Sehluko 8
Kukhuluma naBabe loseZulwini
Babe wetfu loseZulwini usitsandza kakhulu. Usentele indlela yekutsi sikhulume Naye noma kunini lapho sifuna. Singakhuluma kanjani naBabe wetfu loseZulwini?
Singakhuluma naBabe wetfu loseZulwini
Kukhuluma naBabe wetfu loseZulwini kubitwa ngekutsi ngumthandazo. Noma Babe wetfu loseZulwini ahlala eZulwini, singakhuluma Naye, futsi uyasiva. Ufuna kusisita. Usicelile kutsi sikhulume Naye. Uma sikhuluma Naye, utawusisita sente tintfo letilungile lekufuna sitente.
Singamutjela Babe wetfu loseZulwini letintfo lesiticabangako. Singamtjela kutsi siyamtsandza. Singamtjela kutsi siyabonga ngaletintfo lasinikete tona. Singamcela kutsi asisite.
Singakhuluma naBabe wetfu loseZulwini noma ngunini lapho sidzinga kukhuluma Naye. Kumele sikhulume Naye uma sisodvwa. Nasisodvwa singakhuluma Naye ngemizwa netinkinga letiphetselene ngemuntfu ngamunye. Kumele sikhulume Naye lokungenani njalo ekuseni nanjalo kusihlwa.
Kumele futsi sikhulume Naye kanyekanye nemindeni yetfu. Loku singakwenta njalo ekuseni nakusihlwa. Singaphindze sikwente loku ngaphambi kwekudla ngakunye nasibonga kudla kwetfu.
Babe wetfu loseZulwini akayuze ayekele kufuna kukhuluma natsi. Uyohlala asitsandza futsi afuna kusisita. Noma senta lokungakalungi, usasitsandza. Utosilalela aphindze asisite.
Kucocisana
-
Kumele sikhulume leni naBabe wetfu loseZulwini?
-
Kumele sikhulume Naye nini?
Kumele sithandaze ngamunye nangemindeni ekuseni nakusihlwa.
Babe wetfu loseZulwini Usitjelile kutsi Sikhulume Kanjani Naye
Uma sithandaza, kumele sitjele Babe wetfu loseZulwini tintfo lesitivako nalesitidzingako ngempela. Akukameli sisho emagama lafanako ngaso sonkhe sikhatsi uma sikhuluma Naye. Akudzingeni kutsi sihlabele noma simemete.
Usitjelile indlela yekukhuluma Naye. Kumele sikhulume sicondzise ngco Kuye, sitsi “Babe wetfu loseZulwini,” noma emagama lafana nalawa. Kumele sikhulume Naye ngelutsandzo nenhlonipho.
Lokulandzelako, kumele simbonge ngetintfo Lasentele tona.
Leti nguletinye tetintfo lekumele simbongele tona:
-
Kumele simbonge ngemhlaba lomuhle nange kudla kwetfu, timphahla, nalokunye lesinako.
-
Kumele Simbonge ngetimfundziso Takhe nangelikhono letfu lekufundza kabanti Ngaye.
-
Kumele Simbonge ngemindeni nangebangani betfu, imphilo yetfu lenhle, kanye nemsebenti wetfu.
Sibese siyamcela ngetintfo lesitidzingako. Leti nguletinye tetintfo lesingahle sifune kuticela Kuye:
-
Singamcela kutsi asisite kutsi sati kutsi ngutiphi tintfo letiliciniso futsi ngutiphi tintfo letingasiwo emaciniso.
-
Singamcela kutsi asivikele nemindeni nabomakhelwane betfu.
-
Singamcela asisite sente letintfo lafuna sitente.
-
Singamcela asisite kutsi sikhetse kwenta tintfo letifanele.
-
Singamcela asisite kutsi siphendvuke etonweni tetfu.
-
Singamcela asisite kutsi sitfole kudla lokwanele kwalelo langa.
-
Singamcela asisite kutsi sicatulule tinkinga tetfu.
-
Singamcela asite imindeni yetfu noma bangani kucatulula tinkinga labanato.
Kumele siphetse umthandazo wetfu ngekutsi, “Egameni laJesu Khristu, amen.” Loku kusisita kutsi sikhumbule kutsi Jesu nguMsindzisi wetfu. Jesu usebenta ngekucondziswa nguBabe wetfu loseZulwini kusisita ngako konkhe lesikudzingako. Kumele sikhulume ligama laJesu ngenhlonipho.
Kucocisana
-
Uma sikhuluma naBabe wetfu loseZulwini, sicala kanjani?
-
Ngutiphi letinye tetintfo lesingambongela tona?
-
Ngutiphi letinye tetintfo lesingamcela tona?
-
Sitsini uma sesicedzile kukhuluma naBabe wetfu loseZulwini?
Babe wetfu loseZulwini Uyasiphendvula Imihla yonkhe
Singaba nesiciniseko sekutsi Babe wetfu loseZulwini uyasilalela. Uyatati tintfo letinhle kwendlula konkhe kutsi singaba nato. Uhlala alungele kusisita.
Imvamisa Babe wetfu loseZulwini utfumela imphendvulo ngaMoya loNgcwele. Moya loNgcwele uyasisita kutsi sicondzisise tintfo lesidzinga kutati nekutenta. Ngalesinye sikhatsi Moya loNgcwele utjela lomunye umuntfu kutsi asisite.
Kumele sivume kwemukela timphendvulo Babe wetfu loseZulwini lasinika tona. Kungenteka angasiniki letintfo lesiticelako. Kungenteka angasiphendvuli ngendlela lesibheke ngayo. Kodvwa uyakwati lokusilungele.
Kucocisana
-
Usiphendvula kanjani Babe wetfu loseZulwini?
-
Akasiniki ngani letintfo lesiticelako ngaso sonkhe sikhatsi?
Siba Bantfu Labancono ngeKuthandaza
Kungenteka singati lokulungile lokumele sikwente. Kungenteka sesabe. Kungenteka singati kutsi tinkinga tetfu singaticatulula kanjani. Kungenteka singati kutsi ngukuphi lokuliciniso futsi ngukuphi lokungasilo liciniso. Singati tintfo lokufanele sitente kodvwa singabi nemandla lenele ekutenta.
Nasikhuluma naBabe wetfu loseZulwini njalo nje, uyasisita ngetinkinga tetfu. Uyasisita kutsi sati nekutsi sente lokufanele. Nasati siphindze senta lokufanele, siba bantfu labancono. Siba njengaBabe wetfu loseZulwini.
Kucocisana
-
Siba bantfu labancono kanjani ngekukhuluma naBabe wetfu loseZulwini?