មេរៀនទី ៤ ឯកសារគ្រូបង្រៀន ៖ ការស្វែងរកគោលបំណង និងសេចក្ដីអំណរនៅក្នុងការបង្កបង្កើតរបស់ព្រះអម្ចាស់

« មេរៀនទី ៤ ឯកសារគ្រូបង្រៀន ៖ ការស្វែងរកគោលបំណង និងសេចក្ដីអំណរនៅក្នុងការបង្កបង្កើតរបស់ព្រះអម្ចាស់ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )

« មេរៀនទី ៤ ឯកសារគ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់

មេរៀនទី ៤ ឯកសារគ្រូបង្រៀន

ការស្វែងរកគោលបំណង និងសេចក្ដីអំណរនៅក្នុងការបង្កបង្កើតរបស់ព្រះអម្ចាស់

« ក្រោមការដឹកនាំរបស់ព្រះវរបិតាទ្រង់ [ ព្រះយេស៊ូវគ្រីស្ទ ]គឺជាព្រះដ៏បង្កបង្កើតនៃផែនដី » ( « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ChurchofJesusChrist.org ) ។ នៅក្នុងមេរៀននេះ សិស្សនឹងពិចារណាអំពីមូលហេតុដែលព្រះអម្ចាស់បានបង្កើតផែនដី និងអ្វីដែលពួកគេអាចធ្វើ ដើម្បីស្វែងរកសេចក្តីអំណរកាន់តែខ្លាំងនៅក្នុងការបង្កបង្កើតរបស់ទ្រង់ ។

យោបល់សម្រាប់ការបង្រៀន

ការអភិវឌ្ឍការបង្រៀន និងការរៀនសូត្ររបស់យើង

សូមទុកចិត្តលើការរៀបចំរបស់សិស្សអ្នក ។ សូមពិចារណាអំពីរបៀប ដើម្បីលើកទឹកចិត្តសិស្សឲ្យសិក្សាឯកសាររៀបចំសម្រាប់ថ្នាក់ ។ បន្ទាប់មក សូមបង្ហាញជំនឿរបស់អ្នកលើសិស្សរបស់អ្នក ដោយការគូរលើការរៀបចំរបស់ពួកគេអំឡុងពេលរៀនក្នុងថ្នាក់ ។ ការធ្វើបែបនោះនឹងបំផុសគំនិតសិស្សឲ្យទទួលយកទំនួលខុសត្រូវកាន់តែខ្លាំង សម្រាប់ការរៀនសូត្រផ្ទាល់ខ្លួនរបស់ពួកគេ ។

ព្រះបានបង្កើតផែនដី ដើម្បីនាំមកនូវសេចក្តីសង្រ្គោះរបស់យើង ។

ដើម្បីចាប់ផ្តើមថ្នាក់រៀន អ្នកអាចបង្ហាញរូបភាពដែលភ្ជាប់មកជាមួយ ហើយអញ្ជើញសិស្សពីរបីនាក់ឲ្យចែករំលែកនូវ គំនិត អារម្មណ៍ ឬ សំណួរដែលពួកគេមាន ពេលកំពុងសម្លឹងមើលដួងតារានាពេលរាត្រី ។ ឬអ្នកអាចបង្ហាញរូបថតដែលសិស្សបានយកមក ឬផ្ញើមកអ្នក ។ សុំឲ្យពួកគេចែកចាយគំនិតរបស់ពួកគេអំពីអ្វី ដែលបំផុសគំនិតពួកគេនៅក្នុងរូបភាពទាំងនោះ ។

សូមរំឭកសិស្សថា ម៉ូសេមានចក្ខុវិស័យដ៏អស្ចារ្យមួយ ដោយគាត់បានឃើញវិសាលភាពដ៏ធំធេងនៃការបង្កបង្កើតរបស់ព្រះ ។ ដើម្បីជួយសិស្សគិតកាន់តែស៊ីជម្រៅអំពីព្រះដ៏បង្កបង្កើត និងការបង្កបង្កើតរបស់ទ្រង់ សូមអញ្ជើញពួកគេធ្វើការជាក្រុមតូចៗ ហើយផ្ដល់ឲ្យពួកគេនូវសំណៅចែកដូចតទៅ ។

ម៉ូសេរៀនសេចក្ដីពិតដ៏សំខាន់ៗអំពីការបង្កបង្កើត

ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់—មេរៀនទី ៤

សូមអានសាច់រឿងដូចតទៅនេះ ៖

ក្រិតឆិន ចូលចិត្តវិទ្យាសាស្ត្រ ។ ចេញពីការសិក្សារបស់នាង នាងបានរៀនច្រើនអំពី របៀប ដែលពិភពធម្មជាតិដំណើរការ ប៉ុន្តែនាងមិនបានរកឃើញចម្លើយដែលពេញចិត្តចំពោះ មូលហេតុ ដែលពិភពលោកកើតមាននោះទេ ។ នាងមានសំណួរជាច្រើនអំពីគោលបំណងសម្រាប់ផែនដី និងជីវិតរបស់យើង ។

តើនរណាម្នាក់អាចប្រឈមមុខនឹងបញ្ហាអ្វីខ្លះ ប្រសិនបើពួកគេមិនយល់ពី មូលហេតុ ដែលផែនដីត្រូវបានបង្កើតឡើង ?

សូមអានជាមួយគ្នាក្នុង ម៉ូសាយ ១:២៧–៣៩ហើយរកមើលសេចក្ដីពិតដែលអាចបង្កើនទស្សនៈរបស់ក្រិតឆិន អំពីការបង្កបង្កើត ។ បន្ទាប់មក សុំឲ្យសមាជិកក្រុមនីមួយៗជ្រើសរើសចំណុចមួយខាងក្រោម ហើយចំណាយពេលពីរបីនាទីដើម្បីរៀបចំចម្លើយ ។ បន្ទាប់មក ម្នាក់ៗអាចចែកចាយគំនិតរបស់ពួកគេជាមួយនឹងក្រុម ។

តើអ្នករៀនអ្វីខ្លះអំពីលក្ខណៈរបស់ព្រះដ៏បង្កបង្កើត ចេញពីការបង្កបង្កើត ? តើសេចក្ដីជំនឿរបស់អ្នកទៅលើព្រះយេស៊ូវគ្រីស្ទមានឥទ្ធិពលយ៉ាងណា ដោយដឹងថាទ្រង់បានបង្កើតវត្ថុសព្វសារពើ ?
តើអ្នកមានគំនិត ឬអារម្មណ៍បែបណា ពេលអ្នកពិចារណាថា « យើងជាមូលហេតុដែល [ ព្រះ ] បានបង្កើតសកលលោកនេះ » ? ( អ្នកអាចរំឭកឡើងវិញនូវ សេចក្ដីថ្លែងការណ៍ដោយប្រធាន ឌៀថើរ អេស្វ អុជដូហ្វ នៅក្នុងផ្នែកទី ១ នៃឯកសាររៀបចំ ) ។
តើសកម្មភាពអ្វីខ្លះដែលអ្នកបានធ្វើ ឬអ្នកអាចធ្វើ ដើម្បីជួយអ្នកដទៃឲ្យឈានដល់សក្តានុពលរបស់ពួកគេ ក្នុងនាមជាបុត្រាបុត្រីរបស់ព្រះវរបិតាសួគ៌ ? ( អ្នកអាចអញ្ជើញសមាជិកក្រុមឲ្យកត់ត្រាអ្វី ដែលពួកគេអាចនឹងមានអារម្មណ៍បំផុសគំនិតឲ្យធ្វើ សម្រាប់នរណាម្នាក់ដែលពួកគេស្គាល់ ) ។
តើចំណេះដឹងប្រភេទណាដែលយើងអាចទទួលបានពីវិទ្យាសាស្ត្រ ? តើចំណេះដឹងប្រភេទណាដែលយើងអាចទទួលបានពីព្រះគម្ពីរ ? ហេតុអ្វីបានជាយើងត្រូវការចំណេះដឹងទាំងពីរទម្រង់ ? ( អ្នកអាចរំឭកឡើងវិញនូវសេចក្ដីថ្លែងការណ៍របស់ ប្រធាន រ័សុល អិម ណិលសុន និង ប្រធាន ដាល្លិន អេក អូក នៅក្នុងផ្នែកទី ៣ នៃឯកសាររៀបចំ ) ។

កំណត់ចំណាំ អ្នកអាចជ្រើសរើសឲ្យក្រុមតូចៗរាយការណ៍ទៅថ្នាក់ ។ ឬប្រសិនបើអ្នកមានអារម្មណ៍ថា ការពិភាក្សាជាក្រុមបានគ្របដណ្តាប់ប្រធានបទគ្រប់គ្រាន់ហើយ អ្នកអាចជ្រើសរើសបន្តទៅផ្នែកបន្ទាប់នៃមេរៀន ។

អ្នកអាចបញ្ចប់ផ្នែកនេះដោយសង្កត់ធ្ងន់ ឬថ្លែងទីបន្ទាល់ថា នៅក្រោមការដឹកនាំរបស់ព្រះវរបិតាសួគ៌ ព្រះយេស៊ូវគ្រីស្ទបានបង្កើតវត្ថុសព្វសារពើរ ។ អ្នកអាចថ្លែងទីបន្ទាល់ផងដែរថា ការបង្កើតផែនដីគឺជាផ្នែកមួយដ៏ចាំបាច់នៃផែនការរបស់ព្រះវរបិតាសួគ៌ ដើម្បីនាំមកនូវអមតភាព និងជីវិតដ៏នៅអស់កល្បជានិច្ចដល់បុត្រាបុត្រីទ្រង់ ។

ព្រះដាក់អ្វីៗទាំងអស់នៅលើផែនដី ដើម្បីជាប្រយោជន៍ និងភាពរីករាយរបស់យើង ។

អ្នកអាចចាប់ផ្តើមផ្នែកនេះនៃការពិភាក្សាក្នុងថ្នាក់ដោយសួរ ៖

តើការបង្កបង្កើតរបស់ព្រះអម្ចាស់អ្វីខ្លះ ដែលអ្នកមានអារម្មណ៍ថាមានអំណរគុណបំផុត ? តើអ្នកបានសម្តែងការដឹងគុណរបស់អ្នកចំពោះព្រះ សម្រាប់ការបង្កើតទាំងនេះដោយរបៀបណា ?

បន្ទាប់មក អ្នកអាចរំឭកសិស្សថា ព្រះបានសម្រាកនៅថ្ងៃទីប្រាំពីរ ហើយទ្រង់បានឃើញថា « របស់ទាំងប៉ុន្មានដែល [ ទ្រង់ ] បានធ្វើ … នោះសុទ្ធតែល្អ » ( ម៉ូសេ ៣:២ ) ។ បន្ទាប់មក ទ្រង់ « បានប្រទានពរដល់ថ្ងៃទី ៧ ហើយញែកថ្ងៃនោះទុកជាថ្ងៃបរិសុទ្ធ » ( ម៉ូសេ ៣:៣ ) ។ ហើយនៅសម័យទំនើបនេះ ព្រះអង្គសង្គ្រោះរំឭកយើងថា នៅពេលយើងគោរពថ្ងៃឈប់សម្រាក « ផលបរិបូរនៃផែនដី » នឹងក្លាយជារបស់យើង ( សូមមើល គោលលទ្ធិ និង សេចក្ដីសញ្ញា ៥៩:៩-១៦ ) ។

សូមអានជាមួយគ្នាក្នុង គោលលទ្ធិ និងសេចក្ដីសញ្ញា ៥៩:១៦–២០ ហើយអញ្ជើញសិស្សរកពាក្យ ឬ ឃ្លាដែលពិពណ៌នាពីរបៀបដែលព្រះអម្ចាស់នឹងឲ្យយើងដកពិសោធន៍ការបង្កបង្កើតរបស់ទ្រង់ ។ បន្ទាប់ពីពិភាក្សាអំពីសារៈសំខាន់នៃពាក្យ និងឃ្លាទាំងនោះហើយ ( ជាពិសេសពាក្យនិងឃ្លានៅក្នុង ខទី ២០ ) វាអាចមានប្រយោជន៍ដើម្បីបង្ហាញសេចក្ដីពិតដូចតទៅនេះ ៖ ការបង្កបង្កើតរបស់ព្រះអម្ចាស់គឺសម្រាប់ជាប្រយោជន៍ និងភាពរីករាយរបស់យើង ហើយមិនត្រូវប្រើខុសក្នុងគោលបំណងទុច្ចរិតឡើយ ។

ដើម្បីជួយសិស្សយល់កាន់តែស៊ីជម្រៅអំពីសេចក្តីពិតនេះ អ្នកអាចសួរសំណួរដូចខាងក្រោម ៖

ហេតុអ្វីបានជាវាសំខាន់ក្នុងការឆ្លៀតពេលទៀងទាត់ដើម្បីស្វែងរកសេចក្ដីអំណរនៅក្នុងការបង្កបង្កើតរបស់ព្រះអម្ចាស់ ? ( អ្នកអាចតាមដានការអញ្ជើញឲ្យ « ធ្វើសកម្មភាព » នៅក្នុងផ្នែកទី ២ នៃឯកសាររៀបចំ ) ។ តើអ្វីដែលអ្នកអាចផ្លាស់ប្តូរក្នុងទម្លាប់ប្រចាំថ្ងៃរបស់អ្នក ដើម្បីធានាថាអ្នកមានពេលទៀងទាត់ដើម្បីរីករាយនឹងការបង្កបង្កើតរបស់ព្រះអម្ចាស់ ? ( វាអាចមានប្រយោជន៍ដើម្បីឲ្យសិស្សមានពេលកត់ត្រាគំនិត និងអារម្មណ៍របស់ពួកគេ ) ។
តើអ្នកបានទទួលប្រយោជន៍ពីរបស់ល្អដែលមកពីផែនដីដោយរបៀបណា ? តើអ្នកអាចបង្ហាញព្រះអម្ចាស់បន្ថែមទៀតនូវអំណរគុណរបស់អ្នកចំពោះរបស់ទាំងនោះដោយរបៀបណា ?
ហេតុអ្វីបានជាអ្នកគិតថារូបកាយរបស់យើងអាចត្រូវបានហៅថាជាការបង្កបង្កើតដ៏ខ្ពង់ខ្ពស់របស់ព្រះ ? ( សូមមើល សេចក្ដីថ្លែងការណ៍របស់ប្រធាន ហ្គរដុន ប៊ី ហ៊ិងគ្លី នៅក្នុងផ្នែកទី ២ នៃឯកសាររៀបចំ ) ។ តើវិធីមួយចំនួនណាខ្លះដែលយើងអាចគោរពភាពបរិសុទ្ធនៃរូបកាយរបស់យើង និងរបស់មនុស្សដទៃ ? តើអ្វីដែលបានជួយអ្នកឲ្យមានអំណរគុណកាន់តែខ្លាំងសម្រាប់រូបកាយរបស់អ្នក ?

អ្នកអាចបង្ហាញសិស្សនូវវីដេអូ « Our Home » ( ១:៣៤ ) ហើយអញ្ជើញពួកគេឲ្យសញ្ជឹងគិតអំពីអ្វីដែលពួកគេអាចធ្វើ ដើម្បីក្លាយជាអ្នកគ្រប់គ្រងផ្ទះរបស់យើង ដែលជាផែនដីឲ្យបានប្រសើរជាងមុន ។

1:34

សូមផ្តល់ពេលពីរបីនាទីនៅចុងបញ្ចប់នៃថ្នាក់ ដើម្បីថ្លែងទីបន្ទាល់ និងអញ្ជើញសិស្សឲ្យថ្លែងទីបន្ទាល់អំពីសេចក្តីស្រឡាញ់របស់ព្រះដ៏បង្កបង្កើតចំពោះយើងម្នាក់ៗ ។

សម្រាប់ពេលក្រោយ

សូមពិចារណាផ្ញើសារដូចខាងក្រោមទៅសិស្សមុនថ្នាក់បន្ទាប់ ៖ តើអ្នកចង់មានអារម្មណ៍ថាមានថាមពល និងការការពារបន្ថែមទៀតក្នុងជីវិតរបស់អ្នកដែរឬទេ ? នៅពេលអ្នកសិក្សា ឯកសាររៀបចំសម្រាប់មេរៀនទី ៥សូមរកមើលពរជ័យដែលបានសន្យាចំពោះអ្នកទាំងឡាយណាដែលរក្សាសេចក្ដីសញ្ញារបស់ពួកគេដោយស្មោះត្រង់ជាមួយព្រះអម្ចាស់ ។