Tinsita Letisisekelo
Sehluko 30: Umsebenti wetfu Kusita Emalunga Emndeni

Sehluko 30

Umsebenti wetfu Kusita Emalunga Emndeni

Lilunga ngalinye lemndeni lingasita kanjani kwenta umndeni ube ngulojabulile?

Lonkhe Lilunga Lemndeni Libalulekile

Kuba nemndeni lonelutsandvo nalojabulako kudzinga umsebenti. Babe wetfu loseZulwini unike tibopho kumuntfu ngamunye emndenini. Lilunga ngalinye lemndeni kumele libe lusito, lijabule, futsi libe nemusa kulabanye. Uma sithandaza, sisebenta, sihlabela, futsi sidlala ndzawonye, imindeni yetfu ingajabula.

Kuba nelutsandvo kulamanye emalunga emndeni wetfu kwenta kube lula kitsi kwenta letintfo Babe wetfu loseZulwini lafuna kutsi sitente. Uma sitsandza umndeni wetfu, sifuna kwenta konkhe lesingakhona kukwenta kute sibasite. Ngisho netintfo letimatima kutenta tiba lula uma sitenta ngelutsandvo. Kutsatsa sikhatsi nemsebenti kuba lilunga lemndeni lelilungile.

Kucocisana

  • Lilunga ngalinye lemndeni lingasita kanjani kwenta likhaya indzawo lejabulisako?

  • Libaluleke ngani lonkhe lilunga lemndeni?

Babe wetfu loseZulwini Unike Batali Tibopho Letikhetsekile

Babe namake kumele basebente ndzawonye kunakekela bantfwana babo nekubaniketa letintfo labatidzingako. Kumele baphindze bafundzise bantfwana babo livangeli. Kumele babafundzise kuthandaza nekulalela imiyaleto yaBabe wetfu loseZulwini.

Babe namake kumele bacondzisise kutsi ngalesinye sikhatsi bantfwana batawenta tincumo letingakalungi ngisho nangemuva kwekube sebafundzisiwe lokulungile.

Uma bantfwana benta intfo letsite lengakalungi, batali akukameli bayekele kwetama kubasita. Batali kumele bachubeke kutsandza nekufundzisa bantfwana babo. Kumele futsi babe tibonelo letinhle kubo futsi babazilele baphindze babathandazele.

Batali kumele banikete tintfo letitsite kumindeni yabo:

  1. Kumele batsandze bantfwana babo baphindze bafundzise bantfwana babo kutsandzana.

  2. Kumele bafundzisa bantfwana babo livangeli.

  3. Kumele bafundzise emalunga emndeni indlela yekuthandaza.

  4. Kumele bafundzise bantfwana babo kukhokha kwelishumi nemnikelo ngekutsi bakhokhe kwabo kwelishumi nemnikelo.

  5. Kumele bafundzise bantfwana babo indlela yekusebenta.

  6. Kumele banike likhaya lelihlantekile, tembatfo, kanye nekudla.

  7. Kumele babe nesiciniseko kutsi bantfwana babo bayafundza kufundza, kubhala, nekwenta tibalo letisisekelo ngekubatfumela esikolweni noma kubafundzisa ekhaya.

  8. Kumele bente konkhe labangakhona kukwenta kute bantfwana babo bafundze umsebenti futsi balungele kutfola imali leyanele yetintfo labatidzingako.

  9. Kumele bakhombise bantfwana babo indlela yekusebentisa imali ngekuhlakanipha nekonga imali yetidzingo letitako.

  10. Kumele basite bantfwana babo kutfutfukisa lwati nemakhono abo. Leti kungaba tintfo letifana njengelikhono lekufundzisa, kudlala umculo, kuhlabela, kulungisa tintfo, noma ube nekucondzisisa nalabanye.

Batali kumele batimisele kusebenta matima kutsi basite bantfwana babo. Babe wetfu loseZulwini utsite batali kumele bente siciniseko kutsi banfwana babo baphatsana kahle futsi banekudla netembatfo.

Batali kumele bahlele kusengaphambili kute bakwati kuniketa leti tintfo ngisho noma sebagula, balahlekelwa ngumsebenti wabo, noma banaletinye tinkinga. Bangakwenta loku ngekonga imali nekugcina kudla lokwengetiwe, tembatfo, emafutsa etindzaweni lapho loku kuvunyelwe.

Kucocisana

  • Yini batali labangayenta kunika imindeni yabo tidzingo tabo?

  • Yini batali labangayenta kulungiselela tikhatsi lapho bangaba netinkinga?

Image
umndeni upheka ndzawonye

Babe uneTibopho letitsite

Babe ngumholi webuphristi wemndeni. Babe kumele ahole umndeni wakhe ngelutsandvo nangemusa. Kumele akhombise umndeni wakhe kutsi imiyaleto yaBabe wetfu loseZulwini iphilwa kanjani ngekuyiphila yena ngekwakhe. Kumele aphindze afundzise umndeni wakhe livangeli. Kumele abite umndeni ndzawonye ngemthandazo wemndeni ekuseni nakusihlwa. Umkakhe kumele amsite kwenta leti tintfo.

Babe kumele asebentise buphristi bakhe kubusisa emalunga emndeni wakhe. Anganika bantfwana bakhe labancane sibusiso nelibito. Angababhabhatisa uma sebaneminyaka lesiphohlongo. Angagcoba emadvodzana akhe ebuphristini aphindze anike bantfwana bakhe tibusiso letikhetsekile uma batidzinga. Angababusisa uma bagula.

Babe kumele acitse sikhatsi nemntfwana wakhe ngamunye. Kumele akhulume nabo aphindze afundze kucondzisisa tidzingo nekukhatsateka kwabo. Kumele abakhutsate aphindze abatjele kutsi uyabatsandza. Kumele abatjele kutsi bangeta kuye njalo kute batfole lusito nganoma ngutiphi tinkinga labangaba nato.

Kucocisana

  • Yini tibopho tababe?

  • Angabusebentisa kanjani buphristi labuphetse kusita umndeni wakhe?

Make uneTibopho letitsite

Sibopho samake lesibaluleke kakhulu kutala bantfwana nekubanakekela nekubafundzisa. Kunika imitimba yenyama nematsambo kubantfwana bemoya baBabe wetfu loseZulwini ngumsebenti longcwele. Uma make enta loku, ungumhlanganyeli naBabe wetfu loseZulwini. Kutala bantfwana kungulesinye setibusiso letinkhulu.

Make kumele abe nelutsandvo. Kumele asite kufundzisa ngamunye umntfwana livangeli. Kudzingeka asite aphindze asebente nangamunye umntfwana. Make kumele ente ngamunye webantfwana bakhe ative abalulekile futsi kumele abasite bacondzisise tintfo letibatungeletile. Kumele asebente njengemlingani nendvodza yakhe kwenta leti tintfo.

INcwadzi yaMormon ilandzisa ngelicembu lemajaha lalungile lalalela timfundziso tabomake babo. Bomake balamajaha bawafundzisa kwetsembeka, sibindzi, nekulunga. Bomake babo baphindze babafundzisa kutsi Babe wetfu loseZulwini utawubagcina baphephile uma banelukholo kuJesu. Lawa majaha kwakumele abe ngemasotja kute bavikele live labo. Ngenca yekutsi lawa majaha aphila timfundziso tabomake babo futsi bebanelukholo, baba nesibindzi sekwenta umsebenti wabo babhekene nebungoti. Wonkhe make angaba nemtselela lomkhulu etimphilweni tebantfwana bakhe.

Kucocisana

  • Yini tibopho tamake?

  • Bumake bubitwelani ngelubambiswano naBabe wetfu loseZulwini?

Uma kuneMtali Munye kuphela

Ngalesinye sikhatsi babe noma make ushiywa yedvwa kutsi akhulise umndeni futsi kumele ente umsebenti wabo bobabili bobabe namake. Babe wetfu loseZulwini uyati kutsi loku kumatima kukwenta. Uma umuntfu lonjalo, lesimbita ngemtali loyedvwa, acela Babe wetfu loseZulwini, Babe wetfu loseZulwini utawusita loyo muntfu kunakekela umndeni.

Umtali loyedvwa angaphindze atfole lusito kubanaketfu labasitako* nabodzadzewetfu labasitako* (emalunga eLibandla labekwe kunakekela lamanye emalunga eLibandla).

Kucocisana

  • Ngubani longasita batali lababodvwa?

Bantfwana nabo baneTibopho letitsite

Bantfwana kumele basite batali babo kwenta likhaya indzawo lejabulisako. Bantfwana kumele basite batali babo kuhlanta indlu nendzawo leyitungeletile. Bangasita kulungisa kudla kwemndeni, kugeza titja, nekuwasha timphahla. Bangaphindze basite kunakekela bomnakabo noma bodzadzewabo labancane.

Bantfwana kumele batame kamatima kufundza letintfo batali babo lababafundzisa tona. Kumele bafundze kusebenta matima nekwenta imisebenti kahle. Kumele bafundze kwenta imisebenti labaniketwe kutsi bayente.

Bantfwana kumele balalele imiyaleto yaJesu. Kumele basite lamanye emalunga emndeni. Babe wetfu loseZulwini akajabuli uma bantfwana bacabana. Babe wetfu loseZulwini utjele bantfwana kutsi balalele baphindze bakhombise inhlonipho kubatali babo.

Bantfwana kumele batsandze batali babo. Kumele babalalele baphindze babahloniphe. Bantfwana kumele phindze babanakekele uma bagula noma uma sebakhulile futsi bangeke basakhona kutinakekela ngekwabo.

Kucocisana

  • Yini Babe wetfu loseZulwini labheke kutsi bantfwana bayente?

  • Yini bantfwana lekumele bayentele batali babo uma batali babo sebagugile?

  • Yini bantfwana lekumele bayente kulalela nekukhombisa inhlonipho kubatali babo?

Sidzingo sekuCinisa Umndeni

Emhlabeni lamuhla, bantfu labanyenti lababi batame kushintja imibono yetfu ngemndeni. Mabonakudze, emafilimu, nemamagazini akhombisa imibono leminyenti lengakavami nalengakalungi ngebesilisa nebesifazane nendlela labaphatsana ngayo. Imibono lemibi iyafundziswa etinhlelweni letentiwa tibonakale tihlekisa noma tijabulisa. Kungabi msulwa kukhonjiswa kungulokujabulisako nalokufisekako. Bantfwana batfwetjulwa bakhombisa kungahloniphi lokukhulu kubatali babo. Imindeni lelungile kuhlekiswa ngayo. Ngalesinye sikhatsi bantfwana betfu ababoni emafilimini noma kumabonakudze kutsi injani ngempela imphilo lenhle yasekhaya.

Batali kumele batame kuvikela bantfwana babo ekuboneni emafilimu netinhlelo tamabonakudze taloluhlobo. Kumele bafundzise bantfwana babo kutsi leni kungakameli babukele tinhlelo noma emafilimu lamabi. Lokubaluleke kunako konkhe, batali kumele mihla yonkhe babeke sibonelo lesihle emakhaya abo. Uma bantfwana babona sibonelo lesihle onkhe emalanga emakhaya, batawuba bantfwana labalungile futsi, emvakwesikhatsi, batawuba batali labalungile. Uma babona batali babo bakhombisana lutsandvo, batawufuna kuba ngulolo hlobo lwemtali.

Kucocisana

  • Kumele sikhetse ngekucophelela leni letintfo bantfwana betfu labavumelekile kutibona kumabonakudze noma kumafilimu?

Babe wetfu loseZulwini Ufuna Sisitane

Lonkhe lilunga lemndeni kumele litsandze futsi lisite lomunye nalomunye. Sifundza kusita labanye ngekusita batali betfu kucala nabomnaketfu nabodzadzewetfu. Kumele siphindze sisite tihlobo tetfu uma tidzinga lusito. Akukameli sicele lusito kulabanye uma nje sikwati kutondla ngekwetfu. Uma sikwenta, Babe wetfu loseZulwini akajabuli ngatsi.

Jesu bekatsandza wonkhe umuntfu, futsi weta emhlabeni kutosisita. Wasifundzisa kutsi sitsandze siphindze sisite wonkhe muntfu. Uma sitsandza labanye njengoba Jesu enta, sitawenta konkhe lesingakhona kukwenta kubasita.

Labanye betfu bacela Babe wetfu loseZulwini kutsi asite labo labadzinga lusito, bese asenti lutfo ngekwetfu kubasita. Loku akukalungi. Kumele sikhumbule kutsi Babe wetfu loseZulwini usita labanye ngatsi. Kumele sicale sithandazele labo labadzinga lusito bese siyabasita ngayo yonkhe indlela lesingakhona ngayo.

Sonkhe sidzinga lusito kulabanye bantfu. Uma sibantfwana, batali betfu bayasondla, bayasigcokisa, baphindze basinakekele. Sisakhula, labanye bantfu basifundzisa tintfo lesidzinga kutati nekutenta. Linyenti letfu sidzinga lusito lwalabanye uma sigula.

Uma sisita labanye bantfu, simukela tibusiso. Likhono letfu lekutsandza liyakhula, sincipha bugovu, futsi netinkinga tetfu tibonakala tingekho matima kangako. Babe wetfu loseZulwini utsite labo labafuna kuhlala Naye kumele batsandze baphindze basite bantfwana Bakhe.

Kucocisana

  • Babe wetfu loseZulwini ufunelani futsi udzingelani kutsi sisitane?

  • Ngubani lozuzako ngelusito lwetfu?

Print