Sehluko 28
Kwelishumi neMnikelo
Yini kwelishumi nemnikelo, futsi Babe wetfu loseZulwini usibusisa kanjani uma sikunika ngekutitsandzela?
Babe wetfu loseZulwini Usitjele kutsi Sikhokhe Kwelishumi
Kwelishumi ngulokukodvwa eshumini lemali noma letinye tintfo lesitiholako. Babe wetfu loseZulwini watjela bantfu kadzeni kutsi bakhokhe kwelishumi. Abrahama, Jakobe, nalabanye labanyenti bawutfobela lomyaleto.
Uma sihola noma sitfola imali, kumele sinikele lokukodvwa eshumini kwako njengekwelishumi. Uma sinetilwane nome titjalo, singakhokha kwelishumi. Sinikela lokukodwa eshumini kwaletitjalo noma lokukodwa eshumini kwaletilwane letinsha letikhuliswa ngemnyaka. Uma kwenteka, esikhundleni sekunikela ngetitjalo netilwane eBandleni, kumele sititsengise bese sinikela lemali eBandleni. Sikhokhela kwelishumi kumbhishobhi noma mengameli weligala. Uma singati kutsi kumele sinikele malini, kumele sibute umbhishobhi noma mengameli weligala kutsi asisite sicondzisise umtsetfo wekwelishumi.
Sisakhokha kwelishumi, sisita ekusabalaliseni livangeli emhlabeni wonkhe. Kwelishumi kusebenta kwakha takhiwo teLibandla, kuphrinta tincwadzi, nekubhadala letinye tintfo letidzingekako eBandleni leliciniso laJesu.
Ngisho nebantfwana kumele bakhokhe kwelishumi. Batawufundza kwenta loku basabona batali bakhokha kwelishumi. Uma bacala kukhokha kwelishumi uma basebancane, batawufuna kuyikhokha masebabadzala sebanemindeni yabo.
Kucocisana
-
Ngumalini lokutsiwa asiyikhokhe njengekwelishumi?
-
Bantfwana betfu singabafundzisa kanjani kutsi abakhokhe kwelishumi?
Sikhombisa Lutsandvo kuBabe wetfu loseZulwini uma Sikhokha Kwelishumi
Kumele sikhokhe kwelishumi ngekutitsandzela kute Babe wetfu loseZulwini akwemukele aphindze asibusisele kona. Kumele sikhokhe kwelishumi ngoba siyafuna kukukhokha.
Uma site sifiso sekukhokha kwelishumi, kumele sicabange ngato tonkhe tibusiso Babe wetfu loseZulwini lasinikete tona. Ngekukhokha kwelishumi kwetfu ngekutitsandzela siyakhombisa kutsi siyamtsandza Babe wetfu loseZulwini nalabanye bantfu.
Kucocisana
-
Fundza 2 kubaseKhorinte 9:6–7.
-
Kubaluleke ngani kunika ngekutitsandzela?
Babe wetfu loseZulwini Utsembise kusiBusisa uma Sikhokha Kwelishumi
Babe wetfu loseZulwini uyajabula uma sikhokha kwelishumi kwetfu. Utsembise kusibusisa uma sikukhokha. Utsite utawusinika tibusiso letinyenti angeke sati loko lesitawukwenta ngato tonkhe. Uphindze watsi angeke sibhujiswe nalabo lababi uma sikhokha kwelishumi ngekutitsandzela.
Babe wetfu loseZulwini utawusibusisa kute simati kancono. Utawusibusisa kute sati kancono livangeli. Utawusinika emandla langetiwe kuphila timfundziso telivangeli lilanga ngalinye futsi asite imindeni yetfu kuphila lelivangeli. Kuphindze kumenta ajabule uma sisitana kufundza ngelivangeli.
Uma sikhokha kwelishumi, sifundza kuphatsa imali yetfu kancono futsi asibi nebugovu. Kumele njalo nje sicale sibeke eceleni kwelishumi kwetfu emholweni wetfu, futsi sitawutfola kutsi Babe wetfu loseZulwini utawusibusisa kute sikhone kuphatsa loko lokusele kute sitawuba nalokwanele kwetidzingo tetfu.
Kucocisana
-
Ngutiphi tibusiso letintsatfu lesitemukelako ngekukhokha kwelishumi?
Sisita Labanye Bantfu uma Sikhokha Iminikelo yeKuzila
Njengemalunga eLibandla siyazila linye lilanga ngenyanga. Loku kusho kutsi sihlala ngaphandle kwekudla kudla lokubili. Asidli futsi asinatsi lutfo cishe emahora langu 24. Sikholelwa kutsi kuzila kusisita sibe nemimoya lenemandla.
Babe wetfu loseZulwini usitjele kutsi sinikele umnikelo lobitwa ngekutsi ngumnikelo wekuzila. Lomnikelo lo kumele kube nguloko lebesingakusebentisela kudla lesingakakudli ngalelo langa uma sizilile. Kumele sinikele ngetulu kwalelinani leli uma sikhona. Babe wetfu loseZulwini utawusibusisa uma sikwenta. Leminikelo le isetjentiselwa kuniketa kudla, indzawo yekuhlala, tembatfo, kanye naletinye tintfo kulabo labeswele. Uma sibhadala iminikelo yekuzila sikhombisa kutsi siyabatsandza bantfu lesiphila nabo.
Sinikela umnikelo wetfu wekuzila kumbhishobhi noma mengameli weligala, futsi usebentisa lemali kusita labamphofu nalabo labadzinga lusito lolukhetsekile. Babe wetfu loseZulwini utsite uma sisita labo labamphofu utawusibusisa. Utawuphendvula imithandazo yetfu aphindze asisite uma sidzinga lusito. Utawusisita kutsi sicondzisise livangeli kancono aphindze asihole imihla yonkhe.
Libandla lisebentisa kwelishumi nemnikelo:
-
Kufundzisa livangeli kulabanye.
-
Kwakha nekunakekela emathempeli, tindlu temhlangano, kanye naletinye takhiwo teLibandla.
-
Kuphrintha tincwadzi tesifundvo naletinye tintfo bantfu beLibandla labatidzingako kufundza ngelivangeli nekwenta umsebenti waBabe wetfu loseZulwini.
-
Kusita labo labangakhoni kutinakekela ngekwabo.
Kucocisana
-
Singakhombisa kanjani kubonga kuBabe wetfu loseZulwini ngato tonkhe tibusiso lasinikete tona?
-
Kukhokha umnikelo wekuzila kusenta njani sijabule?
Kuzila nemthandazo kuletsa tibusiso.