« មេរៀនទី ២៨ ឯកសាររៀបចំសម្រាប់ថ្នាក់ ៖ ការឈរជាសាក្សីនៃព្រះយេស៊ូវគ្រីស្ទ » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ២៨ ឯកសាររៀបចំសម្រាប់ថ្នាក់ » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ២៨ ឯកសាររៀបចំសម្រាប់ថ្នាក់
ការឈរជាសាក្សីនៃព្រះយេស៊ូវគ្រីស្ទ
តើទីបន្ទាល់របស់អ្នកអំពីព្រះយេស៊ូវគ្រីស្ទត្រូវបានទទួលឥទ្ធិពលដោយការចូលរួមក្នុងវគ្គសិក្សានេះដោយរបៀបណា ? តើអ្នកបានរៀនអ្វីខ្លះពីព្រះវិញ្ញាណបរិសុទ្ធ កាលដែលអ្នកបានធ្វើសកម្មភាពដោយសេចក្តីជំនឿ ដោយការសិក្សាឯកសាររៀបចំនេះ ដោយការចូលរួមក្នុងការពិភាក្សាក្នុងថ្នាក់ និងដោយការឆ្លើយតបនឹងការបំផុសគំនិតខាងវិញ្ញាណ ? កាលអ្នករៀបចំខ្លួនបង្រៀនថ្នាក់ចុងក្រោយរបស់អ្នក សូមសញ្ជឹងគិតនូវអត្ថន័យនៃការឈរជាសាក្សីរបស់ព្រះយេស៊ូវគ្រីស្ទ ( សូមមើល ម៉ូសាយ ១៨:៩ ) ។
ផ្នែកទី ១
តើខ្ញុំអាចពង្រឹងទីបន្ទាល់របស់ខ្ញុំអំពីព្រះអង្គសង្គ្រោះដោយរបៀបណា ?
កាលអ្នកគិតពីទីបន្ទាល់របស់អ្នកទៅលើព្រះយេស៊ូវគ្រីស្ទ សូមចងចាំថា យើងម្នាក់ៗទទួលបានទីបន្ទាល់តាមរបៀបផ្ទាល់ខ្លួនរៀងៗខ្លួន ។ ប្រធាន ឌៀថើរ អេស្វ អុជដូហ្វ ពេលនោះជាទីប្រឹក្សាទីពីរក្នុងគណៈប្រធានទីមួយបានមានប្រសាសន៍ ៖
មានសមាជិកខ្លះមានទីបន្ទាល់ដែលរឹងមាំ ហើយជះរស្មីត្រចះត្រចង់យ៉ាងខ្លាំង ។ សមាជិកខ្លះទៀតនៅតែព្យាយាមស្គាល់ដោយខ្លួនឯង ។ សាសនាចក្រគឺជាគេហដ្ឋានសម្រាប់មនុស្សទាំងអស់មិនថាទីបន្ទាល់គេរឹងមាំ ឬអត់នោះទេ ។ ( « Receiving a Testimony of Light and Truth » Liahona ខែ វិច្ឆិកា ឆ្នាំ ២០១៤ ទំព័រ ២២ )
ប្រសិនបើអ្នកមានអារម្មណ៍មិនច្បាស់លាស់ពីទីបន្ទាល់របស់អ្នកអំពីព្រះអង្គសង្គ្រោះ ឬមានអារម្មណ៍ថាមានមិនសូវខ្លាំងនោះទេ សូមចាំថា « ទីបន្ទាល់រីកចម្រើនបន្តិចម្តងៗតាមរយៈបទពិសោធន៍ ។ គ្មាននរណាម្នាក់ទទួលបានទីបន្ទាល់ទាំងស្រុងនៅពេលតែមួយនោះទេ » ( Gospel Topics « Testimony » នៅលើគេហទំព័រ topics.ChurchofJesusChrist.org ) ។
សូមចងចាំពីបទពិសោធន៍របស់អាលម៉ាជាកូន ។ កាលពីនៅក្មេង លោកបានព្យាយាមកម្ទេចសាសនាចក្រ ។ បន្ទាប់ពីទេវតាមួយអង្គបានមកជួបលោក លោកបានប្រែចិត្ត ហើយបានជ្រើសរើសធ្វើតាមព្រះយេស៊ូវគ្រីស្ទ ( សូមមើល ម៉ូសាយ ២៧:៨–២៤ ) ។ ខណៈដែលរឿងនេះពិតជាមានឥទ្ធិពលលើអាលម៉ា ដែលវាមិនមែនជាប្រភពគ្រឹះនៃទីបន្ទាល់របស់លោកនោះទេ ។ នៅជីវិតរបស់លោកក្រោយមក ខណៈដែលកំពុងបង្រៀនប្រជាជននៅដែនដីសារ៉ាហិមឡា អាលម៉ាបានចែកចាយពីរបៀបដើម្បីទទួលបានទីបន្ទាល់អំពីព្រះយេស៊ូវគ្រីស្ទ ។
សិក្សានៅក្នុងការរៀបចំសម្រាប់ថ្នាក់
សូមអាន អាលម៉ា ៥:៤៦–៤៨ ហើយរកមើលប្រភពនៃទីបន្ទាល់របស់អាលម៉ា ។
នៅពេលអ្នកគិតពិចារណាពីទីបន្ទាល់របស់អ្នក សូមស្វែងរកអំណរនៅក្នុងអ្វីដែលអ្នកដឹង ឬជឿអំពីព្រះអង្គសង្រ្គោះ ។ បន្ទាប់មក សូមពិចារណាដោយការអធិស្ឋាននូវអ្វីដែលអ្នកអាចធ្វើ ដើម្បីស្ថាបនានៅលើគ្រឹះនោះ រហូតដល់គ្រឹះនោះរឹងមាំពិតប្រាកដ ។ អែលឌើរ អុជដូហ្វ បានបង្រៀន ៖
ប្រភពនៃចំណេះដឹងពិតប្រាកដនេះ និងការជឿដ៏រឹងមាំគឺជាវិវរណៈមកពីព្រះ « ការធ្វើបន្ទាល់ពីព្រះយេស៊ូវ នោះហើយជាវិញ្ញាណនៃសេចក្ដីទំនាយ » ( វិវរណៈ ១៩:១០ ) ។
យើងបានទទួលទីបន្ទាល់នេះ នៅពេលព្រះវិញ្ញាណបរិសុទ្ធមានព្រះបន្ទូលទៅកាន់វិញ្ញាណដែលនៅក្នុងខ្លួនយើង ។ យើងនឹងទទួលបានភាពស្ងប់ស្ងាត់ និងភាពប្រាកដប្រជាដែលនឹងក្លាយជាប្រភពនៃទីបន្ទាល់ និងការផ្ដន្ទាទោសរបស់យើងដោយមិនគិតពីវប្បធម៌ ពូជសាសន៍ ភាសា ឬប្រវត្តិសេដ្ឋកិច្ចសង្គមរបស់យើងឡើយ ។ ការបំផុសគំនិតនៃព្រះវិញ្ញាណទាំងនេះ ល្អជាជាងតក្កវិជ្ជារបស់មនុស្សតែឯង នឹងជាគ្រឹះដ៏ពិតដែលទីបន្ទាល់របស់យើងនឹងត្រូវបានស្ថាបនានៅលើ ។
ចំណុចស្នូលនៃទីបន្ទាល់នេះនឹងជាសេចក្តីជំនឿ និងចំណេះដឹងអំពីព្រះយេស៊ូវគ្រីស្ទ និងបេសកកម្មដ៏ទេវភាពរបស់ទ្រង់ ដែលនៅក្នុងព្រះគម្ពីរនិយាយអំពីទ្រង់ផ្ទាល់ជានិច្ច « ខ្ញុំជាផ្លូវ ជាសេចក្ដីពិត ហើយជាជីវិត » ( យ៉ូហាន ១៤:៦ ) ។ ( « The Power of a Personal Testimony » Liahona ខែ វិច្ឆិកា ឆ្នាំ ២០០៦ ទំព័រ ៣៨ )
ពិភាក្សានៅក្នុងការរៀបចំសម្រាប់ថ្នាក់
សូមពិភាក្សាជាមួយនរណាម្នាក់ដែលជឿលើព្រះយេស៊ូវគ្រីស្ទអំពីរបៀបដែលម្នាក់ៗទទួលបានទីបន្ទាល់របស់អ្នកអំពីព្រះអង្គសង្គ្រោះ ។ ប្រសិនបើអ្នកមានអារម្មណ៍មិនប្រាកដក្នុងចិត្តអ្នកពីអ្វីដែលអ្នកជឿ សូមផ្តោតលើអ្វីដែលអ្នកចង់ដឹងអំពីព្រះអង្គសង្គ្រោះ ហើយពិភាក្សាអំពីរបៀបដែលបំណងប្រាថ្នាដ៏សាមញ្ញនេះអាចនាំទៅរកការបង្កើនសេចក្តីជំនឿ និងទីបន្ទាល់ ( សូមមើល អាលម៉ា ៣២:២៧–២៨ ) ។
ផ្នែកទី ២
តើទីបន្ទាល់របស់ខ្ញុំអំពីព្រះយេស៊ូវគ្រីស្ទផ្តល់ពរដល់អ្នកដទៃដោយរបៀបណា ?
សូមគិតពីទីបន្ទាល់របស់អ្នកអំពីព្រះយេស៊ូវគ្រីស្ទ ។ តើមិត្តភក្តិ គ្រួសាររបស់អ្នក និងអ្នកដទៃទៀតដែលអ្នកទំនាក់ទំនងជាមួយដឹងពីអារម្មណ៍របស់អ្នកចំពោះទ្រង់ដែរឬទេ ? តើអ្នកត្រៀមខ្លួនដើម្បីឆ្លើយសំណួរអំពីព្រះអង្គសង្គ្រោះដោយសេចក្តីជំនឿ និងទីបន្ទាល់ដែរឬទេ ? ( សូមមើល ពេត្រុស ទី១ ៣:១៥ ) ។ តើអ្នកបានអញ្ជើញអ្នកដទៃឲ្យមករៀនអំពីព្រះយេស៊ូវគ្រីស្ទសម្រាប់ខ្លួនពួកគេទេ ? ( សូមមើល យ៉ូហាន ១:៣៩ ) ។
នៅពេលអ្នកគិតអំពីឥទ្ធិពលដែលទីបន្ទាល់របស់អ្នកអំពីព្រះយេស៊ូវគ្រីស្ទ អាចមានចំពោះអ្នកដទៃ សូមពិចារណាដំបូន្មានដូចតទៅនេះមកពី អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ៖
ជាមួយអស់អ្នកដែលនៅជុំវិញយើង សូមឲ្យយើងកាន់តែបើកចំហកាន់តែមានឆន្ទៈក្នុងការនិយាយអំពីព្រះគ្រីស្ទ ។ ប្រធាន [ រ័សុល អិម ] ណិលសុន បានមានប្រសាសន៍ថា « សិស្សពិតរបស់ព្រះយេស៊ូវគ្រីស្ទ ស្ម័គ្រចិត្តក្រោកឈរឡើង បញ្ចេញមតិ ហើយខុសពីមនុស្សខាងលោកិយ » ។ …
…ចូរយើងធ្វើជាសាក្សីដោយចិត្តស្មោះត្រង់អំពីជំនឿរបស់យើងទៅលើព្រះគ្រីស្ទ ។ ប្រសិនបើនរណាម្នាក់ចែកចាយពីបញ្ហានៅក្នុងជីវិតគាត់ ឬនាង នោះយើងអាចនិយាយថា « ចន ឬ ម៉ារី អ្នកដឹងថាខ្ញុំជឿលើព្រះយេស៊ូវគ្រីស្ទ ។ ខ្ញុំបានគិតអំពីអ្វីដែលទ្រង់បានមានបន្ទូលដែលអាចជួយអ្នកបាន » ។
សូមបើកចំហលើបណ្តាញសង្គមក្នុងការនិយាយអំពីការទុកចិត្តរបស់បងប្អូនលើព្រះគ្រីស្ទ ។ …
ជួនកាលបងប្អូនគ្រិស្ដសាសនិកខ្លះ មិនច្បាស់អំពីជំនឿនិងបំណងរបស់យើង ។ ចូរយើងរីករាយចែកចាយជាមួយពួកគេដោយស្មោះត្រង់អំពីជំនឿរបស់យើងទៅលើព្រះយេស៊ូវគ្រីស្ទ និងបទគម្ពីរសញ្ញាថ្មីដែលយើងទាំងអស់គ្នាស្រឡាញ់ ។ …
កាលដែលលោកិយមិនសូវនិយាយអំពីព្រះយេស៊ូវគ្រីស្ទ ចូរយើងនិយាយអំពីទ្រង់ឲ្យបានកាន់តែច្រើនឡើង ។ នៅពេលបុគ្គលិកលក្ខណៈពិតរបស់យើងក្នុងនាមជាសិស្សរបស់ទ្រង់ត្រូវបានបង្ហាញ នោះមនុស្សជាច្រើននៅជុំវិញយើងនឹងត្រៀមខ្លួនស្តាប់ ។ នៅពេលយើងចែកចាយពន្លឺដែលយើងបានទទួលពីទ្រង់ នោះពន្លឺរបស់ទ្រង់និងព្រះចេស្តាសង្រ្គោះដ៏លើសលប់របស់ទ្រង់នឹងរះលើបងប្អូនដែលចង់បើកដួងចិត្តរបស់ពួកគេ ។ ( « We Talk of Christ » Liahona ខែ វិច្ឆិកា ឆ្នាំ ២០២០ ទំព័រ ៩០ )
កត់ត្រាគំនិតរបស់អ្នក
សូមជ្រើសរើសយោបល់មួយខាងក្រោម ដើម្បីជួយអ្នកសញ្ជឹងគិត និងវាយតម្លៃពីរបៀបដែលទីបន្ទាល់របស់អ្នកអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់បានរីកចម្រើនក្នុងអំឡុងពេលវគ្គសិក្សានេះ ។ សូមមកកាន់ថ្នាក់រៀនដោយបានរៀបចំខ្លួន ដើម្បីចែកចាយគំនិតរបស់អ្នក ។
-
សូមអាន « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ( នៅលើគេហទំព័រ ChurchofJesusChrist.org ) និងគិតពិចារណាអំពីរបៀបដែលទីបន្ទាល់របស់អ្នកអំពីព្រះអង្គសង្រ្គោះបានរីកចម្រើន ។ សូមសរសេរទីបន្ទាល់របស់អ្នកអំពីព្រះយេស៊ូវគ្រីស្ទ ឬគំនិត ឬចំណាប់អារម្មណ៍របស់អ្នកអំពីទ្រង់ ។
-
ប្រសិនបើអ្នកបានទន្ទេញ « ព្រះគ្រីស្ទដ៏មានព្រះជន្មរស់ » សូមកត់ត្រាពីរបៀបដែលកិច្ចខិតខំនេះបានជះឥទ្ធិពលលើការយល់ដឹង និងទីបន្ទាល់របស់អ្នកអំពីព្រះអង្គសង្រ្គោះ ។
-
សូមអាន នីហ្វៃទី ៣ ២៧:១៣–២១ និងសញ្ជឹងគិតពីអត្ថន័យនៃដំណឹងល្អរបស់ព្រះអម្ចាស់មានអត្ថន័យចំពោះអ្នក ។ សូមកត់ត្រារបៀបដែលការព្យាយាមរស់នៅតាមដំណឹងល្អរបស់ទ្រង់បានផ្លាស់ប្តូរជីវិតរបស់អ្នក ។
-
សូមពិនិត្យមើលតារាងមាតិកាសម្រាប់សៀវភៅសិក្សានេះ ហើយស្វែងរកមេរៀនដែលមានឥទ្ធិពលខ្លាំងបំផុតលើអ្នក ។ សូមពិនិត្យមើលឯកសាររៀបចំសម្រាប់មេរៀននោះ ហើយកត់ត្រាពីមូលហេតុដែលវាធ្វើឲ្យជីវិតមានការផ្លាស់ប្តូរបែបនេះនៅក្នុងជីវិតរបស់អ្នក ។
-
សូមគិតអំពីរបៀបដែលអ្នកបានប្រែក្លាយកាន់តែដូចជាព្រះអង្គសង្រ្គោះ កាលដែលអ្នកបានអនុវត្តតាមអ្វីដែលអ្នកបានទទួលអារម្មណ៍ និងបានរៀននៅអំឡុងវគ្គសិក្សានេះ ។ សូមកត់ត្រាការផ្លាស់ប្តូរទាំងឡាយដែលអ្នកបានឃើញក្នុងជីវិតរបស់អ្នក ។
-
សូមជ្រើសរើសវគ្គបទគម្ពីរមួយ ឬច្រើនអំពីព្រះយេស៊ូវគ្រីស្ទ ដែលបានបង្កើនការយល់ដឹងរបស់អ្នក និងទីបន្ទាល់អំពីទ្រង់ ។ សូមកត់ត្រាអ្វីដែលអ្នកបានរៀនចេញពីបទគម្ពីរទាំងនេះ និងភាពខុសគ្នាអ្វីខ្លះដែលវាបានធ្វើនៅក្នុងជីវិតរបស់អ្នក ។
-
ជ្រើសរើសទំនុកតម្កើង ឬបទចម្រៀងអំពីព្រះអង្គសង្គ្រោះ ដែលបង្ហាញពីទីបន្ទាល់របស់អ្នកអំពីទ្រង់ ។ សូមកត់ត្រាគំនិត និងអារម្មណ៍ដែលទំនុកតម្កើង និងបទចម្រៀងនេះនាំមកដល់គំនិត និងដួងចិត្តរបស់អ្នក ។
-
សូមសរសេរលិខិតថ្លែងអំណរគុណដល់ព្រះអង្គសង្រ្គោះ ។ សូមកត់ត្រាពីរបៀបដែលអ្នកមានអារម្មណ៍អំពីព្រះជន្មរបស់ទ្រង់ និងទ្រង់មានន័យយ៉ាងណាចំពោះអ្នក ។ ប្រសិនបើអ្នកជាអ្នកសិល្បៈ អ្នកអាចគូររូបភាពដែលទាក់ទាញចំណាប់អារម្មណ៍របស់អ្នកចំពោះព្រះអង្គសង្គ្រោះ ហើយចែកចាយវាជាមួយថ្នាក់របស់អ្នក ។