Sehluko 26
Kwetsembeka
Babe wetfu loseZulwini wetsembekile kuko konkhe lakwentako. Ingabe ufuna natsi sitsembeke?
Babe wetfu loseZulwini Usitjela kutsi Sitsembeke kuko konkhe Lesikwentako
Kwetsembeka kusho kukhuluma liciniso. Kwetsembeka kusho kungacambi emanga noma kungebi. Uma sisho tintfo letingasilo liciniso, sicamba emanga. Uma sisho incenye kuphela yeliciniso, sicamba emanga. Uma siholela bantfu kutsi bakholelwe intfo letsite lengasilo liciniso, asetsembeki.
Kweba kutsatsa intfo letsite leyiyalomunye umuntfu ngaphandle kwemvumo yaloyo muntfu. Kutsatsa intfo letsite esitolo ngaphandle kwekungabhadali kweba. Babe wetfu loseZulwini usitjele kutsi singebi.
Bantfu labetsembekile basebenta matima ngawo onkhe emahora lababhadalelwa wona. Bacashi labatsembekile babhadala labo lababasebentelako ngaloko basebenti lokubafanele. Bantfu labatsembekile bakhokhisa ngalokufanele ngemisebenti yabo nangetintfo labatitsengisako. Kumele sitsembeke uma sifuna kuhlala naBabe wetfu loseZulwini.
Sathane utama kusiphocelela kutsi singetsembeki. Uma singatsembeki noma nganguyiphi indlela, silandzela Sathane. Sathane utsandza emanga. Sathane ufuna sicabange kutsi kukuhlakanipha kungetsembeki. Utama kusenta sicabange kutsi sitawujabula uma singakatsembeki. Ufuna sicabange kutsi kungetsembeki akusiso sono. Sathane ufuna kutsi singatsembeki kute singanawujabula.
Babe wetfu loseZulwini usifundzise kutsi sitsembeke ngaso sonkhe sikhatsi. Uyadzabuka uma sicamba emanga. Ufuna sati kutsi kucamba emanga akukalungi mihla yonkhe. Kungetsembeki akukalungi mihla yonkhe futsi kwenta singajabuli.
Labanye bantfu beba tintfo ngoba bacabanga kutsi banelilungelo lekuba nato. Labanye bantfu labancane bayakopa esikolweni kute batfole emamaki lancono ngenca yekutsi labanye bafundzi bayakwenta. Labanye bantfu bacamba emanga kute labanye batawucabanga kahle ngabo. Atikho tizatfu kuleti letenta kweba noma kucamba emanga kube ngulokulungile. Uma sibeka tizatfu ngekweba, asiketsembeki.
Kucocisana
-
Yini Kwetsembeka?
-
Ngubani lesimlandzelako uma sitsembekile?
Singatsembeka kuko konkhe Lesikwentako
Singatsembeka ngekuba nesibindzi sekukhuluma liciniso, noma ngabe kulukhuni kukwenta loko. Babe wetfu loseZulwini utawusisita sitsembeke uma simcela. Utawutfumela Moya loNgcwele kusisita sikhetse kwetsembeka. Moya loNgcwele utawusisita sati kutsi kwetsembeka nguyona intfo lelungile kuyenta.
Uma sicondzisisa timfundziso taJesu, sitawufuna kwetsembeka kuko konkhe lesikwentako. Jesu usifundzisile kutsi sibantfwana baBabe wetfu loseZulwini nekutsi sonkhe sibomnaketfu nabodzadzewetfu. Ufundzisile kutsi singajabula ngempela kuphela uma sitsembekile. Besingeke sibe nekuthula ngekwetfu uma sinentfo tsite emakhaya etfu lekungasiyo yetfu. Usifundzisile kutsi uma sinelukholo Kuye, siphendvuka, futsi sitsembeka ngempela singabuyela sihlale naBabe wetfu loseZulwini siphindze sijabule ingunaphakadze.
Uma sicondzisisa tonkhe leti tintfo, sicala kufuna kwetsembeka. Asifuni kucamba emanga kulabanye bantfu. Sifuna kujabulisa Babe wetfu loseZulwini kute sikhone kubuyela sihlale Naye. Sifuna kuvuma emaphutsa etfu siphindze siwalungise kute Babe wetfu loseZulwini atawusicolela.
Kucocisana
-
Uma sicambe emanga noma kancane, kumele siphendvuke leni?
-
Singatsembeka kanjani kuko konkhe lesikwentako?
-
Babe wetfu loseZulwini angasisita kanjani kutsi sitsembeke?
Kwetsembeka Kusenta Sijabule
Uma sitsembekile, sitiva sikahle. Babe wetfu loseZulwini uyajabula ngatsi. Asitiva sinelicala. Sitiva sikahle ngoba siyati kutsi kute lesikufihlako kulabanye. Akudzingeki sikhatsateke kutsi umuntfu tsite utawati kutsi sicambe emanga.
Uma sitsembekile siba njengaBabe wetfu loseZulwini. Siyati kutsi silungiselela kubuyela sihlale Naye. Uma sitsembekile, labanye bantfu bayasitsemba. Uma sitsembekile, Babe wetfu loseZulwini utawusisita kutsi sente letintfo lesifuna kutenta letilungile.
Kucocisana
-
Siva kunjani uma sitsembekile?
-
Umhlaba ungaba njani uma wonkhe muntfu angatsembeka?