Lēsoni 15
“Ko Au ko e Maama ʻo Māmani”
-
Ko e hā e fakahinohino ʻa Sīsū ki he kakaí ke nau fai ke maʻu ai ha fakamoʻoni ki heʻene ngaahi akonakí? (Vakai, Sione 7:17) Te tau lava fēfē ʻo fakaʻaongaʻi ʻa e ngaahi fakahinohino ko ʻení ʻi heʻetau moʻuí?
-
ʻOku ʻuhinga ki he hā ʻa e hoko ʻa Sīsū ko e maama ʻo māmaní? Vakai ki he Ngaahi Folofola Fekauʻaki Mo Iá ʻi he vahe ko ʻení. Te tau lava fēfē ʻo tokoniʻi e niʻihi kehé ke nau mamata ki he maama kuo foaki mai ʻe Kalaisí? (Vakai, Mātiu 5:16; 28:18–20; Filipai 2:14–15).
-
Ko e hā e talaʻofa ʻa Sīsū ki he kakaí ni ʻo kapau te nau hokohoko atu ʻi he muimui kiate iá? (Vakai, Sione 8:31–32.) Ko e hā ha meʻa ʻoku fakatauʻatāinaʻi kitautolu mei ai ʻe he moʻoní? (Vakai, Sione 8:33–34.) ʻOku hanga fēfē ʻe heʻetau fai angahalá ʻo haʻi kitautolu ke tau pōpula? (Vakai, ʻAlamā 12:11; 34:35). Kuo fakatauʻatāinaʻi fēfē koe ʻe hoʻo ʻiloʻi ʻa e moʻoní?
Fokotuʻu ki hono Aleaʻi ʻe he Fāmilí
Hanga ʻo tāmateʻi e maama ʻi he lokí pea fusi e puipuí ke mapuni. Kole ki ha mēmipa ʻo e fāmilí ke ne hanga ʻo fai ha kiʻi ngāue faingofua pē ʻaki hono fofongá, hangē ko hano lau ha veesi folofola pe ko haʻane fakamatalaʻi ha fakatātā. Hili iá pea fakamoʻui e māmá, fakaava e puipuí, pea kole ki he mēmipa ko ʻeni ʻo e fāmilí ke ne fai e meʻa tatau pē. Mou aleaʻi ʻa e ʻuhinga ʻoku faingofua ai ke fai ʻa e ngāue ko iá ʻi he taimi ʻoku ulo ai ʻa e māmá. Lau ʻa e Sione 8:12, peá ke kole ki he fāmilí ke mou aleaʻi ha ngaahi founga ʻoku hoko ai ʻa Sīsū ko e maama ʻo māmani.