Sehluko 5
Jesu Wenta Umhlaba
Ngubani lowenta umhlaba? Wawentelani?
Besidzinga Umhlaba
Incenye yelisu Babe wetfu loseZulwini lasichazela lona ezulwini kwaba kutsi sishiye kwesikhashana. Besidzinga indzawo lesitawuya kuyo, kudze nasebukhoneni Bakhe, kute sitfole umtimba wenyama nematsambo nekutsi sivivinywe kute kubonakale kutsi siyakhona yini kwenta tincumo letilungile. Bekadzinga kuba nemuntfu tsite kusentela lendzawo. Wakhetsa Jesu kutsi asentele.
Kucocisana
-
Nkulunkulu wahlelelani kusentela umhlaba?
Jesu Wenta Umhlaba
Jesu wenta umhlaba. Wenta imini nebusuku. Wenta lilanga, inyanga, kanye netinkhanyenti. Wehlukanisa emanti emhlabeni lowomile wenta lwandle, emachibi, kanye nemifula. Wahlanyela tjani, tihlahla, timbali, nato tonkhe tinhlobo tetitjalo emhlabeni. Wabese ubeka tilwane, tinhlanti, netilwanyakatana emhlabeni. Jesu nakacedza kwenta konkhe loku, umhlaba bosowulungele kutsi bantfu bahlale kuwo.
Babe wetfu loseZulwini wase wenta wesilisa newesifazane. Lowesilisa wetsiwa kutsi ngu-Adamu, kantsi lona wesifazane wetsiwa kutsi ngu-Eva. Ngamunye waba nemtimba wenyama nematsambo njengemtimba waBabe wetfu loseZulwini. Wonkhe lomsebenti wekwenta umhlaba nekubeka tonkhe tintfo letiphilako kuwo ubitwa ngekutsi Yindalo. Babe wetfu loseZulwini wajabula ngalomhlaba nato tonkhe tintfo layalela Jesu kutsi atibeke kuwo.
Kucocisana
-
Bo-Adamu na-Eva bebehluke kanjani kuleletinye tintfo Nkulunkulu latenta?
Indalo yaBabe loseZulwini Ikhombisa kutsi Uyasitsandza
Sesiphila emhlabeni lomuhle Babe loseZulwini layaleta Jesu kutsi awente. Lilanga lisinika kufutfumala nekukhanya. Litulu lenta titjalo tikhule liphindze lisinike emanti ekunatsa. Titjalo netilwane emhlabeni tisinika kudla nekwembatsa.
Jesu wenta konkhe loku wentela tsine, ngekucondziswa nguBabe wetfu loseZulwini. Nasibona kutsi wenta konkhe loku entela tsine, siyabona kutsi Babe wetfu loseZulwini uyasitsandza futsi uyasikhatsalela.
Kucocisana
-
Cabanga ngaletinye taletintfo Babe wetfu loseZulwini lasentele tona.
-
Sati ngani kutsi Babe wetfu loseZulwini uyasitsandza futsi uyasikhatsalela?
Singakhombisa kutsi Siyabonga Ngemhlaba
Kumele sihlale sikhumbula kutsi Babe wetfu loseZulwini wentela tsine konkhe lokusemhlabeni. Akatfokoti nasingakukhumbuli loko. Singamkhombisa kutsi siyabonga ngekusebentisa ngekuhlakanipha letintfo talamhlabeni. Kumele umhlaba siwunakekele futsi siwugcine uhlantekile. Kumele simbonge Babe wetfu loseZulwini ngalomhlaba lomuhle kangaka nasithandaza Kuye. Kufuna sikhombise Kuye kutsi siyabonga ngemhlaba ngekwenta letintfo lafuna sitente la.
Kucocisana
-
Singamkhombisa kanjani Babe wetfu loseZulwini kubonga kwetfu ngemhlaba?