Lēsoni 20
“Kae Malaʻia ʻa Kimoutolu, … ko e Mālualoi”
-
Ko e hā ha meʻa ʻoku fakafiefa kiate koe fekauʻaki mo e fononga fakalāngilangi fai ʻe he ʻEikí ki Selūsalemá? (Vakai, Mātiu 21:1–11). Ko e hā haʻo fakakaukau pe faʻahinga ongo naʻá ke mei maʻu kapau naʻá ke ʻi ai he ʻaho ko iá?
-
ʻOkú ke fakakaukau nai pe ko e hā hono ʻuhinga ʻoku fuʻu mahuʻinga ai ʻa e ngaahi fekau ʻi he Mātiu 22:37–40? Ko e hā te ke fai ke ke toe moʻuiʻaki ai ʻa e ngaahi fekau ko ʻení?
-
Naʻe toutou folofola ʻaki ʻe he Fakamoʻuí ʻo pehē, malaʻia ʻa kimoutolu ko e kau tangata tohi mo e Fālesi, koeʻuhí ko ʻenau mālualoí. Ne fuʻu tōtuʻa hono tuku ʻenau tokangá ki he ngaahi meʻa ʻoku hā ki tuʻá mo e ngaahi ngāue ʻokú ne ngaohi kinautolu ke nau hā ngali māʻoniʻoni aí, ka naʻe ʻikai ke nau tokanga ki he ngaahi meʻa ʻe māʻoniʻoni ai honau ngaahi lotó (Mātiu 23:13–33). Ko e hā te ke fai ke ke fakaʻehiʻehi ai mei he mālualoí?
Fokotuʻu ki hono Aleaʻi ʻe he Fāmilí
Tā ʻi ha laʻi pepa ha fuʻu ʻakau mo hano lau kae ʻikai hano fua. ʻI he tafaʻaki ʻe tahá, to e tā ha fuʻu ʻakau mo hono laú fakataha pea mo hano fua. Fakaʻaliʻali ki he fāmilí ʻa e fuʻu ʻakau ko ia mo hono laú kae ʻikai fuá, peá ke kole ki ha mēmipa ʻo e fāmilí ke ne lau e Mātiu 21:17–20. Fakamatala ange ko e taimi ko ia ʻoku tau fakangalingali ai ʻoku tau angatonu ka ʻoku ʻikai ke tau anga-tonú, ʻoku tau tatau tofu pē mo e fuʻu ʻakau ʻoku lahi hono laú kae ʻikai pē ha foʻi fua ʻe taha. Fakaʻaliʻali ange ki he fāmilí ʻa e tafaʻaki ʻo e laʻi pepá ʻoku tā ai ʻa e fakatātā ʻo e fuʻu ʻakau mo hono fuá, pea fakalotolahiʻi kinautolu ke nau moʻui anga-tonu pea to e fai lelei ange ke nau hā anga-tonu maʻu pē.