Tinsita Letisisekelo
Sehluko 20: KuHlelwa kwebuPhristi
Image
Labanemagunya Jikelele emhlanganweni jikelele

Tikhulu tebuphristi labengamele Libandla Bungameli Bekucala neKhoramu yebaPhostoli labalishumi nakubili. Bakhona labanye besilisa nebesifazane labasita kuhola lomsebenti weLibandla.

Sehluko 20

KuHlelwa kwebuPhristi

Indvodza ingalitfola kanjani ligunya lekwenta umsebenti waBabe wetfu loseZulwini?

Uma Indvodza inebuPhristi, Ingamela Babe wetfu loseZulwini

Buphristi ligunya Babe wetfu loseZulwini lalinika emadvodza nebafana labafanelekile kwenta umsebenti Wakhe emhlabeni. Wanika leli ligunya kuJesu. Jesu sewunike leli ligunya kumadvodza emhlabeni. Emadvodza nebafana labanebuphristi bamelela Babe wetfu loseZulwini naJesu. Benta tintfo lamanye emadvodza nebafana labangeke sebakhone kutenta. Bangaba bafundzisi belivangeli baphindze bafundzise livangeli laJesu Khristu. Bangabusisa bantfu labagulako. Bangenta imisebenti lengcwele eBandleni.

Jesu usitjelile indlela indvodza lenganika ngayo buphristi kulenye indvodza noma umfana. Indvodza lephetse buphristi ibeka tandla tayo enhloko yalendvodza noma umfana. Ubese unika buphristi kuye egameni laJesu Khristu nangeligunya lalobuphristi lebuphetse.

Yindvodza noma ngumfana kuphela lolalela imiyaleto yaJesu longemukela buphristi. Jesu utawuvumela emadvodza nebafana kwenta umsebenti Wakhe kuphela uma balalela imiyaleto Yakhe.

Kute umuntfu lomkhulu emhlabeni kwendlula indvodza noma umfana losebentisa buphristi ngendlela lefanele.

Kucocisana

  • Yini buphristi?

  • Ngubani longemukela buphristi?

BuPhristi behlukaniswe Tincenye letimbili

Tincenye letimbili tebuphristi buPhristi baka-Aroni nebuPhristi bakaMelkhisedeki. BuPhristi baka-Aroni ngalesinye sikhatsi bubitwa ngebuphristi lobuncane. BuPhristi bakaMelkhisedeki ngalesinye sikhatsi bubitwa ngebuphristi lobukhulu.

BuPhristi baka-Aroni

BuPhristi baka-Aroni bucanjwe emvakwa-Aroni, umnakabo Mosi, umphrofethi. Aroni bekangumholi ngesikhatsi saMosi.

Lilunga lesilisa lelifanelekile leLibandla lingemukela buPhristi baka-Aroni ekucaleni ngaBhimbidvwane ngemnyaka lakahlanganisa ngaye 12 weminyaka. Emadvodza nebafana labanebuPhristi baka-Aroni bangafundzisa bantfu. Labanye labanebuPhristi baka-Aroni bangabhabhatisa bantfu. Basita bantfu bakhumbule Jesu. Bangasita bantfu ngetindlela letinyenti.

BuPhristi bakaMelkhisedeki

BuPhristi bakaMelkhisedeki bucanjwe emvakwendvodza lebitwa ngaMelkhisedeki. Melkhisedeki bekayindvodza lelungile lenebuphristi. Bekaphila ngesikhatsi sa-Abrahama. Bekangumphristi lomkhulu. Ngaphambi kwekutsi buphristi bucanjwe emvakwakhe, bebubitwa ngekutsi buPhristi lobuNgcwele emvakweLuhlelo lweNdvodzana yaNkulunkulu. Leligama lebuphritsi lashintja kuya kuMelkhisedeki kuvikela bantfu kusebentisa ligama laNkulunkulu kaningi ngalokwecile.

Lilunga lesilisa lelifanelekile leLibandla kumele lokungenani libe neminyaka lengu 18 kuphatsa buPhristi bakaMelkhisedeki. Emadvodza laphetse buPhristi bakaMelkhisedeki anemandla ekunika tibusiso kulabanye. Jesu ubavetela letintfo labadzinga kutati nekutisho ekunikeni leti tibusiso.

Kucocisana

  • Ngubuphi buphristi lobubili eBandleni?

BuPhristi ngabunye bunemaHhovisi neLigunya lelehlukene

Uma umuntfu emukela buphristi, ugcotjelwa ehhovisi lebuphristi. Bobubili buPhristi baka-Aroni nebuPhristi bakaMelkhisedeki bunemahhovisi lamanyenti. Ngalinye linemsebenti lokhetsekile.

Emadvodza nebafana lanebuPhristi baka-Aroni futsi bagcotjelwe ehhovisi lemphristi kulobu buphristi banemandla ekwenta nati tintfo:

  1. Kufundzisa livangeli.

  2. Kubhabhatisa.

  3. Kulungiselela, kubusisa, nekundlulisa sidlo seNkhosi.*

  4. Kusita labo labanebuPhristi bakaMelkhisedeki ekuvakasheleni nasekusiteni emalunga eLibandla.

  5. Kunika buPhristi baka-Aroni kulabanye.

Emadvodza lanebuPhristi bakaMelkhisedeki aneligunya lekwenta nati tintfo:

  1. Kuhola Libandla.

  2. Kushumayela livangeli.

  3. Kunika sipho saMoya loNgcwele.

  4. Kunika tibusiso letikhetsekile.

  5. Kunika bantfwana ligama nesibusiso.

  6. Kuphilisa labagulako.

  7. Kunika buphristi kulabanye.

  8. Kwenta tonkhe letintfo emadvodza nebafana lanebuPhristi baka-Aroni langatenta.

Kucocisana

  • Labo labanebuPhristi bakaMelkhisedeki baneligunya lekwenta ini?

  • Labo labanebuPhristi baka-Aroni baneligunya lekwenta ini?

EmaHhovisi ebuPhristi baka-Aroni neMisebenti Yawo

Emahhovisi ebuPhristi baka-Aroni ngumdikhoni, umfundzisi, umphristi, nembhishobhi.

Umdikhoni

Lilunga lesilisa lelifanelekile leLibandla lingemukela lobuphristi liphindze ligcotjwe kuba ngumdikhoni ekucaleni ngaBhimbidvwane ngemnyaka lakahlanganisa ngaye 12 weminyaka. Kumele alalele imiyaleto yaJesu nemitsetfo yeLibandla.

Lena yimisebenti yemdikhoni:

  1. Kwendlulisa sidlo seNkhosi.

  2. Kusita baholi bakhe.

  3. Kusita bafundzisi ebuPhristini baka-Aroni kwenta imisebenti yabo uma bayabelwe.

Umdikhoni angeke sekanike buphristi kulomunye umuntfu. Angeke abhabhatise muntfu. Angeke abusise sidlo seNkhosi.

UmFundzisi

Lilunga lesilisa lelifanelekile leLibandla lingemukela buPhristi liphindze ligcotjwe kuba ngumfundzisi ekucaleni ngaBhimbidvwane ngemnyaka lakahlanganisa ngaye 14 weminyaka. Kumele alalele imiyaleto yaJesu nemitsetfo yeLibandla.

Lena yimisebenti yemfundzisi:

  1. Kubuketa emalunga eLibandla, kubasita bafeze tidzingo tabo tenyama netakamoya.

  2. Kusita emalunga kutsi alalele imiyaleto yaJesu.

  3. Kusita labo labanebuPhristi bakaMelkhisedeki ngekusita imindeni nabo nangekusebentisa basite baphindze bafundzise livangeli kulena mindeni.

  4. Kulungiselela sidlo seNkhosi.

  5. Uma kudzingekile, bente tonkhe tintfo umdikhoni latentako.

Umfundzisi angeke anike buphristi kulomunye umuntfu. Angeke futsi abhabhatise muntfu. Angeke abusise sidlo seNkhosi.

UmPhristi

Lilunga lesilisa lelifanelekile leLibandla lingemukela buphristi liphindze ligcotjwe kuba ngumphristi ekucaleni ngaBhimbidvwane ngemnyaka lakahlanganisa ngaye 16 weminyaka. Kumele alalele imiyaleto yaJesu nemitsetfo yeLibandla.

Lena yimisebenti yemphristi:

  1. Kufundzisa livangeli.

  2. Kukhutsata emalunga kutsi alalele imiyaleto yaJesu.

  3. Kubhabhatisa.

  4. Kubusisa sidlo seNkhosi.

  5. Kugcoba labanye badikhoni, bafundzisi, nebaphristi.

  6. Kuhola imihlangano uma kute muntfu emhlanganweni lonebuPhristi bakaMelkhisedeki.

Umphristi angatenta tonkhe letintfo umfundzisi nemdikhoni latentako. Angeke sekagcobe muntfu ehhovisi lembhishobhi noma nganguliphi lemahhovisi lebuPhristi bakaMelkhisedeki.

Umbhishobhi

Umbhishobhi ngumholi weliwadi.

Lena yimisebenti yembhishobhi (mengameli weligala unetibopho letifanako egaleni):

  1. Kwengamela (kuhola) liwadi.

  2. Kusebenta njengamengameli wekhoramu yebaphristi.

  3. Kuchuba luhlolo lekufaneleka lwemalunga eliwadi.

  4. Kweluleka emalunga eliwadi.

  5. Kusita emalunga eliwadi akhone kutimela aphindze alungiselele timo letiphutfumako.

  6. Kubuketa imibhalo netetimali nekusentjetiswa netekuphepha endlini yemhlangano.

Mengameli weLibandla ucondzisa bomengameli betikhonkhwane kutsi bagcobe emadvodza kuba babhishobhi.

Kucocisana

  • Yini imisebenti yemdikhoni, umfundzisi, umphristi, nembhishobhi?

EmaHhovisi ebuPhristi bakaMelkhisedeki neMisebenti Yawo

Emahhovisi ebuPhristi bakaMelkhisedeki ngumbonisi, umphristi lomkhulu, umphatriyakhi, Labangemashumi Lasikhombisa, umPhostoli. Ngalinye lalamahhovisi lawa linemisebenti letsite.

Umbonisi

  1. Kubhabhatisa.

  2. Kunika sipho saMoya loNgcwele.

  3. Kuchuba imihlangano.

  4. Kwengamela imihlangano uma kute umphristi lomkhulu lokhona.

  5. Kushumayela livangeli.

  6. Kubusisa labagulako.

  7. Kubusisa bantfwana.

  8. Kunika buphristi kulabanye nekubagcoba ehhovisini lembonisi, umphristi, umfundzisi, noma umdikhoni.

  9. Uma kunesidzingo, ente imisebenti yemphristi, umfundzisi, noma umdikhoni.

UmPhristi Lomkhulu

Umsebenti lobaluleke kakhulu wemphristi lomkhulu kuba ngumholi kubantfu beLibandla nekuphatsa tintfo takamoya. Umphristi lomkhulu angaphindze ente leminye imisebenti yembonisi, umphristi, umfundzisi noma umdikhoni uma kudzingekile.

Umphatriyakhi

Umphatriyakhi ngumphristi lomkhulu lonika tibusiso letikhetsekile kumalunga eLibandla. Leti tibusiso tibitwa ngekutsi tibusiso tebuphatriyakhi. Tibusiso tebuphatriyakhi tisita emalunga acondzisise letintfo Jesu lafuna batente.

Labangemashumi Lasikhombisa

Labangemashumi Lasikhombisa bofakazi labakhetsekile baJesu Khristu emhlabeni. Basebenta ngekucondziswa baPhostoli ekwakhiweni kweLibandla.

UmPhostoli

UmPhostoli ungufakazi lokhetsekile waJesu Khristu emhlabeni wonkhe. BaPhostoli bacondzisa tindzaba teLibandla emhlabeni wonkhe. Ngamunye umPhostoli unalo lonkhe ligunya lebuphristi. Kodvwa nguMengameli weLibandla kuphela, lophindze abe ngumPhostoli, longasebentisa lonkhe leligunya lebuphristi. Lalabanye baPhostoli basebentisa leligunya labo kuphela uma Mengameli weLibandla abacondzisa kutsi abalisebentise.

Tikhiya tebuPhristi ngeMagunya ekuCondzisa Kusentjetiswa kwebuPhristi

BuPhristi ligunya lekwenta egameni laJesu nekusiholela emuva kuBabe wetfu loseZulwini. Lomsebenti weligunya lebuphristi uphetfwe ngulabo labaphetse letikhiya tabo. Letikhiya leti tililungelo lekwengamela nekucondzisa Libandla endzaweni letsite. INkhosi Jesu Khristu iphetse tonkhe letikhiya tebuphristi. Unike baPhostoli Bakhe letikhiya letidzingekako kuphatsa Libandla Lakhe. NgumPhostoli lomkhulu kuphela, Mengameli weLibandla, longasebentisa (longagunyata lomunye umuntfu kutsi asebentise) leti tikhiya kuphatsa Libandla lonkhe. Mengameli weLibandla ugunyata bomengameli bemathempeli, bemamishini, betikhonkhwane, nebetifundza; babhishobhi nabomengameli beligala; nabomengameli bekhoramu kutsi baphatse letikhiya tebuphristi labatidzingako kwengamela.

Labaphetse buphristi baneligunya lekwenta letinye tintfo ngaphandle kwemvumo lekhetsekile. Sibonelo, emadvodza laphetse buPhristi bakaMelkhisedeki angabusisa labagulako futsi njengemadvodza nabobabe angabusisa imindeni yabo. Kodvwa, letinye tintfo tidzinga imvumo lebuya kulabo labaphetse letikhiya letidzingekako. Sibonelo, umphristi uneligunya lekubhabhatisa. Kodvwa, angeke sekabhabhatise noma ngubani ate umbhishobhi noma mengameli weligala amvumele kutsi akwente. Umbhishobhi noma mengameli weligala uphetse tikhiya tebuPhristi baka-Aroni kulolohlangotsi leLibandla.

Kucocisana

  • Yini tikhiya tebuPhristi?

Labaphetse buPhristi baHlelwa ngemaKhoramu

Emadvodza nebafana lanelihhovisi lelifanako lebuphristi bahlelwe ngemacembu. Lamacembu lawa abitwa ngekutsi makhoramu. EbuPhristini baka-Aroni kunemakhoramu ebadikhoni, emakhoramu ebafundzisi, nemakhoramu ebaphristi. EbuPhristini bakaMelkhisedeki kunemakhoramu ebabonisi kanye nemakhoramu ebaphritsi labakhulu.

Uma indvodza noma umfana agcotjelwe ehhovisi lebuphristi, uba lilunga lekhoramu yebuphristi lefaka ekhatsi labo labaphetse lelo hhovisi lelifanako. Uhlala kuleyo khoramu ate agcotjwe kulelinye lihhovisi. Baholi bekhoramu bafundzisa baphindze basite ngamunye welilunga lekhoramu.

IKhoramu yeBadikhoni

Ikhoramu yebadikhoni ingaba nebadikhoni labangafika ku 12. Uma kunebadikhoni labangetulu kwa 12 ewadini, lenye ikhoramu yebadikhoni ingakhiwa. Ikhoramu yebadikhoni inamengameli nebeluleki lababili.

IKhoramu yeBafundzisi

Ikhoramu yebafundzisi ingaba nebafundzisi labangefika ku 24. Uma kunebafundzisi labangetulu kwa 24 ewadini, lenye ikhoramu yebafundzisi ingakhiwa. Ikhoramu yebafundzisi inamengameli nebeluleki lababili.

IKhoramu yeBaphristi

Ikhoramu yebaphristi ingaba nebaphristi labangefika ku 48. Uma kunebaphristi labangetulu kwa 48 ewadini, lenye ikhoramu yebaphristi ingakhiwa. Mengameli wekhoramu yebaphristi ngumbhishobhi noma mengameli weligala. Ukhetsa babili baphristi kukhoramu kuba masekela akhe.

IKhoramu yeBabonisi

Ikhoramu yebabonisi ingaba nanoma nguliphi linani lebabonisi labangefika ku 96, futsi ifaka ekhatsi bonkhe babonisi labahlala ewadini. Uma kunebabonisi labangetulu kwa 96, lenye ikhoramu yebabonisi ingahlelwa. Emadvodza lasengakemukeli buPhristi bakaMelkhisedeki angahlangayela nalababonisi kufundza, kumidlalo yekwatana, nemisebenti yesabelo.

Mengameli nebeluleki lababili bahola ikhoramu yebabonisi.

IKhoramu yeBaphristi Labakhulu

Ikhoramu yebaphristi labakhulu ifaka ekhatsi baphristi labakhulu labasita elubitweni lwebuholi lobutsite esikhonkhwaneni. Mengameli wesikhonkhwane nebeluleki bakhe lababili bahola lekhoramu yebaphristi labakhulu.

Kucocisana

  • Yini ikhoramu?

  • Mangaphi emalunga lakha ikhoramu yebadikhoni, yebafundzisi, yebaphristi, yebabonisi, yebaphristi labakhulu?

  • Emalunga ekhoramu angasitana kanjani?

Print