Lēsoni 9
“Ka Mou Fuofua Kumi ʻa e Puleʻanga ʻo e ʻOtuá”
-
Ko e hā ʻa e pale moʻonautolu ʻoku nau fai lelei ke mamata ki ai ʻa e kakai kehé? (Vakai Mātiu 6:2, 5, 16. Ko e hā ha ngaahi meʻa ʻoku tau fai ke mamata ki ai ʻa e kakai kehé ka ʻoku ʻikai fakahōifua ki he ʻOtuá? Te tau fakamaʻa fēfē ʻetau ngaahi fakakaukaú ke tau lava ai ʻo tauhi mo fakahoko ha ngaahi ngāue lelei kehe?
-
ʻOku faʻa ui ʻa e akonaki ʻi he Mātiu 7:12 ko e Lao Koula. Ko e hā ha ngaahi meʻa ne hoko kiate koe kuó ne fakahā atu hono mahuʻinga ʻo e tefitoʻi moʻoni ko ʻení? ʻOku hanga fēfē ʻe he muimui ʻi he Lao Koulá ʻo ngaohi kitautolu ke tau hoko ko ha kau ākonga lelei ange ʻa Sīsū Kalaisi?
-
Naʻe talaʻofa mai ʻa Sīsū kapau te tau “fuofua kumi ʻa e puleʻanga ʻo e ʻOtuá,” ʻe fakalahi mai kiate kitautolu mo ha ngaahi meʻa kehe te tau fie maʻu (Mātiu 6:33). Ko e hā ha meʻa kuó ke aʻusia kuó ne ʻoatu ha fakamoʻoni kiate koe fekauʻaki mo e talaʻofá ni?
Fokotuʻu ki hono Aleaʻi ʻe he Fāmilí
-
Fakaʻaliʻali ha foʻi maka mo ha kiʻi falukunga ʻoneʻone. Fehuʻi ki he fāmilí pe koe fē te nau fakaʻaongaʻi ke fakavaʻe ʻaki ha fale. Lau ʻa e Mātiu 7:24–27, pea mou aleaʻi ʻa e founga ʻoku tatau ai hono langa ʻetau moʻuí ʻi he ngaahi akonaki ʻa e Fakamoʻuí pea mo hono langa ha fale ʻi ha fakavaʻe maka mālohí.
-
Fakaʻaliʻali ha mape. Fehuʻi ange ki he fāmilí pe ʻe tokoniʻi fēfē kinautolu ʻe he mapé ʻi hano palani haʻanau fononga ki ha feituʻu. Kapau ʻoku teu haʻamou fononga ki ha feituʻu ha taimi vavé ni mai, pea kapau naʻa mou toki foki mai mei haʻamou fononga ki ha feituʻu, mou aleaʻi ha founga naʻe fakaʻaongaʻi pe ʻe fakaʻaongaʻi ai ʻa e mapé. Fakamatalaʻi ange, ko ʻetau fononga ko ia ki he moʻui taʻengatá, ʻoku hoko ai e folofolá mo e ngaahi akonaki ʻa e kau palōfita moʻuí ko ha mape, ʻo nau tokoniʻi kitautolu ke tau ʻilo ʻa e founga ke tau toe foki ai ki heʻetau Tamai Hēvaní.