Tinsita Letisisekelo
Sehluko 24: Lilanga leKukhonta

Sehluko 24

Lilanga leKukhonta

Babe wetfu loseZulwini usitjele kutsi sisebentise lilanga linye evikini kumkhonta. Simukela tibusiso letinyenti uma senta lelo langa lilanga lelingcwele.

Babe wetfu loseZulwini Wasinika Lilanga leKukhonta kute Asisite

Babe wetfu loseZulwini uyati kutsi sinetinkinga letinyenti. Kumele sente tintfo letinyenti onkhe malanga. Kumele sisebente kute sitfole kudla netimphahla. Kumele silungise kudla kwetfu naleminye imisebenti yasekhaya onkhe malanga.

Ngato tonkhe leti tintfo lokumele utente, kulula kukhohlwa ngaBabe wetfu loseZulwini. Kulula futsi kukhohlwa letintfo Babe wetfu loseZulwini lafuna kutsi sitente. Sicabanga kakhulu ngetidzingo tetfu temalanga onkhe kunekuba sicabange ngaBabe wetfu loseZulwini.

Babe wetfu loseZulwini uyati kutsi sidzinga sikhatsi kucabanga Ngaye. Sidzinga sikhatsi sekufundza loko lafuna sikwente. Ngenca yaloku, usitjele kutsi asicitse lilanga linye emalangeni lasikhombisa kute siphumule emsebentini wetfu siphindze sifundze Ngaye.

Babe wetfu loseZulwini wadala umhlaba ngaJesu Khristu etikhatsini letisitfupha. Wabita leti tikhatsi ngemalanga. Ngelilanga lesikhombisa, waphumula emsebentini wekudala umhlaba. Usitjele kutsi kumele siphumule lilanga linye liviki ngalinye emsebentini wetfu wemalanga onkhe.

Babe wetfu loseZulwini Usitjele kutsi Nguliphi Lilanga leKukhonta

Babe wetfu loseZulwini watjela bantfu etikhatsini tasemandvulo kutsi basebentise lilanga lesikhombisa leliviki ngelilanga lekukhonta. Lelilanga leli belitosita bantfu bakhumbule kutsi emvakwekudala umhlaba waphumula elangeni lesikhombisa.

Emvakwekutsi Jesu afe, wavuswa elangeni lekucala leliviki. Balandzeli baJesu basebentisa lelilanga lekucala leliviki njengelilanga lekukhonta kusita bantfu bakhumbule baphindze bahloniphe lilanga lekuvuka kwaJesu. Sibita loku ngelilanga leNkhosi. (Jesu ngalesinye sikhatsi ubitwa ngeNkhosi.) Siphindze sibite loku ngelilanga leSabatha.* Noma kulilanga lelehlukile leliviki kunalelo lalisentjetiswa emandvulo ekukhonteni, kuselilanga linye kulasikhombisa. Sisenta umsebenti wetfu lowejwayelekile emalangeni lasitfupha evikini. Bese elangeni lesikhombisa sikhonta Babe wetfu loseZulwini.

Etikhatsini tetfu, bantfu labanyenti basebentisa lilanga lekucala leliviki, lokuLisontfo, njengelilanga lekukhonta. Etimeni letimbalwa Babe wetfu loseZulwini utjele baphrofethi kulamanye emave kutsi bangasebentisa lelinye lilanga njengelilanga lekukhonta.

Image
bantfu bayahlabela ebandleni

Lisontfo lilanga lekukhonta.

Singaligcina Lilanga leNkhosi Lingcwele

Tinyenti tintfo lekumele sitente ngelilanga leNkhosi. Intfo lebaluleke kakhulu lesingayenta kucabanga ngaBabe wetfu loseZulwini naJesu emini. Kumele sicabange ngaletintfo labafuna kutsi sitati siphindze sitente. Letinye tetintfo lesingatenta ngelilanga lekukhonta letingasisita sikhumbule siphindze sifundze ngaBabe wetfu loseZulwini ngunati:

  1. Kufundza imibhalo lengcwele lesifundzisa ngaBabe wetfu loseZulwini naJesu.

  2. Kusita labanye bantfu bafundze ngaleLibandla.

  3. Kufundzisa imindeni yetfu ngaBabe wetfu loseZulwini naJesu naloko labafuna sikwente.

  4. Kuya emihlanganweni yeLibandla nemakilasi lapho singafundza ndzawonye ngelivangeli. Singafundza tindzaba ngaJesu naletinye timfundziso telivangeli, futsi singatjelana ngetintfo Babe wetfu loseZulwini naJesu labasentele tona.

  5. Kuphumula emsebentini lesiwentako ngalalamanye emalanga eliviki.

  6. Kuthandaza.

  7. Kuvakashela bantfu labagulako siphindze sibasite kutsi bative bancono.

  8. Kubhala phansi letinye tetintfo letentekako emindenini yetfu kute sitawukhona kutikhumbula emvakwesikhatsi.

Emalunga eLibandla laJesu Khristu kumele amukele sidlo seNkhosi ngelilanga lekukhonta. Bangatilungiselela kwemukela sona ngekucabanga ngaJesu netintfo lasentela tona. Kumele bacele Babe wetfu loseZulwini kutsi abasite bakhumbule Jesu. Uma batsatsa sidlo seNkhosi, kumele bakhumbule letitsembiso letingcwele labatentile. Kumele bacabange ngetintfo Babe wetfu loseZulwini labatsembise tona uma batawulalela Jesu.

Tinyenti tintfo lekungakameli sitente ngelilanga lekukhonta. Akukameli sisebente. Akukameli sente imindeni yetfu, tisebenti, noma tilwane tisebente. Akukameli sifundze tintfo, sibukele tinhlelo kumabonakudze, noma silalele umculo lotasivimba kutsi sicabange ngaBabe wetfu loseZulwini naJesu. Akukameli siye emicimbini yetemidlalo. Akukameli sitsenge noma sitsengise tintfo. Letintfo leti tingabukeka tibalulekile, kodvwa atisisiti kucabanga ngaBabe wetfu loseZulwini naJesu ngalelilanga leli lelingcwele.

Kungaba netikhatsi lapho kumele sisebente ngalelilanga lekukhonta, kodvwa kumele sitame kungasebenti. Uma kusebenta kudzingekile ngempela, kumele sitame kucabanga ngaBabe wetfu loseZulwini naJesu sisasebenta.

Kucocisana

  • Yini lekumele siyente ngelilanga leNkhosi?

  • Yini lekungakameli siyenta ngelilanga lekukhonta?

Babe wetfu loseZulwini Uyasibusisa ngekugcina Lilanga leNkhosi Lingcwele

Inhloso yalelilanga lekukhonta iyafana njalo nje. Lilanga lekuphumula emsebentini lesiwentako malanga onkhe. Lilanga lekufundza ngaBabe wetfu loseZulwini siphindze silungiselele ngemphilo Naye. Lilanga lekutfutfukisa imphilo yetfu ngekufundza kabanti ngaloko Babe wetfu loseZulwini lafuna sikwente.

Lelilanga leli lihle kitsi. Lisisita kukhumbula Babe wetfu loseZulwini nesizatfu silana emhlabeni. Uma senta letintfo Babe wetfu loseZulwini lafuna kutsi sitente ngalelilanga leNkhosi, sitfola tibusiso. Imindeni yetfu ijabula kakhudlwana. Imitimba yetfu iyavuseteleka. Sisondzela kuBabe wetfu loseZulwini nasetimfundzisweni Takhe. Sitawukhona kuva umtselela waMoya loNgcwele kakhulu phakatsi neliviki. Ngoba siye salalela, Babe wetfu loseZulwini utawusisita kutfola kudla, timphahla, naletinye tintfo lesitidzingako. Utawusisita sifundze kabanti Ngaye futsi sijabule.

Kucocisana

  • Ngutiphi letinye tetizatfu lekumele sigcine lilanga lekukhonta njengelilanga lelingcwele?

Print