Sehluko 4
Sikhululekile Kukhetsa
Sonkhe senta tincumo onkhe emalanga. Babe wetfu loseZulwini usinike lilungelo lekutikhetsela ngekwetfu. Kungani kumele sitame kwenta tincumo letilungile?
Babe wetfu loseZulwini Usinika Lilungelo leKukhetsa
Ezulwini besikhululekile kukhetsa. Besikhululekile kulandzela Jesu noma kulandzela Sathane. Liningi lebantfwana baBabe wetfu loseZulwini bakhetsa kulandzela Jesu. Lalabanye bakhetsa kulandzela Sathane. Babe wetfu loseZulwini wavumela bonkhe bantfwana Bakhe kutsi batentele tincumo tabo.
Babe wetfu loseZulwini uphindze asivumele kukhetsa ngekwetfu la emhlabeni. Uma sita emhlabeni, wabangela kutsi sikhohlwe ngemphilo yetfu Naye. Besidzinga kufundza kutikhetsela ngekwetfu nasingekho Naye.
Kucocisana
-
Uva kunjani nawuphocelelwa kutsi wente lokutsite?
-
Uva kunjani nakukhona lokuvumela kutsi ukhetse letintfo lofuna kutenta?
Lisu laBabe wetfu loseZulwini Lingasebenta Kuphela Uma Sikhululekile Kukhetsa
Incenye yeLisu laBabe wetfu loseZulwini kwaba kusitfumela emhlabeni lapho khona kutoba netintfo letinhle naletimbi. Ufuna sikhetse loku lokuhle. Sathane utama kusiphocelela kutsi sikhetse lokubi. Sikhululekile kukhetsa lokuhle noma lokubi.
Uma senta tincumo letilungile, siyakhona kakhulu kwenta tintfo Babe wetfu loseZulwini lafuna kutsi sitente. Nasenta letintfo Babe wetfu loseZulwini lafuna kutsi sitente, siyakhona kufana naBabe wetfu loseZulwini kakhulu. Siyakhona kutitfolela ngekwetfu kwenta tincumo letinhle kwendlula konkhe. Sicondzisisa ncono tintfo letisijabulisako netintfo letisenta sidzabuke.
Kube besingakhoni kutikhetsela ngekwetfu, besingeke sikhone kufanana naBabe wetfu loseZulwini. Besingeke sikhone kutifundzela ngekwetfu lokuhle kwendlula konkhe lekufanele sikukhetse. Besingeke sikhone kukhombisa Babe wetfu loseZulwini kutsi siyamtsandza futsi sifuna ngempela kumlandzela.
Kucocisana
-
Kumele sibenalo leni lilungelo lekukhetsa?
Kukhetsa Kulalela Babe wetfu loseZulwini Kusenta Sijabule
Tincumo letifanele tiletsa imiphumela lemihle; tincumo letingakalungi tiletsa imiphumela lemibi. Uma sikhetsa kulalela Babe wetfu loseZulwini, sitotfokota siphindze sibe bantfu labancono. Uma sikhetsa kungamlaleli, sitoba nekudzabukisa futsi ngeke sibencono.
Uma senta tincumo letifanele, siyabona kutsi siyatfokota ngenca yato. Siyafundza kutsi kumele sati lokuningi lokuhle. Nasibona kutsi kukhetsa lokulungile kusenta sijabule, sifuna kwenta lokungetulu lokutincumo letifanele. Sifisa kakhulu kakhulu kulunga. Singenta tincumo letifanele malula ngoba siyati imiphumela itaba mihle. Sifundza netintfo lekumele sitati siphindze sitente kute sifane kakhulu naBabe wetfu loseZulwini.
Uma senta tincumo letingakalungi, siva lusizi nemahloni. Nasichubeka senta tintfo letingakafaneli, Sathane ucala kuba nemandla etikwetfu. Kuba matima kakhulu kukhetsa kwenta lokuhle. Siyayekela kutama kulandzela lisu laBabe wetfu loseZulwini.
Kucocisana
-
Cabanga ngaletinye tincumo lotentile. Kwaba yini umphumela waleso sincumo?
-
Ungakhetsa njani kujabula futsi ubuyele uhlale naBabe wetfu loseZulwini?
-
Kukusita njani kutsatsa sincumo lesilungile kute utsatse letinye tincumo letilungile?
-
Kukhetsa tintfo letingakalungi kukuvikela kanjani kutsi wente tincumo letilungile esikhatsini lesitako?
Babe wetfu loseZulwini Utawusisita Kwenta Tincumo Letilungile
Babe wetfu loseZulwini ufuna sente tincumo letilungile kute sifundze letintfo latatiko, sente letintfo latentako, sibe naletintfo lanato. Uyati kutsi sitojabula siphindze sibuyele sihlale Naye uma sikhetsa kwenta tincumo letilungile.
Babe wetfu loseZulwini ufuna kusisita sente tincumo letilungile. Ngekusitwa Nguye, singakhetsa kwenta konkhe latsite asikwente. Uma sicela Kuye, utawusisita kuvimbela tilingo taSathane. Utasipha emandla ekukhetsa lokulungile. Utawusisita kulandzela lisu Lakhe siphindze sifane Naye.
Kucocisana
-
Babe wetfu loseZulwini ufunelani sibe netincumo letilungile?
-
Angasiphocelela yini kwenta lokulungile? Leni?