Lēsoni 16
“Naʻá ku Kui, Ka Ko ʻEni ʻOku ou ʻĀ”
-
Naʻe fakamoʻui ʻe Sīsū ha tangata ne fanauʻi ʻoku kui. (Sione 9:1–7). Naʻe tupulaki fēfē e fakamoʻoni ʻa e tangatá ni ʻi heʻene toutou fakamatalaʻi iá? (Vakai, Sione 9:11, 17, 33, 38). Kuo tupulaki fēfē hoʻo fakamoʻoní ʻi hoʻo vahevahe ia?
-
Ko e hā e tali ʻa e ongomātuʻa ʻa e tangata ne kuí ʻi he taimi ne fakafehuʻi ai kinaua ʻe he kau Fālesí fekauʻaki mo e maná? (Vakai, Sione 9:18–23). Ko e hā hono ʻuhinga ne tali pehē ai ʻa e ongomātuʻá? (Sione 9:22.) ʻOku tau faʻa hoko fēfē he taimi ʻe niʻihi ʻo hangē ko e ongomātuʻa ʻa e tangatá ni? Te tau hoko fēfē ʻo toe loto-toʻa ange ke fai ʻetau ngaahi fakamoʻoní?
-
ʻI he talanoa ko ia ʻa Sīsū fekauʻaki mo e tauhisipí pea mo ʻene sipí, ko hai ʻoku fakafofongaʻi ʻe he sipí? (Vakai, Sione 10:4, 27). Ko hai e tauhi-sipí? (Vakai, Sione 10:11). Ko e hā ha ngaahi ʻulungaanga lelei ʻo e tauhi-sipi leleí? (Vakai, Sione 10:3–4, 7, 9–15). ʻOku hoko fēfē ʻa Sīsū ko e sīpinga haohaoa ʻo e tauhisipí?
Fokotuʻu ki hono Aleaʻi ʻe he Fāmilí
Lau ʻa e Sione 9:1–38. Kole ki he mēmipa takitaha ʻo e fāmilí ke nau kumi ki ha ngaahi founga ne tokoniʻi ai ʻe he Fakamoʻuí ʻa e tangata kuí ke ne fakatou lava ʻo mamata fakatuʻasino mo fakalaumālie. Fakamatalaʻi ʻa e ngaahi founga ʻoku faikehekehe mo faitatau ai ʻa e mamata fakalaumālié mo e fakatuʻasinó. Kole ange ki he mēmipá takitaha ke nau fakamatalaʻi ha founga te nau lava ʻo fakatupulaki ai honau mālohi ke nau “mamata” ki he ngaahi moʻoni ʻo e ongoongoleleí.