Tinsita Letisisekelo
Sehluko 12: INhlawulo yaJesu Khristu

Sehluko 12

INhlawulo yaJesu Khristu

Jesu wahlupheka kakhulu ngenca yetono tetfu. Wakhetselani kusifela?

Babe wetfu loseZulwini Watfumela Jesu Khristu Emhlabeni kutoba nguMsindzisi wetfu

Sidzinga kuba nemitimba yenyama nematsambo kute sibe njengaBabe wetfu loseZulwini, kodvwa Babe wetfu loseZulwini bekati kutsi sonkhe sitawukufa siphindze silahlekelwe yimitimba yetfu ngoba Adamu na-Eva abamlalelanga Babe wetfu loseZulwini. Ngekudla lesitselo Babe wetfu loseZulwini labatjela kutsi bangasidli, bebatawugcina bafile, kanjalo nawonkhe muntfu lototalwa emvakwabo. Futsi, Babe wetfu loseZulwini bekati kutsi sonkhe sitawukona siselapha emhlabeni, futsi ngenca yetono tetfu besingeke sikhone kubuyela sihlale Naye. Sitawudzinga lusito kubhadala inhlawulo ngetono tetfu siphindze sitfobeke kute sikhone kubuyela kuBabe wetfu loseZulwini. Sitawudzinga lusito kutsi siphindze sitfole imitimba yetfu yenyama nematsambo emvakwekufa. Jesu watsi utawusisita. Utawuba nguMsindzisi wetfu.

Besidzinga umuntfu lote sono kubhadalela tono tetfu. Jesu Nguye yedvwa lobekangakwenta loku. Akatange one. Bekanemandla ngetulu kwekufa, ngakoke bekangasisita kute sibe nemitimba yetfu futsi emvakwekufa. Bekasitsandza kakhulu. Bekatimisile kuhluphekela tono tetfu kute sihlanteke kuto. Bekatimisile kusifela kute sibuyele emphilweni emvakwekufa. Umhlatjelo waJesu Khristu ubitwa ngekutsi yiNhlawulo.

Kucocisana

  • Bekumcoka ngani kutsi Babe wetfu loseZulwini atfumele Jesu emhlabeni?

Kuhlupheka kwaJesu Kusikhombisa kutsi Yena naBabe wetfu loseZulwini Basitsandza kangakanani

Babe wetfu loseZulwini usitsandza kakhulu ngangokuba watfumela iNdvodzana Yakhe, Jesu, emhlabeni wamvumela kutsi ahlupheke aphindze asifele. Jesu usitsandza kakhulu kangangobe wahlupheka waphindze wasifela. Jesu wati kutsi lokuhlupheka kutawuba ngulokukhulu kakhulu. Kwacishe kwaba ngetulu kwekutsi akhone kukubeketelela. Kodvwa bekafuna sikhone kuba njengaBabe wetfu loseZulwini.

Jesu waya endzaweni lebeyibitwa ngekutsi kuseNsimini yaseGetsemane. Lapho waguca wathandaza kuBabe wetfu loseZulwini acela lusito. Wacela Babe wetfu loseZulwini kutsi, uma kwakungenteka, angentiwa kutsi ahlupheke. Kodvwa watsi utawukwenta loko Babe wetfu loseZulwini lafuna kutsi akwente. Jesu bekangakaphocelelwa kutsi ahlupheke. Wakhetsa kuhlupheka ngoba bekuyincenye yelisu laBabe wetfu loseZulwini kute sihlanteke etonweni tetfu.

EGetsemane, Jesu wahluphekela tono tabo bonkhe bantfu, kwakungatsi ngeTakhe. Kuhluphekela tonkhe letono leti kwakukukhulu kwendlula kucondzisisa kwetfu. Lobuhlungu bebubukhulu kangangobe wachachatela. Ingati yaphuma etimbotjeni kuwo wonkhe umtimba Wakhe.

Emvakwaloko, bantfu labakhohlakele beta bamtsatsa bamyisa kubabusi baseJerusalema. Lapho bafike bamkhafulela baphindze bamshaya. Benta umchele wemanyeva bawubeka enhloko Yakhe. Bamhleka baphindze bahlekisa Ngaye.

Lababusi batjela emasotja kutsi akambetsele Jesu. Bamenta watfwala siphambano sesigodvo lesisindzako kuya kulendzawo lebekatawufa kuyo. Bamlengisa esiphambanweni ngekubetsela tipikili etandleni nasetinyaweni Takhe. Esiphambanweni, wacedza kuhluphekela inhlawulo yekungalaleli kwa-Adamu netono tetfu.

Washiywa alenga lapho emahora lamanyenti. Nanoma bekeva buhlungu, futsi nanoma labanye bantfu bebasahlekisa Ngaye, wathula waphindze wabeketela. Ekugcineni, watjela Babe wetfu loseZulwini kutsi ubuyisela moya Wakhe Kuye, wase uyafa.

Jesu bekanawo emandla ekutisindzisa ekufeni. Bekangachubeka aphile, kodvwa wakhetsa kufa kute sikhone kuhlala naBabe wetfu loseZulwini.

Uma Jesu afa, moya Wakhe washiya umtimba Wakhe. Ngelilanga lesitsatfu emvakwekufa Kwakhe, moya Wakhe wabuyela emtimbeni Wakhe, waphindze waphila futsi. Lokubuyela kwamoya emtimbeni kubitwa ngekutsi kuvuka.

Jesu wavela kubaPhostoli Bakhe nakulabanye bantfu emvakwekuvuka Kwakhe. Wakhombisa baPhostoli Bakhe emanceba lashiywe tipikili etandleni nasetinyaweni Takhe. Bawatsintsa base bayati kutsi lona ngumholi wabo, Jesu, ubuyile emphilweni. Wakhuluma nabo waphindze wadla nabo.

Kucocisana

  • Babe wetfu loseZulwini wasikhombisa kanjani lutsandvo Lwakhe?

  • Jesu wasikhombisa kanjani lutsandvo Lwakhe?

Image
Christ in Gethsemane [Khristu eGetsemane], ngu Harry Anderson

ENsimini yaseGetsemane namuva esiphambanweni, Jesu watitsatsela Yena tono tabo bonkhe bantfu.

Jesu Wakwenta Kwenteka kutsi Sihlantwe eSonweni

Jesu Nguye yedvwa lobekangasibhadalela tono tetfu. Simukela inzunzo legcwele yemhlatjelo Wakhe ngekukholelwa kutsi uyaphila nangekugcina imiyaleto Yakhe. Kumele sicolise ngetono tetfu. Akukameli sitente futsi. Kumele silandzele timfundziso taJesu Khristu. Bese Babe wetfu loseZulwini uyasicolela tono tetfu.

Kucocisana

  • Umdzingelani Jesu kutsi akusite uncobe tono takho?

  • Yini lodzinga kuyenta kute iNhlawulo yaJesu ikubhadalele tono takho?

Image
Christ on the Cross [Khristu Esiphambanweni], ngu Heinrich Bloch

Jesu wafela esiphambanweni ngetono tabo bonkhe bantfu.

Jesu Wakwenta Kwenteka kutsi Sonkhe Siphindze Sitfole Imitimba yetfu

Jesu wafa ngekutitsandzela futsi waba ngumuntfu wekucala kuvuswa. Nguye yedvwa lobekanemandla ekutivusa. Waphindza wenta kutsi natsi sikhone kuvuswa.

Noma sitokufa, sitawuphila futsi. Uma sifa, imimoya yetfu itoshiya imitimba yetfu. Kodvwa ngoba Jesu wancoba kufa, imimoya nemitimba yetfu itohlanganiswa kanyekanye futsi ingunaphakadze. Asiyuze sife futsi. Lesi sipho Jesu lasinikete wonkhe muntfu lotalwe lamhlabeni.

Kucocisana

  • Jesu wakwenta kanjani kutsi siphindze sitfole imitimba yetfu?

  • Ngubani lotawuvuswa?

Print