« មេរៀនទី ៥ ឯកសារគ្រូបង្រៀន ៖ ការក្លាយជារាស្ត្រនៃសេចក្ដីសញ្ញារបស់ព្រះអម្ចាស់ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បរបស់ទ្រង់ ( ឆ្នាំ ២០២៣ )
« មេរៀនទី ៥ ឯកសារគ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បរបស់ទ្រង់
មេរៀនទី ៥ ឯកសារគ្រូបង្រៀន
ការក្លាយជារាស្រ្តនៃសេចក្ដីសញ្ញារបស់ព្រះអម្ចាស់
ប្រធាន រ័សុល អិម ណិលសុន បានបង្រៀនថា ការធ្វើ និងការរក្សាសេចក្ដីសញ្ញាទាំងឡាយជាមួយព្រះយេស៊ូវគ្រីស្ទ « នឹងបើកទ្វារទៅកាន់ពរជ័យ និងឯកសិទ្ធិខាងវិញ្ញាណទាំងអស់ដែលមាន » ចំពោះមនុស្សគ្រប់រូប ( « As We Go Forward Together » Ensign ខែ មេសា ឆ្នាំ ២០១៨ ទំព័រ ៧ ) ។ នៅក្នុងមេរៀននេះ សិស្សនឹងមានឱកាសចែកចាយរបៀបដែលការធ្វើ និងការរក្សាសេចក្ដីសញ្ញានៃដំណឹងល្អជាមួយព្រះយេហូវ៉ាអាចប្រទានពរដល់ជីវិតរបស់ពួកគេ និងអ្វីដែលពួកគេអាចធ្វើដើម្បីពង្រឹងការតាំងចិត្តរបស់ពួកគេក្នុងការដើរដោយសេចក្ដីជំនឿនៅលើផ្លូវនៃសេចក្ដីសញ្ញា ។
យោបល់សម្រាប់ការបង្រៀន
ព្រះយេស៊ូវគ្រីស្ទបើកសម្តែងថាទ្រង់គឺជាព្រះយេហូវ៉ា ជាព្រះនៃព្រះគម្ពីរសញ្ញាចាស់ ។
ការអភិវឌ្ឍការបង្រៀន និងការរៀនសូត្ររបស់យើង
សូមចងចាំសារៈសំខាន់នៃបរិបទ ។ អត្ថន័យនៃវគ្គបទគម្ពីរមួយ ត្រូវបានជះឥទ្ធិពលដោយបរិបទ ។ ការជួយសិស្សឲ្យយល់ពីបរិបទនៃបទគម្ពីរ អាចជួយពួកគេយល់បន្ថែមទៀតនូវខ្លឹមសារ រួមមានគោលបំណងរបស់អ្នកនិពន្ធដ៏ប្រកបដោយការបំផុសគំនិត ។
សូមបង្ហាញសេចក្ដីថ្លែងការណ៍ដូចខាងក្រោម ៖ « ប្រាកដមែនខ្ញុំប្រាប់អ្នករាល់គ្នាជាប្រាកដថា មុនដែលលោកអ័ប្រាហាំកើតមកនោះមានខ្ញុំហើយ » ( យ៉ូហាន ៨:៥៨ ) ។ សូមរំឭកសិស្សថា ព្រះយេស៊ូវបានមានបន្ទូលពីសេចក្ដីថ្លែងការណ៍ខាងលើនេះ បន្ទាប់ពីពួកអាចារ្យ និងពួកផារិស៊ី បដិសេធការប្រកាសរបស់ទ្រង់ដែលថា ទ្រង់គឺជាពន្លឺនៃលោកីយ៍ ហើយថាទ្រង់កំពុងធ្វើកិច្ចការរបស់ព្រះវរបិតាទ្រង់ ។ ពួកគេបានទាមទារដើម្បីដឹងថាទ្រង់ជានរណាឲ្យប្រាកដ ( សូមមើល យ៉ូហាន ៨:២៥ ) ។ បន្ទាប់ពីការផ្ដល់ឲ្យនូវបរិបទនេះ វាអាចមានប្រយោជន៍ដើម្បីបង្ហាញវីដេអូ « Jesus Declares: I Am the Light of the World; the Truth Shall Make You Free » ( ចាប់ពីលេខកូដម៉ោង ៣:៣៨ ដល់ ៤:២៦ ) និងពិភាក្សាសំណួរដូចខាងក្រោមនេះ ៖
-
ហេតុអ្វីបានជាសេចក្ដីថ្លែងពីព្រះអង្គសង្រ្គោះ បណ្តាលឲ្យពួកអាចារ្យ និងពួកផារិស៊ីព្យាយាមចោលថ្មដាក់ទ្រង់ ? ( វាអាចជាការសំខាន់ដើម្បីរំឭកបរិបទនៅក្នុង និក្ខមនំ ៣ ហើយបន្ទាប់មកអាន ខទី ១៣–១៤ នៃជំពូកនោះ និង សេចក្ដីថ្លែងការណ៍មកពីអែលឌើរ ប្រ៊ូស អ័រ ម៉ាក់ខន់ឃី នៅក្នុងផ្នែកទី ១ នៃឯកសាររៀបចំ ។ សូមជួយសិស្សឲ្យរកឃើញសេចក្ដីពិតស្រដៀងគ្នាដូចតទៅនេះ ៖ ព្រះយេស៊ូវគ្រីស្ទគឺជាព្រះយេហូវ៉ា ជាព្រះនៃព្រះគម្ពីរសញ្ញាចាស់ និងជាព្រះដ៏ជាព្រះ ) ។
-
តើព្រះនាម ព្រះយេហូវ៉ា និង ព្រះដ៏ជាព្រះ បង្រៀនយើងយ៉ាងដូចម្ដេចអំពីនិស្ស័យនៃព្រះយេស៊ូវគ្រីស្ទ ? ( នៅពេលសិស្សចែកចាយអ្វីដែលពួកគេបានរៀនពី ផ្នែកទី ១ នៃឯកសាររៀបចំអ្នកអាចសរសេរពាក្យដូចតទៅនេះនៅលើក្ដារខៀន ឥតចេះប្រែប្រួល; អស់កល្បនិង មានព្រះជន្មរស់ ) ។ តើការដឹងថាព្រះយេស៊ូវគ្រីស្ទគឺឥតចេះប្រែប្រួល អស់កល្ប និងមានព្រះជន្មរស់ ជួយអ្នកទុកចិត្តលើទ្រង់យ៉ាងដូចម្ដេច ?
អ្នកអាចអញ្ជើញសិស្សពីរបីនាក់ឲ្យចែកចាយមូលហេតុដែលធ្វើឲ្យពួកគេទុកចិត្តលើទ្រង់ ។
ព្រះយេហូវ៉ាអញ្ជើញយើងឲ្យធ្វើ និងរក្សាសេចក្តីសញ្ញាដ៏ពិសិដ្ឋទាំងឡាយ ។
សូមពិចារណាសួរសំណួរ ៖
-
ហេតុអ្វីបានជាយើងអាចមានទំនុកចិត្តលើសេចក្ដីសញ្ញាដែលយើងធ្វើជាមួយនឹងព្រះអម្ចាស់ ? ( នៅក្នុងការពិភាក្សារបស់អ្នក សូមប្រាកដថាសិស្សយល់ និយមន័យនៃ សេចក្ដីសញ្ញា ដែលមាននៅក្នុងផ្នែកទី ២ នៃឯកសាររៀបចំ ) ។
ដើម្បីជួយសិស្សគិតកាន់តែស៊ីជម្រៅអំពីសារៈសំខាន់ដ៏អស់កល្បនៃការធ្វើ និងការរក្សាសេចក្ដីសញ្ញាជាមួយនឹងព្រះអម្ចាស់ សូមពិចារណាពិភាក្សាសាច់រឿងខាងក្រោមនេះ ។
ជីម ដែលជាមិត្តរបស់អ្នកបានទទួលការអញ្ជើញឲ្យទទួលបុណ្យជ្រមុជទឹក ។ ក៏ប៉ុន្តែ គាត់ប្រែជារារែកចិត្ត បន្ទាប់ពីបានទៅចូលរួមពិធីបើកសម្ភោធព្រះវិហារបរិសុទ្ធមួយ ។ គាត់ជឿជាក់លើអ្នក « នៅឯពិធីបើកសម្ភោធព្រះវិហារបរិសុទ្ធ ដ៏ពិតជាអស្ចារ្យនោះ ខ្ញុំបានដឹងថា នៅពេលអ្នកទៅព្រះវិហារបរិសុទ្ធ អ្នកត្រូវធ្វើសេចក្ដីសញ្ញាច្រើនជាងសេចក្ដីសញ្ញាដែលអ្នកធ្វើនៅពេលទទួលពិធីបុណ្យជ្រមុជទឹកទៅទៀត ។ ការប្ដេជាចិត្តទាំងអស់នោះដូចជាពិបាកពេកហើយសម្រាប់ខ្ញុំ » ។
សូមអញ្ជើញសិស្សពាក់កណ្ដាលថ្នាក់ឲ្យស្រាវជ្រាវ សេចក្ដីថ្លែងការណ៍របស់អែលឌើរ ឌី ថត គ្រីស្ដូហ្វឺសិន នៅក្នុងផ្នែកទី ២ ហើយរកមើលពរជ័យនៃការដើរលើផ្លូវនៃសេចក្ដីសញ្ញា ។ សូមឲ្យសិស្សពាក់កណ្ដាលថ្នាក់ទៀតស្រាវជ្រាវ អ័ប្រាហាំ ២:៨–១១ ហើយរកមើលពរជ័យដែលបានសន្យានៃការរក្សាសេចក្ដីសញ្ញអ័ប្រាហាំ ។
បន្ទាប់ពីទុកពេលឲ្យសិស្សស្រាវជ្រាវ អ្នកអាចចាត់សិស្សជាគូជាមួយនរណាដែលបានសិក្សាអត្ថបទផ្សេង ហើយសូមឲ្យពួកគេចែកចាយរបៀបដែលសេចក្ដីពិតដែលពួកគេបានរកឃើញ អាចជួយជីមកែប្រែទស្សនរបស់គាត់ចំពោះសេចក្ដីសញ្ញា ។
ដើម្បីជួយសិស្សស្គាល់សេចក្ដីពិត និងសារៈសំខាន់នៃសេចក្ដីសញ្ញានៃដំណឹងល្អ អ្នកអាចពិភាក្សាសំណួរមួយ ឬ ច្រើននៃសំណួរដូចខាងក្រោម ៖
-
ហេតុអ្វីអ្នកគិតថា ព្រះយេស៊ូវគ្រីស្ទតម្រូវឲ្យយើងធ្វើសេចក្ដីសញ្ញាដើម្បីទទួលពរជ័យដ៏ធំបំផុតរបស់ទ្រង់ ? តើជីវិតរបស់អ្នកទទួលបានពរជ័យដោយការធ្វើ និងរក្សាសេចក្ដីសញ្ញាដោយរបៀបណា ?
-
តើអ្វីទៅជាទំនាក់ទំនងរវាងសេចក្ដីសញ្ញាអ័ប្រាហាំ និងព្រះវិហារបរិសុទ្ធ ? ( អ្នកអាចអាន សេចក្ដីថ្លែងការណ៍របស់ប្រធាន ណិលសុន នៅក្នុងផ្នែកទី ២ ហើយជួយសិស្សយល់ថា មានតែតាមរយៈព្រះវិហារបរិសុទ្ធប៉ុណ្ណោះដែលយើងអាចទទួលបានអំណោយទាននៃជីវិតអស់កល្បជានិច្ច ដែលជាពរជ័យចុងក្រោយនៃសេចក្តីសញ្ញាអ័ប្រាហាំ ។ ប្រសិនបើវាជួយដល់សិស្សរបស់អ្នក អ្នកអាចកំណត់នូវសេចក្ដីសញ្ញាដែលយើងធ្វើក្នុងអំឡុងពេលទទួលអំណោយទានពិសិដ្ឋនៃព្រះវិហារបរិសុទ្ធ ដែលមានក្នុងបញ្ជី « About the Temple Endowment » [ temples.ChurchofJesusChrist.org ] ។ បន្ទាប់មក អ្នកអាចអញ្ជើញសិស្សឲ្យចែកចាយរបៀបដែលពួកគេបានទទួល ឬអាចត្រូវបានប្រទានពរជ័យតាមរយៈការធ្វើ និងការរក្សាសេចក្ដីសញ្ញាក្នុងព្រះវិហារបរិសុទ្ធ ។ ឬអ្នកអាចស្ដាប់ទីបន្ទាល់អំពីសេចក្ដីសញ្ញាអ័ប្រាហាំរបស់ប្រធាន ណិលសុននៅក្នុង « Special Witness—President Nelson » [ ៣:២៨ ] ហើយអញ្ជើញសិស្សឲ្យចែកចាយអារម្មណ៍ដែលពួកគេបានទទួល នៅពេលពួកគេរៀនបន្ថែមទៀតអំពីសេចក្ដីសញ្ញាអ័ប្រាហាំ ) ។
2:3
បន្ទាប់មក អ្នកអាចឲ្យពេលដល់សិស្សដើម្បីកត់ត្រានូវពរជ័យមួយដែលពួកគេចង់បាន និងអ្វីដែលពួកគេអាចធ្វើដើម្បីទទួលបានពរជ័យនោះ ។ ( បន្ទាប់ពីសិស្សកត់ត្រាគំនិតរបស់ពួកគេហើយ អ្នកអាចផ្ដល់ឲ្យនូវទស្សនវិស័យមកពីអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ដូចតទៅនេះ ៖ « ពេលខ្លះ ពរជ័យមកភ្លាមៗ ពេលខ្លះ ពរជ័យមកពេលក្រោយ ហើយពេលខ្លះ ពរជ័យមិនមកទាល់តែសោះ រហូតដល់ទៅស្ថានសួគ៌ ប៉ុន្តែ ពរជ័យនឹងមានដល់អ្នកទាំងឡាយណាដែលឱបក្រសោបដំណឹងល្អនៃព្រះយេស៊ូវគ្រីស្ទ » [ « An High Priest of Good Things to Come » Ensign ខែ ធ្នូ ឆ្នាំ ១៩៩៩ ទំព័រ ៣៨ ] ) ។
សម្រាប់ពេលក្រោយ
មុនថ្នាក់បន្ទាប់ សូមពិចារណាផ្ញើឲ្យសិស្សនូវសារលិខិតដូចតទៅនេះ ៖ ចង់ដឹងថាកូនចៀម ស៊ុមទ្វារ នំប៉័ង ឱសថ និងដំបងអាចបង្រៀនអ្នកអ្វីខ្លះអំពីព្រះយេស៊ូវគ្រីស្ទ ? សូមសិក្សា ឯកសាររៀបចំសម្រាប់មេរៀនទី ៦ ដើម្បីស្វែងយល់ ។