Sehluko 2
Imphilo yetfu eZulwini
Besiphila kuphi ngaphambi kwekube sitalwe la emhlabeni? Sentani le?
Ngamunye wetfu Singumntfwana waBabe wetfu loseZulwini
Ngaphambi kwekube sitalwe lamhlabeni, saphila ezulwini. Likhaya letfu ezulwini belisimangaliso futsi lilihle kwendlula konkhe lesikwatiko emhlabeni. Besibemndeni lapho. Besitsandzana futsi sijabulile. Babe wetfu loseZulwini bekanguBabe wemimoya yetfu, ngalesi sizatfu sibohle simbita ngaBabe waseZulwini. Kungoba unguBabe wetfu, Uyasitsandza futsi uyasikhatsalela.
Wonkhe umuntfu lophila lamhlabeni bekangumnaketfu nadzadzewetfu ezulwini. Umntfwana lobekamdzala emndenini wetfu waseZulwini bekunguJesu Khristu.* Ngumnaketfu lomdzala.
Nasisahlala ezulwini besite imitimba yenyama nematsambo njengoba sinayo nyalo. Besiyimimoya. Moya unesimo lesifanako njengemuntfu. Njengemimoya, besikhona kukhuluma sodvwana, kuhambahamba, kwenta tincumo, nekwati umehluko emkhatsini walokuhle nalokubi.
Besingafanani ezulwini. Besehlukile, njengoba sehlukile nanyalo. Besinetifiso nemakhono lehlukene. Safundza kusebentisa emakhono etfu ngetindlela letahlukene.
Kucocisana
-
Belinjani likhaya letfu ezulwini?
-
Bekungubani Babe wetfu?
-
Bekungubani umnaketfu lomdzala?
Babe wetfu loseZulwini Bekati kutsi Singafana Naye
Ngesizatfu sekutsi Babe wetfu loseZulwini unguBabe wemimoya yetfu, Bekasati kahle. Asitsandza. Bekati kutsi simukele kuye emakhono ekufundza tintfo latatiko nekutsi sifane Naye. Ufuna sihlale silungile ngaso sonkhe sikhatsi, njeNgaye. Ufuna kusisita kutfutfukisa emakhono etfu ekutsi sifane Naye.
Kucocisana
-
Babe wetfu loseZulwini utiva kanjani ngatsi, futsi yini layifunako ngatsi?
-
Kukwenta utive unjani kwati kutsi unaBabe loseZulwini?
Ngaphambi kwekuta kwetfu emhlabeni, saphila ezulwini.
Babe wetfu loseZulwini wenta Lisu Kusita tsine
Ezulwini safundza lokunyenti saphindze satitfutfukisa ngayo yonkhe indlela, kodvwa kunetintfo lebesingakhoni kutifundza nekutenta. Babe wetfu loseZulwini wenta lisu lekutsi sifundze lokuningi.
Wasibita emhlanganweni eZulwini. Sonkhe besikhona. Wachaza lisu Lakhe kusisita kutsi sifundze, wasitjela kutsi uma sililandzela lisu Lakhe sitofana Naye.
Babe wetfu loseZulwini watsi utowenta umhlaba, lapho sitophila khona sikhashana lesitsite. Emhlabeni, ngeke sikhumbule imphilo yetfu Naye eZulwini. Sitawukhona kukhetsa tintfo letinhle noma letimbi. Loku kutawuba sivivinyo kubona kutsi siyakhona yini kulalela Babe wetfu loseZulwini uma singekho Naye.
Ngekwelisu laBabe wetfu loseZulwini, ngamunye sitakwemukela umtimba wenyama nematsambo. Sitawudzinga loluhlobo lwemtimba kute sifundze letintfo latatiko nekwenta letintfo latentako. Emvakwesikhatsi, sitawukufa, imimoya yetfu itawushiya imitimba yetfu yenyama nematsambo. Kodvwa imimoya yetfu itawuhlanganiswa futsi nemtimba yetfu, ngakoke asiyuphindze sife futsi. Labo labente letintfo Babe wetfu loseZulwini lasitjele kutsi sitente batawubuyela bahlale Naye ingunaphakadze.
Safundza kutsi wonkhe umuntfu utawuba netinkinga emhlabeni, njengekugula, buhlungu, lusizi, nekufa. Kodvwa sacondzisisa kutsi sitawufundza kuleti tintfo. Leti tinkinga tingasifundzisa kutsandzana nekusitana.
Babe wetfu loseZulwini utawukhetsa sikhatsi nendzawo lapho khona ngamunye wetfu atotalelwa khona lamhlabeni. Bekati kutsi ngukuphi lamhlabeni labekangatfumela khona ngamunye wetfu kutsi sitofundza letintfo lesitawudzinga kutati. Sonkhe sitawuba nematfuba ekwenta tintfo letehlukene. Babe wetfu loseZulwini bekafuna sente tintfo letilungile bese siyakhona kubuyela kuye. Kodvwa ke, akayuze asiphocelele kutsi sente noma ngayini.
Labanye betfu batawukhetsa kumlalela. Uma simlalela, sitawufanana Naye siphindze sibuyele sihlale Naye. Labanye betfu batawukhetsa kungamlaleli. Uma singamlaleli, angeke sifane Naye futsi angeke sikhone kubuyela sihlale Naye.
Mhla siva lisu laBabe wetfu loseZulwini sajabula kakhulu. Sasifuna kukhona kufundza nekutfutfuka. Wonkhe umuntfu lophile emhlabeni wavuma kuphila ngelisu Lakhe.
Kucocisana
-
Kwaba yini lisu laBabe wetfu loseZulwini ngatsi?
-
Kwadzingekelani sishiye likhaya letfu ezulwini?
-
Yini Babe wetfu loseZulwini lafuna siyente emhlabeni?