Tinsita Letisisekelo
Sehluko 17: Balandzeli baJesu Khristu
Abraham on the Plains of Mamre [Abrahama useMatsafeni aseMamre], ngu Grant Romney Clawson

Abrahama wenta sivumelwano neNkhosi.

Sehluko 17

Balandzeli baJesu Khristu

Balandzeli baJesu Khristu behlukile kulabanye bantfu. Bobani balandzeli Bakhe? Behluke kanjani?

Balandzeli baJesu Bayamtsandza Babe wetfu loseZulwini

Balandzeli baJesu bantfu labakholelwa Kuye futsi bayamlalela. Bafundza lisu laBabe wetfu loseZulwini njengoba lafundziswa kubo nguJesu futsi bafuna kulilandzela. Bayamtsandza Babe wetfu loseZulwini futsi bakholelwa kutsi ufuna imphilo lenhle kakhulu ngabo bonkhe. Bakholelwa kutsi Jesu yiNdvodzana yaBabe wetfu loseZulwini. Bakholelwa kutsi Jesu nguMsindzisi wabo. Bakholelwa kutsi Jesu wenta kwenteka kutsi babuyele bahlale naBabe wetfu loseZulwini. Bakholelwa kutsi ngekulandzela Jesu kuphela nangekulalela imiyaleto Yakhe bangacolelwa tono tabo baphindze babuyele kuBabe wetfu loseZulwini.

Labo labalandzela Jesu bayabonga kuNkulunkulu naJesu ngako konkhe Nkulunkulu naJesu labentele kona. Bafuna kulalela Jesu. Bayaphendvuka etonweni tabo. Bayabhajatiswa baphindze bemukele sipho saMoya loNgcwele. Bayacondzisisa kutsi bonkhe bantfu babalulekile kuNkulunkulu. Betama kusita labanye bantfu nganoma nguyiphi indlela labangenta ngayo.

Balandzeli baJesu beliciniso benta titsembiso letingcwele. Bayatsembisa kuBabe wetfu loseZulwini kubitwa ngeligama laJesu Khristu. Loku kusho kwatiwa njengelilunga leLibandla Lakhe, kwemukela nekulandzela tonkhe timfundziso Takhe, nekumkhumbula njalo. Baphindze batsembise kutsandza labanye bantfu nekubasita.

Babe wetfu loseZulwini wenta titsembiso letingcwele kubalandzeli baJesu. Letinye tetintfo latetsembisako kutsi utawu:

  1. Bemukela njengemalunga eLibandla laJesu Khristu.

  2. Banika sipho saMoya loNgcwele.

  3. Basita batfole letintfo labatidzingako.

  4. Banika emandla Akhe kute bakhone kwenta umsebenti Wakhe.

  5. Banika tibusiso letinkhulu nyalo naphakadze.

  6. Bavumela kutsi babuyele bahlale Naye uma bachubeka balalela Jesu.

Kucocisana

  • Balandzeli baJesu bahluke kanjani kulabanye bantfu?

  • Yini balandzeli baJesu labetsembisa kuyenta?

  • Yini Babe wetfu loseZulwini naJesu labayetsembisako kubalandzeli baJesu?

Moses Calls Aaron to the Ministry [Mosi Ubita Aroni eBufundisini], ngu Harry Anderson

Mosi wanika buphristi ku-Aroni ngekumbeka tandla.

Jesu unika buPhristi kuMalunga eLibandla eSilisa Lafanelekile

Jesu unika emalunga esilisa lafanelekile eLibandla ligunya lekumsita kwenta umsebenti Wakhe. Leli ligunya libitwa ngekutsi buphristi. Babe wetfu loseZulwini wanika leli ligunya kuJesu.

Kuba nebuphristi sibusiso lesikhulu. Buphristi ligunya lelingcwele. Ngulawo kuphela emalunga esilisa labalandzeli baJesu ngekweliciniso futsi lasebenta ngekweliciniso kugcina imiyaleto Yakhe labavumelekile kuba nebuphristi.

Uma indvodza inebuphristi, ingenta tintfo letitsite Jesu lafuna kutsi itente. Angafundzisa labanye bantfu ngaBabe wetfu loseZulwini naJesu, ababhabhatise, futsi abanike sipho saMoya loNgcwele. Indvodza lenebuphristi ingabusisa umndeni wayo uma bagula phindze uma banaletinye tinkinga. Noma nini bantfu labakholelwa kuJesu baphindze balalela imiyaleto Yakhe, Jesu ubanike buphristi naletinye tibusiso.

Kucocisana

  • Yini buphristi?

  • Jesu wabunikelani buphristi kumalunga Akhe lamadvuna lafanelekile eLibandla?

Bantfu Labanyenti Bakholelwa kuJesu baphindze Balandzela Imiyaleto Yakhe Ngaphambi kwekutsi Ete Emhlabeni

Adamu na-Eva nalabanye bebantfwana babo bamkholelwa Jesu baphindze balandzela imiyaleto Yakhe ngaphambi kwekuta kwakhe emhlabeni

Babe wetfu loseZulwini watjela Adamu na-Eva kutsi bakholwe kuJesu Khristu baphindze balalele imiyaleto Yakhe. Batjelwa kutsi utawukuta emhlabeni ngalelinye lemalanga. Adamu na-Eva batsembisa kutsi batawulalela. Bagcina setsembiso sabo. Babhatjatiswa, baphindze bemukela sipho saMoya loNgcwele.

Ngaphambi kwekutsi Jesu ete emhlabeni, wanika buphristi ku-Adamu. Wavumela Adamu kutsi anike buphisti kumadvodzana akhe lebekalalela Jesu. Adamu wabeka tandla takhe enhloko yangamunye wemadvodzana akhe lalalelako wabanika buphristi. Emvakwesikhatsi, emadvodzana a-Adamu anika buphristi kumadvodzana abo ngendlela lefanako.

Kucocisana

  • Yini bo-Adamu na-Eva labayenta kute babe balandzeli baJesu?

  • Balandzeli baJesu babemukela kanjani buphristi?

Abrahama Wabusisa Jesu waphindze Walandzela Imiyaleto Yakhe

Abrahama nemndeni wakhe bakholelwa kuJesu. Bakholelwa kutsi utawukuta emhlabeni ngalelinye lemalanga. Abrahama watsembisa Babe wetfu loseZulwini kutsi utawumlalela Jesu aphindze ente umsebenti Wakhe. Babe wetfu loseZulwini watsembisa Abrahama kutsi uma angalalela, Babe wetfu loseZulwini utambusisa kanye nesitukulwane sakhe. Nati letinye tetintfo Babe wetfu loseZulwini latitsembisa:

  1. Utawunika Abrahama nesitukulwane sakhe buphristi.

  2. Utawunika Abrahama nesitukulwane sakhe live labatawuhlala kulo.

  3. Utawunika Abrahama titukulwane letinyenti.

  4. Titukulwane letinyenti ta-Abrahama titawuba balandzeli baJesu.

  5. Linyenti letitukulwane ta-Abrahama litawukhetsa kwenta umsebenti waJesu nekufundzisa labanye bantfu ngaBabe wetfu loseZulwini naJesu.

Abrahama wafundzisa bantfwana bakhe kutsi bakholelwe kuJesu baphindze balalele imiyaleto Yakhe. Abrahama wanika buphristi kundvodzana yakhe lengu-Isaka. Isaka wanika buphristi kundvodzana yakhe lenguJakobe. Emvakwesikhatsi, Babe wetfu loseZulwini washintja libito laJakobe kwaba ngu Israyeli. Israyeli bekanemadvodzana lalishumi nakubili. Wabafundzisa kutsi bakholelwe kuJesu baphindze balalele imiyaleto Yakhe. Bebanebuphristi. Titukulwane temadvodzana aka-Israyeli betibitwa ngetive letilishumi nakubili taka-Israyeli.

Kucocisana

  • Yini Babe wetfu loseZulwini layitsembisa Abrahama?

  • Bekungubani Israyeli?

Bantfu baka-Israyeli Bakholelwa kuJesu baphindze Balalela Imiyaleto Yakhe

Ngoba bekute kudla lokwanele eveni labo, Israyeli nemadvodzana akhe bahamba bayohlala eveni lebelibitwa ngekutsi kuseGibhithe. Ngesikhatsi bantfu lebebahlala eGibhithe benta titukulwane taka-Israyeli tasebenta matima. Babaphocelela kutsi bahlale eGibhithe kute babe tisebenti tabo. Bebangabavumeli kutsi babuyele eveni Jesu lebekabatsembise kubanika lona.

Emvakweminyaka leminyenti, Babe wetfu loseZulwini wakhetsa indvodza lobekutsiwa nguMosi kuhola situkulwane sa-Israyeli kubakhipha eGibhithe. Mosi wasebentisa emandla ebuphristi kubasita baphunyuke kubantfu baseGibhithe. Wabaholela eveni Jesu lebekabatsembise kubanika lona. Leli live belibitwa ngekutsi kuseKhenani. Beyitfolakala enshonalanga yemfula iJordane kanye neLwandle lweluswayi.

Kucocisana

  • Ngumaphi emandla Mosi lawasebentisa kusita bantfu baJesu kuphunyuka eGibhithe?

Bantfu baka-Israyeli bayekela Kukholelwa kuJesu

Emvakwekutsi bantfu baka-Israyeli bahlale eveni leKhenani iminyaka leminyenti, bayekela kukholelwa kuJesu nekulalela imiyaleto Yakhe. Jesu watfumela baphrofethi kubatjela kutsi baphendvuke baphindze balalele imiyaleto Yakhe. Isaya, Elija, naJeremiya bekungulabanye bebaphrofethi Jesu labatfuma. Bebabanyenti labanye bebaphrofethi.

Kodvwa bantfu baka-Israyeli abatange baphendvuke. Ngakoke Babe wetfu loseZulwini wavumela labanye bantfu kutsi bete batobabusa futsi batsatse live labo futsi babahlakate linyenti labo kulamanye emave. Loku kwenta labantfu batfobeke kwaphindze kwababangela kutsi bakhumbule Jesu futsi bamlalele. Kodvwa eminyakeni leminyentana ngaphambi kwekutalwa kwaJesu eBhetlehema, bantfu baka-Israyeli baba nekukhohlakala futsi, naBabe wetfu loseZulwini wavumela bantfu lebebabitwa ngemaRoma batfumbe bantfu baka Israyeli. Batsatsa balawula imihlaba yabo kanye netakhiwo tabo letingcwele.

Kucocisana

  • Yini leyenteka uma labantfu bakhohlwa titsembiso tabo kuBabe wetfu loseZulwini baphindze bayekela kumlalela Jesu?

Jesu weta Emhlabeni waphindze Wahlela Balandzeli Bakhe

Uma Jesu eta emhlabeni, wafundzisa bantfu kutsi bekayiNdzodzana yaNkulunkulu. Wafundzisa kutsi abanawuhlupheka ingunaphakadze ngetono tabo uma batawulalela timfundziso Takhe. Wabatjela kutsi abakholelwe Kuye baphindze baphendvuke. Watsi kumele babhajatiswe. Watsembisa kutfumela Moya loNgcwele kutsi atobasita. Wabafundzisa kutsi abatsandze baphindze balalele Nkulunkulu. Wabafundzisa kutsi abatsandze labanye bantfu nekutsi babasite.

Labantfu labamkholelwa Jesu baphindze bamlalela baba balandzeli Bakhe. Wahlela bantfu Bakhe baba licembu lelibitwa ngekutsi Libandla laJesu Khristu. Wanika buphristi kumadvodza labekabaholi nebafundzisi eBandleni Lakhe.

Kucocisana

  • Jesu wabasita kanjani bantfu kutsi bamlandzele?

  • Yini labantfu lebekudzingeka bayente kute babe balandzeli baJesu?

Kuba Ngumunye weBalandzeli baJesu Bubele Lobukhulu

Labo labalandzela Jesu bayajabula. Bayalati lisu laBabe wetfu loseZulwini ngabo. Bayati kutsi Babe wetfu loseZulwini uyabatsandza. Bayati kutsi ufuna balandzele Jesu kute Jesu atabasita kubuyela Kuye. Bayatati tintfo lekumele batente kute bajabule. Banesipho saMoya loNgcwele kubasita nekubadvudvuta. Uma banetinkinga, bayati kutsi Jesu utawubasita. Bayati kutsi Nkulunkulu utawubabusisa ngekuba nelukholo lekulandzela Jesu.

Labo labalandzela Jesu bayabonga ngetibusiso letinyenti Babe wetfu loseZulwini labanike tona. Babonga Babe wetfu loseZulwini ngaleti tibusiso uma bathandaza.

Bantfu labangasibo balandzeli baJesu bangaba balandzeli Bakhe. Bangafundza Ngaye ngekufundza nangekulalela baholi beLibandla Lakhe. Bangakholelwa Kuye, baphendvuke, baphindze babhajatiswe. Uma balalela Jesu, bangemukela tintfo letifanako Nkulunkulu lahlale atitsembisa balandzeli baJesu.

Kucocisana

  • Kububele lobukhulu ngani kuba ngumunye webalandzeli baJesu?