Sehluko 27
Livi leKuhlakanipha
Lesinye setibusiso letinkhulu Babe wetfu loseZulwini lasinikete sona yimitimba yetfu yenyama nematsambo. Usinike umtsetfo wetemphilo kusisita kunakekela imitimba yetfu. Wati ini ngalomtsetfo lo wetemphilo?
Imitimba yetfu Ingcwele
Sinye sizatfu lesibalulekile sekuta emhlabeni kutomukela imitimba yenyama nematsambo. Sidzinga imitimba kute sibe njengaBabe wetfu loseZulwini. Ngemitimba yenyama nematsambo kuphela singafundza letintfo lesidzinga kutati kute sifane Naye. Singaba nebantfwana. Singemukela timiso letidzingekako kitsi kute sibuyele sihlale naBabe wetfu loseZulwini. Ngaphandle kwemitimba besingeke sikhone kutenta letintfo.
Ngesizatfu sekutsi imimoya yetfu ihlala emitimbeni yetfu, umtimba ungcwele. Uma sinelukholo kuJesu Khristu futsi sitama kumlalela, Babe wetfu loseZulwini utfumela Moya loNgcwele kutsi abe natsi. Moya loNgcwele angeke ahlale natsi uma singalaleli futsi singanakekeli imitimba yetfu.
Uma sifa, imimoya yetfu ishiya imitimba yetfu. Uma Jesu afa, umoya Wakhe washiya umtimba Wakhe. Emvakwemalanga lamatsatfu, umoya Wakhe wangena emtimbeni Wakhe futsi waphindze wavuswa. Jesu bekanemandla ekubuyela ekuphileni; futsi ngenca yemhlatjelo Wakhe kitsi, natsi futsi sitawuvuswa emvakwekufa. Imimoya yetfu nemitimba itawubuyiselwa ndzawonye. Jesu bekati kutsi sitawudzinga kuba nemitimba lengabhubhi yenyama nematsambo kute sibe njengaBabe wetfu loseZulwini siphindze siphile Naye ingunaphakadze.
Babe wetfu loseZulwini ufuna siyinakekele kahle imitimba yetfu. Uma siyinakekela kahle imitimba yetfu, singaba nemphilo nemandla siphindze sente naleletinye tintfo lafuna sitente. Sonkhe kumele sitsatse sincumo kutsi sitayinakekela kahle imitimba yetfu noma sitawenta tintfo letitayilimata. Siyati kutsi imitimba yetfu ibalulekile kulemphilo le nangemuva kwalemphilo lena. Kumele sifundze kuyinakekela kahle. Babe wetfu loseZulwini akajabuli uma singayinakekeli imitimba yetfu.
Batali kumele kube ngibo labafundzisa bantfwana babo kutsi imitimba yabo sipho lesingcwele lesibuya kuBabe wetfu loseZulwini baphindze babachazele kutsi leni imitimba yabo ibalulekile. Uma bantfwana bacondzisisa kutsi leni kubalulekile kunakekela kahle imitimba yabo, angeke bafune kulandzela tilingo taSathane.
Kucocisana
-
Sinayo leni imitimba yenyama nematsambo?
-
Imitimba yetfu ingcwele leni?
-
Kubaluleke leni kitsi kutsi sifundzise bantfwabetfu bumcoka bekunakekela imitimba yabo?
Babe wetfu loseZulwini Usinike Umtsetfo weTemphilo
Babe wetfu loseZulwini usitjele letinye taletintfo letilungele imitimba yetfu naletinye tintfo letingayilungeli. Loku kubhalwe emibhalweni lengcwele futsi kubitwa ngekutsi Livi leKuhlakanipha.
Babe wetfu loseZulwini waveta livi leKuhlakanipha kumPhrofethi Joseph Smith. Ngumtsetfo. Kumele siwulalele lomtsetfo kute sibe nemitimba netingcondvo letinemandla.
Livi leKuhlakanipha lisifundzisa loko lokuhle ngemitimba yetfu. Kumele sidle siphindze sinatse kuphela tintfo letilungele imitimba yetfu. Kumele sidle titselo, tibhidvo, kanye nalokutinhlavu. Kumele sidle linani lelifanele laloku kudla futsi singadli kakhulu. Kumele singadli inyama lenyenti.
Kucocisana
-
Ngukuphi kudla lokulungele imitimba yetfu?
Babe wetfu loseZulwini Usitjele loko Lokungakayilungeli Imitimba yetfu
Babe wetfu loseZulwini uyati kutsi Sathane utawetama kusiphocelela kutsi siyidlabhatise imitimba yetfu. Babe wetfu loseZulwini usitjelile letinye taletintfo letingayilungeli imitimba yetfu. Kunatsa tjwala akusiko kahle emitimbeni yetfu. Babe wetfu loseZulwini usiyalete kutsi singabunatsi tjwala, kanye naletinye tinatfo letinetjwala. Leti tintfo tingabanga kugula tiphindze tibange kungajabuli ekhaya. Uma bantfu banatsa leti tintfo, abakhoni kucabanga kahle. Leti tinatfo tivamise kuholela bantfu kutsi bakhetse tintfo letimbi, kucamba emanga, kumosha yonkhe imali yabo, nekuphula umtsetfo webumsulwa. Uma wesifazane lotetfwele anatsa tinatfo letidzakako, angalimata umntfwana losengakatalwa. Bantfu labanatsa tinatfo letidzakanako badala tinkinga letinyenti letinkhulu.
Babe wetfu loseZulwini uphindze wasitjela kutsi ligwayi liyingoti emitimbeni yetfu. Akukameli sibheme noma sihlafune ligwayi. Bososayensi bakufakazele kutsi ligwayi libanga kugula futsi lingalimata bantfwana labasengakatalwa.
Babe wetfu loseZulwini usitjele kutsi singanatsi likhofi nelitiya. Kumele singanatsi likhofi nelitiya ngoba kunetidzakamiva letiyingoti. Kumele singatisebentisi tidzakamiva, ngaphandle kwemitsi bodokotela labasinika yona.
Babe wetfu loseZulwini usitjelile kutsi tjwala, ligwayi, kanye netidzakamiva tingasisita uma sati kutsi singatisebentisa kanjani kahle. Utsite tjwala busetjentiswa kuphela kuhlanta imitimba yetfu. Ligwayi lingasetjentiswa kwelapha tilondza etinkhomeni letigulako. Tidzakamiva ngalesinye sikhatsi tingasisita kusiphilisa uma sigula. Kodvwa ngaphambi kwekutsi sitame kusebentisa leti tintfo, kumele sifundze kubantfu labahlakaniphile loko lokumele kusentjentiselwe kona nekutsi kumele kusentjetiswe kanjani. Uma sikusebentisa ngendlela lengakalungi, kungaba yingoti.
Akukameli sitsatse noma ngayini emitimbeni yetfu lengasilungeli. Livi leKuhlakanipha lisitjela letinye tintfo letiyingoti kakhulu. Ngumtsetfo lobalulekile.
Livi leKuhlakanipha alisitjeli yonkhe intfo lekungameli siyisebentise. Kumele sicondzisise kutsi noma ngayini leyingoti emtimbeni yetfu noma etingcondvweni, noma kungakashiwo eVini leKuhlakanipha, akukameli kusentjetiswe. Kumele siyinakekele imitimba yetfu ngaletinye tindlela, njengekuyihlanta njalo kute ihlale ihlobile nekutivocavoca lokwanele nekuphumula.
Kucocisana
-
Sati kanjani kutsi letinye tintfo atiyilungeli imitimba yetfu?
-
Ngutiphi letinye tintfo lekungakameli sitifake emitimbeni yetfu?
-
Kuphumula nekutivocavoca kuhlangene ngani nemtsetfo waBabe wetfu loseZulwini wetemphilo?
-
Imitimba yetfu kumele siyigcine ihlanteke kanjani?
Tibusiso Letinkhulu Tita ngeKutfobela Livi leKuhlakanipha
Uma sitfobela Livi leKuhlakanipha, Babe wetfu loseZulwini utawubusisa imitimba yetfu kutsi ibe nemandla kunaloko lengaba ngiko uma singawulaleli lomlayeto. Sitawukwati kancono kwenta umsebenti Wakhe la emhlabeni. Watsi uma silalela lomtsetfo lo sitawukhona kugijima singakhatsali nekuhamba singaculeki. Lesi sibusiso lesikhulu.
Babe wetfu loseZulwini uphindze wasitsembisa kusibusisa ngekuhlakanipha lokukhulu nelwati uma sitfobela Livi leKuhlakanipha. Moya loNgcwele utawukwembula tintfo letinyeti letibalulekile lebesingeke sitati ngaphandle kwaloko. Sathane angeke abe nemandla ngetulu kwetfu. Uma sitfobela Livi leKuhlakanipha, sitawuba nemphilo leyengetiwe futsi sitawulungiselela kuphila lokuphakadze* naBabe wetfu loseZulwini.
Kucocisana
-
Ngutiphi tibusiso letita kitsi ngekutfobela Livi leKuhlakanipha?