UMsindzisi, Jesu Khristu, watalelwa endlini yetilwane letfobekile.
Sehluko 11
Imphilo yaJesu Khristu
Jesu Khristu nguye yedvwa umuntfu longasiholela emuva kuBabe wetfu loseZulwini. Yini lesiyatiko Ngaye?
Bantfu Labanyenti Bema ngeSifiso Lesikhulu ngeKubuya kwaJesu Khristu
Jesu wanikela kuba nguMsindzisi wetfu. Watsi utakuta emhlabeni atosibonisa kutsi singabuyela kanjani kuBabe wetfu loseZulwini. Linyenti lebantfu labaphila ngaphambi kwekutalwa kwaJesu bakholelwa kutsi utawukuta abe nguMsindzisi wabo. Bebakulangatelela kubuya kwakhe. Bebati kutsi bekangabasindzisa ekujezisweni kwangunaphakadze etonweni tabo.
Bonkhe baphrofethi labaphila ngaphambi kwekutalwa kwaJesu batjela bantfu kutsi uyeta. Babe wetfu loseZulwini watfumela ingilosi kutotjela Adamu kutsi Jesu utawukuta emhlabeni.
Eminyakeni leminyenti ngaphambi kwekutalwa kwaJesu, umphrofethi lokulibito lakhe kungu Isaya wabona umbono kutsi Jesu utawuhlupheka kubhadalela tono tetfu. Isaya watsi bantfu batamenyanya futsi batomala Jesu naJesu utova lusizi lolukhulu.
Nefi, umphrofethi lesifundza ngaye eNcwadzini yaMormon, wabona tintfo Jesu lebekatotenta. Nefi wabona leti tintfo eminyakeni leminyenti ngaphambi kwekutalwa kwaJesu. Wabona umntfwana longuJesu asetandleni tenina. Ingilosi yamtjela Nefi kutsi lomntfwana yiNdvodzana yaBabe wetfu loseZulwini.
Sifundza ngemphrofethi lobekabitwa ngaBhenjamini eNcwadzini yaMormon. Watjela bantfu kutsi Jesu utawukuta masinyane emhlabeni. Bhenjamini wabatjela kutsi Jesu utawuphilisa labagulako, ente timphuphutse tibone, aphindze ente labangeva beve. Utophindze akhiphe imimoya lemibi futsi abuyise bantfu labafile emphilweni. Bhenjamini watsi Jesu utawufundzisa bantfu kutsi batsandze Babe wetfu loseZulwini baphindze batsandzane bona.
Bonkhe baphrofethi labaphila emvakwekutalwa kwaJesu basitjelile kutsi weta. Ngaphandle kwaJesu Khristu, lelisu laBabe wetfu loseZulwini belingeke liphumelele.
Kucocisana
-
Jesu wanikelelani kuta emhlabeni?
-
Bekubobani labanye bebaphrofethi labafakaza kutsi utawukuta?
Kutalwa kwaJesu Kwaletsa Intfokoto Lenkhulu Emhlabeni
Jesu watalelwa edobheleni lelincane lelalibitwa ngeBhetlehema. Tingilosi tahlabela uma atalwa ngoba betijabule kakhulu. Inkhanyenti lensha yavela esibhakabhakeni. Belusi netati baya kuyombona baphindze bamkhonta. Bonkhe bantfu emhlabeni wonkhe basagubha kutalwa Kwakhe.
Jesu bekahlukile kunoma ngumuphi umntfwana lowake watalwa. Babe waJesu bekunguBabe wetfu loseZulwini. Babe wetfu loseZulwini bekangasiye Babe waJesu wamoya kuphela kodvwa bekaphindze abe nguBabe Wakhe wemtimba nematsambo. Jesu wemukela emandla kuBabe Wakhe labanye bantfu labete wona. Bantfu bebangeke batsatse imphilo Yakhe ngaphandle abavumele bayitsatse. Emvakwekufa Kwakhe, bekanemandla ekwenta umtimba Wakhe uphindze uphile futsi.
Make waJesu bekunguMariya. Bekanguwesifazane lomncane locwebile lobekahlala cishe iminyaka lengu 2,000 leyengcile edolobheni lelibitwa ngekutsi kuseNazaretha. Aseselitjitji lelincane, asengakashadi, ingilosi lebeyibuya kuBabe wetfu loseZulwini yeta kuye. Lengilosi yamtjela kutsi utawuba ngumake waJesu Khristu. Ingilosi yamtjela kutsi Babe wetfu loseZulwini utawuba nguBabe waJesu. Kute indvodza emhlabeni letawuba nguBabe Wakhe.
Lengilosi yaphindze yeta kulendvodza Mariya lebekatayishada. Lendvodza beyibitwa ngaJosefa. Lengilosi yatjela Josefa kutsi lomntfwana lotawutalwa utawuba yiNdvodzana yaBabe wetfu loseZulwini hhayi indvodzana yemuntfu emhlabeni. Lengilosi yamtjela kutsi akashade Mariya. Ngakoke boMariya naJosefa bashadiswa. Emvakwekutalwa kwaJesu, Josefa wamnakekela ngatsi Jesu yindvodzana yakhe lucobo.
Ngoba unina Wakhe bekanemtimba lobhubhako, Jesu bekakhona kuva indlala, ome, eve nebuhlungu, aphindze afe.
Kucocisana
-
Sati kanjani kutsi kutalwa kwaJesu kwakusehlakalo lesibalulekile?
-
Ngumaphi emandla Jesu lawemukela kuBabe Wakhe?
-
Ngutiphi tintfo Jesu lativa ngoba bekanenina wasemhlabeni?
Nakube bekasesengumfana, Jesu wafundzisa emadvodza lafundzile ethempelini.
Jesu Weta Kutosifundzisa liVangeli Lakhe
Jesu abengenasono
Jesu bekangenasono. Bekenta yonkhe intfo Babe wetfu loseZulwini lebekafuna ayente. Jesu wakhula ngendlela lefanako ngekukhula kwalabanye bantfwana. Asakhula, wazuza inhlakanipho. Bekanemandla aBabe wetfu loseZulwini.
Ngesikhatsi Jesu aneminyaka lengu 12, bekati kutsi utfunywe kwenta letintfo Babe wetfu loseZulwini lebekafuna kutsi atente. Bekati kutsi unemsebenti lokhetsekile lekumele awente emhlabeni.
Ngalelinye lilanga wahamba naMariya naJosefa baya eJerusalema. Uma babuyela ekhaya boMariya naJosefa, babona kutsi Jesu bekasangekho nabo. Babuyela emuva eJerusalema kuyomfuna. Emvakwemalanga lamatsatfu bamtfola ethempelini, akhuluma netati aphendvula nemibuto yabo. Wonkhe muntfu lamuva wetfuka kutsi wati kangaka futsi uphendvula imibuto yabo. Josefa naMariya bajabula kumtfola, kodvwa bebangakajabuli kutsi bekangakahlali nabo. Jesu wabatjela kutsi kungoba bekumele ente umsebenti waBabe wetfu loseZulwini.
Jesu waBhajatiswa*
Uma Jesu aneminyaka lengu 30, waya kuJohane uMbhabhatisi kuyobhajatiswa. Johane wacabanga kutsi angambhabhatisi Jesu, ngoba Jesu bekangakase wona. Kodvwa Jesu watjela Johane kutsi ambhabhatise. Jesu bekafuna kutfobela yonkhe imiyaleto yaBabe wetfu loseZulwini. Johane wambhabhatisa Jesu, wamfaka ngalokuphelele ngaphansi kwemanti waphindze wamphakamisa futsi. Uma Jesu sekabhajatisiwe, Babe wetfu loseZulwini wakhuluma ezulwini washo kutsi Jesu yiNdvodzana Yakhe nekutsi Yena, Babe wetfu loseZulwini, uyajabula kakhulu Ngaye. Moya loNgcwele nawo weta kuJesu uma asabhajatiswa.
Sathane Walinga Jesu
Emvakwekube Jesu abhajatiswe, waya ehlane kuyoba yedvwa aphindze azile futsi athandaze. Emvakwekuzila tinsuku letingu 40, Sathane weta kutomlinga. Sathane bekati kutsi uma angabangela Jesu kutsi ente sono sinye, Jesu bekangeke akhone kwenta letintfo lebekatfunywe kutsi atente. Ngakoke lisu laBabe wetfu loseZulwini lalitowehluleka.
Jesu wala tonkhe tilingo taSathane. Ekugcineni, watjela Sathane kutsi akahambe. Emvakwekuhamba kwaSathane, tingilosi teta kutovakashela Jesu.
Jesu Wasifundzisa kutsi Sitsandze Babe wetfu loseZulwini siphindze Sitsandzane Tsine
Emvakwekumelana naSathane, Jesu wacala wafundzisa bantfu. Sinye sesizatfu sekuta Kwakhe emhlabeni kutsi atosifundzisa indlela lekumele siphile ngayo.
Jesu wasifundzisa kutsi kumele sitsandze Babe wetfu loseZulwini ngayo yonkhe inhlitiyo yetfu, ingcondvo, nangemandla etfu. Waphindze wasifundzisa kutsi kumele sitsandze labanye bantfu njengoba sititsandza tsine. Kumele sicolele siphindze sisebentele labanye bantfu. Jesu wasikhombisa kutsi singatenta kanjani leti tintfo. Wakhombisa lutsandvo Lwakhe kuBabe wetfu loseZulwini ngekwenta yonkhe intfo Babe wetfu loseZulwini lamcela kutsi ayente.
Jesu Bekatsandza Wonkhe Muntfu
Jesu bekanelutsandvo lwawonkhe muntfu. Waphilisa labagulako. Wenta timphuphutse tabona netishosha tahamba. Watsatsa bantfwana labancane etandleni Takhe wababusisa.
Jesu wakhombisa lutsandvo Lwakhe kulabo labebonile. Wabafundzisa kutsi bacolise ngetono tabo bangaphindzi bone. Jesu watsandza ngisho labo labambulala. Wabathandazela kuBabe wetfu loseZulwini. Jesu wafundzisa kutsi kumele sitsandzane njengoba Naye asitsandza.
Kucocisana
-
Ngutiphi taletinye tintfo lesingatenta kukhombisa Babe wetfu loseZulwini kutsi siyamtsandza?
-
Ngutiphi taletinye tintfo lesingentela labanye kukhombisa lutsandvo lwetfu kubo?
Jesu Wahlela Libandla
Jesu bekafuna kutsi bonkhe bati indlela yekubuyela kuBabe wetfu loseZulwini. Indlela Yakhe ibitwa ngekutsi livangeli. Jesu wahlela libandla kute bantfu bonkhe bafundze livangeli.
Jesu wakhetsa emadvodza lalishumi nakubili, lababitwa ngebaPhostoli, kutohola leLibandla. Bebatawufundzisa bantfu lelivangeli emvakwekubuyela Kwakhe eZulwini. Jesu wanika labaPhostoli labalishumi nakubili ligunya lekumumelela. Bebangafundzisa lelivangeli kubo bonkhe bantfu baphindze bababhabhatise. Bebangakhetsa labanye kutsi babasite kufundzisa lelivangeli baphindze bente tonkhe letintfo lebekafuna tentiwe.
Kucocisana
-
Jesu wabakhetselani baPhostoli Labalishumi Nakubili?
Uma Sifundza ngaJesu, Siyacondzisisa kutsi Ngumuntfu Lomkhulu Kanganani
Jesu wasita ngamunye wetfu ngekusikhombisa kutsi siphile kanjani. Uma sifundza kufana Naye, sifundza kwenta letintfo letisenta sijabule. Singaphindze sifundze letintfo letingasisita kute sibuyele eZulwini sihlale naBabe wetfu loseZulwini.
Uma sati kutsi Jesu uyasitsandza, sitivela sinekuthula. Sitiva siphephile futsi singesabi. Siyati kutsi singatsembela Kuye kutsi abe ngumholi wetfu. Siyati kutsi uyaticondzisisa tinkinga tetf2u. Timfundziso Takhe tiyasisita kutsi sincobe tinkinga tetfu. Uma sicondzisisa k2onkhe Jesu lasentele kona, lutsandvo lwetfu Ngaye luyakhula. Lutsandvo lwetfu Ngaye lusenta sifune kumlalela. Silangatelela lesikhatsi lapho singaba Naye.
Kucocisana
-
Kufundza ngaJesu kusisita kanjani?
-
Uva kunjani usafundza ngaJesu?