« មេរៀនទី ១៤ ឯកសារគ្រូបង្រៀន ៖ ការស្គាល់អព្ភូតហេតុរបស់ព្រះអង្គសង្រ្គោះ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ១៤ ឯកសារសម្រាប់គ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ១៤ ឯកសារគ្រូបង្រៀន
ការស្គាល់អព្ភូតហេតុរបស់ព្រះអង្គសង្រ្គោះ
ព្រះយេស៊ូវគ្រីស្ទបានប្រកាសថា « យើងជាព្រះនៃអព្ភូតហេតុទាំងឡាយ » ( នីហ្វៃទី ២ ២៧:២៣ ) ។ នៅក្នុងមេរៀននេះ សិស្សនឹងមានឱកាសចែកចាយពីអ្វីដែលពួកគេរៀនអំពីព្រះយេស៊ូវគ្រីស្ទតាមរយៈអព្ភូតហេតុដែលទ្រង់បានធ្វើនៅអំឡុងព្រះជន្មរមែងស្លាប់របស់ទ្រង់ ។ សិស្សក៏នឹងពិចារណាពីអ្វីដែលពួកគេអាចធ្វើបាន ដើម្បីទទួលអព្ភូតហេតុរបស់ព្រះអម្ចាស់នៅក្នុងជីវិតរបស់ពួកគេ និងស្វែងយល់ពីអព្ភូតហេតុដែលពួកគេបានទទួលរួចទៅហើយផងដែរ ។
យោបល់សម្រាប់ការបង្រៀន
ព្រះយេស៊ូវគ្រីស្ទព្យាបាលមនុស្សទាំងខាងរូបកាយ និងខាងវិញ្ញាណ ។
សូមពិចារណាដាក់បង្ហាញពីមុនថ្នាក់នូវរូបភាពដូចខាងក្រោមពីអព្ភូតហេតុដែលទាក់ទងនឹងសកម្មភាព « កត់ត្រាគំនិតរបស់អ្នក » នៅក្នុងផ្នែកទី១ នៃឯកសាររៀបចំនេះ ។ នៅពេលថ្នាក់ចាប់ផ្តើម សូមណែនាំសិស្សឲ្យយកចិត្តទុកដាក់លើរូបភាពនេះ ហើយអញ្ជើញសិស្សម្នាក់ ឬពីរនាក់ឲ្យចែកចាយដោយសង្ខេបនូវចំណាប់អារម្មណ៍ទូទៅរបស់ពួកគេអំពីអព្ភូតហេតុនៃព្រះយេស៊ូវ ។
ប្រែទឹកទៅជាស្រាទំពាំងបាយជូរ
ធ្វើឲ្យខ្យល់ព្យុះស្ងប់
ប្រោសមនុស្សស្លាប់ឲ្យរស់ឡើងវិញ
ប្រទានអាហារដល់មនុស្ស ៥,០០០ នាក់
ព្យាបាលភ្នែកដែលខ្វាក់មើលឃើញ
អ្នកអាចអញ្ជើញសិស្សឲ្យចូលទៅកាន់សកម្មភាព « កត់ត្រាគំនិតរបស់អ្នក » នៅក្នុងផ្នែក ទី ១ នៃឯកសាររៀបចំនេះ ហើយរំឭកឡើងវិញនូវអព្ភូតហេតុដែលពួកគេបានសិក្សានៅក្នុងការរៀបចំសម្រាប់ថ្នាក់ ។ ប្រសិនបើពួកគេមិនបានរៀបចំទេ សូមអញ្ជើញពួកគេឲ្យជ្រើសរើសអព្ភូតហេតុមួយដើម្បីសិក្សា ។ សូមទុកពេលឲ្យសិស្សពីរបីនាទីដើម្បីពិនិត្យមើលឬសិក្សាពីអព្ភូតហេតុដែលពួកគេបានជ្រើសរើស និងដើម្បីគិតពិចារណាពីការឆ្លើយតបរបស់ពួកគេចំពោះសំណួរទាំងពីរ ចេញពីសកម្មភាពនេះ ។
បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញពួកគេបង្កើតក្រុមតូចៗជាមួយសិស្សផ្សេងទៀត ដែលបានសិក្សាពីអព្ភូតហេតុផ្សេងៗ ។ សមាជិកក្រុមនីមួយៗគួរតែទទួលបានឱកាសឲ្យសង្ខេបខ្លីៗអំពីអព្ភូតហេតុដែលពួកគាត់បានសិក្សា និងពិភាក្សាអំពីការឆ្លើយតបរបស់ពួកគាត់ចំពោះសំណួរដែលភ្ជាប់មកជាមួយយ៉ាងហោចណាស់មួយក្នុងចំណោមសំណួរទាំងពីរ ។
អ្នកអាចចង់អញ្ជើញសិស្សម្នាក់ឲ្យសង្ខេបដំណើររឿងរបស់ព្រះអម្ចាស់ព្យាបាលបុរសដែលខ្វិន ដែលបានកត់ត្រាទុកនៅក្នុង ម៉ាកុស ២:៥–១២ ដែលបានពិភាក្សានៅក្នុង ផ្នែកទី ១ នៃឯកសាររៀបចំនេះ ។ ឬអ្នកអាចមើលដំណើររឿងនេះនៅក្នុងវីដេអូ ៖ « Jesus Forgives Sins and Heals a Man Stricken with Palsy » ( ២:៥៧ ) ។
បន្ទាប់មក អ្នកអាចជួយបង្កើនការយល់ដឹងរបស់សិស្សដោយសួរសំណួរមួយ ឬទាំងពីរដូចខាងក្រោម ៖
-
តើយើងរៀនអ្វីខ្លះអំពីព្រះចេស្តាព្យាបាលរបស់ព្រះអង្គសង្រ្គោះចេញពីអព្ភូតហេតុនេះ ? ( សូមជួយសិស្សស្វែងរកសេចក្តីពិតដូចជា ព្រះយេស៊ូវគ្រីស្ទមានព្រះចេស្តាដើម្បីព្យាបាលយើងទាំងខាងវិញ្ញាណ និងខាងរូបកាយ ) ។
-
តើអ្នក ឬអ្នកណាម្នាក់ដែលអ្នកស្គាល់បានដកពិសោធន៍ការព្យាបាលខាងវិញ្ញាណ ឬខាងរូបកាយតាមរបៀបណា ? ( សូមពិចារណាអញ្ជើញសិស្សម្នាក់ ឬពីរនាក់មុនពេលចូលរៀនឲ្យរៀបចំដើម្បីចែកចាយចម្លើយរបស់ពួកគេចំពោះសំណួរនេះ ។ សូមរំឭកពួកគេថា ពួកគេមិនគួរមានសម្ពាធក្នុងការចែកចាយអ្វីដែលមានលក្ខណៈផ្ទាល់ខ្លួនពេកនោះទេ ) ។
ការអភិវឌ្ឍការបង្រៀន និងការរៀនសូត្ររបស់យើង
សូមអញ្ជើញសិស្សមួយចំនួនរៀបចំខ្លួនមុនមកថ្នាក់ដើម្បីចែកចាយ ។ ការរៀនសូត្រក្នុងថ្នាក់អាចត្រូវបានពង្រឹងនៅពេលដែលយើងអញ្ជើញសិស្សពីរបីនាក់ឲ្យមកដោយបានរៀបចំចម្លើយរបស់ពួកគេចំពោះសំណួរជាក់លាក់ពីមេរៀននេះ ដើម្បីចែកចាយបទពិសោធន៍ដែលទាក់ទង ឬថ្លែងទីបន្ទាល់អំពីគោលការណ៍ជាក់លាក់នានា ។ ការរៀបចំប្រភេទនេះអាចជួយជំរុញការពិភាក្សា ការរៀនសូត្រដែលស៊ីជម្រៅ និងផ្តល់ឱកាសសំខាន់ៗសម្រាប់អ្នកដែលមានអារម្មណ៍មានទំនុកចិត្តក្នុងការចែកចាយនៅពេលដែលពួកគេមានពេលរៀបចំគំនិតរបស់ពួកគេ ។
សូមអញ្ជើញសិស្សឲ្យអានឮៗនូវ សេចក្តីថ្លែងការណ៍របស់ប្រធាន ដាល្លិន អេក អូក នៅក្នុងផ្នែកទី ១ នៃឯកសាររៀបចំនេះ ហើយពិចារណាសួរសំណួរមួយ ឬច្រើននៃសំណួរដូចខាងក្រោមដើម្បីជួយសិស្សរបស់អ្នករៀនសូត្រកាន់តែស៊ីជម្រៅ ។
-
ហេតុអ្វីបានជាអ្នកគិតថា ការផ្លាស់ប្តូរដ៏ធំនៃដួងចិត្ត អាចចាត់ទុកថាជាអព្ភូតហេតុដ៏ធំជាងអព្ភូតហេតុខាងរូបកាយ ? ហេតុអ្វីបានជាវាចាំបាច់ដែលយើងមើលទៅព្រះអង្គសង្គ្រោះសម្រាប់អព្ភូតហេតុនេះ ?
-
តើអ្នកនឹងពន្យល់ពីអព្ភូតហេតុនៃការផ្លាស់ប្តូរដួងចិត្តចំពោះនរណាម្នាក់ដែលយល់មិនច្បាស់ពីអត្ថន័យនេះដោយរបៀបណា ?
-
តើមនុស្សអាចធ្វើអ្វីខ្លះដើម្បីបង្ហាញព្រះអម្ចាស់ថា ពួកគេចង់បានអព្ភូតហេតុនេះ ? តើសកម្មភាពជាក់លាក់អ្វីខ្លះដែលអ្នកអាចធ្វើដើម្បីបង្ហាញព្រះអម្ចាស់ថាអ្នកចង់មានដួងចិត្តដែលបានផ្លាស់ប្តូរបន្ថែមទៀត ? ( អ្នកអាចនឹងត្រូវរំឭកសិស្សថា ដួងចិត្តដែលបានផ្លាស់ប្តូរគឺជាដំណើរការមួយ មិនមែនជាព្រឹត្តិការណ៍នោះទេ ។ វាអាចមានសារៈប្រយោជន៍ដើម្បីផ្តល់ពេលវេលាឲ្យសិស្សដើម្បីកត់ត្រាគំនិត និងចំណាប់អារម្មណ៍របស់ពួកគេ ) ។
អព្ភូតហេតុកើតឡើងស្របតាមជំនឿរបស់យើង និងព្រះហឫទ័យរបស់ព្រះ ។
សូមរំឭកសិស្សថា អព្ភូតហេតុមួយដែលព្រះអង្គសង្គ្រោះបានធ្វើក្នុងអំឡុងពេលនៃការងារបម្រើក្នុងព្រះជន្មរមែងស្លាប់របស់ទ្រង់គឺការព្យាបាលមនុស្សឃ្លង់ ។ សូមអញ្ជើញសិស្សម្នាក់ឲ្យចែកចាយដោយសង្ខេបអំពីអ្វីដែលជីវិតរបស់មនុស្សឃ្លង់អាចនឹងជូបប្រទះនៅក្នុងសម័យព្រះគម្ពីរសញ្ញាថ្មី និងរបៀបដែលការព្យាបាលអាចផ្លាស់ប្តូរជីវិតរបស់ពួកគាត់ ។
សូមអានជាមួយគ្នាក្នុង ម៉ាកុស ១:៤០–៤២ ហើយអញ្ជើញសិស្សឲ្យរកមើលនូវរបៀបដែលមនុស្សឃ្លង់ឈោងទៅរកព្រះអម្ចាស់សម្រាប់អព្ភូតហេតុ ។
-
តើយើងអាចរៀនអ្វីខ្លះពីដំណើររឿងនេះ អំពីរបៀបចូលទៅជិតព្រះអម្ចាស់ នៅពេលស្វែងរកអព្ភូតហេតុមួយ ? ( អ្នកអាចចង់រំឭក សេចក្ដីថ្លែងការណ៍ដោយអែលឌើរ ហ៊រហេ អេហ្វ ស្សែបាលូស នៅក្នុងផ្នែកទី ២ នៅក្នុងឯកសាររៀបចំនេះ ។ សូមជួយសិស្សឲ្យស្វែងយល់ពីគោលការណ៍មួយដូចគោលការណ៍មួយនេះ ៖ កាលដែលយើងអនុវត្តសេចក្តីជំនឿលើព្រះយេស៊ូវគ្រីស្ទ នោះទ្រង់អាចសម្តែងអព្ភូតហេតុនៅក្នុងជីវិតរបស់យើង ស្របតាមព្រះហឫទ័យរបស់ទ្រង់ ) ។
-
តើយើងអាចអភិវឌ្ឍន៍សេចក្តីជំនឿដើម្បីទុកចិត្តលើព្រះហឫទ័យរបស់ព្រះអម្ចាស់ នៅពេលស្វែងរកអព្ភូតហេតុដោយរបៀបណា ? ( សូមពិចារណាពិនិត្យមើលឡើងវិញនូវ សេចក្តីថ្លែងការណ៍ដោយថ្នាក់ដឹកនាំ ក្នុងសាសនាចក្រ នៅក្នុងផ្នែកទី ២ នៃ ឯកសាររៀបចំនេះ ) ។
វាអាចមានសារៈប្រយោជន៍ក្នុងការអញ្ជើញសិស្សមួយចំនួនមុនថ្នាក់ចាប់ផ្ដើមឲ្យមើលដំណើររឿងដែលបានចែកចាយដោយ ប្រធាន អូក ឬអែលឌើរ ដេវីឌ អេ បែដណា ដែលមាននៅក្រោមសំណួរនេះ « តើខ្ញុំអាចអភិវឌ្ឍន៍សេចក្តីជំនឿដើម្បីទុកចិត្តលើព្រះហឫទ័យរបស់ព្រះអម្ចាស់ នៅពេលស្វែងរកអព្ភូតហេតុមួយដោយរបៀបណា ? » នៅក្នុងផ្នែក « ចង់បានបន្ថែមទៀតទេ ? » នៃឯកសាររៀបចំនេះ ។ ពេលកំពុងរៀន អ្នកអាចអញ្ជើញសិស្សទាំងនេះឲ្យចែកចាយដំណើររឿងមួយក្នុងចំណោមដំណើររឿងទាំងឡាយ និងអ្វីដែលពួកគេបានរៀនអំពីដំណើររឿងនេះអំពីអព្ភូតហេតុ និងការទុកចិត្តលើព្រះហឫទ័យរបស់ព្រះអម្ចាស់ ។
សូមពិចារណាអាន សេចក្តីថ្លែងការណ៍ដោយ អែលឌើរ រ៉ូណល អេ រ៉ាសបាន នៅក្នុងផ្នែកទី ៣ នៃឯកសាររៀបចំនេះ ។ សូមអញ្ជើញសិស្សឲ្យចែកចាយឧទាហរណ៍នៃអព្ភូតហេតុតូច និងសាមញ្ញដែលពួកគេបានធ្វើជាសាក្សី ។ ( សិស្សអាចលើកឡើងអំពីអព្ភូតហេតុដូចជា ការទទួលវិវរណៈ ការយកឈ្នះលើទម្លាប់ដ៏គ្រោះថ្នាក់ ការទទួលបានអានុភាពដើម្បីអភ័យទោសដល់នរណាម្នាក់ ការត្រូវបានពង្រឹងនៅពេលប្រឈមមុខនឹងទុក្ខលំបាក ការដកបទពិសោធន៍នៃការបង្កើនសមត្ថភាពដើម្បីបំពេញកិច្ចការដ៏លំបាកមួយជាដើម ) ។
-
តើការសាយភាយនៃ «អព្ភូតហេតុតូចៗ » ទាំងនេះបង្ហាញអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
ដើម្បីជួយសិស្សឲ្យអនុវត្តតាមអ្វីដែលពួកគេបានរៀនពីមេរៀននេះ សូមពិចារណាផ្តល់ពេលវេលាដល់ពួកគេដើម្បីសញ្ជឹងគិត និងកត់ត្រាគំនិត និងអារម្មណ៍របស់ពួកគេអំពីសំណួរដូចខាងក្រោម ៖
-
តើខ្ញុំអាចធ្វើអ្វីខ្លះ ដើម្បីដឹងកាន់តែច្បាស់ និងបើកដួងចិត្តទទួលអព្ភូតហេតុរបស់ព្រះអម្ចាស់មកក្នុងជីវិតរបស់ខ្ញុំ ?
សូមពិចារណាពីការចែកចាយទីបន្ទាល់ថា ព្រះយេស៊ូវគ្រីស្ទជាព្រះនៃអព្ភូតហេតុ ឬអ្នកអាចអញ្ជើញសិស្សម្នាក់ ឬច្រើននាក់ឲ្យធ្វើដូច្នេះ ។
សម្រាប់ពេលក្រោយ
ដើម្បីលើកទឹកចិត្តសិស្សឲ្យរៀបចំសម្រាប់ថ្នាក់លើកក្រោយ សូមពិចារណាផ្ញើរូបភាព និងសារដូចខាងក្រោមនេះ ៖ តើបទពិសោធន៍ថ្មីៗបំផុតរបស់អ្នកពីពិធីសាក្រាម៉ង់យ៉ាងណាដែរ ? កាលដែលអ្នកសិក្សា ឯកសាររៀបចំសម្រាប់មេរៀនទី ១៥ សូមគិតពិចារណាអំពីមូលហេតុដែលព្រះយេស៊ូវគ្រីស្ទមានព្រះទ័យចង់ឲ្យអ្នកចូលរួមប្រចាំសប្តាហ៍នៅក្នុងពិធីបរិសុទ្ធដ៏ពិសិដ្ឋនេះ ។