Sehluko 14
KuPhendvuka
Kwenta tintfo letingakalungi kusenta sidzabuke. Singaphindze sijabule kanjani emvakwekwenta intfo letsite lengakalungi?
Babe wetfu loseZulwini Wasihlelela Indlela kutsi Sincobe Sono
Babe wetfu loseZulwini bekati kutsi sonkhe sitawutenta tintfo letingakalungi emhlabeni. Letintfo letingakalungi lesitentako tono. Siyona uma senta letintfo Nkulunkulu lasitjele kutsi singatenti. Siyona futsi uma singenti letintfo Nkulunkulu lasitjele kutsi sitente.
Babe wetfu loseZulwini akoni, futsi akabavumeli bantfu labonako kutsi bahlale Naye. Kute sihlale Naye kumele siphendvuke etonweni tetfu. Kuphendvuka kusho kutisola ngetono tetfu bese siyayekela kutenta.
Babe wetfu loseZulwini uyasitsandza. Akafuni tono tetfu tisivimbele kutsi sibuyele emuva Kuye. Ngakoke wahlela indlela kusisita.
Babe wetfu loseZulwini watfumela Jesu kutosisita kutsi siphendvuke etonweni tetfu. Jesu usifundzisa ngetintfo lekumele sitente kugwema sono. Uphindze asinike emandla ekwenta leti tintfo. Uma sikholelwa kuye futsi simlandzela, ushintja tinhlitiyo tetfu kute singafuni kuphindze sone, kodvwa sifune kuphela kwenta lokuhle. Uma singafuni kuhlupheka ngenca yetono tetfu, kumele sikholelwe kuJesu. Labo labakholelwa ngekweliciniso kuJesu bayaphendvuka etonweni tabo.
Uma sikholelwa kuJesu futsi siphendvuka, kuhlupheka kwaJesu kubhadala tono tetfu bese siyahlantwa. Siyakhona kubuyela sihlale naBabe wetfu loseZulwini ngoba sesihlantekile.
Kucocisana
-
Kusho kutsini kuphendvuka?
-
Babe wetfu loseZulwini ufuna siphendvuke leni etonweni tetfu?
-
Labo labanelukholo ngekweliciniso baphendvukelani etonweni tabo?
Babe wetfu loseZulwini Usitjele kutsi Yini Lesidzinga Kuyenta kute Siphendvuke
Kuphendvuka, kumele sikholelwe kuJesu netintfo latifundzisa. Kumele sikholwe wahluphekela tono tetfu. Kumele sikholwe kutsi Nguye yedvwa bekangabhadalela tono tetfu. Kumele sikholwe kutsi ufuna sincobe tono tetfu nekutsi utawusisita kwenta loku. Kumele sisebente matima kwenta loko lasilayete kutsi sikwente.
Uma siphendvuka, sivumela Jesu asishintje sibe ngulendlela lafuna sibe ngiyo. Siyayekela kwenta tintfo letingakalungi sicale kwenta tintfo letilungile. Uma sisho tintfo letingasilo liciniso, siyayekela bese sisho tintfo letiliciniso. Uma sebe intfo letsite, siyayibuyisela kumnikati singaphindzi sebe lutfo futsi. Uma sibebete umusa kulabanye, siyayekela bese sibentela tintfo letinemusa.
Uma siphendvuka senta nati tintfo letilandzelako:
Siyavuma ngekwetfu kutsi sonile. Siyati kutsi siyona uma singamlaleli Babe wetfu loseZulwini. Uma siphendvuka, asenti tizatfu tekwenta tintfo letingakalungi. Siyavuma kutsi sente lokungakalungi, futsi sifuna kushintja.
Siyatisola ngetintfo letingakalungi lesitentile. Uma siphendvuka, siyadzabuka ngekweliciniso ngekwenta tintfo letingakalungi. Asimane sitsi siyacolisa ngetono tetfu. Siyatisola ngekweliciniso ngekutenta, siphindze sifise kutsi ngabe asikatenti. Siphindze sifune kwenta loko Babe wetfu loseZulwini lasilayete kutsi sikwente.
Siyayekela kwenta tintfo letingakalungi. Uma sivuma ngekwetfu kuphela kutsi sonile, futsi uma kuphela sitsi siyatisola, asikaphendvuki ngekweliciniso. Kuphendvuka ngekweliciniso, kumele siyekele kwenta tintfo letingakalungi. Ngalesinye sikhatsi akusiko lula kuyekela, kodvwa Jesu weta emhlabeni kutosinika lolusito lesiludzingako. Babe wetfu loseZulwini ufuna siyekelele Jesu asisite ngoba ngiyo yodvwa indlela lesingapheleliswa ngayo siphindze sibuyele sihlale naNkulunkulu.
Sivuma tono tetfu. EBandleni laJesu Khristu Lalabangcwele Betinsuku Tekugcina, kuvuma kusho kutjela Babe wetfu loseZulwini nemholi weLibandla loko lesikwentile lokungakalungi. Letinye tono lesitentako titsintsa tsine ngekwetfu kuphela. Uma sithandaza kuBabe wetfu loseZulwini, kumele simtjele ngaleti tono siphindze simcele asicolele aphindze asisite sitincobe. Uma tono tetfu titsintsa lomunye umuntfu, kumele sitivume kuloyo muntfu nakuNkulunkulu. Kumele sivume tono letimbi kakhulu, njenge kuphinga, kumholi weLibandla, lokungaba ngumbhishobhi* wetfu noma mengameli weligala.*
Senta konkhe lesingakwenta kulungisa loko lesikwentile lokungakalungi. Uma siphendvuka, silungisa lokubi lesikwentile. Sibonelo, uma sebile kumakhelwane, sibuyisela emuva letintfo lesititsetse. Uma sesite letintfo lesititsetse, sibuyisela lokunye noma sikubhadale.
Sicolela tono talabanye. Babe wetfu loseZulwini usilayete kutsi sicolele labanye. Uma sifuna Yena kutsi asicolele, kumele sicolele labanye. Uma senyanya labanye bantfu ngesizatfu setintfo letingakalungi labatentile futsi singabacoleli, Babe wetfu loseZulwini angeke asicolele natsi tono tetfu.
Sitama ngekweliciniso kulalela yonkhe imiyaleto yaJesu imphilo yetfu yonkhe. Sichubeke sishintje loko lokungakalungi lesikwentako site sente tintfo letilungile. Senta loko lesingakhona kukwenta onkhe malanga kulungisa tintfo letimbi lesitentako.
Kumele siphendvuke noma kunini nasente intfo lengakalungi. Singacabanga kutsi kuphendvuka khona nyalo kulukhuni. Singacabanga kutsi kuphendvuka kutoba melula emvakwesikhatsi, kodvwa angeke. Kuphendvuka kuba lukhuni uma simela kukwenta. Kumela kuphendvuka kuphindze kusibuyisele emuva ngekwakamoya, ngoba Jesu angeke asisite sifundze kabanti ngaBabe wetfu loseZulwini siphindze silungisele kuhlala naBabe wetfu loseZulwini uma singaphendvuki ngetintfo letingakalungi lesitentako. Noma kunini nasibona kutsi senta tintfo letingakalungi, kumele siphendvuke masinyane.
Kucocisana
-
Yini lekumele siyente kute siphendvuke?
Ngamunye wetfu Singaphendvuka
Ngamunye wetfu singaphendvuka. Ngalesinye sikhatsi kuphendvuka kungabukeka kuyintfo lelukhuni kakhulu kitsi. Singeva ngatsi asiyuze sikhone kuncoba butsakatsaka betfu. Sathane ufuna sikholelwe loku kute sichubeke sente tintfo letingakalungi. Kumele sikhumbule kutsi singaphendvuka. Angeke sesikhone kukwenta ngekwetfu. Sidzinga lusito. Ngamunye wetfu singumntfwana waBabe wetfu loseZulwini, futsi utfumele Jesu kutsi ete atosisita. Ngelusito lwaJesu singenta tonkhe letintfo Babe wetfu loseZulwini lasilayete kutsi sitente.
Jesu utawusisita kutsi siphendvuke uma sithandaza kuBabe wetfu loseZulwini ngelusito lwaJesu. Yena naBabe wetfu loseZulwini bafuna sente tintfo letilungile. Abatitsandzi letintfo letingakalungi lesitentako. Kodvwa basasitsandza, noma senta tintfo letingakalungi. Bafuna siphendvuke kute Babe wetfu loseZulwini atosicolela siphindze sijabule.
Kucocisana
-
Kumele siphendvuke leni noma kuphendvuka kubukeka kulukhuni?
-
Ngubani lotawusisita kuphendvuka?
Babe wetfu loseZulwini UyasiKlomelisa Uma Siphendvuka
Uma sibeka lukholo lwetfu kuJesu siphindze siphendvuka, Babe wetfu loseZulwini usicolela ngalokuphelele. Akukafaneli sikhatsateke ngekujeziselwa tona. Akagcini ngekusitsetselela; Uphindze asinike lusito kutsi singasafuni ngisho nekona kodvwa sente kuphela tintfo letinhle njalo. Jesu usinika lolu lusito.
Kumele sikhumbule kutsi angeke sibe njengaBabe wetfu loseZulwini ngesikhatsi lesisodvwa. Kodvwa sisachubeka ekubeni nelukholo kuJesu siphendvuke etonweni tetfu siphindze sisebentele kumlalela Jesu, Babe wetfu loseZulwini uyachubeka nekusitsetselela tono tetfu. Jesu uyachubeka nekusisita. Siba nekufana kakhulu naBabe wetfu loseZulwini. Ekugcineni, singabuyela sihlale naBabe wetfu loseZulwini.
Uma siphendvuka, siyajabula. Asidzabuki ngetintfo letingakalungi lesitentile, kodvwa siyajabula ngoba sincobe butsakatsaka betfu ngekusitwa nguJesu. Sibese siyati kutsi sinemandla ekumelana netilingo siphindze sente tintfo letilungile.
Kucocisana
-
Yini Imiklomelo lesiyemukelako uma siphendvuka?