Lēsoni 27
“ʻOku ʻIkai ʻi Heni Ia he Kuó Ne Toe Tuʻu”
-
Ko e hā ʻoku mahuʻinga ai ke tau ʻiloʻi ne toetuʻu ʻa Sīsū mei he maté? Ko e hā ha mālohi ʻoku ʻoange ʻe he ongoongo ko ʻení ki he faʻahinga ʻo e tangatá? Ko e hā ha mālohi ʻokú ne ʻoatu kiate koe?
-
Naʻe hā ʻa e ʻEiki kuo toetuʻú ki ha toko fitu ʻo ʻene Kau ʻAposetoló, he lolotonga ʻenau tuoutaí peá ne foaki ha ika lahi maʻanautolu ʻi ha mana (Sione 21:4–7). Hili ko ia ʻenau maʻu meʻatokoní, ko e hā ne kole ange ʻe he ʻEikí kia Pita mo e kau ʻAposetoló ke nau faí? (Vakai, Sione 21:15–17.) Te tau fafanga fēfē e sipi ʻa e ʻEikí?
-
Ko e hā e ʻuhinga ʻa Sione ki heʻene hiki e ngaahi folofola mo e ngāue ne fai ʻe Sīsū kuo toetuʻú? (Vakai, Sione 20:30–31). Ko e hā ha ngaahi meʻa lelei kuó ke maʻu ʻi hoʻo ako ʻa e ngaahi talanoa fakafolofola ʻo e Toetuʻu ʻa Sīsuú?
Fokotuʻu ki hono Aleaʻi ʻe he Fāmilí
Kole ki ha mēmipa ʻo e fāmilí ke ne tui ha kofu nima pea ueʻi takai holo hono louhiʻi nimá. Fakamatalaʻi ange ʻoku hanga ʻe he kofu nimá ʻo fakafofongaʻi hotau sinó pea fakafofongaʻi leva ʻe hotau nimá ʻa hotau laumālié. ʻOku hoko hono fakatahaʻi ʻo e laumālié mo e sinó ʻo maʻu ai ʻa e tangata moʻuí. Fekau ki ha mēmipa ke ne vete ʻa e kofu nimá. Fakamatalaʻi ange, ko e taimi ko ia ʻoku tau mate aí, ʻe mavahe leva hotau laumālié mei hotau sinó. ʻE mate leva hotau sinó, ka ʻe kei moʻui pē hotau laumālié. Kole ki ha mēmipa ʻo e fāmilí ke ne toe tui e kofu nimá. Fakamatalaʻi ange ko e toetuʻú ko e toe fakatahaʻi ia ʻa e laumālié pea mo e sinó. ʻI he taimi ko ia te tau toetuʻu aí, he ʻikai ke tau toe mate pe tōfanga hotau sinó ʻi ha faʻahinga mahaki. Fakamoʻoniʻi ange, ne tuʻunga he toetuʻu ʻa Sīsū Kalaisí, ʻe lava ai ke toetuʻu ʻa e tokotaha kotoa pē. (Ko e lēsoni fakatātā ko ʻení naʻe toʻo ia mei he lea ʻa ʻEletā Poiti K. Peeka [ʻi he Conference Report, ʻEpeleli 1973, 79–80; pe Tūhulu, Siulai 1973, 51, 53].)
ʻAi ke hoko ko ha konga ʻo e fealēleaʻaki ʻa e fāmilí; haʻamou hivaʻi fakataha ʻa e “Kuo Toetuʻú” Ngaahi Himi, 108) pe ko e “Ne Toe Tuʻu Nai ʻa Sīsū?” (Tohi Hiva ʻa e Fānaú, 64).