« មេរៀនទី ២៥ ឯកសារគ្រូបង្រៀន ៖ ការស្វែងរកការខិតខំដើម្បីធ្វើជាសិស្សដ៏ស្មោះត្រង់របស់ព្រះយេស៊ូវគ្រីស្ទ » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ២៥ ឯកសារគ្រូបង្រៀន » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ២៥ ឯកសារគ្រូបង្រៀន
ការខិតខំដើម្បីធ្វើជាសិស្សដ៏ស្មោះត្រង់របស់ព្រះយេស៊ូវគ្រីស្ទ
ការធ្វើជាសិស្សរបស់ព្រះយេស៊ូវគ្រីស្ទដែលស្មោះត្រង់ គឺមានតម្លៃសមនឹងការខិតខំ ពីព្រោះ « មាគ៌ារបស់ទ្រង់គឺជាផ្លូវដែលនាំទៅរកសុភមង្គលក្នុងជីវិតនេះ និងនៅក្នុងជីវិតដ៏នៅអស់កល្បជានិច្ចនៅក្នុងលោកដែលនឹងមកដល់ » ( « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » មាននៅលើគេហទំព័រ ChurchofJesusChrist.org ) ។ នៅក្នុងមេរៀននេះ សិស្សនឹងស្វែងយល់ពីអ្វីដែលព្រះអម្ចាស់តម្រូវពីពួកសិស្សរបស់ទ្រង់ ។ ពួកគេក៏នឹងពិចារណាផងដែរនូវអ្វីដែលពួកគេអាចធ្វើដើម្បីធ្វើជាសិស្សរបស់ព្រះយេស៊ូវគ្រីស្ទដែលកាន់តែប្តេជ្ញាចិត្ត និងស្មោះត្រង់ ។
យោបល់សម្រាប់ការបង្រៀន
ព្រះយេស៊ូវគ្រីស្ទអញ្ជើញយើងឲ្យធ្វើជាសិស្សរបស់ទ្រង់ ។
សូមពិចារណាពីការបង្ហាញរូបភាពនៃព្រះយេស៊ូវលាងជើងឲ្យពួកសាវករបស់ទ្រង់ ហើយសួរទៅសិស្សម្នាក់ ឬពីរនាក់ឲ្យចែកចាយពីអារម្មណ៍របស់ពួកគេ ប្រសិនបើព្រះអង្គសង្គ្រោះលាងជើងពួកគេនោះ ។
អ្នកអាចដាក់បង្ហាញសំណួរខាងក្រោមនេះ ហើយស្នើសុំសិស្សឲ្យសញ្ជឹងគិតពីសំណួរទាំងនេះមួយសន្ទុះ ៖
-
តើខ្ញុំអាចរៀនអ្វីខ្លះអំពីគុណលក្ខណៈនៃព្រះអង្គសង្រ្គោះចេញពីសកម្មភាពរបស់ទ្រង់ចំពោះពួកសិស្សទ្រង់ ? តើខ្ញុំអាចធ្វើតាមគុណសម្បត្តិដូចជាព្រះគ្រីស្ទទាំងនេះដោយរបៀបណា ?
សូមពន្យល់ថា ប្រភេទសំណួរទាំងនេះគឺជាសំណួរដែលយើងអាចសួរខ្លួនយើង កាលដែលយើងខិតខំដើម្បីធ្វើជាសិស្សដ៏ប្រសើររបស់ព្រះយេស៊ូវគ្រីស្ទ ។ សិស្សរបស់ព្រះគ្រីស្ទគឺជានរណាម្នាក់ដែលធ្វើតាមព្រះអង្គសង្រ្គោះ និងរស់នៅស្របតាមការបង្រៀនរបស់ទ្រង់ ( សូមមើល គោលលទ្ធិ និងសេចក្តីសញ្ញា ៤១:៥ ) ។ បន្ទាប់ពីព្រះអង្គសង្គ្រោះបានលាងជើងឲ្យពួកសាវករបស់ទ្រង់ ទ្រង់បានបង្រៀនពួកគេបន្ថែមទៀតអំពីភាពជាសិស្ស ។
សូមអញ្ជើញសិស្សឲ្យមើល យ៉ូហាន ១៣:១៤–១៧, ៣៤–៣៥; ១៤:១៥- ហើយបំពេញសេចក្តីថ្លែងការណ៍ដូចខាងក្រោម ៖ សិស្សរបស់ព្រះគ្រីស្ទ …
សូមអញ្ជើញសិស្សមួយចំនួនឲ្យចែកចាយសេចក្ដីថ្លែងការណ៍ដែលបានបំពេញរួចរបស់ពួកគេ ដែលអាចរួមបញ្ចូលឃ្លាដូចជា « បម្រើអ្នកដទៃ » « ស្រឡាញ់អ្នកដទៃ » និង « រក្សាបទបញ្ញត្តិទាំងឡាយរបស់ទ្រង់ » ។ កាលសិស្សឆ្លើយតប អ្នកអាចសួរសំណួរតាមដាន ដូចជា ៖
-
តើនរណាមកពីបទគម្ពីរ ឬជីវិតរបស់អ្នកផ្ទាល់ដែលធ្វើជាគំរូនៃភាពជាសិស្សប្រភេទនេះ ? តើគំរូរបស់គាត់ ឬនាងបានជះឥទ្ធិពលលើអ្នកដោយរបៀបណា ?
ការអភិវឌ្ឍការបង្រៀន និងការរៀនសូត្ររបស់យើង
សូមផ្តល់ឱកាសឲ្យសិស្សធ្វើស្វ័យវាយតម្លៃ ។ ស្វ័យវាយតម្លៃអាចជាឧបករណ៍ដ៏មានប្រយោជន៍សម្រាប់ការលូតលាស់ផ្ទាល់ខ្លួន ។ ទោះជាយ៉ាងណាក៏ដោយ ក្នុងករណីខ្លះ វាអាចនាំឲ្យសិស្សមានអារម្មណ៍ខុសឆ្គង ឬបាក់ទឹកចិត្ត ។ សូមរំឭកសិស្សកាលពួកគេបំពេញតាមស្វ័យវាយតម្លៃ ដូចខាងក្រោម ឲ្យមានចិត្តអំណត់ និងសប្បុរសចំពោះខ្លួនពួកគេ ។ ព្រះអម្ចាស់ បានមានព្រះបន្ទូលថា « យើងនឹងមានចិត្តអាណិតអាសូរដល់ភាពកម្សោយរបស់អ្នក › ( គោលលិទ្ធិ និងសេចក្តីសញ្ញា ៣៨:១៤ ) ។
អ្នកអាចបង្ហាញ ឬផ្ដល់ច្បាប់ចម្លងស្វ័យវាយតម្លៃដូចខាងក្រោមនេះទៅឲ្យសិស្ស ។
ស្វ័យវាយតម្លៃភាពជាសិស្ស
ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់—មេរៀនទី ២៥
សូមពិចារណាសេចក្តីថ្លែងការណ៍នីមួយៗ ហើយដាក់ពិន្ទុខ្លួនឯងដោយប្រើមាត្រដ្ឋានខាងក្រោម ៖ ១ = មិនយល់ស្របសោះឡើយ ២ = មិនសូវយល់ស្រប ៣ = អព្យាក្រឹត ៤ = យល់ស្របខ្លះៗ និង ៥ = យល់ស្របយ៉ាងខ្លាំង ។
-
ខ្ញុំព្យាយាមធ្វើជាសិស្សរបស់ព្រះយេស៊ូវគ្រីស្ទដោយស្មោះស្ម័គ្រ ។
-
ខ្ញុំព្យាយាមរក្សាព្រះបញ្ញត្តិរបស់ព្រះអង្គសង្រ្គោះរាល់ថ្ងៃ ។
-
ខ្ញុំព្យាយាមស្រឡាញ់ និងបម្រើមនុស្សនៅជុំវិញខ្ញុំ ដូចជាព្រះគ្រីស្ទនឹងធ្វើ ។
-
ខ្ញុំព្យាយាមលះបង់ចោលបំណងប្រាថ្នាខាងលោកិយដើម្បីធ្វើតាមព្រះអង្គសង្រ្គោះ ។
© 2023 by Intellectual Reserve, Inc. All rights reserved.
ស្វ័យវាយតម្លៃភាពជាសិស្ស
ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់—មេរៀនទី ២៥
បន្ទាប់ពីសិស្សមានពេលកត់ត្រាចម្លើយរបស់ពួកគេហើយ សូមអញ្ជើញពួកគេឲ្យចំណាយពេលប៉ុន្មាននាទីដើម្បីសញ្ជឹងគិតអំពីអ្វីដែលពួកគេរៀនពីស្វ័យវាយតម្លៃនេះ ។
សូមចែកចាយជាមួយសិស្សថា ព្រះអង្គសង្គ្រោះបានអញ្ជើញអ្នកគ្រប់គ្រងស្ដុកស្ដម្ភកំលោះម្នាក់ឲ្យធ្វើស្វ័យវាយតម្លៃខ្លួនរបស់គាត់ ។ សូមអញ្ជើញសិស្សម្នាក់ឲ្យសង្ខេបដំណើររឿងអ្នកកំលោះរូបនេះ ( សូមមើល ផ្នែកទី ២ នៃឯកសាររៀបចំនេះ ) ឬ អ្នកអាចមើល « Christ and the Rich Young Ruler » ( ២:២៦ ) ។
-
តើសារៈសំខាន់នៃសំណួរនេះ « តើនៅខ្វះអ្វីទៀត » គឺជាអ្វី ? ( ម៉ាថាយ ១៩:២០ ) ។ ហេតុអ្វីបានជាវាសំខាន់សម្រាប់សិស្សរបស់ព្រះយេស៊ូវគ្រីស្ទទាំងអស់ឲ្យសួរសំណួរនេះ ?
សូមអញ្ជើញសិស្សឲ្យអាន ម៉ាកុស ១០:២១ ដោយរកមើលពីរបៀបដែលម៉ាកុសបានពិពណ៌នាពីអារម្មណ៍របស់ព្រះអង្គសង្រ្គោះអំពីអ្នកគ្រប់គ្រងស្ដុកស្ដម្ភកំលោះនោះ ។
-
តើការទទួលអារម្មណ៍នៃសេចក្តីស្រឡាញ់របស់ព្រះអង្គសង្រ្គោះជួយអ្នកនៅពេលអ្នកស្វែងរកអ្វីមួយដែលអ្នកត្រូវការផ្លាស់ប្តូរដោយរបៀបណា ?
-
តើវាមានន័យយ៉ាងណា ដែលថា « ឲ្យផ្ទុកឈើឆ្កាង[ របស់អ្នក ] » និងតាមព្រះយេស៊ូវគ្រីស្ទចុះ ? ( អ្នកអាចមើល ការបកប្រែដោយយ៉ូសែប ស្ម៊ីធ ម៉ាថាយ ១៦:២៥–២៦ [ នៅក្នុងបទជម្រើសនានាចេញពីការបកប្រែព្រះគម្ពីរប៊ីបដោយយ៉ូសែប ស៊្មីធ ] និង សេចក្តីថ្លែងការណ៍ដោយអែលឌើរ អូលីសេស សូរ៉េស មកពីផ្នែកទី ២ នៃឯកសាររៀបចំនេះ ) ។
បន្ទាប់មក អ្នកអាចឲ្យសិស្សរំឭកឡើងវិញ សេចក្តីថ្លែងការណ៍ដោយ អែលឌើរ លែរី អរ ឡ័ររ៉ែន នៅក្នុងផ្នែកទី ២ នៃឯកសាររៀបចំនេះ ។ បន្ទាប់មកសូមដាក់បង្ហាញសំណួរខាងក្រោមនេះ ហើយអញ្ជើញសិស្សឲ្យកត់ត្រាគំនិតរបស់ពួកគេអំពីសំណួរនេះ ដែលពួកគេបានរកឃើញថាវាទាក់ទងបំផុតនោះ ។
-
តើអ្វីដែលរារាំងអ្នកមិនឲ្យរីកចម្រើនខាងវិញ្ញាណ ?
-
តើអ្នកអាចបង្ហាញព្រះអម្ចាស់ពីបំណងប្រាថ្នារបស់អ្នកដើម្បីផ្ទុកឈើឆ្កាង ហើយធ្វើតាមទ្រង់ដោយរបៀបណា ?
-
តើមានអ្វីផ្សេងទៀតដែលអ្នកមានអារម្មណ៍ថា អ្នកត្រូវពលិកម្មនៅពេលនេះដើម្បីធ្វើជាសិស្សរបស់ព្រះយេស៊ូវគ្រីស្ទឲ្យកាន់តែប្រសើរដែរឬទេ ?
ព្រះអម្ចាស់ពង្រឹងពួកសិស្សរបស់ទ្រង់ ។
អ្នកអាចបង្ហាញសេចក្តីថ្លែងការណ៍ដូចតទៅនេះដោយប្រធាន ជែមស៍ អ៊ី ហ្វោស្ត ហើយអញ្ជើញសិស្សឲ្យរកមើលពរជ័យទាំងឡាយដែលបានសន្យាដល់អស់អ្នកដែលស្ម័គ្រចិត្តខិតខំធ្វើជាសិស្សនេះ ៖
មនុស្សជាច្រើនគិតថាតម្លៃនៃភាពជាសិស្សគឺមានតម្លៃថ្លៃយ៉ាងខ្លាំង និងជាបន្ទុកដ៏ធ្ងន់ ។ សម្រាប់មនុស្សមួយចំនួន វាទាក់ទងនឹងការលះបង់ជាច្រើន ។ ប៉ុន្តែឈើឆ្កាងមិនធ្ងន់ដូចជាសភាពខាងក្រៅនោះទេ ។ តាមរយៈការគោរពប្រតិបត្តិ យើងទទួលបានកម្លាំងកាន់តែខ្លាំងដើម្បីលើកផ្ទុកឈើឆ្កាងនេះ ។
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាពនោះអ្នករាល់គ្នានឹងបានសម្រាកដល់ព្រលឹង ។
ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ( ម៉ាថាយ ១១: ២៨–៣០ ) ។ ( ជេមស៍ អ៊ី ហ្វោស្ដ៍ « Discipleship » Liahona ខែ វិច្ឆិកា ឆ្នាំ ២០០៦ ទំព័រ ២២ )
អ្នកអាចស្នើសុំឲ្យសិស្សធ្វើការជាមួយដៃគូ ឬជាក្រុមតូចៗ ហើយឲ្យពួកគេពិនិត្យមើលឡើងវិញ រ៉ូម ៨:១៦–១៨, ២៨, ៣៥, ៣៨–៣៩ ។ សូមអញ្ជើញពួកគេឲ្យស្វែងរកសេចក្តីពិតដែលអាចជួយពួកគេ កាលដែលពួកគេប្រឈមនឹងឧបសគ្គទាំងឡាយនៃភាពជាសិស្សនេះ ។ ( សិស្សអាចនឹងរកឃើញសេចក្ដីពិតដូចខាងក្រោម ៖ ប្រសិនបើយើងជាពួកសិស្សដែលមានចិត្តស្មោះត្រង់ នោះយើងអាចក្លាយជាអ្នកទទួលមរតក និងបានរុងរឿង ជាមួយព្រះយេស៊ូវគ្រីស្ទ ។ ប្រសិនបើយើងស្រឡាញ់ព្រះ នោះអ្វីៗទាំងអស់នឹងដំណើរការទៅជាមួយគ្នា សម្រាប់ការល្អរបស់យើង ) ។
កាលសិស្សចែកចាយសេចក្តីពិតដែលពួកគេបានរកឃើញ សូមពិចារណាសួរសំណួរដូចតទៅនេះ ៖
-
តើការជឿថាយើងអាចក្លាយជាអ្នកទទួលមរតករួមជាមួយនឹងព្រះយេស៊ូវគ្រីស្ទជួយយើងឲ្យបន្តធ្វើជាសិស្សដែលស្មោះត្រង់ដោយរបៀបណា ? ( អ្នកអាចរំឭក នីហ្វៃទី ២ ៩:១៨ ។ វាអាចជាការសំខាន់ក្នុងការចង្អុលបង្ហាញថា អ្នកទទួលមរតករួមគ្នាទទួលបានមរតកស្មើៗគ្នាជាមួយអ្នកផ្សេងទៀតដែរ [ សូមមើល គោលលទ្ធិ និងសេចក្តីសញ្ញា ៧៦:៥០, ៥៥–៥៩; ៨៤:៣៨ ] ) ។
-
តើសេចក្ដីស្រឡាញ់របស់អ្នកចំពោះព្រះ និងសេចក្ដីស្រឡាញ់របស់ទ្រង់ចំពោះអ្នកបានជួយដល់អ្នកយ៉ាងដូចម្ដេច នៅពេលផ្លូវនៃភាពជាសិស្សមានការលំបាក ?
ដើម្បីបញ្ចប់ថ្នាក់ អ្នកអាចចែកចាយទីបន្ទាល់របស់អ្នកអំពីគោលការណ៍នៃភាពជាសិស្សដែលអ្នកបានពិភាក្សាជាថ្នាក់ ។ ឬអ្នកអាចមើល « Living the Gospel Joyful » ( ១:៤០ ) ជាមួយប្រធាន ឌៀថើរ អេហ្វ អុជដូហ្វ ដែលនៅក្នុងគណៈប្រធានទីមួយនាពេលនោះ ។
សម្រាប់ពេលក្រោយ
ដើម្បីលើកទឹកចិត្តសិស្សឲ្យអានឯកសាររៀបចំនេះសម្រាប់ថ្នាក់បន្ទាប់ សូមពិចារណាផ្ញើសារខ្លីៗទៅពួកគេអំពីគុណលក្ខណៈដូចជាព្រះគ្រីស្ទ ដូចខាងក្រោម ៖ ដើម្បីបង្កើនការសិក្សារបស់អ្នកពី ឯកសាររៀបចំសម្រាប់មេរៀនទី ២៦ អ្នកអាចមើល « Christlike Attributes » ( ២:៥៣ ) ។
