosisita?
Babe wetfu loseZulwini Wakhetsa Jesu kuba nguMsindzisi wetfu
Babe wetfu loseZulwini uyasitsandza, futsi bekati kutsi sitawudzinga lusito. Bekati kutsi sitawuba nekudzabukisa lokukhulu uma site imitimba yenyama nematsambo futsi ngeke sibuyele sihlale Naye ingunaphakadze. Besidzinga umuntfu lotsite longasisita. Babe wetfu loseZulwini bekafuna kutsi umuntfu lotsite abe nguMsindzisi wetfu. Banaketfu lababili banikela kuba nguMsindzisi wetfu.
Umnaketfu lomdzala, Jesu, wacela Babe wetfu loseZulwini kutsi atfume Yena. Watsi utawulandzela lisu laBabe wetfu loseZulwini. Utawukuta emhlabeni atawusifundzisa tintfo lesitawudzinga kutenta kute sibuyele sihlale naBabe wetfu loseZulwini. Utawukufa kubhadalela letintfo letingakalungi lesatenta. Utawuphindze akhone kwenta kutsi sibuyele sihlale Naye emvakwekufa. Utawusivumela kutsi sitikhetsele tsine kulalela noma kungalaleli Babe wetfu loseZulwini.
Jesu bekati kutsi kutawuba mcoka kutikhetsela tsine tintfo lesitawutenta. Uma umuntfu tsite asiphocelela kulalela, besingeke sifundze siphindze sifane naBabe wetfu loseZulwini. Jesu bekafuna Babe wetfu loseZulwini atfole yonkhe inkhatimulo neludvumo.
Sathane, lebekabitwa ngaLusifa, naye wacela Babe wetfu loseZulwini kutsi amkhetse abe nguMsindzisi wetfu. Watsi utawukuta emhlabeni asiphocelele kutsi sente lekumele sikwente. Watsi kute namunye lotawulahleka. Ngeke asivumele sitikhetsele ngekwetfu. Umvuzo wakhe, bekafuna yonkhe inkhatimulo neludvumo lwaBabe wetfu loseZulwini labekanalo.
Ngoba Babe wetfu loseZulwini uyasitsandza, wakhetsa Jesu kutsi abe nguMsindzisi wetfu. Ngaleso sizatfu, Jesu uvamise kubitwa ngaJesu Khristu. Khristu usho kutsi lokhetsiwe nguBabe wetfu loseZulwini kutsi abe nguMsindzisi. Babe wetfu loseZulwini wakhetsa Jesu kunekukhetsa Sathane ngoba Babe wetfu loseZulwini bekangafuni kutsi silahlekelwe lilungelo letfu lekukhetsa ngekwetfu. Bekati kutsi kumele sente tintfo letilungile ngoba siyafuna, hhayi ngoba kukhona umuntfu losiphocelele.
Kucocisana
-
Yini Jesu lafuna kusentela yona?
-
Yini Sathane lafuna kuyenta?
-
Babe wetfu loseZulwini wamkhetselani Jesu kuba nguMsindzisi wetfu?
Babe wetfu loseZulwini wakhetsa Jesu kuba nguMsindzisi wetfu.
Jesu nguMsindzisi neMholi wetfu
Uma Babe wetfu loseZulwini akhetsa Jesu, Sathane watfukutsela. Wancenga munye kulemitsatfu imimoya eZulwini kutsi imlandzele. Kanyekanye balwa balwisa Jesu nebalandzeli Bakhe. Bebafuna kuphocelela Babe wetfu loseZulwini kutsi emukele lisu laSathane. Babe wetfu loseZulwini wenta Sathane nebalandzeli bakhe bashiye eZulwini.
Sathane nebalandzeli bakhe angeke batfole umtimba wenyama nematsambo. Angeke bakhone kubuyela bahlale naBabe wetfu loseZulwini. Ngulabo kuphela labemukela Jesu njengeMsindzisi wabo labatotfola imitimba yenyama nematsambo.
Siyati, ngoba sinemtimba wenyama nematsambo, kutsi samukela Jesu kutsi abe nguMsindzisi wetfu. Sakhetsa lokulungile eZulwini. Kumele sichubeke sikhetse lokulungile la emhlabeni. Kumele silandzele Jesu. Nguye yedvwa longasifundzisa kutsi singabuyela kanjani kuBabe wetfu loseZulwini. Angasisita kuncoba lokungakalungi lesikwentako aphindze asisite kufundza kwenta lokulungile site sifane naBabe wetfu loseZulwini.
Babe wetfu loseZulwini ufuna silandzele siphindze silalele Jesu. Uyati kutsi Jesu uyohlala asifundzisa indlela yaBabe wetfu yekwenta tintfo, ngako ke nasilalela Jesu silalela naBabe wetfu loseZulwini. Umyaleto noma umlayeto lobuya kuJesu ngumyaleto noma ngumlayeto lobuya kuBabe loseZulwini futsi.
Kucocisana
-
Sati ngani kutsi sakhetsa Jesu kuba nguMsindzisi wetfu?
-
Ngubani umuntfu loyedvwa longasikhombisa kutsi singabuyela kanjani kuBabe wetfu loseZulwini?
-
Kumele simlandzele leni Jesu?