“Naʻe Mole Ia pea Kuo ʻIlo”

Ko e hā te tau lava ʻo ako mei he tōʻonga ʻa e tauhisipí ʻi he talanoa fakatātā ko ia ʻo e sipi molé, pea mo e fefine ko ia ʻi he talanoa fakatātā ʻo e konga silivá? (Vakai, T&F 18:10–13). Ko e hā ha ngaahi founga ʻe lava ke mole ai ha taha? Ko e hā leva hotau fatongia kiate kinautolu ʻoku molé? (Vakai, Luke 15:4–5, 8; ʻAlamā 31:34–35).
ʻI he talanoa fakatātā ko ia ʻo e foha maumau koloá, ko e hā ne fai ʻe he tamaí ʻi he taimi naʻá ne vakai atu ai kuo toe foki mai hono fohá? (Vakai, Luke 15:20). Naʻe tali fēfē ʻe he tamai ko ʻení ʻa e vete hia ʻa hono fohá? (Vakai, Luke 15:21–24). ʻOku tatau fēfē hono tali ʻe he tamai ko ʻení ʻa hono fohá pea mo hono tali lelei kitautolu ʻe he ʻEikí ʻi he taimi ʻoku tau fakatomala aí? (Vakai, Luke 15:7, Mōsaia 26:30; T&F 58:42).

Fokotuʻu ki hono Aleaʻi ʻe he Fāmilí

Mou toe fakamanatu ʻa e talanoa ʻo hono fakamaʻa ʻe Sīsū ʻa e kau kilia ʻe toko hongofulú (Luke 17:11–19). Aleaʻi ha ngaahi founga ʻoku tau hangē ai ko e kau kilia ʻe toko hivá, ʻo ʻikai ke faʻa fakahā ki he ʻEikí ʻetau houngaʻiá. Mou talanoa ki ha ngaahi meʻa te tau lava ʻo fai ke toe fakahaaʻi lelei ai ki he ʻEikí ʻi he ʻaho takitaha ʻa ʻetau houngaʻiá.

ʻAi ke hoko ko ha konga ʻo e fealēleaʻaki ʻa e fāmilí, haʻamou hivaʻi fakataha ʻa e “ʻOku Fakaofo” (Ngaahi Himi, 102).