Emagama longaWati

Babe loseZulwini:Umuntfu lophelele lofana nemuntfu lobhubhako kodvwa unemtimba lovusiwe wenyama nematsambo. UnguBabe wemimoya yetfu, lesithandaza Kuye. Unemandla onkhe futsi akabhubhi. Uyasitsandza ngoba sibantfwana Bakhe. Siphindze simbite ngaBabe waseZulwini.

Babe waPhakadze:Lelinye libito lesilinika Babe wetfu loseZulwini.

Babe waseZulwini:Buka Babe loseZulwini.

Bodzadzewetfu labasitako:Besifazane labanikwe lubito lwekunakekela tidzingo takamoya kanye netenyama temalunga emawadi abo. Lolubito lwelulelwa kubo bonkhe besifazane eBandleni. Imvamisa balingani lababelwe futsi babelwe kusita besifazane labatsite.

Bomnaketfu labasitako:Emadvodza lanikwe lubito lwekunakekela tidzingo takamoya kanye netenyama temalunga emawadi awo. Lolubito lwelulelwa kuwo onkhe emadvodza eBandleni. Imvamisa balingani lababelwe futsi babelwe kusita bantfu labatsite nemindeni.

Bumnyama lobungephandle:Yindzawo lapho Sathane nalabo labakhetse kumlandzela batawuhlala khona. Labo labahlala lapho angeke babuve bunandzi bemtselela waMoya loNgcwele futsi bayoba ngaphandle kwekukhanya neliciniso.

Buphristi:Ligunya Babe wetfu loseZulwini lalinika emadvodza kwenta umsebenti Wakhe aphindze amkhulumele. Kunetigaba letimbili: lobukhulu noma buPhristi bakaMelkhisedeki nalobuncane noma buPhristi baka-Aroni.

BuPhristi baka-Aroni:Lobuncane kulobubili emagunyeni ebuphristi Babe wetfu loseZulwini labunike emadvodza emhlabeni kutsi ente egameni Lakhe kute kusindziswe bantfwana Bakhe. Lobuphristi lobuncane batfola libito labo ku-Aroni, umnakabo Mosi, futsi behlukile kulolobukhulu noma buPhristi bakaMelkhisedeki. BuPhristi baka-Aroni bufaka ekhatsi emahhovisi emdikhoni, umfundzisi, umphristi, kanye nembhishobhi.

BuPhristi bakaMelkhisedeki:Lobukhulu kulobuphristi lobubili, lobunemahhovisi embonisi, umphristi lomkhulu, umphatriyakhi, Labangemashumi Lasikhombisa, kanye nemPhostoli.

Gcoba:Kunika indvodza lefanelekile lihhovisi ebuphristini ngekubeka tandla.

IJerusalema Lensha:Lidolobha lelitawakhiwa esifundzeni saseMissouri, e-United States, ngaphambi nje kwekucala kweMileniyamu. Jesu utawuphatsa hulumende Wakhe, umbuso waBabe wetfu loseZulwini emhlabeni, kusuka kulendzawo le ngesikhatsi seMileniyamu.

IKhoramu:Licembu lelihlelekile lemadvodza noma bafana labaphetse lihhovisi lelifanako ebuphristini. Ikhoramu ngayinye yenganyelwe ngumengameli nebeluleki lababili.

IMfundziso neTivumelwano:Incwadzi yembhalo longcwele lecuketse emavi aBabe wetfu loseZulwini kubantfu betikhatsi tanamuhla.

Imishini:(1) Indzawo yemhlaba lapho Libandla lenta umsebenti wemishini noma lihlose kuwenta. Imvamisa lehlukaniswe ngeticagogwana letincane letibitwa ngetigodzi. (2) Lubito lwemholi weLibandla kufundzisa livangeli noma kunika lusito sikhatsi lesitsite lesicondzile.

Imvumo yelithempeli:Liphepha lelisayiniwe lelivumela umuntfu kunoma nguliphi lemathempeli eLibandla. Kutfola leliphepha, umuntfu kumele abe lilunga lelifanelekile leLibandla. Lemvumo isayinwa baholi bebuphristi labafanele, labafakaza ngekufaneleka kwaloyo muntfu.

INcwadzi yaMormon:Incwadzi yembhalo longcwele lecuketse timfundziso taBabe wetfu loseZulwini kubantfu labebahlala emavenikati aseMelika.

Indlu yaka-Israyeli:Noma ngutiphi titukulwane temvelo noma tekutfolwa temadvodzana aJakobe lalishumi nakubili, lolibito lawo lashintjwa kuya ku-Israyeli (buka Genesisi 32: 28).

Inhlawulo:Inkhokhelo yaJesu, ngekuhlupheka nekufa, ngenca yetono tabo bonkhe bantfu lebavumela kutsi bakhululwe emiphumeleni yekufa ngekwemtimba nangekwakamoya lokwaletfwa siphambeko sa-Adamu nekwehlukaniswa kwemuntfu kuBabe wetfu loseZulwini.

INkhosi:Libito laNkulunkulu. Ngalesinye sikhatsi lisho Babe wetfu loseZulwini futsi ngalesinye sikhatsi lisho Jesu Khristu.

Iparadesi:Incenye yelive lamoya lapho imimoya yalabalungile ihlala khona.

Jesu Khristu:Lomdzala webantfwana bamoya baBabe wetfu loseZulwini, uMdali wemhlaba, uMsindzisi neMhlengi wetfu. Weta emhlabeni kutokhokhela tono tetfu sonkhe. (Buka ikakhulukati sehluko 3, 11, na 12.)

Kubhabhatisa:Kungcwaba umuntfu emantini uphindze umkhiphe emantini kute aphile imphilo lensha. Buka UmBhabhatiso.

Kuboshwa:Simiso lesentiwa ethempelini lesihlanganisa indvodza nemfati ingunaphakadze, noma bantfwana kubatali babo.

Kubuya Kwesibili:Kubuya kweMsindzisi wetfu, Jesu Khristu, kutocala iMileniyamu, noma lesikhatsi semnyaka lotinkhulungwane wekuthula.

Kufa kwakamoya:Simo sekuhlukaniswa naBabe wetfu loseZulwini.

Kufa kwenyama:Kufa lesibhekana nako uma imitimba yetfu yehlukaniswa emimoyeni yetfu.

Kuhlubuka:(1) Simo sekuhocisa ngekwakamoya kuBabe wetfu loseZulwini. (2) Sikhatsi lapho timfundziso taBabe wetfu loseZulwini nebuphristi Bakhe babungekho emhlabeni.

Kuphakanyiswa:Imphilo lesezingeni lelisetulu kakhulu lembuso wesilestiyali. Labo labemukela kuphakanyiswa batawufanana naBabe wetfu loseZulwini.

KuPhendvuka:Inchubo lapho umuntfu lowonile kumele andlule kuyo kute atsetselelwe. (Buka sehluko 14.)

Kuphila lokuphakadze:Loku akusho kuphila ingunaphakadze kuphela kodvwa kuphindze kusho kuphila lenhlobo yemphilo Babe wetfu loseZulwini layiphilako nekufana Naye. Kusho lokufanako nekuphakanyiswa.

Kusihlwa ekhaya nemndeni:Umhlangano wemndeni, imvamisa njalo ngeMsombuluko kusihlwa, lapho bahlabela khona, bafundza livangeli, bacoca nganoma ngutiphi tinkinga labanato, badlala imidlalo, baphindze bente letinye tintfo njengemndeni.

Kuvuswa:Kuhlangana kabusha kwemtimba namoya, emvakwekufa, kwakha umtimba longabhubhi.

Kuwa kwa-Adamu:Lushintjo lolwehlela Adamu na-Eva ngenca yekutsi badla sitselo lebesingakavumeleki. Babe wetfu loseZulwini wabasusa ebukhoneni Bakhe, base baba sesimeni sekubhubha. Loku kwenta bonkhe bantfu bakwati kutalwa baphindze bafe.

Kwelishumi:Lokukodvwa eshumini kwako konkhe lesikutfolako, lokuniketwa Libandla.

Kwembatsisa:Tibusiso letiniketwa nguBabe wetfu loseZulwini emathempelini letiphindze tidzingekile kutfola kuphakanyiswa.

Labangemashumi Lasikhombisa:Lihhovisi ebuPhristini bakaMelkhisedeki. Indvodza lephetse leli lihhovisi ngufakazi lokhetsekile waJesu Khristu futsi usita baPhostoli kwengamela Libandla.

Libandla:Buka Libandla laJesu Khristu Lalabangcwele Betinsuku Tekugcina.

Libandla laJesu Khristu Lalabangcwele Betinsuku Tekugcina:Ligama lelisemtsetfweni leLibandla laJesu Khristu, lalibuyisela ngemPhrofethi Joseph Smith esikhatsini setfu. LeLibandla ngalesinye sikhatsi liye libitwe ngesiteketiso seLibandla lemaMormon.

Ligala:Kusentjetiswa lokumfanekiso wesicu sesihlahla kumela kwehlukaniswa lokuncane noma sicagogwana lesihlelekile semndeni lomkhulu weLibandla. Lokuhlukaniswa kusekelwe emnceleni wendzawo lapho emalunga ahlala khona aphindze ahlangane ndzawonye ngaphansi kwahulumende wetisebenti letigunyatiwe taBabe wetfu loseZulwini.

Ligugu leLinani Lelikhulu:Incwadzi yembhalo longcwele lecuketse imibhalo yaMosi, Abrahama, naJoseph Smith. Leligama empeleni lisho litje leliligugu kakhulu, lokuyindlela lencwadzi lebukwa ngayo ngemalunga eLibandla.

Lihhovisi:Sikhundla seligunya phakatsi kwebuphristi. (Buka umDikhoni, umFundzisi, umPhristi, nalabanye.)

Lijele lamoya:Yincenye yelive lamoya lapho imimoya yetinhlobo tebantfu labatsatfu iya khona emvakwekufa: labo bebakhohlakele kulemphilo le, labo bebaphila imphilo lelungile kodvwa bangalemukeli noma bangaliphili livangeli, nalabo labangatange balitfola litfuba lekuva livangeli. Ekugcineni bonkhe labo bantfu batawuvuswa.

Lilanga leSabatha:Lilanga lekuphumula lelamiswa nguJesu njengelilanga lekukhonta Babe wetfu loseZulwini nekusita labanye. Ligujwa ngeLisontfo etindzaweni letinyenti emhlabeni.

Lithempeli:Sakhiwo lesingcwele, lesivame kubitwa ngendlu yeNkhosi, lapho khona timiso letingcwele tentelwa khona, lokufaka ekhatsi simiso semshado wangunaphakadze.

Livangeli:Timfundziso taJesu Khristu, lokutsi, uma tilandzelwa, titawuvumela umuntfu kutsi abuyele ahlale ebukhoneni baBabe wetfu loseZulwini.

Live lamoya:Yindzawo lapho imimoya yabo bonkhe bantfu iyakhona emvakwekufa kute kube sekuvukeni.

Livi leKuhlakanipha:Ngumyaleto lobuya kuBabe wetfu loseZulwini lositjela loko lokumele nalokungakameli sikudle noma sikunatse. Usho ngalokucondzile kutsi akukameli sisebentise tjwala, ligwayi, litiya, kanye nelikhofi. (Buka sehluko 27.)

Liwadi:Licembu lemalunga eLibandla lelihlelwe ngephakatsi kwesikhonkhwane, langanyelwe ngumbhishobhi nebeluleki bakhe lababili.

Lizulu:Indzawo lapho Babe wetfu loseZulwini ahlala khona. Ngalesinye sikhatsi isentjetiselwa kusho indzawo lapho imimoya yetfu beyihlala khona ngaphambi kwekuta emhlabeni, futsi lapho iya khona emvakwekufa (eveni lamoya). Futsi ligama lendzawo lapho labalungile batawuhlala khona ingunaphakadze emvakwekuvuswa (umbuso wesilestiyali).

Longcwele:Ligama lelisetjentiswa kukhomba lilunga leLibandla laJesu leliliciniso.

Mileniyamu:Iminyaka letinkhulungwane yekuthula letawucala uma Jesu eta emhlabeni futsi kuloko lokubitwa ngekutsi Kubuya Kwesibili.

Moya:Loko lokunika umtimba imphilo. Yincenye yemtimba leyayikhona ngaphambi kwalemphilo le lephindze ichubeke nekubakhona emvakwekufa. Moya nemtimba kutawuhlanganiswa ekuvukeni, akuyuphindze kwehlukaniswe futsi.

Moya loNgcwele:Umuntfu wamoya lote umtimba wenyama lo inhloso yakhe kufakaza loko Babe wetfu loseZulwini naJesu labakushoko nalabakwentako. Uma sitsi Moya waBabe wetfu loseZulwini unatsi, sisho Moya loNgcwele.

Nikela:(1) Emandvulo, kubulawa kwetilwane kutfobela umtsetfo waBabe wetfu loseZulwini. (2) Namuhla, kudzela intfo letsite lenelinani kitsi, njengesikhatsi setfu netinsita, kusita labanye.

Nkulunkulu:Umuntfu lophakeme nembusi wendalo yonkhe. Lelibito Nkulunkulu imvamisa lisho Babe wetfu loseZulwini, kodvwa ngalesinye sikhatsi emibhalweni lengcwele lisho Jesu.

Sembulo:Lwati loluniketwa nguBabe wetfu loseZulwini kumuntfu, imvamisa ngekuphefumulelwa nguMoya loNgcwele, lokungasho tintfo letendlulile, tamanje, noma letitako.

Sidlo seNkhosi:Simiso lapho emalunga eLibandla emukela sinkhwa nemanti lokumelele umtimba nengati yaJesu kusikhumbuta ngeNhlawulo Yakhe yetono.

Sigodzi:Indzawo noma kuhlukana lokubuye kwahlukaniswa kwaba ngemagala ngaphansi kwemishini yeLibandla. Yenganyelwe ngumengameli nebeluleki bakhe lababili.

Sikhonkhwane:Luhlelo lwemalunga ngephakatsi kwendzawo yelive lapho Libandla lihleleke ngalokuphelele futsi lenganyelwe baholi bebuphristi labakhetsiwe. Tehlukaniswa ngeticagogwana letincane letibitwa ngemawadi nemagala.

Simiso:Lisiko noma umsebenti lowentiwa ngeligunya lebuphristi.

Sipho seMoya loNgcwele:Lilungelo lekuba nemtselela waMoya loNgcwele njalo. Lesi sipho siniketwa emvakwembhabhatiso.

Siphrofetho:Emavi laphefumulelwe emphrofethi, imvamisa amayelana nesehlakalo lesitako.

Siyona:Ngulelinye ligama leJerusalema Lensha, lidolobha lapho Jesu utawungamela umhlaba ngesikhatsi seMileniyamu.

Tikhiya tebuphristi:Lilungelo lekunika ligunya lekwenta timiso tebuphristi.

Tivana letiLishumi:Titukulwane talabalishumi kulabalishumi nakubili temadvodzana aka-Israyeli (Jakobe) layiswa ekutfunjweni futsi indzawo yawo yalahleka kusukela elwatini lwebantfu.

Tivumelwano:Titsembiso letingcwele letentiwa emkhatsini waBabe wetfu loseZulwini nemuntfu.

UmBhabhatiso:Simiso lesidzingekako selivangeli lapho khona umuntfu enta sivumelwano naBabe wetfu loseZulwini kutsi utolalela Yena aphindze Babe wetfu loseZulwini ametsembise kumcolela aphindze ahlante lowo muntfu esonweni futsi amvumele bulunga eBandleni Lakhe. Lesimiso sifanekisa kutalwa kabusha ngekungcwatjwa emantini uphindze uvuselwe futsi emphilweni lensha. Lesimiso sentiwa ngulabo labagunyatwe kuphatsa buphristi bentele Babe wetfu loseZulwini.

UmBhabhatiso walabafile:UmBhabhatiso ethempelini laBabe wetfu loseZulwini lemuntfu lophilako lomela indzawo yemuntfu lofile.

Umbhishobhi:Lihhovisi ebuPhristini baka-Aroni lelinika indvodza ligunya lenhlalakanhle yakamoya kanye neyenyama yelicembu lemalunga eLibandla.

Umboni:Umuntfu lokwati kubona likusasa ngoba limbulelwe yena nguBabe wetfu loseZulwini. Umboni uyafana nemphrofethi.

Umbonisi:Lihhovisi lekucala ebuPhristini bakaMelkhisedeki leliniketwa emadvodza lafanelekile laneminyaka lengu 18 noma ngetulu. Libanika ligunya lekwenta timiso letitsite, letitibusiso etimphilweni talabanye bantfu.

Umbuso weSilestiyali:Lowombuso lapho labalungile bahlala khona ebukhoneni baBabe wetfu loseZulwini baphindze batfole konkhe lanako.

Umbuso weThelestiyali:Longephasi kulemibuso lemitsatfu yenkhatimulo lapho khona bantfu batawabelwa emvakwekuvuka. Lombuso lo ubekelwa bacambi manga, babulali, labo labebako, nalabo bantfu lababi.

Umbuso weTherestriyali:Umbuso wenkhatimulo lo simo sawo singephansi kwembuso wesilestiyali kodvwa ungetulu kwalowo mbuso wethelestiyali. Ubekelwe bantfu labalungile emhlabeni labangatange bente konkhe Babe wetfu loseZulwini lebekadzinga bakwente.

UmDikhoni:Lihhovisi lekucala ebuphristini baka-Aroni, lelinganiketwa emalunga esilisa lafanelekile eLibandla kusukela ngaBhimbidvwane wemnyaka bahlanganisa iminyaka lengu 12. Libanika ligunya lekwenta imisesebenti letsite yesikhashana.

UmFundzisi:Lihhovisi ebuPhristini baka-Aroni, lelinganiketwa emalunga esilisa lafanelekile eLibandla kusukela ngaBhimbidvwane wemnyaka bahlanganisa iminyaka lengu 14. Leligama livela kuletinye tetibopho talelihhovisi, letitekufundzisa emalunga eLibandla.

Umnikelo wekuzila:Umnikelo wemali leyongiwe ngekuzila kudla lokubili. Iniketwa Libandla kusita bantfu labamphofu.

Umphatriyakhi:Lihhovisi ebuPhristini bakaMelkhisedeki leliniketwa loyo losavele angumphristi lomkhulu, lo emvakwekugcotjwa ehhovisi lemphatriyakhi unika tibusiso letikhetsekile, letibitwa ngetibusiso tebuphatriyakhi, kumalunga eLibandla lafanelekile.

Umphefumulo:Kusho lokufanako nemuntfu (umtimba namoya ndzawonye). Ngalesinye sikhatsi, noko, leligama leli lisetjentiswa kusho umoya wemuntfu.

UmPhostoli:Lihhovisi ebuPhristini bakaMelkhisedeki. Baphostoli bofakazi labakhetsekile baJesu Khristu emhlabeni wonkhe.

UmPhristi:Lihhovisi ebuPhristini baka-Aroni, lelinganiketwa emalunga esilisa lafanelekile eLibandla kusukela ngaBhimbidvwane wemnyaka bahlanganisa iminyaka lengu 16. Lelihhovisi leli libanika ligunya lekwenta imibhabhatiso nekugcotjwa kwebuPhristi baka-Aroni, kubusisa sidlo seNkhosi, kanye nekwenta imisebenti leminye.

Umphristi Lomkhulu:Lihhovisi ebuPhristini bakaMelkhisedeki lelibhekele kuphatfwa kwetintfo takamoya.

UmPhrofethi:Indvodza lebitwe nguBabe wetfu loseZulwini, lechumana Naye iphindze imkhulumele.

Umshado waphakadze:Umshado loboshwe ethempelini uphindze uchubeke ingunaphakadze emvakwekufa uma sifanelekile kuhlala naBabe wetfu loseZulwini.

UMsindzisi:Umuntfu losindzisa lomunye entfweni leyingoti. Jesu nguMsindzisi wetfu ngoba wasisindzisa ekufeni kwenyama nasekufeni kwakamoya.

Umtsetfo webumsulwa:Umyaleto waBabe wetfu loseZulwini wekutsi umuntfu kufanele abe nebudlelwane ngekwelicansi nalashade naye kuphela.